2013 Feb 日本．群馬 (草津、伊香保溫泉) + 櫪木 (日光、鬼怒川溫泉)．溫泉 7 天自駕遊

~日本．群馬 (草津、伊香保溫泉) + 櫪木 (日光、鬼怒川溫泉)．溫泉七天自駕遊~

日期: 7/2/2013 - 13/2/2013

農曆新年又到喇，原本冇諗住外遊既，因為呢個超級旺季 D 機票實在太貴喇。係大約新年既兩個月前，無意中睇到國航去日本既機票連稅都只係二千幾，仲係年廿七晚出發兼用盡五日公眾假期，所以諗左一陣就買左了。其實要諗 d 咩呢？皆因坐國航要係北京轉機，出發當日要係北京停留一晚既，機程亦比較長。但考慮到國航會送一晚免費既中轉酒店，同埋機程看似好長 (比經台灣、上海轉機長)，但其實以往試過經台灣去日本，頭尾一樣係冇左一日架啦，所以一於成行。

今次係我地既第十次日本遊，天氣凍凍地決定黎一個溫泉之旅。初步搜集過資料後，目的地鎖定左以溫泉盛名既群馬縣同櫪木縣。去得日本以外既近郊，因為交通唔係咁方便，我地一向都會選擇自駕遊，但今次正值日本最凍既二月份，為左安全起見，決定先預約附有雪呔同雪轋既車。慘啦... 問左好多間公司，係東京租既車都冇雪呔同雪鏈呀，咁點算呀？唔通要改行程去第二度...？最後日產公司回覆有雪呔車但都係冇雪鏈，又問左網友意見，最後決定預約呢架雪呔車。

整個溫泉自駕遊行程，由東京玩上群馬縣既草津溫泉、榛名山、水澤、伊香保溫泉，經過赤城山、明智平再到櫪木縣既日光、鬼怒川溫泉，最後經宇都宮返回東京。

今次旅程除左浸溫泉嘆懷石料理外，仲順道去埋伊香保溫泉町附近既榛名山朝聖，呢度就係頭文字 D 入面拓海同夏樹約會既地方，仲可以行下拓海同人比賽果條 "五連髮夾彎" 賽道 tim... 另外又參觀左日光既世界文化遺產 "東照宮"... 特色美食方面就品嚐左日本三大烏冬之一既水澤烏冬同餃子城宇都宮既餃子... 整個旅程非常順利，日元又跌左，玩得好開心！

在較大的地圖上查看2013日本群馬櫪木7天

事前準備

準備	備註
申請日本旅遊簽証	免簽証
申請國際車牌	不用申請 (因上年到澳洲申請的國際車牌還沒到期，可以再用)
購買機票, 訂酒店	購買中國國際航空香港至東京來回機票兩張
購買旅遊保險	於保誠購買旅遊保險
訂民宿, 酒店	於網上預約
租車	於網上預約
換日元	於恆生銀行換購

行程表

		住宿
Day 1	香港 --> 北京國際機場	金航線國際商務酒店 (免費中轉酒店)
Day 2	北京國際機場 --> 東京羽田空港 --> 東京	品川站高輪口 Toyoko-inn
Day 3	東京 --> 草津溫泉	Ruban Yamada Hotel
Day 4	草津溫泉 --> 榛名山 --> 水澤 --> 伊香保溫泉	Fukuzen Hotel
Day 5	伊香保溫泉 --> 赤城山 --> 明智平 --> 奧日光 --> 鬼怒川溫泉	鬼怒川酒店 Hotel
Day 6	鬼怒川溫泉 --> 日光 --> 宇都宮 --> 東京	東京羽田機場第一Toyoko-inn
Day 7	東京羽田空港 --> 北京國際機場 --> 香港

~Day 1~

7/2/2013 (Thursday) 香港 --- 晴, 北京 --- 寒冷

香港 --> 北京國際機場 --> 金航線國際商務酒店 (免費中轉酒店)

6:40 pm

第十次日本遊出發喇, 懷住興奮既心情到達香港國際機場。

由於網上買機票時已選好座位, 所以好快就辦理好 check in 手續。

8:00 pm

CA 116 航班原定 8:00 pm 飛往北京既, 上左機後聽到機長宣佈, 話有航空管制, 航班要 delay >.<

等呀等... 仲未有消息可以起飛既... 同機上有幾個香港人好擔心, 因為佢地去到北京就要轉機到英國, 驚 delay 趕唔切轉機... 我地就好 d, 今晚都要係北京留一晚, 最多訓少 d >.<

9:30 pm

delay 左個半鐘, 終於起飛喇... 坐得國航都係貪平, 飛機餐就麻麻地啦, 短程機冇電視睇, 位都 ok 舒服, 咁既價錢絕對可以接受...

12:30 am

經過大約三個小時, 終於到左北京國際機場喇, 飛機降落時, 機長宣佈當地氣溫係零下十度 >.< 一出機艙, 嘩...好凍呀...

今晚要係北京停留一晚, 預早 book 左國航提供既中轉酒店... 離開機艙後, 好似其他入境既旅客一樣一直行, 唔同既係入境時係行 "外交禮遇、需扶助人員通道", 直至去到接機大堂就有個中轉酒店服務櫃檯...

搭 shuttle bus 到今晚入住既金航線國際商務酒店, 房間不錯, 可惜已冇咩時間欣賞, 拿拿臨沖涼訓覺了...

~Day 2~

8/2/2013 (Friday) 北京 --- 晴, 東京 --- 晴

北京國際機場 --> 東京羽田空港 --> 品川 --> 東京站一番街 --> 銀座 --> SkyTree 晴空塔 --> 品川站高輪口 Toyoko-inn

5:30 am

5:30 am 就 morning call... 原本酒店有埋早餐食既, 但我地諗住去到機場先慢慢食, 所以 check out 之後就搭 shuttle bus 去機場喇...

8:35 am

係機場慢慢嘆番個早餐先... 食飽飽就等上機喇...

CA 181 飛往東京羽田空港既航班準時起飛, 除左食飛機餐之外, 其餘時間都在補眠 :p

(以下轉日本時間)

12:50 pm

安全抵達東京既羽田空港, 過關既人唔算多, 拎埋行李就去到接機大堂喇...

見到有個售賣火車票既 Counter, 我就即刻用我有限既日文同佢講我地要去品川啦, 點知佢就用番唔正既廣東話黎答我, 話每人 400 yen, 兩人就 800 yen... 仲話下一班車將會係 1:53 pm 開出咁 >.< 真係好 helpful...

1:53 pm

搭京急線由羽田空港去到品川站都只係二十分鐘左右, 比起成田機場要成 3000 yen 再加上個半鐘車程先到東京站, 真係超方便！去到品川站, 就拖住行理去到今晚將會入住既品川站高輪口東橫 Inn check in 喇... 以往黎東京都係住新宿池袋多, 但今次重點不是東京, 所以諗住住得近 D 羽田空港, 唔駛拖住 D 行理行咁遠, 所以就決定住品川... 一出京急品川車站, 附近就有個大型商場 Wings, 周圍都係食肆... 東橫 Inn 又近火車站, 感覺不錯, 下次黎東京都可能會再住佢呢！

2:30 pm

Check in 完就開始去玩啦... 行過東橫 Inn 對面有條叫 "品達拉麵．麵達七人眾" 既拉麵街, 係又凍又餓既狀況底下梗係即刻醫左個肚先... 呢條拉麵街其實是位於鐵道下面, 由七間有名拉麵店集合組成既一條拉麵街...

我地揀左呢間旭川拉麵 Saijo, 試左一個鹽味叉燒拉麵同一個味噌拉麵... 好味道！

3:30 pm

去到 JR 品川站, 買番張 Suica 先...

之後搭 JR 去到東京站, 行下東京站一番街... 位於東京站八重洲北口既東京站一番街內既卡通街 Character Street, 係人氣極高既地下街, 因為佢集合左多間人氣卡通人物主題商店, 行一條街就可以買晒所有心愛既卡通人物產品, 嘩哈哈！除左好得意既公仔之外, 呢度亦有好多售賣手信既舖頭同食肆, 如果落雨天黎呢度行下都幾好喎...呵呵！

4:45 pm

搭地鐵去銀座, 銀座係一個貴價購物區, 因為好多世界名牌旗艦店都集中於此。我地就梗係冇錢買野啦, 行行下見餓餓地就去左買野食...

6:15 pm

夠鐘食 dinner 喇... 沿住中央通行去我地預先 book 左既餐廳 "銀座 Shabu 通" 嘆和牛喇... 對於勁鍾意食牛既我地, 每次去日本都會去搜索一 D 正既和牛... 今次搵食難度高左 D, 因為係東京呢個地價咁貴既地方要搵 D 高質素既和牛唔容易, 就算有一定會好貴... 加上今次仲要鎖定地點係銀座區, 因為食完要去 Skytree 影夜景... 上網搵左一輪, 決定試下呢間有蒸 Shabu Shabu 既餐廳啦...

睇完個 Menu 後, 我地好貪心咁又想食傳統既 shabu shabu, 又想試下蒸既 shabu shabu 喎, 由於呢度唔係任食既, 咁我就唯有問下個 Staff 得唔得啦... 個 Staff 話由於唔同食法要用唔同既爐, 所以... 咁我就話由於我地好難得先黎到呢度, 好想試下唔同食法... 此時一副好誠懇既表情, 哈... 個 Staff 走左去問一問, 番黎之後就話 OK, 冇問題, 好野...

我地先食蒸既 Shabu Shabu, 全程唔駛自已動手, 會有人 serve 你... 蒸籠上有好多白菜, 和牛就放在白菜上, 等蒸熟後就包住 D 菜黎食, 真係好好味呀！

之後再食傳統既 Shabu Shabu, 連埋 D 蔬菜, 已經食到好飽了。

呢餐都唔平, 埋單要 15000 yen , 但食物質素非常高, 加上服務一流, 好過食放題...

8:15 pm

食左差唔多兩個鐘, 走回銀座站搭地鐵去東銀座站, 轉都營淺草線去押上站, 睇睇呢個 2012年5月22日開幕既 Skytree...

由於我地冇預先買飛, 黎到亦都一如預期, 冇飛賣了, 所以只係行下 Skytree 下面既 Shopping Mall 同係外面影番 Skytree 既夜景...

10:00 pm

走回押上站搭都營淺草線直接回到品川站, 再回酒店休息。

~Day 3~

9/2/2013 (Saturday) 晴

東京 --> 草津溫泉 --> 運動茶屋公園 --> 西之河原園地 --> 西之河原露天風呂 --> 熱之湯 --> 湯畑 --> Ruban Yamada Hotel

6:30 am

今日會出發去群馬縣既草津溫泉, 由於路途遙遠, 所以都係早 D 起身食早餐先...

7:30 am

食完早餐就穿過 JR 品川站到另一邊搵日產租車公司, 準備取車出發。我已經一早印好左地圖, 諗住好快就會搵到架啦, 點知係咁行, 行左好耐都唔見日產既... 已經行左好耐, 最後唯有問人, 原來呢間日產公司唔係地面, 佢係一棟大廈入面既二樓... >.< 但佢個地址係冇講囉, 浪費晒我地 D 時間呀, 激死...

8:50 am

我地原本 book 左八點鐘取車, 而家差唔多遲左成個鐘, 辦好手續都九點了 >.<...

9:50 am

取車後先回東橫 Inn 拎番 D 行理, 然後就正式向群馬縣進發喇。

途中見到東京鐵塔... 原來我地黎左日本十次, 都未去過東京鐵塔...

1:45 pm

連埋中途休息時間, 大約四個鐘後, 我地終於黎到名列日本人氣溫泉第一位既草津溫泉喇。話晒都係人氣第一, 點都要略略介紹下啦... 草津溫泉位於群馬縣, 對香港人黎講可能有少少陌生, 但係日本觀光經濟新聞社舉辦既溫泉百選活動中, 佢係連續八年都得到第一名... 所以草津一定有它吸引人之處。而草津溫泉和兵庫縣的有馬溫泉、岐阜縣的下呂溫泉, 位列日本三大溫泉, 三者當中, 我地已去過草津同下呂溫泉喇。

首先渣車黎到離草津溫泉街較遠既運動茶屋公園...

2:15 pm

渣車到今晚入住既酒店, 泊低架車, 然後就開始草津徒步之旅... 呢間酒店不是大型酒店, 是家族式經營的, reception 有個伯伯係度, 我地話今晚先番黎 check in, 佢就好熱心咁拎張地圖出黎, 教我地係草津既遊覽路線...

離開酒店, 走到西之河原園地...

一路行到盡頭, 有個西之河原露天風呂。本人極力推介呢個露天風呂, 係咁凍既天氣, 望住雪山黎浸浸浸, 超正呀！

4:00 pm

浸完溫泉就趕住去 "熱之湯館" 睇最後一場熱之湯表演... 由於草津既泉水溫度太高, 呢度既日本人就諗左呢個用塊木板搓泉水黎幫泉水降溫既方法... 其實有點兒無聊, 但日本人睇得非常投入, 仲個個爭住落去試搓泉水 tim...

4:30 pm

睇完表演就黎到草津溫泉既核心 --- 湯畑。湯畑是草津溫泉眾多泉源中最大的一個, 每分鐘湧出 5000L 以上的泉水... 現場所見煙霧迷漫, 想影張相都有點困難... 仲勁大陣硫黃味... 堅！

要等到黃昏影埋夜景, 等到好鬼凍, 買串燒食先...

6:15 pm

回到今晚入住既 Ruban Yamada Hotel, 搬行理上房間然後就去食 dinner 喇...

晚餐好豐富, 每一道菜都係酒店主人用心造既, 最後仲有 cheese cake 做甜品呢！食物既味道未必及得上大酒店, 但誠意就十足！

8:00 pm

溫泉之旅第一浸, 正呀！

POSTER 所見草津溫泉位列日本第一, 據說自古時起已是諸侯將軍如德川吉宗指定要浸的名湯... 泉水對神經痛、肌肉酸痛、關節疼痛、糖尿病、高血壓等甚有療效, 而且還有助於病後恢復, 消除疲勞, 增進健康, 難怪深受日本人既愛戴...

9:00 pm

浸完溫泉就回房間休息。

~Day 4~

10/2/2013 (Sunday) 晴

草津溫泉 --> 榛名山 --> 榛名神社 --> 榛名公園 --> 榛名湖 --> 水澤烏冬街 --> 水澤觀世音 --> 伊香保溫泉石段階 --> Fukuzen Hotel

7:15 am

起身食早餐...

9:00 am

check out 後就去白根神社...

離開草津溫泉向榛名山出發喇... 經過運動茶屋公園停一停補番張相先...

經過 JR 長野原草津口站, 由東京搭火車黎到呢個站, 再轉巴士就可以去到草津溫泉喇...

11:00 am

榛名山是位於群馬縣既上毛三山 (即榛名山、赤城山、妙義山) 之一, 是一座睡火山...

<<頭文字 D>> 電影入面既秋名山其實就係榛名山喇, 藤原拓海每晚送豆腐上山果條山路, 就係連接榛名山山頂同伊香保溫泉既山路黎...

11:30 am

渣車去榛名神社, 呢個神社唔駛入場費, 以為冇咩野睇, 點知原來入面好大, 由入口行去本殿要 15 分鐘...

榛名湖... 呢度就係拓海同夏樹約會既地方喇...

如果想上山一睹榛名湖既風采, 就可以係呢度搭纜車... 不過個湖結晒冰冇咩睇, 走人...

12:45 pm

離開榛名山, 出發去水澤食 lunch...

落山既呢條山路, 就係拓海每晚送豆腐行既伊香保町 33 號"五連髮夾彎" 山路... 中途經過高根展望台, 呢度望番落去見到伊香保溫泉, 風景靚爆呀...

望住 d 車經過, 就好似見到拓海架 AE86 飆過咁... :p

我地又跟住飛喇, go go go！

1:45 pm

好快就黎到水澤烏冬街, 呢度 d 水澤烏冬同秋田縣既稻庭、香川縣既贊歧烏冬合稱日本三大烏冬 (日本真係多三大乜乜乜, 三大物物物既姐...), 梗係要黎試下啦！

呢度成條街都係食烏冬既, 間間都有好多人排緊隊... 最後決定幫襯呢間比較大規模, 歷史比較悠久既 "大澤屋"...

睇下個 menu, 原來冇咩款式揀, 唔好諗住食咩咖哩烏冬、豬扒烏冬咁, 佢清一色得舞茸天婦羅烏冬, 咁就試下啦, 嘩, d 舞茸好鬼好食呀... d 烏冬又好彈牙喎, 好好味呀！

3:00 pm

由於食烏冬食左好耐, 其實係等左好耐, 包括等位同 d 食物 >.<, 搞到要 skip 左原先安排既人形自動車博物館, 變左只係去門口望下影張相咁...

3:30 pm

之後去水澤觀世音...

4:15 pm

向伊香保溫泉進發... 伊香保溫泉以溫泉街 "石段階" 著名, 樓梯兩旁開滿溫泉旅館、餐廳同手信舖... 由於明天 (11/2/13) 係日本既假期, 所以今日伊香保呢度特別多遊客, 熱鬧到暈...

行到盡頭就會見到河鹿橋同伊香保神社...

6:00 pm

到 Fukuzen 酒店 check in, 個 staff 話今晚既晚餐係房入面食... 聽到呢個安排心裡面笑左出黎, 亦都好奇怪... 通常係房度食 dinner 既 plan 都比較貴, 所以以往從未試過, 係見今次話晒都叫做溫泉之旅, 所以聽日住既鬼怒川溫泉就豪一豪佢, book 左係房嘆懷石料理, 點知呢間酒店竟然安排係房度食晚餐, 真係 surprise, 呵呵...！

7:30 pm

食晚餐喇... 好豐富呀...

8:20 pm

溫泉之旅第二浸...正呀！

11:00 pm

休息。

~Day 5~

11/2/2013 (Monday) 早上 --- 雪, 中午後 --- 晴

伊香保溫泉 --> 赤城山 --> 第二伊呂波阪 --> 明智平 --> 中禪寺湖 --> 華巖瀑布 --> 第一伊呂波阪 --> 鬼怒川溫泉 Hotel

7:15 am

呢間酒店真係奇, 除左晚餐係房食, 就連早餐都係房食, 我估係因為佢根本冇餐廳 >.<

8:50 am

check out 出發去赤城山... 差不多開始上山時, 個天落起雪上黎, 一路上山 d 雪仲越落越大 >.< ... 幸好我地租左架雪呔車, 同埋落緊雪都冇咩野, 反而地面有冰就危險喇...

10:15 am

中途經過赤城山上既滑雪場, 諗住落車睇下啦, 嘩, 超凍又大風, 拿拿臨影完相走人...

同榛名山一樣, 赤城山山頂有一個火山口湖 --- 大沼。夏天既時候可以繞住大沼行一個圈, 又或者坐船欣賞風景。冬天個湖就結晒冰喇, 可以係冰上玩釣魚。

大沼旁有一個赤城神社...

11:30 am

因為實在太凍, 所以好快就走人, 出發往櫪木縣既日光喇...

中途有個展望台, 又落車影下相...

2:10 pm

今日會先遊覽日光西面既奧日光地區, 呢度有好出名既中禪寺湖同華巖瀑布, 如果想一次過欣賞晒中禪寺湖、華巖瀑布同男體山既風景, 就可以去明智平纜車站坐纜車上明智平展望台度睇...

要上明智平纜車站, 要先經過第二伊呂波阪... 呢條山路亦係 <<頭文字 D>> 既賽道黎, 不過電影就冇佢份, 呢條賽道係出現係 2001 年既劇場版入面... 呢條伊呂波阪共有 48 個轉彎位, 仲好飛過上榛名山果條"五連髮夾彎" 賽道呀 :p 亦都因為佢有太多個急彎, 所以呢度罕有地實施單程行車, 上明智平就要行第二伊呂波阪, 落番黎就行第一伊呂波阪...