[2015 新加坡．馬拉松] Day 3 極具挑戰既濕馬・新加坡渣打馬拉松

~Day 3~

6/12/2015 (Sunday) 雨

酒店 --> 新加坡渣打馬拉松 --> 牛車水 --> 樟宜國際機場 --> 香港

4:30 am

終於到左今趟快閃之旅既主角 － 新加坡渣打馬拉松 (Standard Chartered Marathon Singapore 2015)。話哂都只係第二隻海外馬，琴晚都有啲緊張，又驚唔知醒遲到冇得跑，所以都訓得唔係幾好...

換好戰衣，帶齊所需物品就搭的士去會場，起點係 Sentosa Gateway...

由於唔想帶咁多野，尤其係貴重物品，所以冇帶電話，即係冇得影相... 不過係呢個資訊咁發達既年代，如果大家想知新加坡渣馬既進行情況又有幾難呢？想知 Race information 可以去上面個 official website，又或者可以去 youtube search "SCMarathonSingapore" 睇番比賽當日既 highlights...


等我都簡單咁介紹下呢個馬拉松盛事啦，新加坡係全球十個舉辦渣打馬拉松既其中一個城市，今年已是第14屆。由於新加坡是熱帶國家，氣候相當炎熱，溫度濕度都好高，所以大會給予全馬參賽者既比賽時間亦係最長既，有成八個鐘咁多... 你可能會覺得八個鐘咁長，行都行到啦，係我親身跑完呢隻濕馬之後，我真係想講，呢個馬拉松真係好難應付，超辛苦呢 >.< 唔知點解佢唔同曼谷既渣馬，曼谷渣馬係零晨時分起跑既，新加坡就係清晨起跑，跑到咁上下太陽伯伯就出黎喇，係烈日當空下，唔好話跑，行都辛苦啦...

新加坡渣馬亦係一個國際田聯認可既金標賽事，起點在 Sentosa Gateway，沿途會經過新加坡既觀光名勝，終點為市中心既 City Hall。實際路線要似乎參加既賽事，分別有全馬、半馬同十公里組別。我報左半馬，呢個就係半馬既環島賽道圖。

為免令大家睇到悶，我都係官網 Capture 左少少圖落黎，等我呢個半馬直擊報導精彩番少少咁啦...

比賽開始前，Sentosa Gateway 已聚集各路英雄一齊準備迎接呢個一年一度既盛事。現場氣氛非常熱鬧，就好似一個嘉年華咁...

(以下圖片來自SCMarathonSingapore)

全馬運動員整裝待發... 跑道外亦有好多打氣團隊...

帶頭既當然係黎自世界各地既精英跑手...

6:30 am
全馬出發左之後，我地就可以上線等起跑喇。半馬賽事亦係 6:30 am 開始...

睇番上面個賽道圖，我地係 Sentosa Gateway 出發，大約跑左 2km，呢個只係練習時一個熱身既距離，但我已經開始流汗，加上頭 2km 果條 Beach Walk 太窄，人又多，想過頭又難，實在跑得唔太順暢...

過左 5km 就開始進入 Universal Studios 喇... 入左環球影城跑得舒服少少，除左跑道濶啲，仲有芝麻街同 Minions 係沿途為跑手打氣啊！

一路跑一路經過唔同既主題區域，見到 WaterWorld 真係好想跑入去，唔係睇 Show，而係想跳落個水池度 :p

又跑多 5km，離開環球影城經過一條好似青馬大橋既天橋跑回 HarbourFront 那邊... 黎到呢個時候其實都跑左差不多一半路程, 剩番 11km 應該好快完成啦... 照理就應該係既, 但對於當時經驗尚淺既我, 係酷熱同高達86%濕度而太陽伯伯又在你頭上同你 say hi 既狀況下, 呢段 11km 既路程真係好難捱...

上左 highway 望住路邊提示剩餘距離既標示牌, 由 11km, 12km 到 13km... 心諗已經好辛苦, 點解仲未調頭架... >.<

跑呀跑, 大約係 13.5km 終於調頭喇, 此時沿住 West Coast Highway 向住終點方向繼續努力... 仲有大約 7km, 不過呢部分路程面向太陽, 好多人已經跑到汗流浹背, 有啲人仲開始行... 其實係烈日當空下跑步, 身體既水份迅速隨汗水流失, 真係唔中暑都偷笑...

睇下全馬精英到終點既英姿啦...

人地話哂都係世界級跑手, 睇落就梗係輕鬆啦, 至於我呢... 滴住汗咁堅持慢跑到終點, 當見到寫住 18km 既路牌時, 心裡面開始倒數, 捱多 3km 就完賽喇, 加油呀！雖然只係 3km, 一個熱身既距離姐, 但我覺得呢 3km 就好似跑左成個鐘咁...

幾經辛苦終於見到終點站, 拼命咁衝埋去... 當隻腳過左終點果一刻, 我即刻停落黎, 乜都唔理, 抖順條氣先... 此時有個工作人員走埋黎問我有冇唔舒服？駛唔駛坐輪椅？我心諗, 乜我個樣真係好辛苦咩？>.<

抖左唔知幾耐, 先至醒覺原來我已經成功咁完成左呢個咁艱巨既旅程 - 新加坡渣打半馬拉松, 成績係2小時12分, 仲比第一隻澳洲內陸半馬快左4分鐘 tim, 真係估佢唔倒... 能夠完成呢隻濕馬, 真係俾左自已一個好大既鼓勵, 長跑原本就是要訓練人既耐力, 但酷熱天氣又令呢隻半馬增添不少難道, 除左耐力, 冇堅強既意志力真係好難應付架！

慢慢走到完賽區, 工作人員會派發完賽獎牌, 望住呢個得來不易既獎牌, 心裡面真係有啲激動...

9:30 am
同朋友會合後返回酒店附近既麥當勞食早餐...

10:30 am
補充番能量之後就回酒店沖涼休息。

呢個就係靚靚完賽獎牌喇 yeah...

12:30 pm
休息後體力漸漸恢復, 亦都夠鐘 check out 喇, 寄存行理係 lobby 然後就步行到牛車水既 Maxwell Food Centre 食 lunch... 記得上年黎呢度就梗係為左食天天海南雞飯啦,  不過大家都知唔排至少半個鐘都食唔倒, 而我呢個黎呢度只係為"跑"而唔係"玩"既朋友, 又點會有耐性同你排呢... 佢話食隔離個檔咪一樣... @@@

1:00 pm
食完就行下牛車水同買林志源...

2:15 pm
搭的士返酒店拎行理, 然後再去機場。

牛車水既戰利品...

3:30 pm
去到機場 check in 出境, 然後食埋個 tea...

最後一個任務係同上年一樣, 就係買斑蘭蛋糕喇... 亦都因為上年去過, 我仲記得機場既 Bengawan Solo 分店既位置, 但係唔知點解行黎行去都唔見喎... 最後問下機場啲職員先知佢原來間舖裝修緊, 而家得一個好細既臨時檔仔... 跟住職員既指示終於搵到, 真係細到經過左都唔多覺, 賣既食品款式亦都好有限 >.< ...

4:45 pm
TR 2068 飛往香港既航班準時起飛...

8:45 pm

安全抵達香港, 3 天既新加坡渣打馬拉松之旅完滿結束。