~日本.中部北陸 (愛知、岐阜、石川、福井) x 名古屋馬拉松五天自駕遊~
日期: 12/3/2016 - 16/3/2016
上年十月頭在網上看到跑友話報左名古屋女子馬拉松, 呢個女子馬拉松由 Tiffany 贊助, 完走既跑手都會得到一條 Tiffany 頸鏈, 超吸引啊! 諗住湊熱鬧又報下, 點知原來已經截左止... >.<女子馬拉松就冇得玩, 但當日除左女子全馬, 另外仲有個名古屋城市半馬, Tiffany 頸鍊就冇架喇, 見仲有得報名, 就隨口問下係澳洲跑 Ayers Rock 半馬時識既跑友去唔去, 佢又一口答應, 仲話跑完可以玩番幾日咁話... 就係咁, 我地就報名喇!
上網報名確認後, 就買機票同 book 酒店... 由於我對日本自由行比較熟, 所以 plan 行程都係我一手負責... 問過朋友意見, 朋友話想 hea 啲, 由其跑完個半馬咁辛苦, 主要想去浸下溫泉, 食下野咁... 嘩, 咁就簡單啦, 目標明確清楚, 我 like 呀... 好快就定好行程, 第一天到步先去 Expo, 第二天就係馬拉松賽事, 休息後就租車開始自駕遊, 住三晚溫泉酒店, 分別係下呂、奧飛騨同越前海岸既溫泉鄉... 旅程中可以品嚐到高山既飛騨和牛、金沢近江町市場既超正魚生同季節限定既越前蟹豪華料理... 一個短短既日本 5 天之旅, 可以完成一個半馬賽事, 享受美食, 欣賞靚景同狂浸溫泉, 真係超級滿足啊!
後記
今次係我既第四個海外半馬, 由於全程路線平坦, 天氣清涼, 唔會好似新加坡渣馬咁熱到爆, 又唔似台灣渣馬咁凍到顛... 所以最後 pb 了, 以 2:06 時間完走。可以 pb 真係好開心, 不過跑完係好攰好攰, 同朋友離開時, 我地傾傾下先發現... 咦, 冇獎牌既... 對一啲真正熱愛跑步既人黎講, 完賽獎牌當然唔係最重要, 但當我知道原來咁辛苦走完係冇獎牌既時候, 我真係覺得有啲失落同唔抵囉 :p 下次報名時真係要睇清楚, 哈!