2013 Aug 日本．四國 (香川、愛媛、高知、德島) 9 天環島自駕遊

~日本．四國 (香川、愛媛、高知、德島) 九天環島自駕遊~

日期: 24/8/2013 - 1/9/2013

復活節去完西班牙都有幾個月，心思思又想走番轉日本 XDDD... 係我地未踏足過既中國、四國、九洲 (大頭自已去過既) 同沖繩呢四個部份，我地最後選擇左比較冷門既四國。其實四國與關西神戶只是一橋之隔，話遠又唔係好遠，但四國旅遊都以欣賞自然景色為主，加上四國景點分散，交通不便，喜愛 Shopping 既香港人就相對比較少。

今次係我地既第十一次日本遊，目的地鎖定左四國之後就上網睇下 d 機票... 初時原本想乘 ANA 經東京或大阪轉內陸機直飛四國，諗住可以慳番 d 時間... 但睇過 d 航班之後，發覺 d 時間麻麻地囉... 去到東京/大阪要 Stay 一晚第二朝先再轉機咁... 最後決定坐樂桃航空直飛大阪，由關西國際空港開始租車，再到四國完成環島遊之後，駕車回到關西國際空港還車。

整個四國環島自駕遊行程，由大阪玩上有馬溫泉，經姬路港進入香川縣既小豆島、高松，再以逆時針方向經德島縣既祖谷溫泉、愛媛縣既東予地區、松山、南予地區、高知縣既四萬十川、足摺岬、室戶岬，再返回德島縣既德島同嗚門咁環繞四國一周，最後經淡路島返回大阪，全程駕駛了約 1500 km。

四國主要係睇自然風景，有名既景點都有好多架... 小淘特別喜愛既有香川縣既小豆島同栗林公園、愛媛縣既瀨戶內島波海道、高知縣既四萬十川沈下橋、足摺岬同室戶岬、德島縣既祖谷藤蔓橋、落合集落同嗚門旋渦等等。除左欣賞靚景之外，唔少得既梗係我地至愛既溫泉同美食啦... 全程去左四個溫泉﹕日本三大名泉有馬溫泉、日本三大秘境祖谷溫泉、日本最古老既道後溫泉同足摺岬溫泉。美食方面呢... 嘩哈哈... 唔好以為四國呢 d 鄉下地方冇啖好食... 由於四國近海，周圍既名產都係魚生魚生同魚生... 愛媛縣有鯛魚、高知縣有鰹魚同知名既皿缽料理... 另外值得推介既仲有高松名物骨付鳥同日本三大烏冬之一既贊歧烏冬。四國 - 一個充滿田園氣息、人情味同古日本風貌既地方，確實值得一去架！

在較大的地圖上查看2013日本四國9天

事前準備

準備	備註
申請日本旅遊簽証	免簽証
申請國際車牌	到運輸署申請國際車牌, 有效期為一年, 費用 $80
購買機票	購買 Peach 樂桃航空香港至大阪來回機票兩張
購買旅遊保險	於保誠購買旅遊保險
訂民宿, 酒店	於網上預約
租車	於網上 Toyata Rent A Car 預約一豐田汽車, 全程駕駛約 1500 km
換日元	於恆生銀行換購

行程表

		住宿
Day 1	香港 --> 關西國際空港 --> 大阪	Hotel Seagull
Day 2	大阪 --> (兵庫縣) 有馬溫泉	有馬溫泉 Hotel
Day 3	有馬溫泉 --> (香川縣) 小豆島 --> 高松	Super Hotel 高松．田町
Day 4	高松 --> 琴平 --> (德島縣) 祖谷溫泉	祖谷之宿 Kazuraya
Day 5	祖谷溫泉 --> (愛媛縣) (東予) 今治 --> 松山 --> 道後溫泉	道後之宿葛城
Day 6	道後溫泉 --> (南予) 內子 --> 伊予大洲 --> 宇和島 --> (高知縣) 四萬十川 --> 足摺岬溫泉	足摺園 Hotel
Day 7	足摺岬 --> 香美 --> 桂濱 --> 高知	高知 Bright Park Hotel
Day 8	高知 --> 安芸 --> 室戶岬 --> (德島縣) 日和佐 --> 德島	德島站眉山口 Toyoko-inn
Day 9	德島 --> 嗚門 --> (兵庫縣) 淡路島 --> 關西國際空港--> 香港

~Day 1~

24/8/2013 (Saturday) 香港 --- 晴, 大阪 --- 雨

香港 --> 關西國際空港 --> 池田城跡公園 --> 日清杯麵發明博物館 --> 黑門市場 --> 道頓堀/心齋橋 --> 美國村 --> 井原里 Hotel Seagull

(23/8/2013) 10:15 pm

第十一次日本遊出發喇, 懷住興奮既心情到達香港國際機場。

樂桃航空既 check in counter 係 Terminal 2, 係 T1 落左車之後就推住行理走去 T2, 好快就到。

Check in 唔算多人, 好快就搞掂晒。

走回 T1 等上機...

(24/8/2013) 12:35 am

大阪回香港既 MM 067 航班降落之後, 冇幾耐就可以上機喇... 第一次搭桃子, d 位都好迫下...

MM 068 航班在差不多 1:00 am 起飛... 起飛冇幾耐空姐就派入境表, 拿拿聲填好就即訓...

(以下轉日本時間)

5:25 am

好似未訓過咁就到左關西國際空港喇...

桃子既基地係新開既 T2, 由於人少, 好快就辦好入境手續同取行理...

6:30 am

搭 shuttle bus 到 T1, 乘南海本線到井原里站...

8:00 am

由於明天朝早會在機場租車, 所以今晚會入住機場附近既酒店... 未到 check in 時間, 放低行理就走人... 出發去難波...

9:25 am

到左難波首先搵間 cafe 食個早餐...

10:10 am

然後就出發去池田... 係梅田搭阪急寶塚線, 只需二十分鐘就到喇...

11:00 am

首先去左池田城跡公園... 因為行錯路, 去左西門 (即係後門) 入口...

公園面積不大, 好快就行完。

11:50 am

走回池田站的另一邊, 向日清杯麵發明博物館進發。沿途會見到一座古色古香既一風堂, 見冇人等就入去食左個 Lunch 先...

叫左赤丸新味... 好好味呢！

12:20 pm

食飽飽再向前行, 就會見到日清杯麵發明博物館...

博物館免費入場, 要整杯麵就另外俾錢。地下展館介紹日清杯麵既發明同製作過程, 展館旁就係整杯麵既場地...

由於今日係星期六, 博物館非常多人, 咁我諗住去排隊整杯麵先啦... 排呀排呀, 條隊都冇郁過咁, 之後有個日本人走出來唔知 up 左 d 咩, 排前面 d 人就跟住佢行, 咁我又跟住行囉... 原來因為人太多, 係二樓開左另一個場整杯麵...

上到二樓, 個場仲大過地下果個...

排左一陣就可以買個空杯喇... 盛惠 300 yen。

拎住個杯, 工作人員就示意我去一張空檯度坐低, 可以開始設計我個自家杯麵喇。

畫好左一半 :P

畫好之後就去排隊放個麵餅入去...

然後就揀湯底同材料... 每個杯麵最多可以揀四款材料...

最後就係包裝.... 搞掂！

落番地下參觀展館... 見到地下整杯麵條人龍註明排隊到完成需時 80 分鐘 >.<

2:25 pm

搭阪急番梅田... 然後再轉地鐵去有大阪廚房之稱既黑門市場... 搭地鐵去到日本橋站, 出左地面行幾步路就見到黑門市場架喇...

4:10 pm

拎住地圖, 向道頓堀進發... 同 2007 年黎既時候一樣, 呢度都係咁熱鬧...

行到去心齋橋... 呢日實在太多人, 好似行緊花市咁...

5:00 pm

不知不覺就走到去美國村...

呢間 Ice Dog 好似幾出名, 我見好多網友都有食, 但我就冇試...

5:30 pm

晚餐黎左呢間北極星, 叫左個人氣第一既雞肉蛋包飯... 唔知係咪睇完網友既推介期望過高, 我覺得都 ok 好食, 但又未至於要再幫襯喎...

7:10 pm

慢慢走回難波站, 搭南海本線回井原里站 Hotel Seagull 休息。

~Day 2~

25/8/2013 (Sunday) 雨

大阪 --> Rinku Premium Outlets --> 大阪野球 @ Kyocera Dome Osaka --> (兵庫縣) 摩耶山 --> 六甲山 --> 有馬溫泉 Hotel

8:45 am

上網 book 左 Toyota 既車, 係關西國際空港分店取車。搭火車去到機場 T1, 再沿住天橋走到 Aeroplaza 既地下就會見到 Toyota。取車手續好快就搞掂, 檢查埋架車就出發去 Rinku Premium Outlets。

9:15 am

去到 Outlets 都係 9:15 am, 仲未開門 >.< 唯有周圍行下先啦...

10:00 am

到左十點就事不宜遲, 衝入 Outlets... 今次我既收穫都算唔錯, 買左一條裙、一對 Nike 跑鞋同一對 Rockport 皮鞋。

12:15 pm

出發去 Kyocera Dome Osaka 睇野球, 是日比賽為大阪球隊歐力士野牛 (Orix Buffaloes) 對北海道球隊 (Hokkaido Nippon-Ham Fighters)。野球係日本非常受歡迎既運動, d 觀眾睇得好投入, 每當主場擊球手上到壘都會好興奮, 仲會一齊叫住出場球員個名。

去到第七局, 全場觀眾會一齊放汽球... 仲有靚女出黎表演, 帶動氣氛...

到最後主場球隊都係輸左, 結果係 0:3 >.<

4:30 pm

離開大阪, 向神戶既摩耶山進發。如果大家去大阪而又想去近效睇下夜景, 最佳選擇應該都係摩耶山同六甲山喇。論景觀同知名度就絕對係摩耶山勝人一籌, 但論人氣就六甲山高 d, 主要原因係六甲山既交通比較方便... 有馬溫泉每天都有纜車上六甲山, 而上摩耶山既纜車就只在星期六日運行 (夏天除外), 咁六甲山既遊客自然就多 d 啦！我地自駕就先上摩耶山, 再經六甲山到有馬溫泉, perfect！

日本三大夜景分別為神戶既摩耶山、北海道既函館山同長崎既稻佐山, 希望日後有機會去埋稻佐山啦！

5:30 pm

黎到標高 690 公尺既摩耶山展望台 - 掬星台, 嘩, 好鬼凍呀...

7:00 pm

再去六甲山山頂, 呢度個視野比摩耶山窄 dd 既... 但係呢度有個好大既手信店, 感覺係好行 d 喎, 哈哈！

7:50 pm

出發往有馬溫泉, 有馬溫泉位於神戶市北部, 歷史悠久, 與草津同下呂躋身為日本三大溫泉。

由於我地係自駕, 所以揀左一間唔近電車站既溫泉酒店, 價錢都平 d 架。

8:20 pm

Check in 完放低行理就要去食 dinner 喇, 有馬話晒都係日本三大名泉, 晚餐非常正, 好好味... 但勢估唔到後來既四國之旅, 越食越意想不到, 越食越豐富！

9:40 pm

溫泉第一擊 - 日本三大名泉之有馬溫泉！

11:30 pm

休息。

~Day 3~

26/8/2013 (Monday) 晴

有馬溫泉 --> (香川縣) 小豆島 --> 高松 --> Super Hotel 高松．田町

7:30 am

嘆番個溫泉早餐先...

8:00 am

今日會向四國進發, 第一站係香川縣既小豆島... 離開有馬溫泉, 驅車前往姬路港...

前往小豆島既方法就只有搭船, 岡山、姬路同高松既港口都有定期航班去小豆島, 有些船仲可以載車的。

9:15 am

黎到姬路港, 見到 d 私家車已經排緊隊, 咁我地又去排啦, 停低架車之後我地示意已在網上 book 左船飛, 工作人員 check 到有我地個名, 佢就叫我地落車去售票處取票等上船喇。

9:45 am

渣住架車一齊上船喇... 第一次連埋架車一齊搭船, 感覺好得意。

由姬路搭船到小豆島既福田, 需時 100 分鐘, 船上冇咩設施, 但 d 梳化好舒服, 仲可以訓埋覺。

11:25 am

到左小豆島, 驅車往第一大景點 - 寒霞溪。聽個名都知, 呢度應該係賞紅葉勝地, 秋天應該好靚呢...

12:30 pm

順便係呢度食埋個 lunch 先...

1:10 pm

島上唯一展望台 - 標高 777 米既四方指展望台...

經過銚子溪... 入面有個猴子園, 我地冇入去...

前面架車停左係度, 原來餵緊隻猴子, 搞到佢坐係馬路中心唔肯走...

1:50 pm

小豆島大觀音...

2:15 pm

之後去天使之路...

小豆島有一條天使之路, 傳說戀人們可以一齊走過就會幸福美滿, 皆因呢條天使之路每日只會出現兩次, 機會難得。咁神奇？因為海水潮汐既關係, 每日只有退潮既時候, 呢條天使之路先會出現, 我地今日就冇緣見到喇, 嗚嗚...

行唔到天使之路唔緊要, 我地走左上去呢個戀人之聖地展望台, 一樣咁浪漫 ^.^

3:30 pm

再到丸金醬油紀念館, 入場費 210 yen, 每人附送一樽醬油...

醬油係小豆島既名產之一, 醬油紀念館前身係儲存醬油既倉庫, 所以一入去就好重醬油味...

日本人真的很厲害, 什麼景點都一定有雪糕賣, 連醬油味雪糕都有...

4:30 pm
除左醬油, 小豆島另一名產就是橄欖... 黎到小豆島最具人氣既景點 - 道之站小豆島橄欖公園。由於小豆島擁有地中海型氣候, 於明治 41 年 (1908 年), 小豆島首次為日本成功栽種地中海既橄欖樹, 自此島上便種植了大量既橄欖樹, 還出產了好多橄欖製品。

這個希臘風車, 必定是小豆島既人氣地標。

5:30 pm

淨番少少時間, 去埋池田港附近既小豆島 Furusato 村...

6:00 pm

夠鐘要同小豆島講再見喇, 我地駕車到池田港, 坐船到高松市。高松比姬路近小豆島, 船程只需一小時就到左高松港口喇。

7:30 pm

今晚會入住高松市既 Super Hotel, 呢間酒店同東橫 Inn 差不多, 都係屬於商務酒店, 附送早餐, 仲比東橫 Inn 多左個細細地既溫泉... check in 後放低行理就去食 dinner...

8:15 pm

黎到高松, 除左讚歧烏冬之外, 必定要食既就係高松名物骨付鳥。我地揀左呢間好出名既 "骨付鳥一鶴高松店", 黎到門口見到好多人等緊位, 仲有日本人係度影相... 果然係名店啊！

骨付鳥即係烤雞脾, 成間餐廳都只係清一色食烤雞脾既姐, 所以好快就可以 order, 每人一份烤雞脾加一個雞飯同味噌湯既 set...

等左好耐終於上菜, 嘩, 成隻大雞脾放係面前, 烤到香噴噴, 未食都已經流口水了... 用紙巾包住腳跟冇肉既部份, 一口咬落 d 脆卜卜既皮同 d 極度嫩滑既雞肉度, 味道真係一流, 大家去高松一定要去試試！

9:30 pm

食飽飽就走回 Super Hotel, 去浸下佢個小溫泉...

11:00 pm

浸完溫泉就回房間休息。

~Day 4~

27/8/2013 (Tuesday) 晴

高松 --> 栗林公園 --> 琴平．金刀比羅宮 --> (德島縣) 祖谷溪．小便小僧 --> 落合集落 --> 祖谷藤蔓橋 --> 琵琶之潼 --> 祖谷之宿 Kazuraya

8:00 am

起身食早餐... Super Hotel 既早餐款式比東橫 Inn 多少少, 不過味道都係一般...

9:00 am

check out 後就去栗林公園... 栗林公園是日本四國地區最著名的庭院, 分為南、北兩個庭園, 南庭為迴遊式庭園, 北庭是近代的準洋式庭園。公園總面積約 75 公頃, 是全日本被指定為特別名勝的庭園之中最大的一個。園內特色為種遍松樹, 其中還不乏王室所親手栽植之松樹。除了松樹的綠意外, 此處也標榜著 6 池 13 築山巧妙組合下所展現的中國風庭園造景之美, 為江戶時期以來有名的迴遊式庭園。

我地係北門進入公園, 逆時針方向走向南庭...

如果大家有睇過四國既旅遊書, 應該對呢個景有 d 似層相識既感覺。位於偃月橋旁的飛來峰, 是庭園造景內的高處, 以中國的名山命名之。由飛來峰往下眺望的南湖與偃月橋之景, 是栗林的代表性絕景亦是明信片與海報既代表景色。

因為我地泊左架車係北門, 所以由南庭走回北門取車, 剛剛好繞栗林公園走了一周。

10:00 am

出發往琴平既金刀比羅宮...

10:45 am

係表參道泊好車, 就見到大大間既中野烏冬學校... 山長水遠黎到香川縣, 除左可以品嚐香川縣出產既贊歧烏冬之外, 仲可以黎呢間中野烏冬學校體驗一下自已整烏冬既樂趣, 不過我地行程緊迫, 就咁參觀下算喇。

金刀比羅宮位於四國地區香川縣琴平海拔 521 公尺的象頭山山腰上, 這裡因供奉著被稱為 "金毗羅" 的海上交通守護神而聞名, 因此不少造船廠或是船東於新船下水啟用前會前來祈求航行平安, 後來更吸引了不少日本各地的人來此參拜。從參拜道入口到達奧社一共有 1368 階, 到達本宮則有785 階。

11:45 am

唔知行左幾多級樓梯, 一路行一路傾, 好快就到左本宮喇... 本宮係祭祀大物主神以及崇德天皇, 莊嚴的社殿讓人肅然起敬。黎到本宮已有相當高度, 可以欣賞到琴平市既景色。

行得咁辛苦, 梗係要買番個金刀比羅宮既幸福御守啦...

如果大家仲有氣力的話, 可以繼續挑戰餘下既 583 階, 向白峰神社、奧社進發... 由於我地仲要趕往偏遠既祖谷, 所以都係下山喇 :P

12:50 pm

落番表參道, 選了這間 Konpira 烏冬店, 試試出名既贊歧烏冬... 各點了一個凍一個熱既烏冬, 烏冬夠彈牙, 味道都唔錯, 但品嚐過日本三大烏冬之後, 本人都係對秋田縣既稻庭烏冬同群馬縣既水澤烏冬念念不忘呢！

1:30 pm

離開琴平, 向德島縣既祖谷溪進發。

祖谷是位於德島縣西面、四國中部既山區地方, 被列為日本三大秘境之一。日本三大秘境是指歧阜縣白川鄉的合掌村、九州宮崎縣的椎葉村同埋四國德島縣既祖谷一帶。相傳西元 1180 年間, 日本兩大武士家族「源氏」和「平氏」展開「源平合戰」, 最後源氏取得勝利。在這持續六年既戰爭過程中, 平家人四處逃散, 也造成日本各處都有「平家落人」的傳說與遺址。由於當年平家逃入這些深山荒野, 卻依舊保留著貴族生活型態, 因此相關平家落人的建築、食物、溫泉、生活型態等等, 直到現在都還非常受日本人喜愛, 認為那是一種「秘」的感覺、美的感覺。在這些流傳著平家落人的遺址中, 又以岐阜縣白川鄉的合掌村、九州宮崎縣的椎葉村, 以及位於四國德島縣三好市的祖谷地區被合稱為「三大秘境」。

去過白川鄉, 由於遊客眾多, 已不太有秘境感覺... 椎葉未去過... 至於祖谷呢, 由於位處深山, 大步危與小步危旁既祖谷溪流與峽谷, 景觀非常漂亮, 加上遊客都係日本人多, 感覺寧靜舒服得多。

3:05 pm

沿住祖谷溪流向祖谷溫泉方向一直駛, 就會見到這個 "小便小僧" 雕像。這個雕像樹立在祖谷溪最險峻既七曲段上方, 一塊突出於懸崖、距離溪谷200 多米高既岩石上, 係呢度望落去谷底, 都有 D 腳軟既感覺呢！據說以前 D 祖谷人相約黎呢度尿尿, 以證明自已既膽量 (果然係勁...), 後來此地就豎立左呢個雕像做紀念, 亦都成為左祖谷一個好出名既景點呢！

4:10 pm

再渣車往東祖谷方面走, 為的是一個有如童話般, 就好似天空之城一樣既景點 - 落合集落。見到呢個牌就轉右, 沿住山路一直上, 就會去到落合集落展望台架喇。

5:10 pm

返回祖谷溫泉方面, 探訪祖谷人氣第一既 "祖谷藤蔓橋"。顧名思義, 藤蔓橋即是用藤類植物來編織既吊橋, 其主要目的就是可以隨時砍斷藤蔓, 以阻止敵軍既追捕。根據記載, 古時該處有多達 13 條藤蔓橋, 而家就只剩下祖谷這條和東祖谷二重藤蔓橋了。

走一轉祖谷藤蔓橋 (只限單程) 要 500 yen, 全長 45 m, 寬 2 m... 成條橋就是由木條和藤來支撐著, 未走時以為好易, 點知一走, 嘩, 條橋左搖右擺, 好似想跌咁... 再望下面, 木條同木條之間既縫隙又超大, 腳板細 D 都驚跌落去... 行到中段, 開始唔驚, 仲覺得好好玩, 係咁影相 tim, 哈哈！

行完藤蔓橋, 再走到隔離既琵琶之潼。

6:30 pm

黎到今晚入住既溫泉酒店 - 祖谷之宿 Kazuraya check in。呢間酒店規模係祖谷一帶黎講唔算大, 但環境優雅, Staff 親切有禮, 我地一落車就有個伯伯出來幫我地搬行理 (其實好多溫泉酒店都會既, 哈哈)。

7:00 pm

休息一陣就食 dinner 喇... 成個旅程一共住了四晚溫泉酒店, 今晚這個祖谷溫泉晚餐係最令人失望的, 但住宿加晚餐的價錢卻是最貴的一晚... >.< 整個晚餐連一片魚生都沒有, 就連天婦羅亦只有蔬菜, 蝦都沒一隻... 難道祖谷位處深山, 時令的食材就只有蔬菜, 哈哈！

8:30 pm

溫泉第二擊 - 日本三大秘境之祖谷溫泉！

11:30 pm

休息。

~Day 5~

28/8/2013 (Wednesday) 晴

祖谷溫泉 --> (愛媛縣) (東予) 今治城 --> 瀨戶內島波海道 --> 龜老山展望公園 --> 松山城 --> 道後溫泉本館 --> 道後溫泉街 --> 道後之宿葛城

8:00 am

食早餐...

9:00 am

check out 之後又要長征, 出發去愛媛縣既東予地區。愛媛縣位於四國既西北邊, 分成了東予、中予和南予三個地區。東予地區當然就是指愛媛縣東面既部份, 即是今治市一帶。而南予就是松山市南面既內子、伊予大洲同宇和島市。

9:30 pm

經過大步危站...

11:20 am

黎到今治市, 先去看看今治城。今治城建於慶長 9 年 (西元 1604 年), 寬闊既護城河, 是今治城一大特色...

今治城大門 - 鐵御門。

這個是今治城既築城者 - 藤堂高虎。

天守閣...

12:00 pm

欣賞完這個日本 100 名城之後, 又要趕往下一個目的地 - 龜老山展望公園。其實今治這個地方, 對遊客來說本來是個陌生既城市, 但近年不知為什麼興起踏單車之旅, 路線就是位於今治、跨越瀨戶內海的島波海道。瀨戶內島波海道是由各具特色的 9 座高架橋樑將瀨戶內海的大島、伯方島、大三島、生口島、因島和向島連接起來的全長約 60 公里的汽車專用道路, 頭尾連接本州廣島縣尾道市和四國愛媛縣今治市, 亦是一條近年頗熱門既單車車道。

12:30 pm

我地就當然冇時間慢慢踏單車, 但係都想欣賞下瀨戶內海既景色, 所以就渣車黎呢個位於大島南端、海拔 307.8 米既龜老山展望公園。

1:00 pm

Lunch 諗住係大島食埋先, 睇旅遊書介紹, 去左呢間 "道之站 yoshiumiikiiki 館"。其實呢間道之站餐廳既特色係食炭燒海鮮, 你可以揀自已鍾意食既海鮮, 然後慢慢燒黎食, 我見 D 網友都話好好食... 不過我地驚咁食法唔知要食幾耐, 所以都係食番個普通既 Lunch 算喇。

今治燒豚玉子飯...

海鮮冷麵...

1:50 pm

食飽飽就出發往松山城...

松山城是日本江戶時期末期的重要城堡, 由築城名人加藤嘉明於 1602 年開始興建, 於 1627 年完成, 歷時 25 年。日本全國現僅有 12 座現存天守, 松山城是其中之一, 其城樓、乾櫓、戶無門等 21 棟建築, 被評定為日本國家級重要文化遺產。

3:30 pm

到達松山城纜車站, 不愧為重要古蹟景點, 個纜車站都咁靚... 想登上松山城這個著名歷史古蹟, 必須從山下搭乘纜車上去 (走路約需 20 分鐘), 來回纜車加參觀天守閣套票為 1000 yen。

買完飛就上山喇, 通往松山城的纜車有兩種, 一種就是普通既纜車, 即係海洋公園果 D 咁啦, 另一種就是類似滑雪場那種單人空中吊車, 去程我地選擇坐單人空中吊車, 坐定定都唔太驚既, 呵呵！

唔好以為搭完纜車就到, 仲要行多一段路先到天守閣...

登上天守閣...

落山唔駛諗, 因為單人空中吊車已經停駛, 只好搭纜車了。

5:30 pm

離開松山城, 向道後溫泉進發。道後溫泉係日本最古老既溫泉之一, 據說約 3000 年前已開業。

5:45 pm

到達溫泉酒店 "道後之宿葛城" check in... 一間規模相當大既酒店, 泊好車後, 當然又係有個阿伯出黎幫你拎行理...

6:00 pm

放低行理就出發去溫泉街中心既道後溫泉本館... 道後溫泉本館係建造於 1894 年既公共溫泉浴場, 係道後溫泉既標誌, 幾乎每個黎道後溫泉既遊客都必定會黎呢度浸一浸...

溫泉酒店送左位於地下一階 "神之湯" 既入浴卷俾我地, 咁我地就慳番每人 400 yen 喇...

好快浸完出黎就行下道後溫泉街, 好熱鬧呢！

行到溫泉街盡頭, 就會見到道後溫泉時計 "少爺機關鐘塔"... 為左慶祝道後溫泉本館建立 100 周年, 在 1994 年模仿道後溫泉本館的振鷺閣所建, 每隔一小時就會播放輕快的旋律, 是道後溫泉人氣地標...

古色古香既道後溫泉電車站... 電車站前既廣場, 還放著一架少爺蒸汽火車...

7:15 pm

回酒店食 dinner, 坐低不久, Staff 端上一碟二人用既新鮮魚生, 未食都流晒口水喇... 仲有和牛同愛媛縣既名產鯛魚飯。係愛媛縣呢度, 鯛魚既捕撈量係全日本第一, 咁鯛魚飯自然就成為愛媛縣既代表風味美食啦。不過東予同南予烹調鯛魚既方法並唔一樣, 係東予 (即今治、松山) 呢度, 煮法是把肉質緊實兼最高級既鯛魚, 整條放入鐵鍋與大米一同煮熟。Staff 幫我地著左個火, 叫我地等 25 分鐘, 個鯛魚飯就食得咁話... 真係好好味呀！至於南予地區烹調鯛魚既方法, 等聽日去到宇和島再講啦... :P

8:15 pm

食飽飽後又出動, 因為道後溫泉係八月份有個夏日祭典, 咁我地梗係出去湊下熱鬧啦！所謂既夏祭, 就是有人表演打鼓... 聽落好似冇咩好睇, 但其實都 OK 喎...

睇完表演我地又行溫泉街喇... 道後溫泉真的很特別, 座落係松山市中心, 但卻保留著古老既風味, 不愧為日本最古老既溫泉... 加上呢度遊客多, 到左夜晚九點溫泉街仲好熱鬧, 真係非一般既溫泉！

10:00 pm

溫泉第三擊 - 日本最古老溫泉之道後溫泉！

走到隔離既姊妹館浸溫泉... 除左 "道後之宿葛城" 自已既大浴場之外, 酒店還附送左隔離姊妹館既溫泉入浴卷俾我地, 咁我地就諗住去左隔離果間浸左先, 聽朝再係我地住既呢間浸多次咁...

11:30 pm

休息。

~Day 6~

29/8/2013 (Thursday) 晴

道後溫泉 --> (南予) 內子 --> 伊予大洲 --> 大洲城 --> 宇和島城 --> (高知縣) 四萬十川岩間沈下橋 --> 佐田沈下橋 --> 足摺園 Hotel

7:50 am

因為琴晚只係浸左隔離酒店個溫泉, 所以今朝就早 d 起身浸埋 "道後之宿葛城" 呢面個溫泉... 一朝早冇咩人, 爽呀...

8:10 am

浸完就食個正早餐先...

9:15 am

check out, 向南予地區進發... 今日會依次探訪南予既內子、伊予大洲同宇和島呢三個地區...

10:15 am

到達內子町, 先到高昌寺...

沿住內子町觀光協會推薦既策散路線一路走...

江戶後期到明治時代, 內子出產既木蠟和紙品質都很有名, 內子因而繁榮起來。"八日市．護國地區" 一帶至今仍保留著當年的景象, 更被指定為國家級重要傳統建築群保存地區。

內子町有一座很出名既內子座...

內子座是一座觀賞歌舞伎既木造戲劇院, 為內子町指定文化財, 亦是代表愛媛縣既木造建築。古時為了慶祝日本大正天皇即位, 由地方善心人士出資, 於日本大正 5 年 (1916 年) 建設, 定期上演歌舞伎、電影等, 為內子居民提供享樂設施。

11:30 am

離開內子, 向伊予大洲進發。大洲市是鎌倉時代末期, 伊予國的守護宇都宮豐房修築地藏城而發展起來的城下町, 以生產木蠟、蠶繭而繁榮, 至今仍隨處可見歷史古蹟, 如大洲城遺趾、臥龍山莊、白壁土藏街道等等, 是一座有山、有水、有城, 又古色古香既城市, 因此亦有 "伊予小京都" 之稱。

小花街... 沿街排列從江戶到明治時代的商鋪與武士宅第, 頗具懷舊情調。

走到臥龍山莊... 臥龍山莊是明治時期的富商河內寅次郎, 構思十年之久所建的別墅, 以建築、庭園、景觀著名。

最後走到大洲城... 大洲城看落去好似好新咁, 皆因建於鎌倉時代末期既大洲城, 於明治 21 年 (1888) 獲廢城令, 天守亦被拆除, 現在的天守閣是從平成 6 年 (1994 年) 開始復建, 一直到平成 16 年 (2004 年) 才完工的。

1:00 pm

離開大洲, 又要出發往下一個目的地 - 宇和島。係宇和島城附近泊好車, 見時間都唔早又有 d 肚餓, 咁就食 lunch 先啦...

1:45 pm

選了這間專吃日本鯛魚料理的餐廳 - 一心... 叫了兩個鯛魚定食...

之前都講過了, 鯛魚係愛媛縣既名產, 而南予同東予地區烹調鯛魚既方法係唔同既... 東予地區既鯛魚飯已經係道後溫泉品嚐過喇, 至於南予地區既鯛魚呢？睇下下面張相就知啦... 愛媛南予既鯛魚飯又稱 "日向飯", 係用新鮮捕獲既鯛魚製成魚生, 浸入拌有生雞蛋既醬汁, 再與米飯一同食用既。至於邊隻好味 d？我覺得兩隻煮法都非常好味呀, 哈哈哈！

2:45 pm

食飽飽就走上宇和島城... 宇和島城始建於天慶 4 年 (941 年), 在嘉禎 2 年 (1236 年) 被改建為丸串城。後來築城名手藤堂高虎在文祿 4 年 (1595 年) 被封為宇和郡 7 萬石大名, 藤堂高虎在丸串城遺跡上大幅改建, 成為了現在所見的宇和島城風貌。

井戶門...

好彩食左 lunch 先行, 因為要行好多石階呢, d 石階仲要唔係幾好行, 因為年代久遠, 好多石階早已凹凸不平...

終於到達本丸, 從本丸眺望 "宇和海"...

宇和島天守閣...

3:30 pm

離開宇和島, 向高知縣既四萬十川進發。對於愛看自然風景既我來說, 四萬十川是我非常期待既行程。四萬十川是位於高知縣西部渡川水系的干流, 全長 196 公里, 流域面積 2, 270 平方公里。由於四萬十川不如其他河流般湍急, 同時上游並未興建水壩, 水質清澈見底, 因而有 "日本最後的清流" 之美譽, 並與柿田川及長良川並稱日本三大清流。四萬十川流域內共架設 47 座沒有設置欄杆的沈下橋, 當水位升高時, 橋面會被淹沒, 形成獨特的景觀。由於四萬十川既沈下橋眾多, 我地只會去必遊既岩間沈下橋同佐田沈下橋...

途中經過 JR 江川崎站, 見有個觀光案內所, 入去拎張地圖先, 案內所那個女人還好細心咁教我地去岩間沈下橋既路線 tim...

沿住地圖走, 途中既風景已經美不勝收, 忍唔住停低影相呢！

4:40 pm

岩間沈下橋... 建於昭和 41 年, 全長 120 米。橋既兩邊真係冇欄杆, 不論係渣住架車行, 定係個人係上面行, 都好驚會跌落橋呀, 哈哈！

呢個係 poster 常見既招牌靚景...

5:40 pm

四萬十川條溪流咁靚, 沿途仲有好多唔同種類既水上活動...

6:10 pm

佐田沈下橋... 建於昭和 47 年, 全長 291.6 米。佐田沈下橋位於四萬十川最下游, 亦是最長的一條沈下橋...

遊客可以坐呢 d 屋形船欣賞四萬十川既景色...

要離開四萬十川喇... 日本最後的清流果然冇令我失望, 美麗既風景、清澈既溪流、純樸既風土人情加上獨特既沈下橋... 雖然四萬十川確實有點遠, 唔係自駕仲更加麻煩 tim, 但我都推薦呢個地方俾大家 ^.^...

6:30 pm

向四國最南端既足摺岬駛去... 由於天已黑, 感覺渣車時間比白天長咁... 中途仲要俾個 GPS 老點行左一條超黑超窄既山路...

7:30 pm

終於到左足摺岬既溫泉酒店 - 足摺園 Hotel... 對於位處咁偏遠既溫泉酒店黎講, 我地呢個時間先黎 check in 確實有點遲, check in 時那個男 staff 叫我地放低行理就好去食 dinner, 哈哈！

7:45 pm

好啦, 反正個肚都打晒豉, 就拿拿臨去食 dinner 啦... 一坐低, 見到檯上已經放左好多海鮮係度,又蝦又蟹咁, 心諗咁正既...

點知驚喜陸續有來, 負責招呼我們的嬸嬸隨後端上一盤勁大既魚生, 見到眼都突埋... 此時才醒起訂房時, dinner 說明是享用皿缽料理的。皿缽料理究竟係乜？皿缽料理係日本高知縣同三重縣既鄉土料理, 專門係聚會或宴會上供應。料理用上一個直徑有 33 cm 長既大盤子, 將繁多既時令飯菜盛載在內, 飯菜款式並冇規定, 可以係刺身、壽司或著主菜等等, 總之就排列得井井有條, 陣容鼎盛。

我地享用既巨碟之中, 有好多新鮮既鯛魚、池魚同油甘魚... 大大塊, 食落有 d 入口即溶既感覺, 真係超勁滿足！除左巨碟中既刺身, 另外仲有一碟高知代表性名物 - 鰹魚他他燒。黎高知冇食過鰹魚, 就等如去北京冇行過長城一樣啦... 他他燒是將鰹魚表面用火烤熟, 但內裡仍是魚生, 又係好好味呀！不過掛住食, 唔記得影碟鰹魚既大特寫 tim...

9:30 pm

食完四國之旅最豐富既一餐晚餐就去浸溫泉喇...

溫泉第四擊 - 日本最南端之足摺岬溫泉！

11:30 pm

休息喇。

~Day 7~

30/8/2013 (Friday) 晴

足摺岬溫泉 --> 足摺岬 --> 足摺黑潮市場 --> 香美市麵包超人博物館 --> 桂濱 --> 高知 --> Hirome 市場 --> 高知 Bright Park Hotel

8:10 am

食早餐...

補番張酒店相先...

9:15 am

check out 後就開始遊足摺岬... 位於日本四國最南端既足摺岬屬於足摺宇和海國立公園, 係呢度可以 270 度之廣闊視野眺望太平洋... 以足摺岬燈塔為中心, 有一條圍繞住山角全長約 2 km 既策散遊覽路線, 途中仲可以睇到足摺岬七不思議...

我地以停車場側既入口廣場為起點, 呢度有個好大既 "約翰萬次郎" 銅像。約翰萬次郎, 原名中濱萬次郎, 是個傳奇人物。他出世於高知縣土佐清水市, 是一個貧窮漁夫既次子。15 歲時遇到暴風雨, 在海上飄流了 5 日半後, 奇蹟地飄到位於大平洋既無人島上生活了 143 天, 其後獲救並遠赴美國生活。在日本幕末時期, 回到日本當教師, 協助設計蒸汽船並促進日美親善條約, 對日本歷史影響深遠。

足摺岬展望台...

七不思議之一 - 地獄之穴。

七不思議之二 - 弘法大師爪彫之石。

七不思議之三 - 龜呼場。

足摺岬燈塔...

七不思議之四 - 潮之滿干之手水缽。

七不思議之五 - 龜石。

白山洞門...

白山洞門對面有個金剛福寺... 唔好以為日本寺廟冇咩特別, 係日本四國入面有 88 間由弘法大師修建, 稱為靈場既寺廟, 俗稱八十八箇所。環繞走一遍, 全長約 1,400 公里, 呢個動作稱為 "遍路"。係日本人心目中, 遍路係非常神聖且認為是一生中必要完成的一個舉動。金剛福寺係八十八箇所既第 38 站, 供奉著千手觀世音菩薩。

七不思議之六 - Yurugi 石。

七不思議之七 - 一夜建立不成之華表。

睇完晒都唔係好知究竟有幾咁不可思議 :p

10:45 am

其實足摺岬好細, 好快就行完... 出發去足摺黑潮市場食 lunch...

11:00 am

呢個魚市場又係好細, 入面得一間餐廳... 叫左兩個鰹魚烏冬...

11:50 am

食完 lunch 又要長征, 渣車去香美市既麵包超人館...

3:00 pm

山長水遠黎到香美市, 就係為左去麵包超人館... 入場費 700 yen, 包三個美術館。

主菜當然係麵包超人館啦, 參觀過後有點失望... 美術館樓高五層, 睇落去好似好大咁, 但係展品並不多, 好快就行完... 大家計劃行程時可考慮一下是否值得去喇...

睇埋另外兩個美術館... 入面仲要唔俾影相...

4:00 pm

三個美術館加埋都係行左一個鐘 >.< 之後去桂濱... 高知縣既著名景點, 除左高知城外, 就是桂濱公園了... 明治維新既主要人物板本龍馬就係出身自高知縣...

板本龍馬同約翰萬次郎一樣, 都係維新時期既傳奇人物, 而板本龍馬更為大家熟悉。板本龍馬是日本幕末時期的維新志士, 他促成薩摩及長州二藩成立 "薩長同盟" 協力推翻幕府, 板本龍馬所提出的「船中八策」更是後來維新政府重要的指導方針。

4:50 pm

板本龍馬記念館... 去到都差唔多閉館, 冇得睇...

個個都爭住同板本龍馬扼扼手, 你睇板本龍馬在日本人心中既地位係幾咁重要...

板本龍馬銅像... 建於昭和三年 (1928 年), 由高知縣居民集資建造...

再走到桂濱沙灘逛逛...

6:30 pm

返回高知, 到今晚入住既 "高知 Bright Park Hotel" check in... 呢間酒店價錢平, 房夠大, 地點非常好, 係高知城同 Hirome 市場附近, 不過唔近 JR 高知站, 岩晒自駕遊既朋友...

6:45 pm

放低行理就出去行下, 附近有個壹番街... 一出酒店就聽到香港人既聲音, 四國之旅唯一一次撞到香港人, 佢地一定係去緊 Hirome 市場, 哈哈！

7:30 pm

沿住商店街一路行, 行到尾就會見到 Hirome 市場！呢個開到夜晚十一點既 Hirome 市場, 除左係遊客必到既市場, 仲係當地人放工聚守一堂, 飲住啤酒傾下計既好地方... 初時見到佢話收十一點, 心諗有冇人架？點知去到, 真係座無虛席, 好熱鬧！

搵左兩個位就去人氣第一既 "明神丸" 排隊, 叫左兩客鰹魚他他燒定食... 等食時仲見到師傅係度烤 d 鰹魚, 好好火 :p

有得食喇... 放左第一片鰹魚入口... 嘩嘩嘩... 唔係跨張, 真係堅好味！表面有炭燒既味道, d 魚肉好新鮮兼且入口即溶, 比琴晚溫泉酒店同今日足摺魚市場個鰹魚烏冬仲好食好多, 最重要係價錢平, 唔怪得呢間明神丸咁出名啦, 十個讚呀！

食飽飽就慢慢行番酒店。

11:30 pm

休息。

~Day 8~

31/8/2013 (Saturday) 晴

高知 --> 高知城 --> 安芸市野良時計 --> 室戶岬 --> (德島縣) 日和佐大濱海岸 --> 德島眉山 --> 德島站眉山口 Toyoko-inn

8:15 am

酒店唔包早餐, 諗住出去食, 點知行左一陣, 周圍靜英英, 咁就去左高知城先啦...

8:40 am

高知城係高知市一座日本城堡, 是平山形城堡, 屬於日本國家指定遺跡之一, 戰國時代稱為大高板山城。一入去就見到戰國武將山內一豐既銅像...

高知城大門 - 追手門...

進入追手門後, 可以看到同樣是土佐出身既維新功臣 - 板垣退助既銅像。

沿住階梯繼續走, 看到山內一豐正室 - 山內千代既銅像。傳說當山內一豐還是下級武士時, 千代用自已的嫁妝買下這匹馬給山內一豐。山內一豐騎乘此馬參加戰鬥而獲得織田信長賞識。另一說法是山內一豐騎乘此馬在信長家臣間的賽馬中勝出, 而獲得功名。還有一種說法是山內一豐將此馬送給信長因而獲得信長既賞賜。

從階梯看到美麗既高知城天守喇...

二之丸的區域...

其 4 層 5 樓的天守閣是日本僅存 12 座的現存天守之一, 極為珍貴。我地冇上天守閣, 只在外欣賞天守閣加庭園既美...

9:30 am

走回商店街, 見到有 cafe, 入去食早餐喇...

10:10 am

再去高知市中心既 Harimaya 橋...

呢條橋係以前兩位富商為方便做生意而建造既一條木橋, 呢條重建既紅色 Harimaya 橋已成為高知既地標...

10:40 am

又要讚下呢間酒店, check out 時間都俾人遲, 係十一點... 行完就番去 check out, 離開高知後我地要去高知東南面既室戶岬... 由於車程比較長, 我地中途會停一停安芸市, 當係休息一下。

11:45 am

到左安芸市, 雖然呢度冇咩遊客, 但安芸有一個頗出名既野良時計... 野良時計是這家民宅主人在 1887 年自己購買零件、拼裝而成的時鐘, 把時鐘安裝在自家門前, 農人既作息都以這鐘為準, 在當時既鄉村可是了不得的大事。現在這座一百多歲的老時鐘仍然滴答滴答地走著, 襯著白色的牆壁和深色的屋瓦, 成為一幅非常美麗的田園風景, 野良時計儼然成為安芸的代表, 刻畫著安芸的過往和未來。

再走去睇睇武家屋敷... 靜英英, 鬼影都冇隻 >.<

如果唔係自駕遊, 我諗都冇咩人會 plan 黎呢度... 不過自駕遊確實有佢既好處, 可以係主要景點之間發掘一 d 二線景點, 除左當作中途站休息之外, 仲可以去多 d 地方深入了解當地文化, 真正既深度遊！

12:20 pm

離開安芸, 繼續向室戶岬進發。

1:20 pm

室戶岬係一個位於高知縣東南端室戶市靠太平洋側既海岬, 也是室戶阿南海岸國定公園既一部分, 是高知縣著名既景點之一。室戶地質公園更係 2011 年 9 月 18 日被列入為世界地質公園之列, 成為日本第 5 個世界地質公園。

泊好車就走去室戶地質公園, 呢度可以睇到因板塊運動和一億年前海底地震而隆起的海岸等豐富既地質景觀。

1:50 pm

食 Lunch...

中岡慎太郎雕像... 一個幕府時代末有名既政治家, 不僅參加尊王攘夷運動, 還為團結討幕勢力而奔波, 同情人民疾苦, 關心國家前途。據說這個雕像面向的方位, 便是正正對著位於桂濱既板本龍馬銅像。

2:25 pm

弘法大師修行之地... 一個弘法大師昔日修行既洞穴...

2:45 pm

著名既戀人聖地, 可以清楚見到室戶之象徵 - 室戶岬燈塔。這座燈塔完成於明治 32 年 (1899 年), 至今仍持續維護航海安全, 燈塔上既透鏡直徑 2.6 公尺, 是日本最大既透鏡。

3:10 pm

離開室戶岬後又要長征, 向德島進發。由於車程又係比較長, 中途會停一停日和佐既大濱海岸。

4:30 pm

到左日和佐, 停車場側就係日和佐海龜博物館。入去借個洗手間一用先 :p

大濱海岸... 冇咩人, 好舒服啊！

5:00 pm

繼續駛向德島。

6:15 pm

到左德島, 先到今晚入住既德島站眉山口 Toyoko-inn check in, 然後就駛上眉山睇夜景。

6:45 pm

眉山夜景當然冇摩耶山呀, 函館山果 d 咁出名啦, 不過話晒係德島名勝, 都要上黎睇下啦！

睇完夜景就番酒店休息一下, 然後再出動去食 dinner。黎左四國咁耐都係食魚生多, 今晚決定食居酒屋, 走到位於另一間德島 Toyoko-inn 對面既居酒屋 "Suzuno 助"...

8:15 pm

黎德島就要食阿波雞, 咁就點左一客... 不過食落同普通炸雞冇咩分別姐 >.< 總之今晚就盡情炸炸炸啦...

呢客就係德島名物 - 阿波雞...

9:30 pm

食飽飽就番酒店休息喇。

~Day 9~
1/9/2013 (Sunday) 雨

德島 --> 鳴門觀光船 --> 鳴門公園渦之道 --> 靈山寺 --> 阿波舞館 --> (兵庫縣) 淡路島 --> 關西國際空港 --> 香港

7:45 am

今日係四國之旅既最後一日喇, 一於繼續玩盡佢... 首先食番個好耐冇食既東橫 inn 早餐先...

8:10 am

食完早餐就出發去鳴門睇旋渦... 由於鳴門海峽的寬度相對狹隘, 流經其間的快速海潮會在此處形成此起彼落的漩渦。這種特殊既現象日本人稱之為鳴門的渦潮, 號稱是世界三大渦潮之一。要觀賞鳴門旋渦有兩個方法, 一個係坐觀光船係海上近距離睇, 另一個係去鳴門公園內既渦之道從高空望落海面... 採取邊個方法都好, 最緊要係睇定當日既潮見表... 每日只會有一次潮漲同一次潮退, 撞唔岩時間就白行一趟架喇...

鳴門有兩間船公司經營觀潮船, 一隻係位於龜浦漁港既細船 (Uzushio 汽船), 另一隻係位於龜浦觀光港既大船 (鳴門觀光汽船)。計劃行程時都唔知揀邊隻觀潮船好, 因為我地係自駕, 所以唔需要顧慮碼頭既地點, 後來考慮到坐細船的話, 應該可以更加貼近 d 旋渦, 所以就透過佢地既網頁 book 左朝早 9:00 am 既船飛。

點知... 去緊碼頭既途中, 個天開始黑... 落雨 tim... 仲越落越大... 係大到黑色暴雨警告果隻... 大到我地有 d 懷疑觀潮船仲會唔會航行 >.< 係呢個時候, 我醒起有個網友講過, 黎到碼頭因為好大風既關係, 所以隻細船停航... 咁而家咁大雨, 我又驚去到佢唔開船, 如果去到隻細船唔開, 我地又趕唔切去坐 9:00 am 開果班大船, 唉, 咁點好呢？就係呢個時候, 我地作出左一個好重要既決定, 就係改去坐大船... 去咁多旅行, 呢次係我地第一次預先 book 左野但臨時放飛機囉, 個心真係有 d 唔舒服呢！

8:50 am

黎到龜浦觀光港, d 雨終於細番 d... 去到售票處, 見到 9:00 am 出發既鳴門觀光汽船船飛正在發售中, 好野... 買完飛就等上船喇！

今日既潮退時間係 9:20 am, 係前後既個半鐘應該都可以睇到旋渦既...

9:00 am

開船喇, 好快到左鳴門海峽... 之所以有高速的旋渦流通過鳴門海峽, 係因為位於淡路島兩邊海面高度落差異所產生的海流。當潮漲時南邊的海面會比北邊高, 潮流由南往北快速流動, 稱為北潮。而當潮退時, 北邊的海面高過已進入潮退的南邊, 形成了由北往南的快速潮流, 此稱為南潮。基本上南北高低落差越大, 所導致的旋渦效應就越明顯。

鳴門漩渦最大可以大到直徑 20 公尺, 尤其在春秋兩季的大潮時更是特別的明顯。

去到鳴門海峽, 我地見到原先 book 左果架細船 :p

船程半個鐘, 番到碼頭再去鳴門公園內既渦之道...

9:45 am

渦之道距離海面 45 米, 長 450 米。係走道上設有幾個透明玻璃地板, 透過玻璃地板都可以睇到壯觀既旋渦, 不過就冇觀光船咁近咁清楚啦...

因為要就番今日潮退既時間, 所以行程安排係一早去左鳴門, 睇完旋渦再番去德島...

11:40 am

lunch 前去左靈山寺... 靈山寺係四國八十八箇所既首站, 供奉釋迦如來本尊。主殿既天花掛滿和式燈籠, 除左朝聖者之外, 呢度亦吸引左好多慕名而來既遊客。

12:30 pm

返回德島市中心, 趁最後一日既 lunch 試下德島拉麵先... 係網上搵左一間當地食評比較好既德島拉麵 - 中華 Soba Inotani 本店。去到正值中午 lunch 時間, 果然係好多人喎... 不過日本食拉麵就好似香港食雲吞麵咁, 好快就有位... 叫左兩個德島拉麵, 我果個仲加多隻生雞蛋 :p