2013 March 西班牙．小城古鎮西甲鬥牛 12 天遊

~ 西班牙小城古鎮西甲鬥牛十二天遊 ~

日期: 29/3/2013 - 9/4/2013

自從上年復活節去完土耳其之後, 覺得呢個時候去歐洲真係一個唔錯既選擇, 雖然都仲係凍凍地, 但價錢就比暑假旺季平得多。加上今年復活節檔期只要請三日假就可以去到十日, 咁當然要黎個長線遊啦, 最後決定去南歐既西班牙。西班牙係一個位於歐洲西南面既國家, 西面連接葡萄牙, 東北面連接法國...

今次我地會深入西班牙呢個國家, 黎一次十二天既深度遊... 整個行程由西班牙首都馬德里 (Madrid) 開始, 加上馬德里附近兩個古城﹕托雷多 (Toledo) 同塞哥維亞 (Segovia)。然後向西班牙南部進發, 先到塞維亞 (Sevilla), 再沿住地中海自駕到 Ronda, Nerja 同 Frigiliana 呢三個小鎮, 最後係格拉納達 (Granada) 還車。然後再搭夜火車向巴塞隆拿 (Barcelona) 進發, 最後返回首都馬德里 (Madrid) 再回香港。

今次旅程走遍西班牙兩大城市馬德里、巴塞隆拿同南部既小城古鎮, 睇左六個世界文化遺產, 包括 1. 托雷多歷史城、2. 塞哥維亞老城鎮及其輸水道、3. 塞維亞的主教座堂、王宮和西印度群島檔案館、4. 格拉納達的阿爾罕布拉宮、納里斯王宮和阿爾拜辛、5. 巴塞隆拿的加泰羅尼亞音樂宮和聖保羅醫院、6. 安東尼．高第的作品﹕桂爾公園、桂爾宮和米拉之家、維森斯住宅、聖家堂的誕生立面及地下室、巴特由位宅和桂爾居住區教堂地下室。又去左充滿地中海風情既 Nerja 同 Frigiliana 白色山城, 係呢度可以感受到西班牙既藍天白雲同當地人既熱情, 唔怪得有人話唔去西班牙南部就等同冇去過西班牙, 推薦！另外, 去得西班牙梗係唔少得睇波同西班牙既國粹鬥牛啦, 今次旅程睇左兩場波: 馬德里體育會 VS 華倫西亞、皇家馬德里 VS 利雲特... 因為就唔岩時間, 睇唔倒 FC 巴塞隆拿, 希望日後有機會... 至於鬥牛, 有一點點兒殘忍, 但都值得一看！

在較大的地圖上查看2013西班牙12天

事前準備

準備	備註
申請歐洲旅遊簽証	免簽証
申請國際車牌	不用申請 (因上年到澳洲申請的國際車牌還沒到期，可以再用)
購買機票	購買中國國際航空香港至馬德里來回機票以及巴塞隆拿至馬德里內陸單程機票各兩張
購買旅遊保險	於保誠購買旅遊保險
訂酒店	於網上預約
訂火車	於網上預約並付款
訂球賽、各景點門票	於網上預約並付款
租車	於網上預約
換歐羅	於恆生銀行換購

行程表

		住宿
Day 1	香港 --> 北京國際機場	航機上
Day 2	北京國際機場 --> 馬德里巴拉哈斯 (Barajas) 機場 --> 馬德里 (Madrid) --> 托雷多 (Toledo) 古城 --> 馬德里	Hotel Mora
Day 3	馬德里 --> 塞哥維亞 (Segovia) 古城 --> 馬德里 --> 西甲: 馬德里體育會 vs 華倫西亞	Hotel Mora
Day 4	馬德里 --> 塞維亞 (Sevilla)	Hostal Puerta Carmona
Day 5	塞維亞 --> Ronda --> Frigiliana 白色山城 --> Nerja --> 格拉納達 (Granada)	Pension Alcazaba
Day 6	格拉納達 --> 巴塞隆拿 (Barcelona)	西班牙夜火車 Trenhotel
Day 7	巴塞隆拿	Hostal Bejar
Day 8	巴塞隆拿 --> 蒙塞拉特 (Montserrat) --> 巴塞隆拿	Hostal Bejar
Day 9	巴塞隆拿 --> 馬德里 --> 西甲: 皇家馬德里 vs 利雲特	Hotel Zenit
Day 10	馬德里	Hotel Zenit
Day 11	馬德里巴拉哈斯機場 --> 杜拜國際機場	航機上
Day 12	杜拜國際機場 --> 香港

~Day 1~

29/3/2013 (Friday) 香港 --- 晴

香港 --> 北京國際機場

4:00 pm

期待已久既西班牙之旅出發喇, 懷住興奮既心情到達香港國際機場。

去到機場睇睇水牌, 下... 去北京既航班 DELAY... >.< 拿拿臨剎去 Check in counter, 問問國航既 Staff 趕唔趕得切係北京轉機去馬德里... 個 Staff 話冇問題... 我估大陸航空公司既機票賣到咁平都冇咩人想坐, 就係因為驚佢 DELAY 啦, 始終大陸既服務都冇咩保證...

7:30 pm

原定 5:30 pm 起飛既 CA 110 航班, 終於係 7:30 pm 起飛喇, 機程約三小時, 向北京國際機場進發...

10:30 pm

到達北京國際機場, 沿住轉機既指示牌一路行, 經過安檢 (大陸真係煩, 連轉機都要再 check 多一次), 再走到登機閘口已經十一點幾了 (北京國際機場真係好鬼大), 果真是時間岩岩好啊！我估國航賣機票時應該預計埋航班 DELAY 既時間, 哈哈...

~Day 2~

30/3/2013 (Saturday) 馬德里 --- 晴

北京國際機場 --> 馬德里巴拉哈斯機場 (Madrid Airport Barajas) --> 馬德里 (Madrid) --> 托雷多 (Toledo) 古城 --> 馬德里

12:05 am

飛往馬德里既 CA 907 航班又起飛喇, 勉強食過唔好食既飛機餐之後, 就刷牙訓覺喇...

(以下轉西班牙冬令時間)

4:00 am

訓訓下有個強國小朋友係度喊, 俾佢嘈醒左 >.< 反正都訓唔番, 索性等食早餐啦...

而家西班牙仲係實施緊冬令時間, 當地時間慢香港七小時, 即刻較番隻錶同電話個時間先...

5:35 am

安全抵達馬德里巴拉哈斯機場, 可能太早冇咩機到達, 好快就過左海關順利進入西班牙既首都馬德里喇...

拎埋行理就去搭 metro 出市區...

6:45 am

去到地鐵站先要買飛啦, 我地買左一張 T10 ticket (€12.2) 再加兩個人離開機場既 airport supplement (€3/person)。

T10 ticket 係一張可以俾你搭十程車既飛, 包括地鐵同巴士, 可以轉車一次... 呢張 ticket 仲可以兩個人一齊用, 即係一個人先入閘, 然後交張飛俾第二個人再入閘咁...

至於進出機場, 每人都要另加 €3 附加費...

買完飛就搭 metro 去 Atocha 站, 再走到預先 book 左既 Hotel Mora...

7:30 am

黎到 hotel, 由於太早冇得 check in 住, staff 幫我地 keep 好行理, 我地就出發, 展開我地既西班牙之旅喇！

第一站係太陽門廣場 (Puerta del Sol), 太陽門廣場座落於馬德里市中心, 亦是西班牙公路網絡的中心點。呢度係各國遊客必到既景點之一, 不過由於時間太早, 呢度都仲係冷清清 :p

廣場北面有呢個「熊與草莓樹雕像」, 呢個圖形亦係馬德里既市徽。

廣場南面有國王卡洛斯三世雕像...

穿過橫街窄巷, 經過聖西內斯教堂 (Iglesia de San Gines)...

皇家赤足女修道院 (Convento de las Descalzas Reales)... 過去曾是皇室女性成員既住所, 這些女性成員進入修道院從事藝術方面的工作, 有 d 藝術品亦被遺留下來供人欣賞。

8:45 am

從聖西內斯教堂走入一條小巷就會見到呢間好出名既 Chocolateria San Gines, 係門口已經見到好多遊客在影相...

Chocolateria San Gines 係一間歷史悠久既朱古力油條專門店, 店內幾乎全是遊客, 專程黎試試馬德里這個獨特既朱古力油條早餐呢！

新鮮出爐既油條與香港的油炸鬼差不多, 但今次唔係配白粥, 而係配上香濃既朱古力, 感覺好新鮮, 但我估食得多都會厭呢！

9:15 am

食完朱古力油條就繼續行, 走到主廣場 (Palaza Mayor)。主廣場以前是用來鬥牛和行刑的地方, 而家就變成一個開滿咖啡店和餐廳既熱鬧廣場。不過由於時間尚早, 所以遊客並不多。

廣場中央有菲利浦三世雕像...

穿過 Plaza Mayor 向西走便是從 17 世紀保留下來的市政廣場 (Plaza de la Villa), 這個廣場的規模比 Plaza Mayor 小很多, 相中右邊的是市政廳 (Ayuntamiento), 左邊的是西斯奈羅之家 (Casa de Cisneros)。西斯奈羅之家是一棟具有 16 世紀複雜花葉形裝飾的銀匠式風格建築。

市政廣場後方有一座外形曲線十分迷人, 且具有 18 世紀巴洛克建築風格既聖米蓋爾大教堂 (Basilica de San Miguel)...

9:45 am

經過阿爾穆德納大教堂 (Catedral de Nuestra Senora de la Almudena), 呢座教堂於 1992 年才建成, 所以外觀比較現代化。由於整個教堂缺乏歷史既痕跡, 所以冇咩旅遊書介紹... 我地亦都只係過門而不入...

大教堂旁是馬德里既皇宮 (Palacio Real), 前身是阿拉伯王朝軍事堡壘, 哈布斯楚王朝的宮殿。當 1734 年舊皇宮被燒毀後, 當時的皇帝菲利浦五世 (Felipe V) 便決定建造一座全歐洲最美麗和規模最大的宮殿, 可是當他去世時, 這座皇宮只是建成了原本計劃的四分之一 (但是已經有 2800 個房間), 因此這座皇宮也只算是半制成品罷了。西班牙皇室現已搬離這座皇宮, 現在對外開放, 供遊客參觀。我地見冇咩特別, 所以只係外面影相。

10:15 am

離開皇宮繼續走到東方廣場 (Plaza de Oriente), 廣場內有噴泉和國王腓力四世騎馬既雕像。

東方廣場後方就是皇家劇院 (Treatro Real)...

10:50 am

再走到王室化身修道院 (Monasterio de la Encarnacion), 此修道院建於 17 世紀, 其特別之處是內裡收藏了很多聖物。每年既 7 月 27 日, 此修道院都會展示聖潘達萊昂血液溶化的奇景, 吸引了大量既信徒和遊客黎參觀。

11:00 am

又再走回太陽門廣場, 此時既太陽門廣場比今早的熱鬧多了... 除左已堆滿大量既遊客之外, 仲有好多卡通人物同街頭表演...

12:00 pm

行左成朝, 差不多睇晒馬德里既主要景點洛... 唔係跨張架, 其實馬德里景點不多, 我地對博物館興趣又不太... 所以係馬德里既頭兩日, 我地都分別安排左兩個古城半日遊﹕托雷多 (Toledo) 古城同塞哥維亞 (Segovia) 古城。

今日先去托雷多 (Toledo) 古城, 搭 metro 到 Plaza Eliptica Station, 然後再轉搭 Alsa bus, 大約四十五分鐘就可直達 Toledo 喇。

去到 Plaza Eliptica Station, 沿住指示找到 Alsa bus 既售票處。我地買左兩張來回票 (return €9.39/person), 好處係比分開買兩張單程票平, 同埋回程唔駛再排隊買飛。

12:30 pm

買完飛就去排隊搭車喇... 基本上去 Toledo 既巴士, 每隔三十分鐘就有一班, 如果多人上唔倒車等下一班都唔會話要等好耐既...

1:15 pm

Toledo 是西班牙中部的世界文化遺產古城, 位於馬德里西南約 70 公里, 曾經是中世紀卡斯提亞王國 (Reino de Castilla) 的首都, 可以說是西班牙歷史文化的縮影, 在豐富的猶太教、回教、基督教和摩爾人文化交會衝擊之下, 具有豐富的中古世紀特色。

到達 Toledo 巴士站... 落左車諗住拎張地圖, 點知巴士站係冇 Information Centre 既... 咁問題都不大既, 我地向住古城個方向行, 沿途都有好多人, 好快就到左古城入口喇...

2:15 pm

經過古城入口, 慢慢走到舊城區中心既蘇克德貝爾廣場 (Plaza de Zocodover)。

蘇克德貝爾廣場 (Plaza de Zocodover)... 這個熱鬧廣場在阿拉伯統治時期, 曾是一個牲畜市集, 後來變成了鬥牛和宗教審判既地方。現在廣場四周都是房屋和餐廳, 亦是遊客休息既好地方。

3:40 pm

走上托雷多阿爾卡薩爾城堡 (Alcazar), 這座城堡位於托雷多的最高點, 早期是羅馬人的宮殿。1882 年一度成為軍事院校, 直至 1936 年西班牙內戰時, 城堡幾乎完全被摧毀, 之後佛朗哥將其重新改建成現今的國立軍事博物館。我地對軍事冇咩興趣, 所以只在外邊影影相。

4:00 pm

黎到 Toledo 古城, 不得不錯過的就是這座托雷多聖母主教座堂 (Catedral de Toledo)。這座大教堂位於舊城區中心, 建於 1226 年, 是一座哥德式建築。教堂入口是由三道門組成, 由左至右分別是「地獄之門」(Puerta del Infierno)、「赦罪之門」(Puerta del Perdon) 和「審判之門」(Puerta del Juicio)。

大教堂前就是市政廣場 (Plaza del Ayuntamiento)... 旁邊的是市政廳 (Ayuntamiento de Toledo)...

4:45 pm

另外一個不可錯過既景點就係聖多美教堂 (Iglesia de Santo Tome), 聖多美教堂是 14 世紀住在托雷多的阿拉伯人所建的穆德哈爾風格建築, 內裡珍藏著格雷戈 (El Greco) 的名畫《奧爾加斯伯爵的葬禮》。《奧爾加斯伯爵的葬禮》被公認為世界名畫之一, 是 1586 年聖多美教堂的神父委託格雷戈所作, 以紀念已經死去 200 年、並曾為教會捐獻過大筆資金的托雷多貴族奧爾加斯伯爵。

繼續穿梭於托雷多既大街小巷...

5:15 pm

聖胡安皇家修道院 (Monasterio San Juan de los Reyes)... 建於 1477 年, 是當時既國王伊沙貝爾和費南多為了突顯皇權和鞏固天主教在西班牙的地位而興建的。

再走到托雷多外圍的聖馬丁橋 (Puente de San Martin)...

6:00 pm

Iglesia San Roman

Plaza del Cardenal Siliceo

7:00 pm

走回 Toledo coach station, 搭巴士回馬德里...

7:45 pm

大約四十五分鐘又返到黎馬德里喇, 搭 Metro 到 Anton Martin Station。

8:30 pm

行到鬼死咁累, 其實都冇咩胃口, 黎左呢間網友介紹既餐廳 Museo del Jamon, 試左西班牙出名既火腿, 好咸呀...

9:40 pm

返回 Hotel, 於 reception 當值的 staff 已不是今朝的那個... 取回今朝已寄存的行理便回房間休息。

~Day 3~

31/3/2013 (Sunday) 雨

馬德里 --> 塞哥維亞 (Segovia) 古城 --> 馬德里 --> 比森特．卡爾德隆球場 (Estadio Vicente Calderón) --> 西甲: 馬德里體育會 VS 華倫西亞

(以下轉西班牙夏令時間)

7:30 am

黎左西班牙一日咁大把, 冬令時間就已經結束... 今日西班牙開始實施夏令時間, 7:30 am 起身...

8:00 am

今日會先黎個塞哥維亞 (Segovia) 古城半日遊, 然後再番黎馬德里睇西甲, 諗起都興奮啊！

搭 metro 到 Principe Pio Station, 再轉搭巴士到 Segovia。

8:45 am

同去 Toledo 一樣, 到左 Principe Pio Station 就去搵巴士啦... 不過今次指示冇咁清楚, 我地搵黎搵去都搵唔倒去 Segovia 既售票處... 最後問左個當地既女士, 幸好佢識少少英文同埋知道個售票處係邊... 買左兩張來回車票 (return €14.22/person), 又係比分開買兩張單程票平架...

9:00 am

搭九點開出的巴士 Le Sepulvedana Coach, 一個鐘多 d 就到左 Segovia 喇。

其實去 Toledo 同 Segovia 都有兩種方法, 一是坐火車, 車程較短, 二是坐巴士, 車程較長。去呢兩個古城, 我地都選擇坐巴士, 因為巴士站比較接近要去既景點, 而且車資比火車便宜。搭火車係就係快 d, 但火車站唔近景點, 到時都要再轉搭市內巴士, 加埋都係差不多時間。

10:15 am

被列為世界文化遺產既 Segovia 係公元前 80 年已經建立起來, 並由羅馬人統治, 後來更成為羅馬在伊比利半島中一個重要既城鎮, 期間經歷了多次戰爭。之後 Segovia 受到西班牙皇室既喜愛, 曾被定為國王登基的地方, 可惜到左 16 世紀, 因為革命又再次令 Segovia 走向衰落。直至 1960 年代, 因為遺留下來既遺跡如羅馬水道橋而令旅遊業繁榮起來。古城面積不大, 但大部分既觀光景點都好出名﹕羅馬水道橋 (Acueducto)、大教堂 (Catedral) 同阿卡乍城堡 (Alcazar)。另外, 呢度既烤乳豬非常出名, 黎到 Segovia 一定要試試！

落車後見到 Information Centre, 走去拎張地圖, 那裡的人還建議我們先到最遠既城堡參觀, 然後經過大教堂, 吃個烤乳豬, 再走回羅馬水道橋, 最後搭巴士回馬德里。

10:50 am

我地聽取意見, 第一站先走到最遠既塞哥維亞阿卡乍城堡 (Segovia Alcazar)。阿卡乍城堡是一座造型獨特的石砌城堡, 位於塞哥維亞舊城西北方, 艾雷斯馬河 (River Eresma) 與克拉摩列斯河 (River Clasmores) 交會處岩山上。13 世紀建築完成之後, 仍不斷重新改建。這座城堡最初只是一個堡壘, 後來用作王宮、監獄、皇家炮兵學院和軍事學院。迪士尼電影 "白雪公主" 出現的城堡便是以此座城堡作為參考。

進入城堡參觀要買票, 每人 €4.5, 上城堡 Tower 另加 €2。售票處在城堡旁這座建築物內...

城堡內部...

再走上城堡 Tower, 欣賞 Segovia 城鎮既美...

離開城堡時, 忍不住再用另一角度拍攝城堡既樣貌...

12:00 pm

參觀完城堡就走到大教堂 (Segovia Cathedral)... 大教堂始建於西元 11 世紀, 完成於 16 世紀, 是西班牙境內最晚落成的哥德式教堂... 正想入內參觀時, 門口職員說參觀時間已過, 要待下午兩點再開放 >.<

12:25 pm

遇著復活巡遊... 又湊下熱鬧先...

12:30 pm

聖馬丁廣場 (Plaza de San Martin)

12:45 pm

由於食烤乳豬既餐廳仲未開門, 所以先走到阿索格霍廣場 (Plaza de Azoguejo) 睇睇羅馬水道橋...

1:00 pm

一點喇, 再走回 Casa Duque 餐廳... 其實 Segovia 有好幾間出名食烤乳豬既餐應, 我地選擇這間是因為 Lonely Planet 都推薦佢...

點了一份烤乳豬和一份魚...

烤乳豬果然不錯, 皮脆肉嫩, Lonely Planet 果然冇介紹錯！

2:00 pm

食飽飽後就參觀埋最後一個景點 - 位於阿索格霍廣場 (Plaza de Azoguejo) 既羅馬水道橋 (Roman Aqueduct)...

羅馬水道橋顧名思義就是一座從古羅馬時期遺留下來既遺跡, 建於公元 1 世紀, 全長 728 公尺, 最高達 28.5 米, 用 167 個拱門支持著。其水源來自 17 公里外的冷水河 (Fuente Fria), 然後通往舊城的城堡 (Segovia Alcazar)。

水道橋乃塞哥維亞最重要的標誌性建築, 二千幾年黎都一直運作良好, 為塞哥維亞提供了水源。到左 20 世紀, 水道橋受到汽車污染的損害, 花崗岩受到侵蝕。在修復工程完成後, 水道橋雖不能繼續供水予古城, 但亦能完整咁保存落黎, 而阿索格霍廣場成了行人專用區。

2:30 pm

走回 Coach Station, 搭巴士回馬德里...

4:30 pm

返回馬德里後就到狄寶神殿 (Temple of Debod)... 呢個神殿係埃及政府為答謝西班牙於興建橫跨尼羅河之亞斯旺水壩時期, 對挽救沿河之古蹟的貢獻而送贈的。神殿係免費參觀, 但由於神殿面積細小, 職員會限制入內參觀既人數, 待有遊客出來, 就會讓排緊隊既人入去架喇... 對於去過埃及既我地, 這個神殿梗係冇咩睇頭啦, 不過唔駛錢就入一入去啦！

5:00 pm

再走到西班牙廣場 (Plaza de Espana)... 此時落起毛毛細雨來...

西班牙廣場後面有個小市集...

逛逛熱鬧既格蘭大道 (Gran via)... 此時雨越落越大... >.< 連相都冇影 tim...

7:00 pm

出發去睇波... 搭 Metro 到 Piramides Station... 係 metro 見到好多馬體會球迷啊！

7:30 pm

到左 Piramides Station 就要行去馬體會主場既比森特．卡爾德隆球場 (Estadio Vicente Calderón), 原本都驚唔識行, 但基本上跟住 d 球迷, 就一定冇錯。

比森特．卡爾德隆球場 (Estadio Vicente Calderón) 係西班牙球會馬德里體育會所擁有既球場, 於 1966 年落成, 可容納五萬多人。

之前係 ticketmaster 買左飛, 去到售票處講個信用卡 number 佢聽就可以拎到飛喇...

9:00 pm

今場比賽係西班牙甲組聯賽馬德里體育會對華倫西亞 (Atl Madrid vs Valencia), 焦點當然落在馬體會前鋒法卡奧身上啦...

開波啦...

開場八分鐘已經平手 1:1...

兩隊波表現平均, 睇到完場都仲係 1:1... >.<...

散場就走回 metro station, 初時都驚好多人會搭唔倒車 (係香港大球場睇完波走時都幾迫架嘛...)... 點知去到 metro station 已有警察在控制人潮, 隔一段時間先放人入去地鐵站, 以防地鐵站內太多人... 入到站仲有個驚喜, 就係搭車唔駛錢... 可能想快 d 疏散人潮掛？

11:40 pm

好快就番到 Hotel 喇... 沖埋涼就休息。

~Day 4~

1/4/2013 (Monday) 晴

馬德里 --> 塞維亞 (Sevilla) --> 塞維亞大教堂 (Catedral de Sevilla y La Giralda) --> 塞維亞城堡 (Alcazar) --> 西班牙廣場 (Plaza de Espana)

6:00 am

今天會出發往西班牙南部既 Sevilla, 一早就要 Wake up 喇...

6:35 am

拖住行理走到 Madrid-Puerta De Atocha 火車站, 往 Sevilla 既火車都係呢個火車站開出既...

7:00 am

一早已係 Renfe 官網買左平飛, 預先 print 埋張飛出黎就可以直接上火車, 唔駛再去換飛架喇...

Renfe AVE02070 列車, 於 7:00 am 出發, 向 Sevilla 進發...

9:30 am

到達 Sevilla Santa Justa 火車站... Sevilla 的旅遊景點都唔近火車站, 所以大部份既酒店都唔近火車站既, 我地預先印好晒地圖, 拖住行理離開火車站向酒店出發喇...

10:15 am

行左大約十五至二十分鐘啦, 終於見到我地 book 左既酒店 Hostal Puerta Carmona。呢間酒店規模細小, 房間整潔, staff 好 nice, check in 後仲好有耐性咁建議我地遊覽 Sevilla 既路線 tim... 我地於房間稍作休息就出發喇！

穿梳於 Sevilla 既大街小巷之中...

11:00 am

塞維亞 (Sevilla) 係西班牙南部安達魯西亞 (Andalucia) 自治區首府, 人口約一百三十萬人, 是西班牙第四大城市。Sevilla 係鬥牛同佛朗明哥既發源地, 因地理位置關係, 深受回教文化影響, 所以到處都是回教風格既建築, 其中以大教堂最具代表性。

第一站黎到薩爾瓦多廣場 (Plaza Salvador), 於羅馬人統治時期曾是羅馬廣場, 如今變成有好多商店和酒吧既旅遊勝地。廣場中央有一座紅色既巴洛克式建築 - 薩爾瓦多教堂 (Parroquia del Salvador), 教堂建在伊斯蘭教清真寺遺趾上 (教堂於回教徒統治時期曾是清真寺), 地基仍使用原來清真寺既柱子, 但地上既建築則只保留了尖塔和一部分庭園。

11:20 am

從薩爾瓦多廣場再繼續走, 走到 Sevilla 最熱鬧既新廣場 (Plaza Nuvea)。

位於新廣場既市政廳 (Ayuntamiento)...

市政廳前既聖法蘭西西斯科廣場 (Plaza del San Francisco)... 這個廣場曾經是宗教裁判和執行火刑的地方...

由聖法蘭西西斯科廣場繼續向大教堂方向走...

12:10 pm

接著是 Sevilla 既重頭戲 - 世界文化遺產塞維亞大教堂 (Catedral de Sevilla y La Giralda)。塞維亞大教堂是一座哥德式教堂, 是西班牙第一大教堂, 也是世界第三大教堂, 與梵蒂岡既聖彼得大教堂、倫敦既聖保羅大教堂齊名, 於 1987 年被列為世界文化遺產。塞維亞大教堂的所在地原是一座清真寺, 完成於 1198 年。到了 1248 年, 基督徒奪回 Sevilla 後將清真寺改建為天主教堂。直至 1401 年被計劃重建, 1402 年開始動工, 直到 16 世紀完成並成為世界最大既教堂之一。教堂內殿高 42 米, 裝飾極為華麗。

排隊買票然後開始參觀大教堂...

教堂內部空間極大, 主要有王室座堂、主座堂、珍藏館、祈禱廳、聖器收藏室等等。

教堂正中間的是王室座堂, 當中的主祭壇佈滿呈現基督誕生、受難及死亡的華麗浮雕, 可見這主教堂的財力是多麼的龐大。祭壇正中還安放了一座代表塞維亞地方保護神 "國王聖母" 的木刻雕像。雕像前有三個王室成員的骨灰盒, 中間一個銀制骨灰盒是費爾南多三世（1217 - 1252 年在位）國王的遺骨, 兩旁分別是皇后和兒子阿方索十世（1252 - 1230年在位）的骨灰盒。

教堂既拱形圓頂表面都佈滿了富麗堂皇的複雜紋樣裝飾...

教堂內還有哥倫布的墓穴, 他的墓穴由哥倫布航海時代四大王國的國王的青銅雕像扛著, 他們分別是右前方的卡拉提斯 (Castilla)、左前方的亞拉岡 (Aragon) 和後方的萊昂 (Leon) 和那瓦爾 (Navarra)。

教堂既珍藏館內有很多雕刻作品、油畫...

這是莫里歐的作品﹕受胎聖母 (Inmaculada)

1:10 pm

門票還包上教堂既希拉爾達塔 (La Giralda), 它是一座清真等尖塔... 上到塔頂向外望, 眼中所見就是 Sevilla 呢個咁美麗動人既古城...

2:00 pm

不愧為世界三大教堂, 參觀左差不多兩小時, 要食 Lunch 喇... 隨意挑選這間 Genova 餐廳, 味道不錯！

3:00 pm

食飽飽繼續行程, 下一站係 Sevilla 第二重頭戲 - 塞維亞城堡 (Alcazar)。這座城堡在十世紀前已經屹立在 Sevilla 上, 回教徒佔領 Sevilla 後, 他們對城堡作出多次的改建和擴建, 使它帶有濃厚的中東色彩。基督教教徒奪回 Sevilla 後, 他們沒有拆卸城堡, 反而當作君主的寢宮, 後來的國王更在城堡內加上哥德式建築, 在城堡外興建了花園。現在的城堡除了開放給遊客外, 也是接見外國使節的地方。

城堡門外...

購票後進入城堡中庭...

走入參拜廳 (Sala de Audiencias), 內有一幅描述哥倫布、西班牙國王和美洲土人在聖母的保護下發現美洲的作品...

使節廳 (Salon de Embajadores)... 它就是國王接見外國使節的地方...

正義之廳 (Sala de la Justicia)...

卡洛斯五世宮殿 (Salones de Carlos V)... 宮殿是國王和大臣開會的地方, 宮殿外是一個大花園...

宮殿內有一間拱頂廳 (Sala de las Bovedas) 和一間掛滿了巨大掛毯的掛毯廳 (Salon de Tapices)...

4:20 pm

參觀完城堡, 走到大教堂和城堡旁既聖十字區 (Barrio de Santa Cruz)。於西元 13 世紀時, 天主教從回教徒手中奪回 Sevilla, 當時既國王把猶太人聚集於此。到了 15 世紀, 猶太人被強制驅離西班牙, 聖十字區就變成富商居住既地方。

4:45 pm

下一站是西班牙廣場 (Plaza de Espana)... 這個廣場是為了1929 年的世界博覽會而興建的, 由 1911 年開始建造, 花了八年時間才完成！

每一個西班牙城市既歷史同位置都被繪畫在磁磚上, 各具特色。

呢個廣場真係好大, 此時見到一個香港旅行團, 我在想, 如果跟團就好了, 等陣就可以上車抖抖了！

5:45 pm

再慢慢走到瓜達爾基維爾河 (Rio Guadalquivir), 呢度有一座黃金塔 (Torre Del Oro), 是 13 世紀時期由回教徒興建的一座瞭望塔, 現今改建為一座航海博物館。

黃金塔 (Torre Del Oro)

河邊有好多人跑步, 我地呢個時候又行到冇咩力, 正好坐係度休息一下, 欣賞下河邊既景色。

6:15 pm

休息完又繼續行, 走到 Sevilla 既鬥牛場 (Plaza de Toros de la Real Maestranza)... 由於入內參觀要俾錢, 我地之後亦會返回馬德里睇鬥牛, 所以都冇入去參觀, 只在外邊影相算了。

6:45 pm

行左成日, 又累又肚餓, 係時候食 dinner... 又隨意找了一間 Don Juan 餐廳, 叫了多個 Tapas 西班牙小菜, 再加杯西班牙特飲 Sangria, 正！

8:15 pm

黎到西班牙, 第一會諗起鬥牛, 第二就是佛朗明哥舞 (Flamenco)。Sevilla 就係 Flamenco 既發源地, 黎到 Sevilla 又點可以唔睇呢... 之前係網上搵料, 睇下邊度睇 Flamenco 好啦, 後來睇到有網友介紹, 話有間酒吧有免費 Flamenco 睇, 咁唔駛錢, 叫做睇過下都好啦... 咁我地食飽飽就去搵呢間 La Carboneria 酒吧喇...

雖然印定地圖, 但係 Sevilla d 街道又多又窄, 搵左好耐都搵唔倒, 最後問左個當地人, 佢唔識英文但都好用心咁指俾我地睇, 我地最後都搵到喇... 黎到都係八點三, 個天都仲未黑, 入到去好似冇咩人咁既... 斷估 d 人唔會咁早黎飲酒掛... 再睇真 d, 有個牌寫住 "Flamenco Show at 10 pm"... 再問多次酒吧既 staff, 佢話個 show 係十點鐘開始, 咁我地就諗住番酒店沖涼先, 等夠鐘再黎過...

10:00 pm

差唔多十點又出動, 走回 La Carboneria 酒吧, 今次入到黎, 成個酒吧已坐滿人... 我地搵左兩個後排位置坐低, 叫左一杯 Sangria 同一杯可樂就等睇 show 喇...

表演開始喇... 首先係結他表演, 慢慢舞者加入... 熱情有力既步伐、腳踏地板既聲音與氣勢都令在場人士大拍手掌...

11:00 pm

回酒店休息。

~Day 5~

2/4/2013 (Tuesday) 晴

塞維亞 --> Ronda --> Frigiliana 白色山城 --> Nerja --> 歐洲陽台 (Balcón de Europa) --> 格拉納達 (Granada)

7:00 am

Wake up...

今日會離開 Sevilla, 展開為期一天既西班牙南部自駕之旅, 向地中海沿岸既三個城鎮 Ronda, Frigiliana 同 Nerja 進發。check out 之後就拖行理走回 Sevilla 火車站...

8:10 am

我地出發前已向 Eurocar 租左一架細車, Eurocar 既 office 就係火車站入面... 辦好手續之後, staff 就話我地聽個停車場係邊, 叫我地自已去拎車... 如果係日本租車職員一定會帶我地去停車場 :p

8:45 am

Eurocar 果真是大公司, 個停車場好大, Eurocar 佔左大部分車位呢！

搵到我地架戰車喇... 係標緻 208 啊！細心檢查車子, 見車尾有少少花, 同駐場個職員講, 佢幫我地記低係租車份文件上。

搬行理上車, 裝好 GPS (GPS 是私伙來的, 因在歐洲租車係唔包 GPS, 要每日另外計錢的, 又諗起日本既好 :p), 一切準備妥當, 向 Ronda 進發！

Ronda 位於西班牙南部馬拉加省分 (Provincia de Malaga), 是西班牙最古老既城市之一。Ronda 建於海拔約 750 公尺的巨大山岩上, 貫穿其間既 Rio Guadalevin 河將 Ronda 一分為二, 並造成了一個深度超過 100 公尺既埃爾塔霍峽谷 (El Tajo Gorge)。如此優越既地勢讓此城市易守難攻, 在防禦上佔盡優勢, 於摩爾人統治時代, Ronda 亦是西班牙最後一個投降既城市。

10:30 am

歐洲 d 路都好易行, 公路既指示牌好清楚, 差唔多兩個鐘就黎到 Ronda 既 Plaza del Socorro。我地將車泊係廣場既地下停車場, 應該比泊在街安全吧！

泊好車, 就開始 Ronda 古城之旅。第一站自然就是 Plaza del Socorro...

廣場旁既教堂 Iglesia del Socorro...

11:15 am

Ronda 鬥牛場 (Plaza de Totrs), 為西班牙最古老既鬥牛場之一, 於 1785 年開放。同 Sevilla 一樣, 都係要俾錢參觀, 冇入去！

影完鬥牛場, 正想走向新橋時, 見到一個日本旅行團向山邊方向走去, 咁我地又跟住走, 原來果度有個觀景台...

11:45 am

Ronda 被 El Tajo Gorgen 峽谷一分為二, 峽谷既南邊為舊城區 (La Ciudad), 北邊為新城區 (即 Plaza del Socorro、鬥牛場那邊)。舊城區同新城區之間主要靠三道橋樑連接﹕摩爾時期興建既羅馬橋 (Roman Bridge)、17 世紀既舊橋 (Puente Viejo) 同完成於 18 世紀末既新橋 (Puente Nuevo)。

新橋 (Puente Nuevo) 建於 1751 年, 工程維持了 42 年, 為三道橋樑中最高的一座, 高約 120 公尺, 是 Ronda 知名地標。

過了新橋就是 Ronda 既舊城區 (La Ciudad)... 一個充滿濃厚回教風味既舊城區...

12:15 pm

聖母瑪利亞主教堂 (Iglesia de Santa Maria la Mayor)... 此座教堂原是回教清真寺, 於 1485 年天主教徒佔領 Ronda 時破壞了原寺大部分建築, 並在同一地點上興建了這座教堂。

12:30 pm

經過菲利普五世之門 Arco de Felipe V (Arch of Philip V), 此城門以當時 Borbon 王朝首位國王 Philip V 而命名的。

穿過城門就是一個漂亮既白色城鎮...

羅馬橋 (Roman Bridge)

十六世紀的 Iglesia de Padre Jesus...

1:00 pm

再走到 Jardines de Cuenca (Garden of Cuenca), 係呢個公園可用另一個角度去欣賞新橋...

舊橋 (Puente Viejo)... 建於 1616 年, 係 Ronda 最古舊既橋, 知名度亦不及新橋...

1:15 pm

由於今日行程緊迫, 所以係時候離開 Ronda 喇... 但係又好肚餓喎, 都係食埋 Lunch 先走啦... 回程路上找了這間餐廳 La Terminal, 點了個西班牙海鮮炒飯... 嘩, 一個字, 咸 >.<

2:00 pm

食完 Lunch 就返回停車場, 再向下一個目的地進發 - Frigiliana 白色山城！

3:45 pm

黎到 Frigiliana, 泊好車子就再出發！

順著山坡直上, 路旁有好多特色手信店...

再沿住石級一路上, 兩旁都是白雪雪既屋仔, 好靚呀！

眼前呢個面向地中海既白色山城, 簡直令人嘆為觀止, 十分推薦！如果大家時間許可, 係呢度住番一晚都真係唔錯架！

5:00 pm

離開 Frigiliana 駛往 Nerja, 一個距離 Frigiliana 只有約十五分鐘車程既著名渡假城市, 到達後將車泊係歐洲陽台附近既停車場。

5:30 pm

Nerja 既歐洲陽台 (Balcón de Europa) 面向地中海, 係著名既渡假勝地。每年既夏天, 世界各地既遊客都蜂擁而至, 為的是 Nerja 宜人既氣候、漂亮既海岸、純樸既漁村風貌。

6:30 pm

南部自駕之旅係時候要結束了, 我地要趕往今晚落腳既 Granada, 所以要渣車走人喇。為左南部 Ronda, Frigiliana 同 Nerja 呢三個城市, 我地刻意租了一日車, 雖然提高左旅費, 但我地都覺得超值, 去旅行就是要放眼世界, 去唔同地方睇 d 唔同既野嘛... 尤其呢三個城市真係好靚, 好有特色。由於交通唔係咁方便, 加上旅行團都未必會黎, 所以今日都冇見過中國人咁濟, 只係見到日本同韓國人... 係 Frigiliana 有個小朋友仲同我講﹕Kon-ni-chi-wa... tim ^.^

8:30 pm

到左 Granada, 先到 Pension Alcazaba 放低行理, 然後再去還車啦。Pension 主人幫我地辦好 check in 手續之後, 就問我地明天是否要去阿爾罕布拉宮 (La Alhambra)... 咁黎得 Granada, 當然就係為左佢啦... 原來 Pension 主人好好人, 佢得知我地 book 左 1:30 pm 參觀納里斯王宮 (Palacio Nazaries), 佢就提議我地明天出門口既時間同埋參觀阿爾罕布拉宮既路線。

9:00 pm

同 Pension 主人傾完之後, 我地就去入油...

9:20 pm

然後就駕車到 Granada 火車站還車喇... 係歐洲租車同係日本租車有少少唔同, 你可以係租車公司關門後還車都得, 只要泊入 Eurocar 既停車場, 同時將入閘張 ticket 放埋係架車度就 ok 架喇... 不過黎到火車站都天黑, 我地搵唔倒 Eurocar 個停車場... 最後要去問警察, 但佢 d 英文唔得, 咁佢搵左個女人幫手, 好彩個女人識英文, 又好彩佢知個停車場係邊喎... 原來 Eurocar 個場就係火車站旁, 但太黑睇唔倒佢個牌...

10:00 pm

泊好車都差唔多十點洛... 隨便在 Pension 附近找了一間餐廳 San Francisco II 食 Dinner...

11:00 pm

回 Pension 休息。

~Day 6~

3/4/2013 (Wednesday) 陰

格拉納達 --> 阿爾罕布拉宮 (La Alhambra) --> 阿爾拜辛區 (Albayzín) --> 巴塞隆拿 (Barcelona)

9:30 am

今天行程比較鬆動, 可以訓到九點半 ^.^ 出發時補番張 pension 既相先...

10:45 am

走到格蘭大道搭 30 號巴士上山, 終點站就係阿爾罕布拉宮。

11:10 am

Granada 既旅遊景點不多, 但著名既世界文化遺產 - 阿爾罕布拉宮 (La Alhambra y el Generalife) 就屹立在此。由於遊客實在太多, 阿爾罕布拉宮每天限制了參觀納里斯王宮 (Palacio Nazaries) 既人數, 為免山長水遠黎到至話買唔倒飛, 我地出發前已經係網上買左 Daytime visit 既 ticket, 兼預約左參觀納里斯王宮既時間。Daytime visit ticket 包括參觀阿爾罕布拉宮既所有範圍, 參觀時間為 8:30 am 到 2:00 pm, €13/person, 網上買票另加手續費。到左參觀王宮既預約時間, 就可以去到王宮門口排隊入場架喇。

黎到售票處, 你會見到有兩條隊, 一條係好多人排既即場票 (右手邊), 一條係比較少人排既已售票 (左手邊)... 我地當然係排少人果條啦

好快去到 counter, 出示信用卡就可入場喇...

11:20 am

阿爾罕布拉宮 (La Alhambra) 號稱世界上最美麗既阿拉伯宮殿, 於 13 世紀開始興建, 起左百幾年。La Alhambra 意思是紅色的城堡, 係夕陽映照下, 它會被照射成瑰麗既紅色, 故有此名稱。它主要分為四個部分: 庭園 (Generalife)、城堡 (Alcazaba)、卡洛斯五世宮殿 (Charles V Palace) 同埋納里斯王宮 (Palacio Nazaries)。

入場後, 我地首先參觀庭園 (Generalife) 部分...

12:20 pm

再沿指示牌向城堡 (Alcazaba) 方向走...

經過 Church of Santa Maria de la Alhambra...

穿過 Wine Gate 就係城堡既範圍喇...

走上城堡既瞭望塔... 可以欣賞山下既阿爾拜辛區 (Albayzín)...

Military Quarter

見未夠鐘參觀王宮, 就先到卡洛斯五世宮殿 (Charles V Palace)。呢個宮殿是後來加蓋的, 是一座宏偉既文藝復興時期建築。於 1526 年, 卡洛斯國王在蜜月旅行時到了阿爾罕布拉宮, 佢好鍾意呢個地方, 便下令係呢度起一個宮殿。

宮殿內部係圓形兩層建築...

1:30 pm

到左 1:30 pm, 我地就走到納里斯王宮門外排隊喇...

1:45 pm

整個阿爾罕布拉宮既心臟地帶就是納里斯王宮 (Palacio Nazaries), 建於 14 世紀。

進入左王宮, 到達既第一個房間就是梅斯亞爾廳 (Sala del Mexuar), 這裡是行政與司法既辦事處, 石壁上到處雕刻著由可蘭經文所變形而成的複雜圖騰。

黃金廳 (Cuarto Dorado)

桃金孃中庭 (Patio de los Arrayanes)... 呢度係從前國王接見大臣既地方, 如果陽光充足, 水中可清楚看見宮殿同樹木既倒影, 為王宮內最美麗既景觀之一。

使節廳 (Sala de los Embajadores)... 接待外賓既場所, 廳內既牆壁全是雕工精緻、金碧輝煌既可蘭經文圖騰。

雙姐妹廳 (Sala de las Dos Hermanas)... 蘇丹國王嬪妃既居所, 此廳的八角形天井採星形設計加上鐘乳石裝飾而成, 被譽為伊斯蘭建築最美麗既屋頂, 很是華麗。

獅子宮 (Patios de Leones)... 國王既私人客廳, 圍繞獅子宮的都是大理石柱, 石柱上的拱門刻滿了回教圖案和經文詩句, 中央有 12 頭獅子雕像, 故被稱為獅子宮。

2:30 pm

離開阿爾罕布拉宮, 由於係落山, 所以今次選擇行路, 慳番一程車錢。

3:00 pm

走到山腳既新廣場 (Plaza Nueva) 搵食 (仲未食 lunch >.<)... 選了一間土耳其餐廳食 pizza... 味道唔錯！

3:45 pm

食飽飽就向充滿回教色彩既阿爾拜辛區 (Albayzín) 進發。阿爾拜辛區係回教徒最初在 Granada 落腳既地方, 即使後來天主教徒佔領左 Granada, 在阿爾拜辛區既回教城牆和花園仍被保留下來。區內大部分地方舖上鵝卵石, 加上一些新建成既古典花園別墅, 整個社區彷彿仍然停留在十五世紀裡。

Real Chancilleria

採用清真寺尖塔既聖阿娜教堂 (Iglesia de Santa Ana)

4:00 pm

格拉納達主教座堂 (Catedral de Granada)

沿途有好多特色手信店...

4:45 pm

聖米蓋爾巴赫廣場 (Placeta de San Miguel Bajo)

5:30 pm

聖尼古拉斯教堂 (Iglesia San Nicolas)

係聖尼古拉斯教堂前有個小廣場, 係呢度可以一睹阿爾罕布拉宮既全貌。

6:00 pm

薩爾瓦多教堂 (Colegiata del Salvador)

7:00 pm

行左幾個鐘, 走回新廣場附近搵食。

入左一間裝修不錯既餐廳 EL Generalife, 食物都好味！

8:15 pm

由於今晚會搭夜火車到巴塞隆拿, 見仲未夠鐘, 又再周圍行下。

8:30 pm

走回 Pension 取行理, 然後走到 Granada 火車站。

9:30 pm

今晚會搭 Renfe TrenHotel 00894 列車前往巴塞隆拿, 二人一房, 有得沖涼, 訓醒就到巴塞, Good！如果想好似我地咁, 兩個人住一間房, 又有得沖涼既, 買飛時揀 Cama Preferen 同 Doble Familiar 就得架喇... 我地仲好好彩, 之前係網上撞岩有 promotion, 票價只是正價 (€111/person) 既一半 :p

~Day 7~

4/4/2013 (Thursday) 晴

巴塞隆拿 --> 魯營球場 (Camp Nou Stadium) --> 米拉之家 (Casa Mila) --> 巴特由之家 (Casa Batllo) --> 加泰隆尼亞音樂廳 (Palau de la Musica Catalana) --> 巴塞隆拿大教堂 (Catedral de Barcelona) --> 蘭布拉大街 (La Rambla) --> 港口 (Port Vell)

8:39 am

雖然夜車中途都有停站, 但我訓到成隻豬咁都唔多覺 :p 朝早 8:39 am 準時到達 Barcelona Sants Train Station。

9:15 am

離開左充滿地中海風情既西班牙南部, 黎到西班牙第二大城市以及加泰隆尼亞自治區首府巴塞隆拿, 繁忙既火車站、人來人往既街道又再次出現係眼前... 先到 Hostel check in 先... 今次 book 左呢間 Hostal Bejar, 又係貪佢近 metro 同埋去機場既巴士站...

9:30 am

去到 Hostel 未夠鐘 check in, 只好放低行理... 然後就開始巴塞之旅喇... 第一站係魯營球場。由 Hostel 走出來就是 Tarragona Metro Station, 同馬德里一樣, 買張 T10 ticket (€12.2) 可以兩個人用。

9:50 am

搭到 Collblanc Station 再走多十分鐘就見到呢個全歐洲最大既魯營球場 (Camp Nou Stadium) 喇... 我諗唔駛講大家都知, 魯營球場就係西甲球隊巴塞隆拿既主場, 呢個場可以容納十萬人咁多... 嘩... 十萬人一齊見證美斯既入球呀... 可惜我冇機會 >.<

買飛入博物館... 咩事呀？一早都咁鬼多人既... 參觀博物館盛惠 €23/person, 唔計睇波同鬥牛的話, 呢個景點算是成個 trip 之中最貴的一個了。

雖然係貴左 D, 但估唔倒入面都真係幾多野睇架喎... 除左睇晒巴塞隆拿呢支球隊過往既歷史、所得既獎盃, 仲可以親身體驗一下球員出場既情況 tim...

11:40 am

走回 Collblanc Station 搭 metro 到 Diagonal Station。

12:00 pm

下一站係高第既作品 - 米拉之家 (Casa Mila)。係呢度先介紹一下呢個偉大既建築師先, 皆因呢兩日係巴塞隆拿睇既景點幾乎都係高第既作品黎...

安東尼．高第 (Antoni Gaudi) 生於 1852 年, 天生具有良好的空間解構能力與雕塑感覺。小時候患有風濕病而不能和其他小朋友一起玩耍, 只能敏銳的觀察大自然, 使他日後成為師法自然的建築師。長大後到巴塞隆拿修讀建築系, 於 1878 年受富商委託設計了維森斯之家 (Casa Vicens), 自此便開始了其設計生涯。後來高第認識了歐塞比．桂爾 (Eusebi Guell) 先生, 桂爾先生十分賞識高第既才華, 從此委託他設計很多不同既建築。聖家堂是高第最偉大既作品, 佢將一生中的 43 年都貢獻在此, 而這座大教堂至今仍未完工。聯合國教科文組織係 1984 年將包括聖家堂、米拉之家在內的幾個高第設計的建築列入世界遺產中。

米拉之家建於 1906 至1912 年間, 由富商佩雷．米拉 (Pere Mila) 請高第設計的。米拉之家其實是一個私人住宅, 係米拉先生既府第, 所以就叫米拉之家啦。

預先係網上買左飛 (€16.5), 所以唔駛排隊 :p 大家睇下條龍幾咁長 :p

米拉之家佔地 1323 平方公尺, 有六層樓高和一層頂樓 (閣樓), 共有3個立面。只有最高的三層樓 - 六樓、頂樓和屋頂陽台對外開放讓遊客參觀。入場後職員會先帶你搭電梯上屋頂...

參觀完屋頂就進入米拉之家既內部...

離開時再從另一角度欣賞高第呢個作品...

1:00 pm

再走到另一高第設計既作品 - 巴特由之家 (Casa Batllo)。巴特由之家建於 1904 - 1906 年, 於 2002 年復修後才對外開放, 讓人參觀。建築物屬於現代主義風格, 外牆舖滿了五彩繽紛既馬賽克磁磚, 卵形既窗戶, 另外加建骨形既石柱同面具形既窗台。同米拉之家一樣, 沒有任何直線... 今次只在外影相, 冇入去參觀呢...

巴特由之家左邊的是阿馬特耶之家 (Casa Amatller)... 由於不對外開放, 所以冇咩人會提... 現場所見遊客都只是高舉相機狂影巴特由之家...

1:20 pm

再走到加泰隆尼亞廣場 (Placa de Catalunya)... 係舊城區既一個大型廣場, 數條重要街道既交匯處。此廣場面積達 50,000 平方米, 以噴泉和雕塑著稱。

1:40 pm

離加泰隆尼亞廣場不遠處有座富麗堂皇既加泰隆尼亞音樂廳 (Palau de la Musica Catalana), 呢個音樂廳由建築師路易．多明尼克 (Lluis Domenech i Montaner) 設計, 佢既著作仲有聖十字聖保羅醫院。1997 年加泰隆尼亞音樂廳和聖十字聖保羅醫院一起被聯合國教科文組織宣布為世界遺產...

我地走到售票處, 見到 2:00 pm 既導賞團仲有位, 雖然未食 lunch 好肚餓... 但唔想走番轉頭就決定 join 埋 2:00 pm 既 tour 先 (€17)...

2:00 pm

夠鐘入場, 淨係個仿古既大堂都咁富麗堂皇...

tour guide 係一個靚女黎, 佢首先帶我地睇套 video, 介紹一下呢個音樂廳既歷史... 環境實在太舒服啦, 睇到個人昏昏欲睡 >.<

睇完 video 就開始參觀音樂廳...

超大既演奏廳呀... 演奏廳內有好多天神雕塑裝飾, 天花上既馬賽克玻璃更是整個音樂廳既靈魂啊！我地仲好幸運, 遇著有樂團在練習呢！

音樂廳位於狹窄既巷子裡, 要拍到全貌真的不容易...

3:00 pm

聽完咁高貴既演奏之後, 個肚真係打晒鼓... 一早已計劃好 Lunch 要去大名鼎鼎既 4 隻貓餐廳 4 Gats, 有咩咁特別呢？

4 隻貓餐廳於 1897 年開幕, 係西班牙現代主義運動既重要場所, 也曾經一度關閉, 直到 1981 年才有人接手。畫家畢卡索也是這間餐廳既常客呢... 畢卡索的第一次個人畫展也是在這裡舉行的。

餐廳 menu 封面亦是畢卡索既作品...

建議大家要黎呢度食午餐, 因為午市有 lunch set, 好抵啊... 有頭盤 (好似主菜咁大份既頭盤)、主菜、甜品同飲品 (可以飲紅酒, 再抵 D ^.^), 食完之後真係飽到夜晚果餐都唔駛食呀...

頭盤上場... 無錯, 呢個西班牙海鮮飯的確係頭盤, 已等同香港餐廳既主菜份量...

主菜叫左一份魚, 一份牛...

仲有甜品... 食到超飽...！

4:40 pm

食飽飽繼續行, 走到另一高第作品 - 卡佛之家 (Casa Calvet)。卡佛之家於 1900 年落成, 是紡織企業家 D. Pedro Martir Calvet 的住處和辦公室。卡佛之家屋頂有兩座拱形山牆, 每間窗戶外都有鐵欄杆圍繞的波浪狀陽台, 帶有巴洛克風格。

5:00 pm

之後經過菜市場 (Mercat Stanta Caterina)... 呢個 market 既特別之處在於佢個波浪形屋頂, 我地唔夠高, 影唔倒佢個頂喎 :p

為左將 325,000 塊迷彩色賽維亞瓷磚裝上彎曲既屋頂, 大部分瓷磚須經人手切割, 足足花了 7 年時間才完成呢個奪目地標... 連街市都咁獨特, 難怪巴塞可以成為一個藝術之都。

5:20 pm

再走到畢卡索博物館 (Museu Picasso), 由於之前香港都搞過畢卡索既展覽, 畢卡索既名畫亦已欣賞過, 所以決定唔入去參觀了。

5:40 pm

散步到城堡公園 (Parc de la Ciutadella), 城堡公園佔地 31 公頃, 包括市議會大廳、動物園和幾個博物館。城堡公園之所以得名, 因這裡曾是個建於 18 世紀初的軍事城堡, 當城堡被拆卸後只遺下教堂和軍械庫, 而軍械庫亦已變為現在的市議會大廳。

6:00 pm

離開城堡公園, 再走到聖瑪利亞廣場 (Placa de Santa Maria)... 呢度有一座名為 <<海上的聖母瑪利亞教堂>> (Esglesia de Santa Maria del Mar), 據說這座教堂的名字早在公元 11 世紀既外國航海紀錄中出現... 到了 1324 年, 因為 Santa Maria 樞機登位, 這座教堂就被重新興建...

6:20 pm

走進巴塞隆拿大教堂 (Catedral de Barcelona), 這座哥德式教堂建於 13 至 15 世紀。

6:50 pm

從大教堂走出來, 走到羅馬城牆 (Roman Walls)... 這些城牆係以前既羅馬人用來抵禦日耳曼民族的入侵而建的, 可以說是巴塞中歷史最悠久的建築物。

再穿過唔知幾多條小巷就會走到聖海梅廣場 (Placa de Sant Jaume), 廣場兩旁是自治區政府大樓 (Palau de la Generalitat) 和市政廳 (Ajuntament)。數千年前, 由於附近曾經是羅馬廣場, 呢度曾經係人們討論羅馬時事和政治的好地方... 由 15 世紀開始, 建成Palau de la Generalitat 和 Ajuntament 後, 廣場就變成左巴塞既政治中心。

7:30 pm

繼續係舊城區亂行, 走到巴塞最繁榮既蘭布拉大街 (La Rambla), 不遠處就係皇家廣場 (Placa Reial)。

皇家廣場 (Placa Reial)

8:00 pm

沿住蘭布拉大街一直逛, 就會見到港口 (Port Vell) 旁既哥倫布紀念塔 (Monument a Colom)...

8:30 pm

Port Vell 係巴塞既一個港口, 當回教徒佔領西班牙半島時, 由於巴塞既地理位置, 呢度成為左一個繁忙既貿易中轉站... 係 1992 年奧運會前既市區重建計劃中, 呢個港口亦被納入重建項目之一, 昔日既貨倉改成現時既遊艇碼頭、大型商場和海洋博物館 (Museu Maritim)...

9:15 pm

行到成九點, 4 隻貓餐廳既午餐都消化得七七八八, 咁我地就出發去另一間頗出名既蝸牛餐廳食 dinner 喇... 點知去到勁多人, 我地等左幾個字佢都冇叫人入去, 咁我地就轉去同一條街隔幾個舖位既 La Fonda 食啦...

其實 La Fonda 都係好出名既, 點左逢遊客都會叫既名菜 - 墨魚飯 (Black Rice)、炸薯仔 (Fried Potato) 同 Sangria... 個墨魚飯真係唔錯, 值得推介！

10:50 pm

走到 Drassanes Station 搭 metro 回 Tarragona Station, 再回 Hostel 取行理。

11:15 pm

今日行左超多地方, 超累, 取房間後立即沖涼休息喇。

~Day 8~

5/4/2013 (Friday) 陰

巴塞隆拿 --> 蒙塞拉特山 (Montserrat) --> 聖家堂 (Sagrada Familia) --> 聖十字聖保羅醫院 (Hospital de la Santa Creu I de Sant Pau) --> 桂爾公園 (Park Guell)

7:00 am

今日要早 D 起身, 因為要去一去離巴塞稍遠既蒙塞拉特山 (Montserrat)...

8:00 am

從 Hostel 走到西班牙廣場 (Placa Espanya), 再經地下通道走到西班牙廣場車站 Placa Espanya Station... 其實呢個站就係西班牙廣場下面呢...

係站內既售票機買左兩 set 套票, 包含巴塞至蒙塞拉特山既來回火車票 + 上蒙塞拉特山既纜車票 (Train + Cable car combine ticket €19/person)... 其實上山有兩個方法既, 可以搭纜車或登山火車, 若選擇搭纜車上車, 就係 Montserrat-Aeri 站落車, 若選擇搭登山火車, 就係 Monistrol de Montserrat 站落車就 ok 架喇...

8:36 am

搭 8:36 am 開出既火車, 大約一個小時就到左 Montserrat-Aeri 站... 呢個係一個好細既車站, 亦都冇站員同閘口, 就好似日本果 d 無人車站咁...

跟住指示走到纜車站, 搭纜車上山喇~

9:45 am

黎到 Montserrat, 為的是呢 d 奇形怪狀既山脈。山脈外觀古怪奇異, 像是被急速冷凍的巨人群。此山脈是約 5780 萬年前既河底沉澱物, 經過多年地層變動和風吹雨打, 而變成了今日的模樣。聽說天才建築師高第係興建聖家堂前來到此地, 看到如此既奇石奇景, 因而得到靈感。

除左 d 奇形怪狀既山脈之外, 黎到 Montserrat 就一定要去睇睇 <<黑聖母像>>。經過聖瑪利亞廣場有個修道院, 修道院建於 1025 年, 就是為了紀念聖母顯靈而建的。修道院入面有個大教堂 Basilica, 黑聖母像 (La Moreneta) 就在大教堂內。據說從前有一群牧童在山上看到神光降臨, 且傳出天籟般的聲音。牧童回家告知村內人, 村民大夥兒上山一看, 果真不假。此消息傳到教主耳中, 教主也趕緊上山看看, 教主沿著天籟既聲音, 在山洞裡找到一尊聖母像。原本教主打算將聖母像請下山, 供民眾瞻膜, 可是無論怎麼用力搬, 聖母像都黏在那兒, 動也不動, 於是教主就地幫聖母像蓋了這個教堂。

此雕像出自於 12 世紀末 13 世紀初一位木匠之手, 雕像散發著祥和、樸實既美麗。特別的是, 雕像臉部和手部, 因釉藥產生化學變化, 加上長期煙燻, 所以又有「黑瑪麗」之稱。於旅遊旺季, 瞻仰黑聖母像既人龍都長達幾十公尺, 我地好幸運, 唔駛等就可以摸一摸聖母像呢！

教堂內部樸實華麗...

見到呢 d 咁奇形怪狀既山, 真係覺得大自然好神奇...

10:30 am

睇過黑聖母像就要走喇, 搭 Cable Car 落山, 再轉搭火車回巴塞隆拿。

12:00 pm

回到西班牙廣場站, 走到當地一間專食 Tapas 既餐廳 Tapa Tap 食 lunch, menu 有晒圖片, 唔驚唔識叫...

12:30 pm

食完野原本要出發往聖家堂, 但見到有個好大型既商場 (Arenas de Barcelona), 唔好理行埋先。呢個商場前身其實是一個鬥牛場, 建於 1914 年, 後來加泰隆尼亞議會通過左禁止鬥牛既法案, 咁呢個鬥牛場就搖身一變成為一個大型商場, 而頂層更改建成一個觀景台, 可以飽覽巴塞既景色。

1:00 pm

搭 metro 到 Sagrada Familia Station, 一出地鐵站拎轉個頭, 就見到高第最偉大既作品聖家堂喇。

1:30 pm

我地預先在網上買左參觀聖家堂同上 tower 既連票 (Basilica + Towers €19/person), 去到又係唔駛排隊 :p 不過去到入口處, 個職員話因為落雨, 所以 tower 唔開放... 嗚嗚... 唔制呀...

聖家堂 (Temple Expiatori de la Sagrada Familia) 始建於 1882 年, 由建築師 Francesc de Paula del Villar 興建。一年後, 這位建築師和宗教團體意見出現分歧, 辭職而去, 當時年僅 31 歲既高第接手繼續興建設計, 此後既 43 個年頭, 高第都將佢既心力全放在聖家堂上, 直至死去。由於聖家堂是一座贖罪教堂, 興建既資金主要來自捐款, 捐款既數目就直接影響到工程既進度, 至今聖家堂仍未完工, 它是世界上唯一一座還未完工就被列為世界遺產既建築物。

聖家堂完成後會有 18 個高塔和三個立面, 分別係誕生立面 (東面) - 訴說基督既誕生和幼年, 受難立面 (西面) - 訴說耶穌既受難和死亡同榮耀立面 (南面) - 包含死亡、審判、地獄及最後的榮光, 也是聖家堂最大、最豪華既立面和正門所在。每個立面分別有 4 座鐘塔, 合共 12 座, 代別耶穌的十二門徒。至於另外的 6 座高塔, 分別代表耶穌基督、聖母瑪利亞和聖經四福音書作者: 馬太、聖可、路加以及約翰。

受難立面 (Passion facade) - 位於西面既受難立面建於 1954 - 1977 年, 以基督的死亡為題, 描寫了耶穌與十二門徒既最後晚餐到耶穌被釘十字架及升天的故事...

耶穌被釘在十字架上...

榮耀立面 (Glory facade) - 位於南面既榮耀立面到現在仍在動工, 依照高第的構想, 榮耀立面所要表現的是見證神的榮耀。他將以一排樓梯引領人們拾級而上, 闡述著死亡與地獄、人類的墮落、因墮落招致的世俗困頓生活, 以打動人們虔誠信仰上帝, 做為救贖的第一步。

榮耀立面亦是聖家堂既入口... 進入聖家堂, 與歐洲其他教堂好唔同, 聖家堂內部光線充足...

誕生立面 (Nativity facade) - 建於 1892 -1930 年, 高第將誕生立面設計在教堂既東面, 好讓每朝早由東方升起既太陽都能夠照耀著誕生立面, 代表著生生不息的奇跡。

誕生立面以基督的誕生為題, 細訴基督既誕生和成長既故事, 它有三個門, 左邊是「希望之門」, 中間是「基督之愛門」, 右邊是「信仰之門」, 分別代表天主教最重要的精神﹕「信、望、愛」。

「基督之愛門」高於左右兩座門, 上面還有一株著名的「生命之樹」, 更突顯出其重要性。

耶穌誕生以及耶穌替瑪麗亞加冕既畫面都出現係呢個誕生立面...

目前已建好「誕生立面」和「受難立面」, 18 座高塔已建好「誕生立面」的 4 座鐘塔和「受難立面」的 4 座鐘塔, 還差十座高塔。整個建築完成了將近 50%, 預計要在 2026 年才完工。

3:15 pm

離開聖家堂, 步行到聖十字聖保羅醫院 (Hospital de la Santa Creu I de Sant Pau)。起初在計劃行程時, 覺得好奇怪, 點解咁多網友都要黎參觀呢個醫院呢？做過 research 後發現, 呢個醫院既來頭真係唔細... 設計呢座醫院既就係被喻為高第既對手、現代主義建築師路易．多明尼克 (Lluis Domenech i Montaner), 亦即係加泰隆尼亞音樂廳既設計者, 佢呢兩個作品都被列為世界文化遺產架！

不過好可惜, 我地黎到既時候發現, 醫院正在維修, 正門都被封閉... 我地沿住醫院外牆走, 終於搵到個入口, 都可以入到去醫院範圍, 但總是感覺欣賞唔倒整座醫院既建築設計咁...

3:45 pm

搭 H6 號線巴士, 係 CAP Larrard Station 落車, 目的地係桂爾公園 (Park Guell)。

4:10 pm

桂爾公園 (Park Guell) 建於 1900 - 1914 年, 由鬼才建築師高第設計。桂爾公園隨處都可見到由馬賽克磁磚拼砌出既美麗圖案...

5:20 pm

係桂爾公園門口巴士站, 等 116 號巴士, 到 Pl Lesseps-Gran de Gracia Station 落車, 再向桂爾宮進發。

5:30 pm

經過維森斯之家 (Casa Vicens) - 維森斯之家 (Casa Vicens) 既屋主是位磁磚製作商, 因此高第在室外運用了許多美麗的磁磚, 建造出色彩繽紛、彷彿童話屋子般既維森斯之家。

6:00 pm

同其他高第既作品一樣, 桂爾宮 (Palacio Guell) 都係加泰隆尼亞自治區巴塞隆拿既一座住宅, 由工業大亨桂爾先生委託高第設計的。我地黎到售票處, 正想買入場票入去參觀, 售票處職員又話因天雨關係 (其實係落緊毛毛雨姐...), 桂爾宮既屋頂暫停開放... >.< 咁我地覺得高第既設計精華往往都放係屋頂架喎, 冇得睇屋頂既設計咪等如冇睇過桂爾宮咁？最後決定唔參觀喇...

6:15 pm

冇得參觀桂爾宮就走到一個叫 Antic Hosptial de la Santa Creu 既地方, 這座 15 世紀擴建而成的哥德式建築從前是歐洲早期的醫院之一。直至 20 世紀初, 新的 Hospital de la Santa Creu I de Sant Pau 建成, 這座醫院才結束醫療用途。在醫院結業前, 它是替窮苦大眾醫病的地方, 當中最著名既受診人士就是高第了。高第係 1926 年被電車撞倒後, 因為他寒酸的外表被人送來了這間醫院, 最後還傷重身亡, 現在這裡仍然保留他被認出是高第既資料和他過身時的房間。醫院結業後, 它被改建成藝術學院和大型圖書館, 而後院已經成為巴塞市民休閒聚會的地方了。

6:30 pm

係舊醫院不遠處有另一個著名菜市場 (La Boqueria market)...

6:45 pm

呢個係著名既格蘭．德爾、利索歌劇院 (Gran Teatre del Liceu)...

6:50 pm

話說琴晚九點幾去到蝸牛餐廳, 因為太多人冇機會幫襯, 咁今日就諗住早 D 去... 未夠七點走入呢間百年老餐廳 - 蝸牛餐廳 (Los Caracoles), 冇咩人... 入到去示意兩位, 果個人就叫我地直入用餐區, 入到去見到好多空檯, 但個 waiter 話全部都被人 book 左... 咁即係點？冇位呀... 特登咁早黎到, 成場都空既, 話冇位？跟住個 waiter 指住呢張話 book 左七點半, 跟住又指住果張話 book 左八點... 呢個時候, 我覺得佢好似有心唔俾檯我地咁... 大頭聽到佢話張二人檯 book 左八點, 即刻同個 waiter 講, 我地而家食, 八點前可以食完啦... 咁個 waiter 就俾左我地坐喇... 最火滾既係, 之後有個鬼婆走左入黎, 都係冇 booking 架, 但又俾左張檯佢坐... 你話係咪火都黎...

唔理咁多, 叫野食先... 叫左呢度出名既燒雞同西班牙海鮮炒飯...

8:10 pm

因為聽朝早機回馬德里, 所以食飽飽就搭 metro 回 Hostel 喇。

8:30 pm

回到 Hostel, 執拾行理沖涼休息。

~Day 9~

6/4/2013 (Saturday) 晴

巴塞隆拿機場 --> 馬德里巴拉哈斯機場 --> 馬德里 --> 班拿貝球場 (El Estadio Santiago Bernabeu) --> 西甲: 皇家馬德里 VS 利雲特

4:00 am

天未光就起身, 因為要搭早機回馬德里。

5:00 am

搭第一班巴士到巴塞隆拿機場。

6:00 am

到達巴塞機場 T1 大樓, 指示牌唔係咁清楚, 問 information 那個人又唔想答咁... 搞到我地都唔知 check in counter 係邊層... 搵左一輪終於搵到喇, check in 後就等上機啦...

7:30 am

我地買左西班牙廉航 Vueling Airlines 由巴塞隆拿飛往馬德里既單程機票, 兩個人連埋行理費都要二千幾蚊, 貴！

VY 1003 航班於 7:30 am 起飛...

8:50 am

又黎番馬德里機場, 等埋行理搭 metro 到 Arturo Soria Station。

呢兩晚會入住 Hotel Zenit, 呢個站唔近馬德里既主要景點, 我地住呢度係貪佢近機場, 同埋呢兩日主要係睇波同鬥牛, 酒店門口就有巴士直達班拿貝球場...

可能位置唔近遊客區, 呢度可以用一個抵 d 既價錢但又住到高 d 質素既酒店, 好似我地呢兩晚住既 Hotel Zenit, 房間好似 d 豪宅示範單位咁, 但每晚只係 HK$500 咋... 去日本住東橫 Inn 都唔得呀...

4:00 pm

係酒店上下網, 休息下... 差唔多四點鐘我地就出發去睇波喇... 係酒店門口既巴士站搭 120 號巴士, 終點站就係皇馬既主場 - 班拿貝球場。

班拿貝球場 (El Estadio Santiago Bernabeu) 於 1947 年啟用, 係西班牙著名球會皇家馬德里既球場, 可容納約八萬人。

呢個球場真係好大, 話說我地黎到諗住買飛先啦, 問人售票處係邊, 俾人點左去唔知幾多號閘, 去到又話唔係呢度喎... 再問人又話番番去頭先果度... 你知圍住個足球場行可以行幾耐架啦... 我都唔記得行左幾耐, 終於俾我地買到兩張飛喇, 不過今次想慳錢, 坐山頂位算...

6:00 pm

今次係西班牙甲組聯賽皇家馬德里對利雲特 (Real Madrid vs Levante), 有點強弱懸殊...

比賽於 6:00 pm 開始, 上半場冇出 C 朗, 有點失望...

到左下半場, C 朗出場...

最後 5:1 完場, 相信在場既皇馬 fans 應該好開心~

8:00 pm

完場諗住走啦, 點知見到好多人係場外聚集, 似係等緊 d 球員離開... 當時個情況就好似黎明係紅館開完演唱會, d 人係紅館外等佢出黎一樣...

咁我地又等埋一份, 哈... 但係等呀等... 只係見到利雲特既球員坐旅遊車離開... 然後就有 d 人渣住靚車出黎, 我估皇馬 d 球員都係自已渣車走... 咁我地見冇咩睇就搭巴士番酒店了。

9:00 pm

回酒店休息。

~Day 10~

7/4/2013 (Sunday) 晴

馬德里 --> Las Ventas 鬥牛場 (Plaza de Toros de Las Ventas) --> Bullfight 鬥牛

11:00 am

今日係旅程既最後一天, 訓到差唔多十一點, 好滿足...！

3:15 pm

隨便周圍行行, 然後就去左食 pizza...

5:00 pm

搭 metro 去 Ventas Station, 一出地鐵站就會見到非常著名既 Las Ventas 鬥牛場！

Las Ventas 鬥牛場 (Plaza de Toros de Las Ventas) 是西班牙最出名既鬥牛場, 位於馬德里東面, 有大約 25,000 個座位, 於 1931 年 6 月17日開始啟用。呢個鬥牛場由 Jose Espeliu 設計, 係一座摩爾式建築。

一去到鬥牛場門外, 已有人問是否要 ticket ticket... 我地冇理, 照去售票處排隊買飛...

整個鬥牛場直徑約 65 米, 分開三個區域, 太陽位 (Sol), 半太陽位 (Sol y Sombra) 同陰暗位 (Sombra), 門票價格就視乎你揀既區域同行數啦... 想平可以揀太陽位, 即係面對太陽既座位, 我地都買左兩張太陽位, 每張 €13.4, 即係百幾蚊港紙就可以睇到咁精彩既西班牙國粹鬥牛表演, 都幾抵架！

鬥牛季節由每年既 3 月開始, 12 月結束。由於而家未算係旺季, 所以即場都仲有好多飛賣, 個場亦都坐唔滿既。如果大家想預早買定飛, 都可以透過網上預訂既。

6:00 pm

開始喇, 在樂隊演奏進行曲下, 鬥牛士開始依序進場。每場比賽共有三組表演者, 分別為鬥牛士 (Matador)、長槍手 (Picador) 和鏢槍手 (Banderillero)。

首先, 鬥牛士會以鮮艷既斗篷來挑釁牛隻, 以圖測試牛隻既速度、反應和身體狀況。

讓公牛在場上四周衝來衝去後, 長槍手便會騎著馬匹出場, 引誘公牛衝向馬的旁邊。長槍手騎住既馬匹穿上厚厚的保護衣, 眼睛被黑布遮掩, 防止牠看見公牛衝來時受驚。係公牛撞上馬匹前, 長槍手把長槍刺在牛的脖子上, 適當地減弱公牛的氣力, 令牠之後的衝刺垂下頭, 方便鬥牛士在最後時間給予致命一擊。

接著是鏢槍手出場, 佢會利用長度約 70 cm, 2 個一組既花式短槍黎突襲牛隻既背部...

終於輪到鬥牛表演既重頭戲, 左手拿著紅巾, 右手拿著長劍既鬥牛士登場。

鬥牛士拿著全紅色的斗篷和劍揮動, 吸引公牛衝過來, 鬥牛士引領著公牛向鬥牛士身邊的斗篷左衝右撲, 務求盡快消耗公牛的體力。這時公牛已經受過一定的傷害, 一場鬥牛精采與否, 除了鬥牛士的功力外, 公牛餘下的體力和鬥心也是決定性的因素。當公牛體力已幾乎消耗盡, 鬥牛士就看準機會, 用劍瞄準牛既肩甲骨之間約 5 cm 位置, 一口氣刺穿牛的心臟。