[2017 英國．馬拉松六大滿貫]「跑者殿堂」．倫敦馬拉松 2017 直擊報導

~Day 1~
21/4/2017 (Friday) 香港 --- 晴, 倫敦 --- 晴

香港 --> 倫敦希斯路機場 --> 溫莎 Windsor --> 溫莎堡 Windsor Castle --> 倫敦國際會議展覽中心 ExCeL London (領取選手包) --> Queen's Theatre: LES MISÉRABLES --> Flemings Mayfair

11:00 pm

嚴格黎講, 20號晚就要出發, 本身是以亞洲萬里通換了11:55 pm 出發的 CX 251 機位的, 但朝早番工時收到國泰通知, 航班將會 delay 半小時出發, 即 12:25 am...

放工後回家吃飯, 洗澡, 執好行理 (由於跑完就走, 索性帶個背囊就算 :p) 就搭 Uber 去機場... 到左國泰既登記區域, 因已在網上辦理 check in 手續, 加上我係冇寄倉行理, 咁我直接於自助 check in 機印番張 boarding pass 出黎就離境喇 (其實網上 check in 左可以自已印埋張 boarding pass 又或者選擇係手提電話接收電子 boarding pass, 如果好似我咁連寄倉行理都冇既, 就可以直接出境)。

11:30 pm

去到登機閘口, 等呀等呀, 等到十二點都未有得上機既... 此時, 有個地勤人員走出來同啲乘客講唔好意思, 話客機唔知因咩原因未準備好 (佢同啲鬼講英文, 我聽唔清楚...), 佢呢個行為就梗係為左安撫啲乘客, 等啲人唔好勞嘈啦... 最好笑係有個鬼問佢, 咁你有冇水俾我飲住先, 佢話上到機就有架喇 @@@...

1:40 am
等到好鬼眼訓呀, 航班最後係 1:40 am 啟程, 足足遲左個半鐘有多... 起飛後不久就派飛機餐, 今次係坐特選經濟客位, 即 premium economy, 個餐應該比 economy 好少少... 食完已經係凌晨兩點幾, 好快就訓著了...

(以下轉英國時間)
5:45 am
訓醒左好快就有早餐食喇...

7:50 am
因為飛機 delay 左個半小時出發, 所以都遲左到步, 7:50 am 安全降落於倫敦希斯路機場囉。

8:30 am
倫敦同香港一樣, 機場出名繁忙, 好多旅客都會經倫敦轉機, 所以入境都要排好耐... 今次貪得意用 BNO 入境, 倫敦入境嚴格就係人都知, 個職員問我黎做咩, 我就話黎參加馬拉松囉, 咁佢就俾我過喇喎, 所以我唔知同用 BNO 有冇關係...

9:15 am
黎到入境大堂, 準備去今日第一個景點﹕溫莎堡。由於黎到倫敦有兩日時間, 第三日先係跑馬既大日子, 咁我又諗下去邊好啦... 遊客必去既景點如 Tower Bridge, Big Ben 果啲已經去過哂, 在網上搵下資料, 見機場附近有個溫莎小鎮幾靚, 一於去溫莎啦...

不過問題係, 呢個溫莎小鎮雖然係機場附近, 但喺我落機既 Terminal 3 呢度係冇車直達, 就算 T5 有到溫莎既巴士, 但因所需時間頗長, 溫莎堡既官網都建議遊客係機場直接搭的士去的... 於是我走去 customer service 度問下可唔可以幫我叫的士, 那個黑人姐姐話可以, 仲即刻話一程係 £50... 聽到係 £50, 心裡打左個突, 心算唔叻但都盡量計下即係港幣幾錢, 嘩, 成 $500... 於是我同黑人姐姐講, 等我諗下先, 哈...

咁鬼貴, 諗下有成日時間咁多, 不如搭火車去啦, 但又真係幾唔方便喎... 諗下諗下經過一間 cafe, 不如入去食個早餐先再決定 (其實飛機餐仲未消化 >.<)...

後來出到倫敦發現原來 Caffè Nero 係一間頗具人氣既 Cafe 黎...

9:45 am
早餐又食完, 走左出去的士站望下, 見到啲的士有唔同顏色, 都唔知應該搭邊隻, 就係呢個時候, 有個似係職員既男人叫我唔好影相, 我心諗, 的士都唔俾影？我又順便問下佢去溫莎堡幾錢啦... 佢即刻話 £40... 點解又平10英磅既？我覺得佢地可能係同啲的士司機夾埋, 幫啲司機搵客, 但有冇收錢就唔知喇... 我見時間都唔早, £40 就話 ok 啦...

上左架的士, 果個男人應該同左個司機講好價錢, 我估係比落錶價平啲, 因為個司機問我有冇 cash... 佢話遊客一落機未必有 cash, 多數俾信用卡, 咁佢就會蝕手續費, 我話我可以俾 cash 個司機就好似好滿意咁... 同個司機傾傾下, 我話我黎參加馬拉松架, 點知個司機話佢啲仔女都想參加但抽唔倒, 呢個真係名乎其實抽一世都可能抽唔中既六大馬...

10:00 am
搭的士真係好方便, 大約15分鐘就黎到溫莎喇。溫莎 Windsor 是位於英國伯克郡的一個小鎮, 位於查令十字的西邊, 也在泰晤士河的南方, 英國王室的正式居所之一溫莎城堡亦座落在此。如果由倫敦市中心出發, 都只需坐大約1小時火車就黎到, 好適合作一日遊既近郊小鎮。

在美麗既溫莎小鎮閒逛, 走到這間手信店, 店主知我係遊客, 同我講等陣 10:55 am 會有士兵交接儀式, 就在他們的店舖門口...

初時唔係太明佢既意思, 士兵交接儀式都睇過啦, 逢係皇宮都有架啦, 後來先知原來溫莎堡既士兵交接比較特別, 士兵會由城堡走出來, 繞小鎮一圈再走回城堡內的, 到差不多時間, 城堡外已聚集左好多人等睇交接喇...

士兵黎喇... 士兵交接睇得多, 呢個又真係幾特別喎...

11:10 am
睇完 Change of Guard 就去參觀溫莎堡。溫莎堡 Windsor Castle 由威廉一世時期開始興建, 作為當年倫敦在西面的一道保護屏障, 而東面則以倫敦塔監視入侵者, 目前是英國王室溫莎王朝的家族城堡, 也是現今世界上有人居住的城堡中最大的一個。城堡的地板面積大約有45,000平方公尺, 與倫敦白金漢宮、愛丁堡的荷里路德宮 (Holyrood Palace) 一樣, 溫莎堡也是英國君主主要的行政官邸。現任英國女王伊麗莎白二世每年有相當多的時間在溫莎堡度過, 在這裡進行國家或是私人的娛樂活動。

買票入場, 今天不算多人...

經過嚴格既保安檢查, 就開始進入城堡喇...

城堡地標之一, 被稱為圓塔的建築...

入內看主題展覽, 但展品都不能拍照...

城堡外的風景...

繼續走到聖喬治教堂...

12:15 pm
離開溫莎堡, 向 Windsor & Eton Bridge 的方向走去...

溫莎有兩個火車站, 呢個係 Windsor & Eton Central Station, 另一個係較遠既 Windsor & Eton Riverside Station...

Windsor & Eton Bridge... 呢度好靚好舒服...

12:30 pm
完成溫莎半日遊, 走到 Windsor & Eton Riverside Station, 搭火車回倫敦...

在火車站內既小食店買簡單午餐...

大約一個鐘火車就可到達倫敦市中心...

2:00 pm
到了 Waterloo, 先買張 Oyster Card, 然後轉地鐵到 Prince Regent...

2:45 pm
下一站係倫敦國際會議展覽中心 ExCeL London, 倫敦馬拉松既報到處就係呢度喇...

ExCeL London 就好似灣仔既會展咁, 入面有好多個展覽廳... 黎到 London Marathon 既報到處喇...

一入去就搵番自已個登記櫃枱, 出示個人證件, 好快就取得選手包, 之後就可以入會場慢慢逛。

初時以為世界六大馬, 參加人數眾多, 黎行 Expo 都會好迫, 原來都唔係丫... 同岩岩跑完既首爾馬一樣, 大會贊助商係我最鍾意既 adidas...

因為本身不太喜歡韓國, 對首爾馬評價亦係一般, 唯一要讚既係首爾馬有免費 T-shirt 印名服務, 倫敦馬嘛, 當然要俾錢啦...

全球最大既慈善馬拉松, 非倫敦馬拉松莫屬...

5:50 pm
逛完 Expo, 搭地鐵到 Green Park Station, 走到今次入住的酒店 Flemings Mayfair check in...

呢間酒店既地點係極度之好, 就在 Green Park Station, 馬拉松終點同今晚睇歌劇既 Queen's Theatre 附近, 價錢當然就有點貴啦... 最初是打算住遠一點但價錢平一點的酒店, 但後來計劃有變, 因請唔倒長假期, 跑完就要返酒店拎行理再趕往機場... 首爾馬既經驗話我知, 如果酒店距離終點太遠, 真係會好辛苦... 所以最後就 book 左呢間不錯的酒店...

稍為休息一下, 順便整理一下今天在溫莎買的名信片同磁石...

選手包... 在 Expo 買了一頂帽子同三包 energy gel...

6:40 pm
再次出發, 向 Queen's Theatre 的方向走去, 大約 10 分鐘就到了...

英國既歌劇院唔同戲院, 每一座歌劇院只會主演特定一套歌劇...

之前在蘇格蘭之旅看了 The Phantom of the Opera, 今次選了我好鍾意既 Les Misérables... 出發前在官網買左飛, 到了Queen's Theatre 先去取票...

拎左飛走到對面既唐人街...

有菠蘿包同蛋撻呀...

行黎行去都唔知 dinner 食乜好, 偶爾經過呢間 Shake Shack 既餐廳, 望入去見到枱枱都梗有一碟薯條, 人人都食既應該都唔差得去邊, 於是我又走入去, 叫左一客超邪惡既芝士薯條同一個熱狗... 買完先知買岩左一半, 個薯條真係好好味, 但熱狗真係一般, 原來呢度既名菜係薯條加漢堡呀, 嗚嗚...

7:30 pm
食完超邪惡晚餐後走回 Queen's Theatre...

皇后劇院 Queen's Theatre 是一座西區劇院, 位於西敏市沙夫茨伯里大街, 每天均在此上演著名音樂劇 Les Misérables... 皇后劇院於1907年10月8日開張, 1972年被列為二級登錄建築。雖然話晚晚都做同一套劇, 真係唔知點解晚晚都座無虛席...

Les Misérables《悲慘世界》是由法國音樂劇作曲家克勞德-米歇爾•勳伯格和阿蘭•鮑伯利共同創作的一部音樂劇, 改編自維克多•雨果的同名小說。故事以1832年巴黎共和黨人起義為背景, 講述主角尚萬強在多年前因為家人沒有食物而去偷麵包遭判重刑, 19年後獲假釋後計劃重新做人, 他撕毁了假釋文件, 隱姓埋名當上法國某地的市長。尚萬強答應照顧芳婷的私生女兒珂赛特, 同時他也必須逃避警探賈維的追捕。

呢套音樂劇後來亦被拍成電影, 真係好好睇, 百看不厭呀...

10:00 pm
音樂劇演出約兩小時, 連埋中間休息, 睇到十點散場...

走回酒店, 洗澡休息了。

~Day 2~
22/4/2017 (Saturday) 晴

酒店 --> Warner Bros. Studio Tour London: The Making of Harry Potter --> 大英博物館 British Museum --> Little Venice --> Green Park --> Flemings Mayfair

8:00 am
一早起身, 為的是去華納兄弟哈利．波特影城朝聖啊。2010年時, 華納兄弟公司宣佈其購買下利維斯登影城將其作為常駐拍攝地, 自此華納兄弟成為唯一一家在英國擁有常駐拍攝基地的好萊塢電影製作公司。到了2012年3月31日, 被稱為 “華納兄弟影城之旅” 的展覽館向公眾開放了, tour 大約需要3-4個小時, 每天接納5000左右的遊客。作為哈利．波特系列電影十年來主要的拍攝地, 這裡展出了許多電影拍攝時候使用的道具和場景, 對於哈利．波特迷來說, 當然是一個一生必去的打卡聖地！

搭 metro 到 London Euston 火車站, 再轉火車到 Watford Junction 火車站。

8:40 am
到了 Watford Junction 火車站, 先買早餐。

9:15 am
在官網上 book 左 Warner Bros. Studio Tour London (哈利．波特影城) 既入場卷, 由於反應熱烈, 遊客眾多, 影城限制了每日既入場人數, 如果想去朝聖, 一定要預先訂飛, 絕不接受 walk in 買票的。由於我太遲先決定成行, 係4月初既時候上網睇, 整個4月的 tour 都是 sold out 的, 當時真係好鬼失望架... 但後來俾我發現, 有啲時段原本冇位, 後來又有位放出黎, 可能係有人退票或是系統問題吧, 於是我就每日都上去官網 keep check 住... 到後來竟然俾我見到 22/4 (Sat) 呢日真係有空位, 仲係朝早 9:30 am 既靚時間... 唔駛諗即刻上網訂票俾錢...

根據官網既建議, 係入場前45分鐘到達 Watford Junction 火車站, 呢度有一架哈利．波特影城既 shuttle bus... 見時間差不多, 買左早餐都唔食住, 出去搵左個巴士站先...

等呀等呀, 巴士仲未到, 咁可以食早餐, 好好味, 唔係, 應該係好邪惡既多士...

等左成半個鐘, 哈利．波特巴士終於黎喇, 搭上呢架巴士準備進入神秘既魔法世界囉...

9:30 am
到左哈利．波特影城喇, 先去換入場票, 再要排隊入場...

聽說每人取到的票都有不同圖案的...

10:00 am
今日好多遊客, 排左半個鐘, 終於可以入場了... 有啲似環球片場既 show 咁, 大家首先會睇一段短片, 呢段短片介紹了呢套風靡全球既魔幻電影, 由幕後製作花絮、道具、特技運用、場景, 到主角採訪, 我想講我並不是 Harry Potter 粉絲黎架, 但睇完呢段短片, 我都覺得好正喎, 如果係哈利．波特迷一定要黎, 難怪呢度啲飛咁難買...

睇完短片就正式展開哈利．波特奇妙之旅... 進入展館既第一部分, 亦係電影中最常出現既學院晚宴場景...

大 Boss 鄧布利多同石內卜教授...

之後繼續進入展館既不同部分...

戲中使用的髮飾衣服...

Harry Potter 既宿舍呀...

一個十分重要既場景﹕九又四分之三月台...

只要是哈利．波特的粉絲都應該知道, 在9月1日早上11時, 霍格華茲魔法學校 (Hogwarts School of Witchcraft and Wizardry) 既小巫師們必須出現在國王十字車站 (King's Cross Station) 既九又四分之三月台 (Platform Nine and Three Quarters), 才能搭上霍格華茲特快列車 (Hogwarts Express), 前往魔法國度!

繼續走到展館的下一部分...

很多網友都說要預留大約三小時去完成整個 tour, 我行得快, 逛了大約兩小時就走到最後的手信區...

12:30 pm
再次搭上哈利波特 shuttle bus 返回 Watford Junction 火車站, 然後轉火車到 London Euston 火車站。

1:30 pm
在火車站吃 lunch 先... 見到好多 cafe 同麵包店, 麵包怪的我又選擇困難, 行經呢間 The PASTY SHOP, 見到平時好想食但又唔敢食既批, 真係吸引到呢... 最後買了一個酥皮香腸卷, 好味！

行過隔離呢間都好吸引, 不過佢啲包太大個了, 問佢可唔可買半份, 佢話唔得...

最後再選了一間咖啡店吃個小三文治, 再加杯 Yogurt 同 coffee 啦...

2:30 pm
食完 lunch 就到下一個目的地﹕大英博物館。大英博物館 British Museum 成立於1753年, 又稱不列顛博物館, 是世界上規模最大、最著名的博物館之一。目前博物館擁有藏品800多萬件, 好多人都話要慢慢咁欣賞哂所有展品要花數天時間。而由於空間的限制, 目前還有大批藏品未能公開展出, 真真誇張。博物館在1759年1月15日起正式對公眾開放, 免費入場。

排隊過保安檢查...

之前黎英國都冇時間參觀大英博物館, 今次終於有空檔喇...

由於博物館太大既關係, 我都冇行哂, 主力睇左介紹埃及皇朝同我最愛既日本文化歷史部分...

4:40 pm
離開大英博物館, 搭地鐵到帕丁頓火車站 (Paddington)。帕丁頓火車站係英國一個繁忙的交通樞紐, 通往各地的火車、地鐵和巴士都從這裡出發。

5:20 pm
小威尼斯 (Little Venice) 是隱藏於倫敦市中心一片安静的水域, 不是著名景點, 遊人並不是太多, 但風景非常美麗, 是一個真正遠離繁囂的好地方。這片位於城邊既水域呈三角形, 是摄政運河 (Regent's Canal) 和 Grand Union 運河交匯點, 水沿着泰晤士的河道一直流到小威尼斯。

沿住指示牌, 好快就走到小威尼斯 (Little Venice)。

位於河邊的 Starbucks...

水面上漂浮着各式小船, 彩色繽紛, 形態各異。

6:20 pm
由於明天就係倫馬既大日子, 要早點吃 dinner, 準備明天早餐, 仲要早點休息, 所以係時候離開小威尼... 走回帕丁頓火車站。

6:50 pm
返回 Green Park Station, 見到天仲未黑, 走入 Green Park 逛逛。

7:45 pm
跑馬前就梗係要食碳水餐, 走了一會, 最後在 Starbucks 吃了一個 bagel, 再去 Pret A Manger 買了一個 Pretzel... 雖然跑馬堅辛苦, 唯一令我高興既係可以俾籍口自已狂食包, 真係大滿足呀！

8:30 pm
食完包包就去 M&S 買早餐, 然後就回酒店喇。沖完涼就準備明天既戰衣裝束, 又影張例行公事既相先 :p

這是明天的早餐...

10:00 pm
一切準備就緒, 最重要就係早啲休息, 訓覺喇...

~Day 3~
23/4/2017 (Sunday) 晴

酒店 --> Greenwich Park --> 倫敦馬拉松 2017 (Virgin Money London Marathon 2017) --> 倫敦希斯路機場

6:45 am
期待已久, 籌備半年既世界六大馬 - 倫敦馬拉松終於舉行了, 一早起來, 心情真係好鬼興奮。換上昨晚準備好既跑衣, 並將比賽晶片綁在波鞋上。

到酒店 reception check out 並寄存行理, 然後就出發喇。

7:40 am
如果大家都計劃跑呢隻倫敦馬, 我建議大家好似我咁 book 啲係終點附近既酒店, 主要原因係當大家完走之後, 要走路回酒店, 即使路程幾短都好, 都唔係一件易事, 其次就係比賽當日, 所有跑手搭倫敦地鐵到會場起點都是免費的, 只要向站內職員出示號碼布就可以直接去搭車, 方便到極, 呢個安排真係超級正, 抵讚！

走到 Green Park Station 搭 metro, 站內到處都是倫馬跑手！

到了 Cannon Street Station, 再轉 Southeastern line 到 Greenwich Park Station...

8:15 am
好快就到了 Greenwich Park Station, 落車後跟著人潮走...

8:30 am
每個大型既馬拉松比賽, 為了使跑道暢通, 都會根據眾多跑手既過往完走時間分開不同組別, 跑得越快就編得越前, 好似我呢啲咁慢既, 就多數被編到最後排, 好多時鳴槍後都要走多十數分鐘才到起跑線... 貴為世界六大馬拉松, 倫敦馬既參賽人數高達40,000人, 真係好跨張... 如果呢四萬人一齊起步, 我估等一個鐘都唔知跑得未... 所以大會將所有參賽者分開三組, 每組的起步點都唔同架, 咁就唔怕幾萬人迫埋一齊而造成混亂...

每個跑手會隨機編配一個跑手號碼, 根據號碼分成藍、綠、紅三組, 我是紅色組別, 起點就在 Greenwich Park 喇... 到左 Red Start 跑手起步區, 冇號碼布的人黎到呢度就行人止步喇...

入到公園範圍, 首先見到寄存行理既大貨車...

由於唔駛換衫, 在公園找個地方坐下, 吃早餐和熱身...

眾所周知, 倫敦馬是目前世界上慈善募款金額最高的運動賽事, 大部分既參賽名額都落在不同既慈善團體手中, 在會場內亦見到好多慈善跑手呢...

9:15 am
熱身後, 上個洗手間, 再走回大貨車寄存行理, 之後就去起跑區等出發... 我既 Start Zone 係 8-9, 算係比較後, 這個應是根據跑手過往的成績來編配吧...

第37屆倫敦馬拉松是英國倫敦一年一度舉辦的馬拉松賽事, 比賽自1981年開始舉辦, 現時的主要贊助商為維珍理財, 因此也被冠名為「維珍理財倫敦馬拉松 (Virgin Money London Marathon)」。

倫敦馬拉松誕生於1981年, 當時是受了紐約馬拉松的啟發而生成。倫敦馬拉松每年4月下旬舉行, 絕對是每一個跑手的節日, 寬闊的場地、景色優美的路線、熱情的觀眾、排山倒海般的歡呼聲, 再加上快速的路線和幾乎完美無瑕的組織工作, 這一切無疑深深吸引著那些馬拉松資深跑手。
(以上由維基百科提供)

10:00 am
上面提到跑手被分成三個組別, 紅色的起點就在 Greenwich Park...

Start Area

紅藍綠三個組別既跑手在 10:00 am 一同起跑, 大約跑左 5km 之後就合三為一...

倫敦馬拉松路線圖

由於人數真係太多, 我大約在 10:30 am 才走到起跑線... 自3月中跑完首爾馬之後都冇咩點練跑, 心知 pb 就冇咩希望架喇, 今次有幸參加世界六大馬, 不如盡情投入比賽, 欣賞沿途英倫風景, 真正咁享受一下跑馬既過程啦...

女子精英組

男子精英組

起步後以輕鬆既披醒跑呀跑, 見到 10km 既 marker 好鬼開心, 咁就完成左四分之一啦... 繼續跑呀跑, 去到半程 20km, 開始覺得吃力, 冇咩氣 tim... 就係呢個時候, 竟然黎到超級靚既人氣景點 Tower Bridge... 慢慢走上橋, 兩邊既人群不停為跑手打氣, 啲打氣聲大到好似開緊 concert 咁... 果種氣氛真係可以令你繼續跑落去... 除左人群既支持, 我望見眼前既 Tower Bridge, 諗起自已第一次黎呢度時既情景, 由二人遊變成一人旅, 由旅行變成跑馬拉松... 冇變既係, Tower bridge 仍然係咁靚, 我既世界之旅仍然係咁精彩... 諗下諗下又開始眼濕濕, 唯有繼續跑, 提醒自已要支持下去...

又捱多 10km, 終於見到 30km 既 marker... 呢個係關鍵時刻, 每次跑馬到左呢個時候我就開始出現撞牆... 3 月跑首爾馬亦都因為咁, 最後都係飲恨未能成功 sub 5... 今次情況好像有點改善, 跑下跑下又到 35km 喎, 仲唔需要停下來噴止痛劑... 証明速度上雖未有明顯進步, 但至少肌肉耐力都有提升...

雖然冇相睇, 但都想講下啲水站, 之前跑日本馬覺得正, 除左因為氣氛好, 大會安排既水站亦都好正, 因為有好多野食... 哈... 但係倫敦馬既水站只得水同運動飲料, 仲要係冇杯, 全部都係一支支的, 初時我覺得點解會咁唔環保架, 成支水, 啲跑水經過拎一支但飲幾啖就掉架啦... 後來我係度諗, 其實高水平既賽事可能就係咁, 啲精英跑手都唔會停落黎食野飲水... 唔環保都係一年一次姐... 就係因為呢個安排, 我都成功地冇停下來, 走到 40km...

好辛苦... 好辛苦... 好辛苦... 要講三次, 因為真係好辛苦... 望下左面, 見到 big ben 呀... 即係就到終點喇, 加油呀...