[2018 美國．馬拉松六大滿貫]．芝加哥馬拉松 2018 直擊報導

~Day 1~
4/10/2018 (Thursday) 香港 --- 晴, 芝加哥 --- 晴

香港 --> 洛杉磯國際機場 --> 芝加哥國際機場 --> Chicago 芝加哥 --> Riverwalk --> Tribune Tower --> Chicago's Original Architecture Tour --> 海軍碼頭 Navy Pier --> Nordstrom --> Wrigley Building --> Chicago French Market --> Hampton Inn Chicago Downtown West Loop

10:30 pm

第四隻六大馬, 又是首次踏足美國之旅, 理應是興奮的... 但因為腳傷, 首次懷住戰戰兢兢既心情出發...

到了機場寄行理就入閘, 夜晚通常都好快既, 所以又有時間去 lounge 坐下...

00:06 am
飛往美國洛杉磯既國泰航班 CX 880 航班好準時起飛...

(以下轉美國洛杉磯時間)

3/10/2018, 8:00 pm
洛杉磯時間慢過香港成15個鐘, 訓醒左先係美國既3號晚上八點鐘...

9:18 pm
安全降落洛杉磯國際機場... 落機後就要入境, 由於第一次去美國, 而美國入境麻煩、嚴格就出哂名, 所以心情都有少少緊張... 點知結果係完全出乎我意料之外, 首先旅客唔駛好似去日本咁要填入境卡, 只需要在入境櫃位前進行自助登記, 好似去加拿大咁, 但要答既野又比加拿大少啲, 之後就去排隊... 眼見前面幾個人都係問一兩條問題就過, 咁都好OK丫... 好喇, 到我喇, 那個入境職員係... 一句野都冇問過我, 就吸印俾我過... 下？就係咁架咋？咪仲易過去日本？又話美國好嚴既... 點知仲簡單過去日本、澳洲同北歐...

入左境就去拎行理, 再走到美國航空 American Airlines 櫃位寄番個行理...

4/10/2018, 00:57 am
美國航空 AA 362 飛往芝加哥既航班又起飛喇...

(以下轉美國芝加哥時間)
4/10/2018, 6:34 am
又坐左三個鐘, 由香港起飛計, 連轉機時間總共花了17個半小時, 終於到了美國既芝加哥 Chicago 喇, 真係好攰呀...

好快就取回行理, 之後走到 O' Hare Train Station...

由機場搭 Blue line 就可以直達芝加哥既 Downtown... 第一次黎到美國, 在售票機前例牌要睇下點買飛, 睇下睇下, 突然有個剛到機場既女仔走埋黎, 心諗咩事呀... 原來佢有張 3-day pass 話可以用到今日下午2點, 咁佢而家搭飛機走喇, 所以想俾我用喎... 哈, 估唔倒除左入境超級順利之外, 咁快又遇到第二椿好事, 睇黎今次既馬拉松有啲希望喇, 嘻嘻...!

7:25 am
有免費車飛就入閘喇, 搭火車到 Grand Station...

8:05 am
到左 Grand Station 再拖住行理搵酒店, 原來有少少遠, 大約行十五至二十分鐘...

8:40 am
到左酒店 Hampton Inn Chicago Downtown West Loop, 咁早未有房, 但可以照 check in 同寄行理... 咁放低行理之後就出發囉...

9:10 am
酒店距離市中心都有一小段距離, 但遠少少清靜啲, 環境又好啲... 由酒店走向 Downtown, 途經一間 Cafe, 就係呢度食個早餐先...

呢個三文治都幾特別, 食包食得多, 但好似未食過咁樣既三文治...

10:10 am
之後走到最出名既芝加哥河 Chicago River...

芝加哥河是一條114英里長, 貫穿芝加哥市區的河流。儘管不是特別長, 但這條河因為土木工程而著名。芝加哥河本來流入密西根湖, 同時也將芝加哥的城市污水注入湖中。19世紀末, 為了徹底根除城市污水對密西根湖湖水的污染, 芝加哥通過修建一系列的水閘, 成功地倒轉了芝加哥河的流向。(維基百科)

芝加哥河上面有好多遊船, 呢啲都係專供遊客飽覽芝加哥建築既最佳方式黎... 河邊有好多間不同既船公司, 我諗只要時間岩, 幫襯邊間都分別不大既...

沿住芝加哥河邊有一條供人散步或跑步既 Riverwalk... 走在這步道上, 不停都有跑友來來回回, 讓不能跑步既我感到好可惜, 亦首次感到原來可以跑步, 唔駛快, 只要能跑, 已是一件十分幸福既事 >.<

10:40 am
論壇報大廈 Tribune Tower...

論壇報大廈是美國芝加哥論壇報和論壇公司的總部所在地, 大樓內還有CNN電視台的辦公室、當地電台和其他一些機構。這棟建築始建於1923年, 外觀上充滿了強烈的哥特風格, 是芝加哥市的地標之一。(維基百科)

11:05 am
一路沿住芝加哥河走向海軍碼頭 Navy Pier... 到了海軍碼頭見到 Shoreline 下一班遊芝加哥河既導賞團仲有10分鐘就出發, 時間岩岩好唔駛等, 就買飛遊船河先啦...

Shoreline Sightseeing 有三條不同路線既導賞團, 最受遊客歡迎既就當然係專門欣賞同介紹芝加哥著名建築大廈既 Chicago's Original Architecture Tour...

11:15 am
開船喇, 整個遊船既過程都會有專人講解, 但我英文水皮, 知道自已欣賞過乜乜建築物已好好啦 :p...

船慢慢駛進芝加哥河, 兩旁都是著名建築師既手筆...

中間呢楝係樓高92層既川普國際酒店大廈 Trump Tower...

川普國際酒店大廈, 又稱為芝加哥川普大廈和川普大廈, 是一座位於美國伊利諾州芝加哥的酒店式公寓。大廈以房地產開發商億萬富翁唐納•川普的名字命名, 設計師為SOM建築設計事務所的亞德里安•史密斯。寶維士聯盛負責建造這座92層的大廈, 其塔尖高度為1,389英尺, 封頂高度為1,170英尺。(維基百科)

被稱為粟米大廈既 Marina City...

Marina City 為住宅商業混合建築, 位於美國伊利諾州芝加哥市的芝加哥河畔北斯戴特大街 (State Street) 300號。其建築包含兩幢61層、高179米 (587英尺) 的住宅大樓, 以及一個鞍型的禮堂, 一個中等高度的飯店建築, 均有着懸臂平台, 此外還有一個通往芝加哥河的碼頭。該建築群建成於1962年, 是當時世界上最高的商用住宅建築。它由建築師貝特朗•戈德堡(Bertrand Goldberg) 設計, 因其酷似玉米棒的獨特外形而成為芝加哥市的地標, 並大量出現在相關影視作品、宣傳畫冊中。(維基百科)

圓形果棟係 River City...

去旅行多數都會上啲乜 Tower 物 Tower 去睇下當地既日夜景色, 就好似東京既 Skytree、札幌既電視塔、台北 101、倫敦既 London Eye 咁啦... 而芝加哥亦都有兩個 Tower 供遊客選擇, 就係 Willis Tower 同 John Hancock Center...

正中間既就係遊客必上既 Willis Tower...

左手面既龐然大物係面積排名世界第三既 Merchandues Mart...

12:45 pm
大約個半鐘既芝加哥河 Architecture Boat Tour 完成了, 花了42元, 係美金... 對芝加哥既建築藝術確係多左少少認識 :p...

落左船就走到海軍碼頭 Navy Pier...

軍碼頭是一個長3,300-英尺的碼頭, 位於芝加哥近北區的密西根湖湖畔。它建於1914-1916年, 耗資450萬美元。它是由建築師和都市計畫師丹尼爾•伯納姆和他的同事制定的芝加哥規劃的一部分。海軍碼頭規劃作為公共基礎設施的多種用途。其主要用途為貨運設施, 以及上下碼頭的倉庫。但是, 海軍碼頭也設計為短途客輪的停靠地點。(維基百科)

呢度超級大風... 見到個商場即刻走入去行下先... 商場入面有好多手信舖, 亦有個 food court...

1:15 pm
順道在這裡吃 lunch, 選擇困難症下叫左呢個... 食左幾啖, 唔好食... 再去 Starbucks 買番啲正常野 >.<

食完野再行下 Navy Pier...

3:15 pm
大風到頭都甩咁濟, 行完 Navy Pier 走回 Downtown...

Whole Foods Market 係呢度一間好出名既連鎖超市, 好大間, 商品種類超多, 平時香港人好鍾意網購買既護膚品、零食、健康食品同嬰兒產品都可以係呢度搵到架...

Hotel InterContinental Chicago...

Nordstrom 百貨公司...

Wrigley Building...

6:00 pm
一路走到酒店附近既 Chicago French Market, 就係呢度食 dinner 啦... 都係選擇困難, 朋友話黎芝加哥要食 pizza, 咁就叫 pizza 啦...

麻麻地好食, 鬼咩... 同 food court 一樣, 呢啲地方會好味得去邊 >.<

Lunch 同 Dinner 都冇心機去搵好野食... 皆因隻腳傷左, 我真係冇咩心情 >.<

6:40 pm
搭左十幾個鐘飛機, 接住又行左成日, 係時候番酒店喇...

取回行理上房, 嘩, 一開門, 有啲驚喜喎... 我仲以為芝加哥好似日本咁, 地貴酒店房實好細, 點知間房大過我間屋呀, 嘻嘻...

酒店望出去既夜景, 其實都唔駛去 Willis Tower 啦...

手信就冇心機買喇, 今日行行下隻腳都好鬼痛, 驚驚地都係買多個鞋墊, 諗住跑時放係腳踭度, 希望加重避震...

~Day 2~
5/10/2017 (Friday) 陰天

酒店 --> Abbott Health & Fitness Expo (領取選手包) --> 格蘭特公園 Grant Park --> 千禧公園 Milennium Park --> Hampton Inn Chicago Downtown West Loop

8:30 am
超攰, 訓到八點幾, 一早起身望出去係天陰陰啊...

九點落酒店食早餐... 去旅行真好, 好多時早餐都係我至愛既炒蛋多士^.^...

10:15 am
出發去 Expo 報到... 大會在幾個不同地方安排左免費巴士接載跑手到 Expo, 由酒店出發, 最近既一個上車點係位於 Grant Park 對面既 Hilton Chicago, 咁就步行到 Hilton Chicago, 順便可以計下時, 預算埋星期日朝由酒店往起點既時間...

10:40
途經有名既 The Art of Institute of Chicago...

11:10 am
見到條人龍, 好明顯係去 Expo 架啦, 跟住排隊等上車...

11:30 am
20分鐘車程到左 Abbott Health & Fitness Expo, 感覺好似香港既會展...

到左 Expo 入口, 超級多人, 原來佢唔似其他馬拉松既做法, 按參賽號碼直接分流去番相關 counter 報到, 芝馬要在入口 check 哂跑手既 ID 先俾入...

終於入到去, 按自已號碼去番相關登記 counter 取號碼布其實係好快既一件事... 之後就可以開始行 Expo...

第四隻六大馬, 按 Expo 既大小、人數來說, 東京係第一, 其次係柏林, 倫敦同芝加哥應該差不多, Expo 唔算好大...

初時見到呢個 counter, 免費幫人貼 tape 喎, 平時既我應該都唔會理, 但腳痛嘛, 有人幫你貼埋又可以學下野幾好咁喎, 咪諗住試下囉... 點知... 一排就成個鐘, 排排下想走又唔憤氣喎 :p...

3:30 pm
如果唔係排左成個鐘頭隊去貼 tape, 真係唔駛行咁耐... 搭 shuttle bus 回 Downtown...

3:45 pm
15分鐘回到 Hilton Chicago, 走到對面既格蘭特公園 Grant Park...

格蘭特公園是芝加哥市中心內的主要大型公園, 亦是芝加哥市區內主要的四大公園, 與林肯公園、千禧年公園、華盛頓公園並列, 而格蘭特公園位於密西根大街與密西根湖之間, 且格蘭特公園將芝加哥市中心與密西根湖連成一氣, 提昇了芝加哥的天際線與城市景觀, 同時為繁忙的芝加哥提昇了休閒功能。(維基百科)

芝馬會場...

後日就係呢度起步喇...

4:30 pm
千禧公園 Millennium Park...

千禧公園又稱千禧年公園, 是位在美國伊利諾州芝加哥洛普區的一座大型公園。本公園是密西根湖湖畔重要的文化娛樂中心, 含蓋整個格蘭特公園西北邊24.5英畝的土地。該地區曾經被伊利諾中央鐵路當作停車場使用。截至2009年, 千禧公園是全芝加哥人氣第二高的旅遊景點, 僅次於海軍碼頭。(維基百科)

5:30 pm
一路走到 Willis Tower... 昨天遊船河時已介紹過, 上去頂層可以飽覽芝加哥既夜景, 雖然今次係就係冇咩心情玩, 但作為遊客, 都諗住上一上去啦...

點知... 去到售票處前已有 staff 通知遊客, 因為天氣不佳兼能見度極低, 上到 Tower 係冇野睇... 嘩, 大家有冇睇我7月去挪威既遊記, 我就係不聽勸告上左去 Bergen 山, 咩都睇唔倒就落山, 今次學精左, 唔上...

其實我行左成日已經好攰, 加上著住對岩岩造起既鞋墊, 真係好攰, 冇得上 Tower 就早點回酒店喇...

6:10 pm
今日在 Expo 取既選手包, 除了最下面的 Salt stick 同六對襪係自已買之外, 其他既都是跑手既禮物... 件芝馬 tee 不錯呀...

~Day 3~
6/10/2018 (Saturday) 陰天

酒店 --> Oak Street Beach --> N. Michigan Ave --> Fourth Presbyterian Church --> Hampton Inn Chicago Downtown West Loop

9:00 am
玩左2日, 發覺可以去的景點都已去得七七八八 (美加真的是探親才會去的 :p)... 又可以訓晏啲慢慢嘆早餐...

10:30 am
出發去較遠既 Oak Street Beach... 路痴既我初時行錯路, 又去左芝加哥河...

12:15 pm
加上未習慣新鞋墊行得慢, 去到 Oak Street Beach 已是 12點 >.<...

12:40 pm
呢度又好多人跑步呀, 沿住個海灘可以跑到去海軍碼頭, 真係好正呀... 我得個睇字, 冇得跑, 唯有係度食個 lunch...

1:00 pm
由海灘走回最繁榮既 N. Michigan Ave...

Fourth Presbyterian Church...

呢度就係同 Willis Tower 一樣, 可以欣賞芝加哥景色既 John Hancock Tower (360 Chicago)... 不過今日天氣一樣唔好, 上到去都係冇野睇, 又可以慳番...

芝馬既贊助商係 Nike, 想買芝馬跑 tee, 完賽 tee 或其他限定版跑衫, 唔係去 Expo, 黎呢間 Nike Shop 就岩架喇...

3:00 pm
芝加哥真係好細, 景點唔太多, 真係3日咩都夠, 明天跑馬索性早啲番酒店, 執下野, 拉下筋...

明天既戰衣及補給...

6:15 pm
準備好哂明天既物資, 再次出動走到酒店附近既 Shake Shack Burger... 話說呢間野, 去跑倫敦馬時, 係等睇 Les Misérables 前偶然見到幫襯過, 當時未知原來係來自美國 New York 好出名既漢堡包, 我仲好搞笑咁叫左薯條同熱狗 >.< 今次真係黎到美國喇, 所以要去食番一次 Burger 先...

叫左一個普通既 Cheese Burger, 其實都唔係好正姐, 我覺得麥記都唔錯...

6:50 pm
回到酒店... 再拉筋, 最後就係貼膠布喇, 今次實在係太驚喇, 平時冇事冇幹都會起水泡, 如果咩都一齊黎咪死得, 所以都係穩陣啲, 索性貼多啲 :p...

9:00 pm
一切準備就緒, 最重要就係早啲休息, 訓覺喇...

~Day 4~
7/10/2017 (Sunday) 雨

酒店 --> Grant Park --> 芝加哥馬拉松 2018 (Bank of America Chicago Marathon 2018) --> Hampton Inn Chicago Downtown West Loop

6:15 am
第一次黎美國, 可能時差真係比較大, 黎左三日都未習慣, 加上好驚跑唔倒, 所以琴晚訓得唔係幾好... 朝早五點幾已醒左, 準備好行裝就落去食早餐, 餐後加送兩粒痛博士...

到酒店 reception 放低房卡就出發喇...

同上年既柏林馬出發時既情況好相似, 又係天陰陰, 落住毛毛雨...

臨近 Millennium Park 時見到已準備好既水站...

每個大型既馬拉松比賽, 為了使跑道暢通, 都會根據眾多跑手既過往完走時間分開不同組別, 跑得越快就編得越前, 好似我呢啲咁慢既, 就多數被編到最後排, 好多時鳴槍後都要走多十數分鐘才到起跑線... 芝馬大會將所有參賽者分開三個 Wave, 每組的起步點都唔同架, 咁就唔怕幾萬人迫埋一齊而造成混亂...

大會將跑手分開三個 Wave, Wave 1 由 Corral A-E, Wave 2 由 Corral F-H, Wave 3 由 Corral J-L, 起跑時間分別為 7:30 am, 8:00 am 同 8:35 am... 我被編在 Corral K, 去番該組別位於 Grant Park 既寄存行理區...

由於昨晚落雨, 所以草地都係濕既, 咁作最後準備都冇咁方便... 通常係呢個時候, 都會覺得日本馬好正, 供跑手換衫既地方唔係大體育館就係地下停車場...

搵左個好少少既位, 搽緊太陽油之際, 有個同鄉叫我喎, 原來係香港人, 講講下原來仲係 FB 跑步谷既谷友...

搞掂哂, 最後再食多兩粒必理痛就寄行理, 然後去洗手間...

8:00 am
去起跑區等出發喇... 我既 Start Zone 係 Corral K, 8:35 am 起步...

「美國銀行芝加哥馬拉松 (Bank of America Chicago Marathon) 」於1977年設立, 今年已是第42屆。

芝加哥馬拉松每年舉行一次, 是世界馬拉松大滿貫之一。芝加哥馬拉松於1977年設立, 首次比賽於1977年9月25日舉行。1987年起比賽開始每年定期舉行。2008年起, 美國銀行成為主要贊助商, 官方冠名為「美國銀行芝加哥馬拉松」至今。
(以上由維基百科提供)

8:35 am
芝加哥馬拉松同柏林馬一樣, 賽道寬闊平坦, 非常有利 PB 的...

芝加哥馬拉松路線圖

等起跑時又落雨, 不過落雨又有咩好驚喎, 驚得過等陣腳痛到跑唔倒？記得二月跑東馬 PB 了, 三月跑名古屋女子馬再下一城, 再次 PB... 之後賽季差不多完結, 我亦都減少左練習, 只在五月去左新西蘭輕鬆地完成多一隻生日馬... 今次芝馬在美國十月舉行, 天氣未係最好, 因越凍對我越有利, 但我已在七八月開始作出準備, 希望今次可以再次 PB... 點知就衰左啦, 我都唔明, 我都唔算操得勁, 人地全職操練都冇事, 唉... 而家只望完成咋...

好緊張呀, 夠鐘喇, 出發...

起步後覺得隻腳OK喎, 冇咩痛咁, 於是不自覺地跑快左, 頭6km仲係6分披內, 喂喂, 唔好呀, 提自已要慢番啲, 之後以6分幾既速度一路走, 無驚無險就過左半程喇... 21km 後, 開始覺得吃力, 係呢個時候, 竟然又有人嗌我, 原來又係香港人, 不過佢黎左美國呢度讀書, 話黎到呢度冇野好做所以就報左黎跑, 仲一次中哂芝加哥同紐約馬, 好幸運呀, 我以前實會好羡慕, 不過今次我就真係好慶幸自已抽唔中紐約馬, 哈... 同佢一齊傾一齊跑, 又捱多幾K...

25到30km嚴重跌速, 好不容易終於見到 30km 既 marker... 淨番12km, 唔好以為呢12km好容易, 跑馬既人都知最後呢12km先係馬拉松既開始, 不過今次唔講呢啲大道理喇, 又唔係要 PB, 我想講今次呢個30km同樣係關鍵時刻, 因為我左腳腳踭終於捱唔住, 出現痛楚... 原本諗住唔怕啦, 再跑慢啲囉, 7分披唔得就8,9 分披, 但係實在唔得, 每跑一步腳踭既痛都直上心口... 如果我堅持咁跑番去, 我好驚會加重傷患, 番去有排醫, 為著健康著想, 我決定連 sub 5 都放棄喇... 最後係半行半跑咁完成最後既路程...

好辛苦呀, 明明有力跑, 但都係要行... 不過腳痛可能影響埋條腰, 除左腳底, 條腰都好鬼辛苦... 今次係我首次跑馬時袋住支止痛藥膏跑, 真係慘情...

2:00 pm
終於都番到黎 Grant Park 喇, 淨番最後1k, 點都要跑番去啦, 加上臨到終點跑道兩旁都堆滿加氣既人群, 我都盡自已既努力去完成呢個馬拉松... 帶住腳傷完走既芝加哥馬拉松, 係我第十四隻全馬, 第四隻六大馬, 我好感恩今次可以順利完走, 成績嘛... 待我好番, 我一定會再次努力, 再次 PB 的！

過了終點線, 在工作人員手中取得芝馬獎牌, 心情真係好激動... 除了獎牌, 還有很多補給...

慢慢走回行理區取行理, 等左一陣都唔見起跑前撞到既谷友, 於是就離開會場返回酒店了...

跑完真係要用腳尖行路, 番酒店條路顯得格外漫長, 幸好沿途都有人同我講 Congratulations ^.^...

3:30 pm
回到酒店, 沖涼拉筋大休息...

6:00 pm
通常跑完全馬梗係要去食番餐好, 我原本都搵左間餐廳諗住去据個扒架, 但真係行唔到呀, 於是好 hea 咁落樓下 7-Eleven 買 dinner...

6:15 pm
你話跑完個六大馬食呢啲係咪真係有啲慘情 >.<... 唯有望住個靚靚獎牌黎食啦...

食完野又拉下筋, 咁多日都仲有 jet lag, 好鬼眼訓, 都係早啲訓...

~Day 5~
8/10/2017 (Monday) 晴

酒店 --> Whole Foods Market --> 芝加哥國際機場 --> 香港

6:15 am
又一早醒左, 真係番工都冇咁早, 索性早啲去食早餐...

8:30 am
淨番最後一個早上, 走到酒店附近既 Whole Foods Market 逛逛兼買手信...

之前行過下 Downtown 果面既 Whole Foods Market, 知道入面真係咩都有, 所以我就留待今朝黎呢度大肆搜索一番... 估唔到呢間係當地人眼中既普通超市, 我竟然可以當百貨公司咁行左成兩個鐘... 鬼咩, 平時我地上網買既零食、護膚品都可以係呢度搵到...