[2016 日本．京都馬拉松] 海外初全馬．京都馬拉松 2016 直擊報導

~Day 1~
19/2/2016 (Friday) 香港 --- 晴, 大阪 --- 寒冷

香港 --> 關西國際機場 --> ホテル日航関西空港

6:30 pm

放工後搭機場快線到機場, 由於廉航冇野食, 先食少少野, 再等上機...

2016 Feb 日本．京都馬拉松 4 天之旅 － 行程規劃

*** 海外兼日本初全馬. 京都マラソン 2016 ***

~日本．京都馬拉松 4 天之旅~

日期: 19/2/2016 - 22/2/2016

一月先岩岩跑完香港同台北既渣馬, 事隔一個月又跑？其實上年九月時一心諗住抽 2016 既東京馬拉松, 咁報名時只係順手報埋個京都馬拉松, 點知東京就抽唔中, 京都就成功中左。本身考慮到一月已有兩個渣馬要跑, 唔想太辛苦, 加上冇朋友一齊去, 最重要其實係京都已去過, 吸引力自然又低左 (好明顯我係為左去旅行多過去跑啦 :p), 所以一路都仲係十五十六... 直至去到比賽前既兩星期, 同個朋友傾開原來佢都會去, 咁我又實在好鍾意日本, 雖然京都呢啲賽事好易抽, 但唔去就要等下年, 好啦, 一於去跑我第一個既日本馬拉松。

呢個唔止係快閃, 仲係半即興馬拉松之旅, 2 月頭先決定去, 即刻上網買機票訂酒店。由於離出發日子太近, 只能買到星期五晚出發, 星期一朝早回程既機票。話就話 4 天, 但頭尾兩天只係搭飛機, 所以呢趟真係為左去跑架咋, 熱血到呢，哈哈...

後記﹕之前成日聽人講日本既馬拉松好正, 又話氣氛好好, 好熱鬧咁話... 跑完呢趟京都馬拉松, 我親身驗証呢啲人並唔係亂 up 既, 真係好正 (其實日本有咩唔正？)... 究竟有幾正, 等我簡單講少少啦... 出發前已收到大會發給跑手既參加指南, 設計精美, 非常清楚咁介紹比賽當天既所有安排, 包括換衫位置、寄行理程序、供應食物及水既位置同完走之後拎獎牌及取回行理的位置等等, 未出發已對當日既流程非常了解了, 不過大前提係你會睇呢份指南 :p。同其他國家舉辦既馬拉松一樣, 大會於比賽前安排了一個 Expo 讓跑手拎參賽用品, 不過呢個 Expo 真係非常大型, 入面勁多野睇, 仲有野食賣, 唔怕行到肚餓, 聽人講東京馬拉松既 Expo 仲可以行足一日 tim... 到了比賽當天, 去到會場不用擔心換衫的問題啊, 會場係一個體育館, 入面會有一個超大既 hall 俾你換衫, 做埋熱身食埋早餐都仲得呀... 諗起香港同台北既渣馬, 冇地方俾你換衫之餘, 仲要捱住凍咁等起跑... 仲好記得跑完香港渣馬果刻, 成個人濕哂咁去搭巴士番屋企, 真係慘情 >.< 比賽開始後, 沿途有好多日本人為跑手打氣, 氣氛真係好好, 就算跑到好攰都會令你有動力繼續跑落去...

嘩, 話講少少都講左咁多, 入番正題, 講番呢次全馬既表現先... 今次係繼香港渣馬後既第二隻全馬, 表現不過不失, 以 5:22 既成績完成, 僅僅比香港渣馬快左少少... 不過相比香港既渣馬, 京都馬拉松既難度冇咁高既, 路線比較平坦, 所以嚴格黎講, 今次只算係完成, 表現仍有待改善。馬拉松確係一項挑戰人體極限既運動, 耐力同體力缺一不可, 可以係京都呢度完成我第二隻, 同時係海外兼日本既第一隻全馬, 我真係好開心！