[2019 日本．關西和歌山] 溫泉美食慶生之旅

~Day 1~

5/10/2019 (Saturday) 香港 --- 晴, 大阪 --- 晴

香港 --> 關西國際空港 --> (大阪府) 黑門市場 --> 難波千日前 --> 道頓堀 --> 心齋橋 --> 天然温泉 夕霧の湯 ドーミーイン PREMIUM なんば

4:40 am

期待左好耐既全家族生日之旅出發喇, 由於近日香港既交通比較不穩定, 為免入機場有咩延誤, 一早 call 定車去機場...

到了機場就去 check in 寄行理, 可能星期一係公眾假期, HK Express 既 check in 櫃位超多人排隊... 寄好哂行理就過海關, 出境...

7:04 am
HK Express UO 850 航班準時起飛...

2019 Oct 日本．關西、和歌山．家族慶生 4 天之旅 - 行程規劃

~日本．關西 (大阪、神戶、奈良)、和歌山．家族慶生四天之旅~

日期: 5/10/2019 - 8/10/2019

繼上年既沖繩自駕遊, 我地又全家人一齊出動喇... 十月係姪女晴晴既三歲生日, 而我媽媽同姪女既生日只隔兩天, 所以我地決定黎一趟家族慶生之旅。上年去沖繩時晴晴還細, 訓多過玩 :p 今年話哂都三歲, 應該可以走多點路... 收集了家人的意見, 初步希望去大阪, 行程方面有人想行街, 有人想睇風景, 不過都唔緊要, 難唔倒我呢個日本通既, 最後我提議頭兩天玩大阪市區、奈良同神戶, 然後租車落和歌山同白濱, 咁就可以一次過行街街、睇鹿鹿、嘆神戶和牛、睇靚靚風景仲有我既至愛節目浸溫泉喇... 大家一致通過呢個家族慶生行程！

話哂晴晴都係細, 行程唔敢去得太盡, 只想屋企人可以睇到大自然靚景、享受日本美食、浸下溫泉, 好好咁享受呢個旅程！整個行程, 由關西既大阪開始, 因有家人未到過大阪, 所以到步就先逛下打卡熱點心齋橋、道頓堀同黑門市場。第二天就去奈良睇鹿鹿, 然後再去神戶嘆神戶和牛。第三天開始自駕遊, 渣車落和歌山縣參觀下和歌山城同黑潮市場, 然後落白濱睇下風景同浸溫泉, 最後去埋 outlet 掃貨就返回關西國際空港還車結束豐富既行程喇。

後記
整個關西和歌山之旅, 結合左熱鬧既大城市、具有日本傳統地位既城堡、大自然美景、溫泉美食同可以盡情購物既 outlet。為了慶祝晴晴同媽媽的生日, 我還預早 book 了神戶的神戶和牛晚餐, 另外還落重本, 白濱既溫泉酒店亦特別預約左兩間露天風呂付客室... 話落重本係冇講錯, 事關我咁鍾意浸溫泉都未試過咁豪 :p 不過為了家人開心就冇所謂啦！總結來說, 大家都玩得好開心, 最令人驚喜的竟然是晴晴在溫泉酒店既浴衣 look, 超級可愛啊！