~南美．智利、玻利維亞．高原沙漠 x 天空之鏡探秘之旅十五天遊~
日期: 20/12/2015 - 3/1/2016
對很多喜愛旅遊的亞洲人黎講, 即使是足跡已遍佈世界各地的旅行愛好者, 南美洲實在是一個只可遠觀卻未能踏足既地方... 主要原因是距離, 由香港去南美的任何一個國家, 少極都起碼要飛二十個鐘, 長時間的飛行時間實在是折磨人的... 其次就是價錢了, 飛到咁遠, 淨機票都夠你去兩轉日本了... 就當你不怕長途機, 又有大把銀兩, 都仲要有假期囉... 去程預兩日, 回程預三日, 去一轉起碼要請兩個星期假... 其實我都好怕搭長途機, 請假又難, 最重要就係冇乜銀兩, 咁又點會促成呢個南美之旅既呢？原因就係我一個朋友, 佢既足跡已遍佈世界各地, 既唔怕搭長途機, 又有假期又有銀兩, 呢個聖誕佢又同我講話要去南美既高原沙漠區同去睇天空之鏡, 問我去唔去... 我聽到南美呢兩個字已經雙眼發光, 再聽到天空之鏡就直頭想即刻請假 :p 認真說, 上面講左香港人少去南美既原因, 而家難得有人同我去, 我係十分之想去... 搭長途機都仲可以接受, 假期方面應該都不成問題, 令我猶豫不決既其實係銀兩... 去一次南美真係唔平, 唔係話駛左再搵過咁簡單呀 (証明我真係冇咩銀兩的...) 諗左好耐, 覺得呢次唔去可能真係要等退休先有機會, 好啦, 一於 join 朋友一齊去, 最多回來捱麵包...！
一提到南美, 人們多數會想到南美四國﹕秘魯、智利、巴西及阿根廷。四國中, 我地只會去其中一國, 行程由智利北部既 Atacama Desert (阿塔卡馬沙漠) 開始, 一直向東北方走, 橫過智利與玻利維亞的交界進入玻利維亞的 Siloli Desert (斯諾利沙漠)... 繼而向全世界最大既 Salar de Uyuni (烏尤尼鹽沼) 即鼎鼎大名既 *天空之鏡* 進發... 遊畢沙漠區同天空之鏡後, 返回大城市遊覽兩國首都﹕ La Paz (拉巴斯) 同 Santiago (聖地牙哥)... 雖然我都經常自由行, 但今次要深入高地沙漠區同烏尤尼鹽沼, plan 行程確實係有難度, 以下就提供一個簡單既路線俾大家參考下啦﹕
香港 --> Chile (智利) --> San Pedro de Atacama (聖佩德羅德阿塔卡馬) --> Bolivia (玻利維亞) --> Siloli Desert (斯諾利沙漠) --> Salar de Uyuni (烏尤尼鹽沼) --> La Paz (拉巴斯) --> Chile (智利) --> Santiago (聖地牙哥) --> 香港
後記
上面提到, 為左去呢趟南美之旅, 番黎可能要捱麵包, 果然, 錢駛了不少, 但非常非常值得 (是藉口嗎 :p)！呢趟南美之旅, 看到很多珍貴既隱世秘景, 大大小小兼色彩繽紛既湖泊、酷似月球既山脈地形、國家公園內的火山動物、一望無際既鹽沼、間歇泉區等等... 呢啲景色唔捱過27個鐘頭機都睇唔倒... 除左自然美景, 還有展示南美洲古文名既世界遺產 Tiwanaku... 最後仲有暢遊兩大首都 La Paz (拉巴斯) 同 Santiago (聖地牙哥)... 令我特別難忘的, 就是有機會在南美洲智利這裡參與倒數活動, 迎接2016年的來臨！最後提一提人們都關心的高山症吧, 今次去的地方平均位於高海拔4000米, 確是非常高, 我都有點高山症的徵狀, 但吃點 Coca Candy, 行路唔好咁急促, 同埋係酒店吸下氧氣, 整體問題都不大。
