2017 年既倫敦馬、柏林馬, 到2018年既東京馬, 繼續向六大馬拉松呢個目標進發。淨番三個都位於美國, 有啲難度, 好鬼遠, 波士頓就更加唔駛諗, 冇 BQ... 2017年尾即管上網報下名, 芝加哥同紐約呢兩隻馬相距時間好近, 正路唔適宜一齊跑, 不過反正都要抽籤既, 六大邊有咁好彩中丫... 登登登登, 結果出喇, 今次有啲運仔, 竟然俾我中左芝加哥馬呀, 紐約馬就唔中... 其實咁樣都好, 如果兩隻中哂, 一黎唔知點跑, 二黎一個係十月, 一個係十一月, 連續兩個月去一次冇野玩美國, 唔好喇掛...
網上報名芝馬時, 要俾埋信用卡, 如果抽中左, 大會就會自動過數, 咁既做法有好有唔好啦, 等你中左冇得諗, 亦都防止啲人係又抽唔係又抽... 唔知係咪因為咁, 所以芝馬比其他六大都易中, 真係第一次抽就中, 希望2019中埋紐約馬就好喇, 嘻嘻 :p
收到結果就上網 book 酒店, 然後就 plan 下行程... 我都算成日去旅行, 但一次都未去過美國, 一黎勁遠, 二黎好似冇咩玩咁... 上網睇下網友介紹, 芝加哥好似真係冇咩玩咁, 哈... 再問下去過既朋友, 都係話冇咩特別野玩, 照咁睇可以快閃喎... 不過咁, 去美國真係唔同去日本, 搭十幾個鐘飛機, 去到又要適應時差, 機票又咁鬼貴, 無理由去到跑完就走架, 連個美國簽証都浪費埋啦... 左諗右諗, 芝加哥雖然好細, 但我諗都可以玩到三四日既, 最後決定去6日, 唔計頭尾機程, 玩足4日... 到確認左假期後, 約在七月買埋國泰機票, 去程經洛杉磯飛芝加哥, 回程由芝加哥直航飛香港, 玩足4日半！
今次係第十四隻全馬, 第四隻六大馬... 2018年跑過東京馬、名古屋馬同紐西蘭既生日馬, 東京馬同名古屋馬都 PB 了, 為求再次進步, 在五六月開始訓練階段, 訓練中加入 tempo, interval 既項目, 希望能夠再次 PB... 但好景不常, 在八月中左腳腳踭出現疼痛, 睇醫生食左消炎藥, 但一路冇好轉... 上網睇左好多資料, 應該是跑者最唔想患上既足底筋膜炎 >.< 腳痛後唔好話訓練, 連 hea 跑幾 K 都痛, 真係好灰... 對於跑者黎講, 冇得跑慘過大病, 我亦都知好多跑手係痛住照跑, 但我就比較理智 (自以為...), 我只想盡快好番, 唔停跑肯定有排都唔會好... 不過咁好彩有得跑芝馬, 就係呢個時候腳痛, 個天係咪玩我呀？為左快啲好番, 咩都去試, 碌網球、按摩、拉筋, 仲去埋做金灸, 但得番個半月, 邊會好得切呢... 諗過放棄唔去, 但岩岩買埋機票, 成本太高... 唉... 最後決定去, 最多慢跑完成, 番黎再專心治療。
後記
同倫敦馬、柏林馬、東京馬比較之下, 論 Expo 規模, 東京一定係最大, 其次係柏林, 芝馬同倫敦馬差不多, 但都好多野睇... 論賽道, 芝馬同柏林馬一樣, 賽道寬闊平坦, PB 一流... 論比賽時氣氛, 倫敦馬仍然係第一, 其次係芝馬同東馬, 最後係柏林馬... 芝馬整體黎講, 大會各方面都安排不錯, 賽道非常好跑, 十月天氣頗適合跑馬... 最值得一讚係個完賽牌好靚 ^.^...
上面提到, 岩岩衰左筋膜炎, 八月中後一個10K都冇跑過, 哈... 跑前準備十足, 唔係長課, 而係止痛藥、止痛膏、防震鞋墊:p... 最後十分感恩, 跑前朝早啪左四粒止痛藥, 唔知係咪好有效, 跑頭30K竟然冇事, 腳踭唔痛... 到左30K先黎料, 始終都跑左30K, 對隻腳傷害已不少, 最後12K痛到跑唔倒, 唯有放棄成績, 快走番終點... 最後以5:25成績順利完走... 原本目標是 sub 4, 雖然好唔開心, 但都冇辦法... 番到香港第二日即去做針, dr 話跑到70歲都仲可以完成呢啲先係成績呀... 我唔知佢係咪安慰我先咁講, 但諗深一層, 又唔係冇道理既... 之前為左成績為左攞獎, 操到受埋傷, 而家慢跑都唔得, 值唔值得呢？
最後, 雖然今次完全冇心情玩, 但話哂第一次去美國, 都要講下遊覽既部分... 同未去之前既預期一樣, 美國同香港差不多, 唔係去探親的話都冇咩特別野做... 不過芝加哥有好多設計獨特既建築, 大家去到一定要遊船河去欣賞位於芝加哥河兩旁既高樓大廈。美食方面, 呢度必食既係 pizza 同牛扒, 待我下次有機會再黎先慢慢品嚐！
