[2016 日本．京都馬拉松] 海外初全馬．京都馬拉松 2016 直擊報導

~Day 1~
19/2/2016 (Friday) 香港 --- 晴, 大阪 --- 寒冷

香港 --> 關西國際機場 --> ホテル日航関西空港

6:30 pm

放工後搭機場快線到機場, 由於廉航冇野食, 先食少少野, 再等上機...

8:10 pm

UO 874 航班準時起飛...

係行程規劃主頁既後記都有提到, 大會係出發前已 email 左參加指南俾各跑手, 我就好乖咁印哂出黎, 上左機之後拎出黎睇啦 (我都好認真架 :p)... 就係我睇緊份指南時, 坐係我隔離既一個男仔問我: 你去跑京都馬拉松嗎？原來佢都一樣, 不過佢仲勁, 跑完京都馬拉松, 就會過東京, 跑埋下星期既東京馬拉松... 後來傾傾下, 原來佢仲抽到年尾 10 月既柏林馬拉松, 聽到都覺得勁呀... 好開心係呢程機上面認識到呢個朋友仔, 仲係一個跑界既高手黎 tim...

(以下轉日本時間)
20/2/2016 (Saturday)
12:15 am
到達大阪已是零晨, 估唔到咁多人搭夜機黎, 入境都排左成一個鐘...

2:00 am
入住位於關西空港既日航酒店... 其實同機好多人都只在機場搵地方訓, 話哂得番幾個鐘就天光, 到時就有火車出市區... 不過我今次黎係為左跑馬拉松喎, 如果休息唔夠好似唔係幾好, 所以我就唔慳住一晚機場酒店啦, 好好咁訓番幾個鐘都差好遠架！

平時唔見佢俾咁大間房, 今次一個人又冇時間享受仲要俾間雙人房我...

~Day 2~
20/2/2016 (Saturday) 大阪 --- 雨、寒冷

關西國際機場 --> 京都市勧業館みやこめっせ (領取跑手包) --> 京都駅 --> Hotel Granvia Kyoto

8:00 am
真係訓左幾個鐘就要起身, 望出窗外就見到關西機場既 JR 火車站。

8:15 am
check out 喇, 呢間日航酒店真係超方便, 行幾步就到火車站...

先去便利店買早餐, 然後走到 JR Ticket Office 買火車飛出京都。預先做定功課, 一心諗住買呢套關西空港限定既 "Hello Kitty 大阪城 ICOCA & HARUKA" 套票, 包 Hello Kitty ICOCA 卡同往來關西機場京都既來回特快列車 "はるか" 火車票各一張。

8:43 am
乘搭特快列車 "はるか" 8 號去京都, 大約 1 小時 15 分鐘就到達 JR 京都站。

係火車上慢慢嘆剛才在便利店買既早餐...

10:00 am
到左京都站, 再轉地鐵去東山站。一出站就見到好清楚既指示, 跟住行好快就搵倒參賽者報到既會場 - 京都市勧業館みやこめっせ。

11:00 am
先係會場既入口會合我既朋友... 呢個會場好大, 報到處設於一樓, 拎齊文件好快就取得選手包, 內有號碼布、計時晶片、行理袋同大會紀念品等等。
(以下圖片來自官方網頁)

拎完野繼續行就會進入贊助商區。贊助商區好大, 分別設於一樓報到處既另一面同三樓, 真係可以預留半日慢慢行。

京都馬拉松始於2012年, 今年已是第5屆。

2:00 pm
行完 Expo 返回京都站, 係時候醫肚。黎到京都伊勢丹 (ISETAN) 十樓呢條京都拉麵小路搵食, 呢條拉麵小路匯集左日本八間人氣拉麵, 真係揀食邊間都諗左好耐。

[京都拉麵小路]
地址﹕京都站ビル 10階
營業時間﹕11:00 - 22:00
網址﹕http://www.kyoto-ramen-koji.com/

由於明天要跑個全馬, 之前要食多啲碳水化合物, 拉麵絕對合格啦, 但係唔知點解, 我好想食飯, 哈哈... 最後係呢條拉麵小路食既竟然係豚肉飯 @@@

2:45 pm
食完野就係京都站既商場逛逛, 由於朋友驚行太耐會影響明天跑馬既表現, 我地買左少少手信就番酒店休息喇。

4:00 pm
酒店 Hotel Granvia Kyoto 就在京都站上蓋, 超方便... 番到酒店我地先執齊明天跑步既用品, 然後就一齊拉拉筋, 吹下水...

例牌出動本人既戰衣, 京都馬拉松果件紀念 tee 都係唔捨得著...

6:00 pm
一切準備就緒, 出去食 dinner... 朋友預先 book 了這間來自沖繩既 shabu-shabu 火鍋店: アダン京都站店。呢間沖繩料理就在京都站附近, 食材都係沖繩直送的。

[アダン京都站店]
地址﹕京都市下京区東塩小路町578-2 あすなろビ 2/F
電話﹕075-353-6765
營業時間﹕17:30 - 24:00
網址﹕http://www.f-a-p.jp/masoho_hanare.html

雖然我未去過沖繩, 但係都知沖繩最出名既本土料理就係豬啦, 所以我叫左沖繩豚しゃぶしゃぶ再加個人氣豚肉料理, 真係好鬼好味, 要快啲 plan 去沖繩先得, 哈哈...

8:50 pm
食完 dinner 就返回京都站, 返酒店前順便買埋明天既早餐。

11:00 pm
返到酒店沖完涼又拉下筋, 吹下水, 然後就休息喇。

~Day 3~
21/2/2016 (Sunday) 大阪 --- 陰天、寒冷

酒店 --> 京都馬拉松2016 (Kyoto Marathon 2016) --> 關西國際機場 --> KIX Airport Lounge

6:00 am
為了跑馬有更好既表現, 朋友一早起身"跑"去吉野家食牛肉飯, 冇錯, 係"跑"... 講起我就真係慚愧, 我寧願訓多一陣都唔去, 哈哈... 更慚愧既係, 我竟然較錯鬧鐘, 原本約好左 6:30 am 一齊係酒店出發, 正當朋友 6:00 am 番到酒店時, 見到我仲係度訓緊覺 @@@ 佢驚到大叫﹕Ivy... 起身喇... 就係呢刻, 我即刻彈起身, 趕快梳洗換衫...

6:50 am
好彩我個人都係比較有計劃, 琴日已經執好哂行理, 好快就搞掂可以出發。由於我跑完就會離開京都, 所以我先到 JR 京都站放低部分行理於站內既 locker, 然後再會合朋友, 一齊搭大會安排既 shuttle bus 到馬拉松起點會場﹕西京極綜合運動公園。講到 shuttle bus, 我又想讚下呢個京都馬拉松, 其實係行程規劃主頁都已經提過, 大會既安排真係好好, 如果你住京都站附近, 可以乘搭大會安排既 shuttle bus 去馬拉松起點, 但要預先在選手報到既 Expo 內買定巴士飛, 每人只需 230 yen, 好過迫地鐵去啦...

係巴士上食埋個早餐, 大約 25 分鐘到左運動場。

7:15 am
等我又簡單咁介紹下呢個賽事先, 由京都市主辦既京都馬拉松始於2012年, 今年已是第5屆, 設有馬拉松、雙人接力賽及輪椅競賽三個項目。馬拉松賽事名額為 15, 900 人, 如報名人數超出此數目就要以抽籤決定參賽者資格, 比賽時限為6小時, 參賽費用為 15,000 yen (海外)。

雖然京都馬拉松名氣不及大阪及東京馬拉松, 但我反而覺得京都馬拉松比大阪馬更優勝 (寫呢個遊記時已完成2016年3月名古屋半馬同10月既大阪馬喇 :p)... 除左大會既體貼安排, 我覺得京都馬既吸引之處係佢既路線... 其他城市安排既路線, 周邊一般都係房屋商店, 但京都本身就係一個古色古香兼洋溢著日本文化既古都, 跟住呢個全馬路線跑一圈, 主要既景點都會出現係你眼前...

以下係官網提供既全馬路線, 以西京極綜合運動公園為起點, 途經天龍寺、仁和寺、龍安寺、金閣寺、上賀茂神社、下鴨神社、銀閣寺這七大世界文化遺產以及梅宮大社、松尾大社、清涼寺、大覺寺、平野神社、敷地神社、大德寺、今宮神社等觀光名勝, 最後以平安神宮為終點。

(以下圖片來自官方網頁)
黎到會場, 好清楚既地圖指示你去更衣室...

換好衫就去寄行理, 然後去番自已既等候區做熱身等起跑...

日本人真係好體貼, 起跑前都有水提供俾參賽者...

由於參賽者眾多, 成萬幾人, 大會會根據參賽者過往跑馬既成績去劃分不同既等候組別... 如果你跑得快啲, 就可以係前啲既區域等起跑, 我今次被編入 H 組, 由 9:00 am 鳴槍起計, 大約過了十分鐘先走到起跑點...

9:00 am
各路跑界高手齊集起點準備起跑喇...

首次係日本跑馬拉松, 氣氛真係好到無得頂, 除左當地既居民, 大會亦安排好多啦啦隊, Q 版人物為跑手打氣...

由 20km 開始, 每 5km 都會有水、能量飲品同食物補給...

已經過左 30km, 體力明顯下降, 心裡面不停咁問自己, 究竟我係度做緊乜呀, 好地地去下旅行咪算囉... 唯有靠著自己既一份堅持加上途人既支持繼續跑下去...

2:30 pm
幾經辛苦, 終於都跑到終點喇... 呢幅相係借用官網的, 我當然唔係 sub 5 既材料啦, hahaha... 繼香港渣馬之後, 同樣以 5:22 呢個成績完成左我第二隻全馬, 比香港渣馬快左 14 秒, 都算係 PB 啦, 哈哈！

跑得咁辛苦, 工作人員為每個努力完走既跑手送上完賽獎牌同毛巾...

黎到呢度又要再讚下呢個京都馬拉松, 除左完走獎牌同毛巾, 大會係終點仲 set 哂 printer 印埋完走證書俾跑手, 雖然證書都唔係急住要, 通常都係過後上網 download, 不過呢個安排又真係好細心, 好讓心急既跑手知道自己既成績... 就連名氣更大既大阪馬拉松都冇呢個安排呢...

望住呢張完走證書同個完走獎牌, 心裡面又再次感動起來, 好想好想有人同我分享呢份喜悅！

3:30 pm
完走之後大會於會場安排左簡單既給食同按摩服務俾參賽者, 但我換好衫稍為休息左一陣就同朋友道別, 搭地鐵返回京都站。

4:45 pm
於京都站取回行理, 乘搭 "はるか" 33 號回關西空港。

6:50 pm
由於要等到明天既早機回港, 到左機場就諗下點打發時間...

首先去 Starbucks 醫下肚先...

之後就去了位於 Terminal 1 2/F 既 KIX Airport Lounge... 話就話係機場休息室, 但呢個唔同一般既 Lounge, 除左 open seats 之外, 佢仲有 single booths 同 group rooms, 如果大家想慳錢, 又只係一晚半晚的話, 即係好似我咁明天早機走, 我覺得黎呢度勉強代替晚酒店都 ok 既...

我揀左 single booth, 有一張按摩椅, 電腦等設備, 都 ok 架喎... 至於收費方面, 頭30分鐘 410 yen, 滿6小時 3090 yen, 9 小時 3910 yen...