[2024 日本．富士山] 日本最高山峰．富士山登頂全紀錄．感恩安全完走

~Day 1~

10/7/2024 (Wednesday) 香港 --- 晴, 東京 --- 天陰

香港 --> 成田空港 --> 新宿 --> 歌舞伎町一番街 --> 新宿プリンスホテル

8:00 am

挑戰日本最高山峰既富士山登山之旅出發喇... 香港航空 HX 604 航班準時起飛...

(以下轉日本時間)

2:08 pm
安全到達東京既成田空港, 排隊入境都算快...

3:15 pm

乘搭京城電鐵 Skyliner 到日暮里, 轉山手線到高田馬場駅, 最後再轉西武新宿線到西武新宿駅, 好似好轉折, 但落車後好快就到左今晚入住既酒店 - 新宿プリンスホテル (Shinjuku Prince Hotel)...

4:45 pm

check in 後先去新宿高速巴士總站, 確定一下明早往富士山既上車位置, 之後就逛逛新宿一帶... 新宿我就黎過好多次, 但同行既未黎過, 咁我就帶佢逛下啲遊客熱點, 好似伊勢丹、紀伊國屋書店同埋歌舞伎町一番街咁啦...

7:15 pm

好耐冇食過日本既豬扒飯, 今晚就食豬扒飯啦... 睇日本既 Openrice 見到歌舞伎町一番街既とんかつにいむら都幾高評價, 價錢又唔貴, 就試下啦...

[とんかつにいむら本店]

地址﹕東京都新宿区歌舞伎町1-23-10
電話﹕03-3200-5900
營業時間﹕10:30-翌日02:30 [01:45 L.O.];

Lunch: 10:30-16:00 [土日祝: 10:30-15:00]
定休日﹕不定休
網址﹕http://www.shinjuku-niimura.com/

可能太耐冇食, 好好味...

食到好飽, 再逛多一陣歌舞伎町, 然後去便利店買早餐同明天上山既乾糧。

9:50 pm

明天一早就要搭巴士去富士山, 今晚早啲休息。

~Day 2~

11/7/2024 (Thursday) 富士山 --- 雨、天陰

酒店 --> 富士山吉田線五合目 --> 登山 --> 七合目 --> 八合目 --> 本八合目 --> 山小屋--> 本八合目トモエ館

6:10 am
執好行李 check out...

6:45 am
由於昨天探左路, 今朝由酒店出發, 好快就到左新宿高速巴士總站...

每年到左富士山既登山季節, 即7月中到9月初, 由京王電鐵巴士株式會社營運的「高速巴士」會加開來往新宿至富士山五合目(吉田口)既高速巴士班次, 大家可以係一個月前上佢地既網站預約車票 ( https://highway-buses.jp/chi/ )...

由新宿開往富士山吉田線五合目既高速巴士準時出發...

其實富士山有4條登山路線, 分別係吉田路線、須走路線、御殿場路線和富士宮路線。4條路線之中, 吉田路線應該算係最容易應付既, 所以吉田路線都會比較多登山人士, 我地都揀左經吉田線登山啦...

吉田路線圖 [富士登山官方網站提供]

9:00 am

坐巴士大約2個多小時就直達富士山既五合目, 真係好方便啊... 一落車, 嘩, 好鬼凍, 又好大風...

先去攞登山裝備... 由於我地唔係經常登山, 仲要係咁高既山, 所以唔想為左登一次富士山走去買所需既裝備, 用完又唔知幾時再有用, 於是我地係出發前在網上租定我地想要既裝備, 黎到五合目就可以攞架喇...

提供富士山裝備租借服務既公司有好多, 我地就揀左 LaMont, 貪佢係河口湖同五合目都有分店, 咁我地就可以黎到五合目先攞裝備...

登山裝備租借 [LaMont]

LaMont 富士河口湖

地址: 〒401-0301 山梨県南都留郡富士河口湖町船津6663-11

電話: 0555-21-1888

營業時間: 09:00 – 20:00 (7月 – 9月) / 09:00 – 18:00 (10月 – 6月)

富士山みはらし吉田口五合目

地址: 〒401-0301 山梨県南都留郡富士河口湖町船津6663-11

營業時間: 09:00 – 17:00

LaMont 的登山裝備租借方案一共有兩種，分別是一套7件包含主要登山裝備的「Full Set / フルセット」(登山外套、褲、背包、鞋、腳套、頭燈及登山杖), 以及一套12件包含所有適合富士山登山裝備的「Perfect Set / パーフェクトセット」(比 Full Set 多了登山內衣、手套同襪各一對)。我地租左 Full Set, 後來發覺佢件外套唔係全防水, 好彩我地自已有帶定防水既風褸...

攞齊裝備就去換鞋, 執齊所有登山用品放在登山背包內, 然後就把其他不用帶上山既行李寄存係五合目。正準備出發之際, 發現外面落緊大雨... 上網睇下即時天氣報導, 好似落到中午先會停雨, 反正咁大雨都行唔到, 於是係五合目食個 lunch 先...

食完 lunch 就去買金鋼杖... 金鋼杖是一枝八角直身木杖, 可當作登山杖使用。由五合目開始, 每間山小屋及山頂兩間神社, 皆可以為山客在木棍上燒上一個印, 收費是200 至 500yen不等。每間山屋的燒印款式也不同, 還每年轉款, 如果每間山屋燒一個, 花的錢也不少。我地已租左登山杖, 所以買左3支短身既金鋼杖...

12:50 pm

等到中午就黎一點鐘, 見天色開始好轉, 雨都停左, 就出發喇...

為左確保登山者既安全, 以及舒緩登山人數太多既問題, 日本山梨縣由2024年起實施人流管制措施及收費。2024年7月至9月富士山開山期間, 在富士山吉田線五合目既登山步道入口設置閘門, 只有已預約登山人士才可進入。閘門在每天下午4時至隔日凌晨3時期間關閉, 禁止登山客進入步道。登山人士可在富士山登山官方網站預約富士山登山通行證, 費用為2,000日圓。

完成預約後, 抵達吉田線五合目登山入口時, 出示已預約登山既通行證 (QR Code), 工作人員就會幫你穿上手帶, 咁就可以通過閘口開始登山喇。

吉田口五合目 [海拔2,305米]

由海拔2,305米高既五合目開始登山, 途經六合目到七合目的山路都不算難行... 每經過一間山小屋, 都可以吸印仔...

七合目 [海拔2,700米]

由七合目開始, 山路變得難行, 要手腳並用...

5:50 pm

八合目 [海拔3,020米]

終於到達海拔3,020米高既八合目... 由於七合目之後既山路難行, 加上風勢很大, 好似10號風球咁既風力, 唔捉實啲石頭個人都驚俾風吹走 >.<, 所以我地上山既速度慢左好多, 最緊要安全為上... 最後用左差唔多五小時先到達八合目...

八合目山小屋 - 太子館 (海拔3,100米高)...

黎到太子館稍為休息一下, 由於海拔高, 氣溫低左好多, 係呢個時候我地都要戴番手套同冷帽先繼續行...

7:00 pm

到達八合目山小屋 - 白雲莊...

原本仲諗住早啲到我地既山小屋, 點知行到日落都未到... 不過都唔緊要, 係白雲莊呢度欣賞埋伴隨著日落既雲海景色, 真係好靚呀...

7:30 pm

到達八合目山小屋 - 元祖屋 (海拔3,250米高)...

此時天都黑哂, 要開頭燈了...

8:15 pm

本八合目 [海拔3,350米]

八合目之後既山路開始平坦返少少, 拎住登山杖慢慢行其實係OK既, 不過由中午開始都行左大約七小時, 爬升左約950米, 所以大家都好攰喇... 繼續努力咁向上走, 終於到左海拔3,350米高既本八合目...

8:20 pm

本八合目有3間山小屋, 我地今晚會入住呢間本八合目トモエ館...

呢度就係我地今晚休息既房間喇, 雖然係簡單啲, 但都有床舖、充電、衣架呢啲基本設施...

8:45 pm

休息一會就食晚餐, 可能行左成日太辛苦, 呢個咁簡單既咖喱漢堡飯真係好好味... 之後仲會派埋明天既早餐...

10:00 pm

食完晚飯就要休息喇, 可能海拔高, 有啲頭痛唔係幾訓到覺 >.<

~Day 3~

12/7/2024 (Friday) 富士山、河口湖 --- 雨

山小屋 --> 登山 --> 九合目 --> 富士山山頂 --> 下山 --> 五合目 --> 河口湖 --> 若草の宿　丸栄

2:00 am
幾個鐘後又要起身, 不過其實都唔係幾訓到... 其他登山旅客都陸續起床, 大家都在大廳吃麵包早餐...

2:40 am
頭仲有啲痛, 不過都要出發喇... 由本八合目開始, 往山頂進發...

八合五勺 [海拔3,450米]

好快到左海拔3,450米高既八合五勺... 呢度有人氣 No. 1 既山小屋御來光館... 點解咁受歡迎? 好多登山人士都話第一日應該行多啲, 住到最高既山小屋, 咁第二日上山頂就會輕鬆啲... 我就唔係100%同意, 除非你既體能好好, 如果好似我地咁, 第一日都行得慢, 去到本八合目都已經好夜, 咁其實休息既時間反而少左架...

3:50 am

九合目 [海拔3,600米]

不經不覺到左海拔3,600米高既九合目, 離富士山山頂既距離又拉近左... 本身唔係行山高手既我, 真係第一次行夜山... 係凌晨兩點幾咁大班人一齊上山頂, 感覺真係好特別...

就到山頂喇, 加油呀...

4:40 am

富士山山頂 [海拔3,766米]

登登登登... 我地終於到達富士山山頂喇... 好感動...

由山小屋一路走直到山頂, 天氣都尚可, 冇咩風, 但係一到左山頂, 又可以親身感受富士山變幻莫測既天氣喇... 係山頂影影下相開始落雨, 刮起大風, 氣溫急降 >.< 講到好似好跨張咁, 但真係變得好凍... 凍到唔想郁, 咁我地就決定坐低食碗麵暖下先...

6:00 am

食完麵, 雨越落越大, 身體覺得越黎越凍, 最後唯有放棄缽巡, 即係去唔到另一邊既劍峰同富士山郵局 >.< 為左安全, 都冇辦法, 我地開始下山... 落山既初段有好多分叉路, 睇清楚自已想去返邊條路線既五合目, 唔好行錯呀... 聽聞好多人想去吉田口都行錯左須走線...

12:00 pm

上山容易落山難真係一啲都冇錯, 無限個"之"字形既路段, 仲要一路落住大雨, 個腦已經一片空白, 淨係不停咁行, 好想快啲落到山... 最後用左6個鐘終於返回吉田線五合目喇... 經過上山既入閘口, 又見到好多人正在出發登山...

去到五合目仲係落緊雨, 成身濕哂拿拿聲去攞返啲行理, 然後就換衫休息一下先... 雖然今次上到富士山山頂未能完成缽巡, 即係環繞富士山口走一圈, 又去唔到富士山郵局寄明信片, 但我回想返第一日上山前明明橫風橫雨, 但之後天氣開始好轉, 直至第二日上到山頂天氣都係OK既, 我覺得已經好好喇, 最緊要係平安上山平安落山嘛, 途中仲要吸左咁多得意既山小屋印仔 ^.^

1:45 pm

休息過後就去還登山裝備, 然後搭巴士往河口湖駅...

2:30 pm

到左河口湖駅, 然後走到遊客中心請職員幫我地打電話到溫泉酒店... 大部分河口湖邊既溫泉酒店都有提供接送服務, 到達河口湖駅之後可以請遊客中心職員代為聯絡酒店開車來...

3:00 pm

到達今晚入住既溫泉酒店 - 若草の宿　丸栄。呢間屬於日式傳統溫泉酒店, 房間都係和室的, 仲係對住河口湖 tim...

由今朝係富士山山頂落山到而家仲係落緊雨 >.<... 加上登完富士山都超爆攰, 所以我地唔出去行喇, 即刻去浸返個溫泉先...

6:15 pm

今次 book 左個部屋食溫泉料理 dinner 既 plan...

浸完溫泉嘆完溫泉餐就休息喇...

~Day 4~

13/7/2024 (Saturday) 河口湖 --- 晴、東京 --- 天陰

溫泉酒店 --> 河口湖 --> 銀座 --> 皇居 --> 天然温泉七宝の湯ドーミーインＰＲＥＭＩＵＭ銀座

7:30 am
訓返一晚好覺個人精神好多, 望一望出去, 嘩, 太陽出來了, 咁我地就出去行下啦... 由酒店開始沿住河口湖邊向東面行到八木崎公園再折返...

8:00 am

返到酒店先去浸溫泉... 有大溶場既室內溫泉, 亦有露天風呂...

露天風呂「富士の湯」[相片來自酒店網頁]

露天風呂「湖（うみ）の湯」[相片來自酒店網頁]

浸完溫泉可以走到屋上既富士山展望台...

8:30 am

浸完溫泉就去食早餐...

食完早餐仲有啲時間, 我地就上左去酒店最頂層既富士山展望台...

屋上「富士山展望台」[相片來自酒店網頁]

10:50 am

check out... 搭酒店 shuttle bus 到河口湖駅...

11:30 am

出發前已在 Japan Bus Online 網站 ( https://japanbusonline.com/en ) 預約河口湖至東京駅的高速巴士... 巴士在河口湖2號巴士駅開出, 駛往東京駅日本橋口, 而營運公司與東京新宿到五合目的不同...

1:50 pm

大約2個多小時後到達東京駅日本橋口, 然後拖著行李往銀座...

2:45 pm

到左今晚入住既酒店 - 天然温泉七宝の湯ドーミーインＰＲＥＭＩＵＭ銀座。check in 後放低行李, 就出去搵食喇...

3:20 pm

其實我去日本就唔會去食麥當勞既, 不過而家成日聽人講話日本麥當勞好好味, 咁就去試下啦... 揀啲香港冇既包, 味道不錯啦...

之後就在銀座附近逛街...

7:15 pm

行到咁上下, 我地就返酒店換衫, 然後就跑步到皇居... 如果係跑者, 我諗都唔駛我多介紹, 皇居係一個跑步熱點, 圍住皇居跑一圈約5K... 仲有好靚既城門河夜景...

8:30 pm

我地由酒店跑到皇居約2K, 圍住皇居跑了一個圈, 再跑回酒店, 總共9K... 之後就去浸溫泉喇...

9:30 pm

浸完溫泉就到酒店餐廳食拉麵宵夜...

~Day 5~

14/7/2024 (Sunday) 東京 --- 雨、天陰

酒店 --> 皇居 --> 成田空港 --> 香港

6:45 am
琴晚在皇居夜跑, 睇到好靚既夜景, 我地諗住朝早再去跑多一轉, 咁可以睇埋朝早既景色啦... 點知換好衫離開酒店之際, 原來落緊雨... 咁點好? 繼續跑? 返上酒店再訓過? 唔知點算好既同時, 雨好似細左啲, 咁我地就決定出發喇...

一路跑到皇居, 雖然唔算好大雨, 但天色真的唔太好 >.<

8:00 am

最後梗係冇圍住皇居跑足一圈啦, 影下相就回程喇, 返到酒店大約跑了4.5K... 返到酒店就去浸溫泉...

8:30 am

然後就到酒店餐廳 Hatago 食早餐...

11:00 am

食完個好好味既早餐就要執行李喇... check out 後就要出發往機場... 原本我打算搭返京城電鐵 Skyliner 到機場, 點知落到東銀座駅, 大大隻字寫住去機場, 咁我咪跟住行, 點知佢帶左我去搭都營淺草線, 要先到押上駅, 再轉京成電鐵 Access 特急車到機場... 咁樣搭時間就梗係耐啲, 但價錢就會平好多...

1:00 pm
到左機場 check in... 之後就係例牌動作, 買手信...