[2024 日本．神戶馬拉松] 久違的日本馬拉松 x 有馬溫泉之旅

~Day 1~
16/11/2024 (Saturday) 香港 --- 晴, 日本 --- 晴

香港 --> 關西國際空港 --> 神戸国際展示場 (領取選手包) --> CANDEO HOTELS (カンデオホテルズ)

11:30 pm

15號晚出發到機場...

1:59 am
CX 566 航班準時起飛...

(以下轉日本時間)

6:20 am
清晨到左関西國際空港, 天氣有點清涼, 唔算好凍...

7:00 am
過關後就搭機場巴士直接往神戶三宮... 機場巴士由関西空港交通株式會社營辦, 巴士丕需預約, 乘搭之前在機場外的巴士站直接購巴士卷就可以了, 往神戶三宮單程票價為 2,200 yen...

8:09 am

大約一個小時就到左神戶三宮喇...

下車後先走到今晚入住既酒店 - CANDEO HOTELS (カンデオホテルズ) check in 同寄存行李... 揀呢間酒店首先係佢有大浴場, 其次係佢既位置非常優越, 距離三宮、火車/地鐵駅同馬拉松既起跑點都非常近...

9:40 am

稍作休息之後就出發往神戶馬拉松 Expo... Expo 設於神戸国際展示場, 由酒店步行至三宮駅, 乘搭神戶新交通株式會社營運既 Port Liner (新交通港灣人工島線) 於市民廣場駅下車即可到達, 交通尚算方便...

10:15 am
到達神戸国際展示場已見排隊入會場的人龍, 淨係行去龍尾都行左好耐 :p...

會場唔算好大, 入場第一件事當然就係報到同攞跑手包啦...

神戶於1995年1月17日經歷了傷亡無數既阪神·淡路大震災, 主辦單位為了對曾經向當地提供援助既所有人表達感謝之意, 特意將神戶馬拉松的大會主題命為 "感謝和友情"。

之後就逛逛 expo, 買下手信...

2024年係最後一次跑上神戶大橋的機會...

買定補給品...

整條馬拉松路線有上有落...

今年既獎牌設計好靚...

2:00 pm

會場細細, 但都行左三個幾鐘喎... 離開 expo 前食埋個 lunch 加加碳...

2:25 pm

走回市民廣場駅, 乘搭 Port Liner 回三宮駅, 再返回酒店休息一下... 呢間酒店真的不錯, 位置非常好, 房間又大, 很舒適...

4:50 pm

時間尚早, 走到馬拉松起點看看... 起點設於神戶市役所前, 由酒店步行前往都只需15分鐘...

5:20 pm

之後走回三宮搵食, 最後決定吃拉麵 dinner... 點了一碗白賀正, 好味到不得了啊...

[神戸豚骨らーめん賀正軒]
地址﹕兵庫県神戸市中央区北長狭通1-9-5
電話﹕078-392-1052
營業時間﹕11時～深夜4時(ラストオーダー深夜3時45分)
網址﹕https://gashoken.co.jp/

6:40 pm
回到酒店, 拿拿聲去浸個溫泉先...

8:00 pm
浸完溫泉舒服哂, 然後就開始執野準備明天既比賽喇...

選手包加 Expo 戰利品...

由跑東馬開始, 我就習慣貼定哂膠布以防起水泡, 睇見都覺得好笑 :p...

明天出賽戰衣...

明天比賽前的早餐...

10:00 pm
一切準備就緒, 最重要就係早啲休息, 訓覺喇...

~Day 2~
17/11/2024 (Sunday) 晴

酒店 --> 神戸市役所前 --> 神戸マラソン2024 (Kobe Marathon 2024) --> 有馬溫泉 --> 溫泉街 --> 有馬温泉　有馬ロイヤルホテル

7:30 am
由於酒店好近起跑區, 可以在酒店食埋早餐先出發...

8:00 am

check out 寄存行李在酒店就出發了...

事隔5年再次參加日本既馬拉松 (上一次係2019年既富士山馬拉松), 心情難免有啲緊張, 加上疫情冇跑幾年, 今次都冇咩目標, pb 就當然好啦... 不過, 當離開酒店出發之際, 我就知 pb 無望了, 因為天氣突然熱過前一日好多 >.<...

好快到達會場, 寄完行李就去上線區... 同富士山馬拉松一樣, 我既起跑區係 C, 但係去到已經企滿人 >.< 遲來到達既跑手只好企在欄杆外等候起跑...

9:00 am
第12屆神戶馬拉松2024, 由兵庫縣/神戶市/兵庫田徑協會主辦, 神戶新聞社、朝日新聞社協辦, 是一個符合國際馬拉松路跑協會 AIMS (Association International Marathons and Distance Races) 賽道認證的賽事。全程馬拉松參賽定員20,000人 (海外2,000人), 限時7小時。

2024神戶馬拉松路線圖

神戶馬拉松既起點設於神戶市役所前, 起跑後一路往西跑, 於明石海峡大橋西面既垂水区西舞子折返, 最後沿神戶大橋跑到位於ポートアイランド (Port Island) 上既市民広場附近衝線。

之前都提過, 2024年係最後一次跑上神戶大橋既機會, 聽聞改路線係因為神戶馬本身係 AIMS 認證賽, 即 Boston Marathon BQ 賽, 但由於最後要跑上神戶大橋增加左佢既難度, 咁樣有機會影響到跑手報神戶馬既意欲, 所以大會想改路線增加報名參加既人數... 係我寫呢篇分享時, 大會已經公布左2025年既新路線喇, 一如大家所估計, 新路線冇左神戶大橋, 係咪真係易跑啲可以睇下以下呢個新舊路線高低對比圖...

2025神戶馬拉松路線圖

新舊路線高低對比圖

9:00 am

起跑喇, 雖然我被安排在 C 區起步, 但前面好多人, 大約在 9:04 am 先經過起跑線, 比鳴槍時間足足慢了 4 分幾鐘。

比賽前一天明明都涼涼地, 點解到左星期日突然熱左咁多架, 跑到 9km 已經出哂汗 >.< 都冇辦法啦, 好彩係香港8月就開始練習, 當跑個夏天長課吧...

好不容易咁到左折返點, 即係差不多半程喇... 後半程既風景好一點, 感覺易捱啲, 但天氣確實有點熱...

37K

終於到左40K既神戶大橋, 呢個時候氣溫又開始下降...

怕熱既我真係跑到冇咩心機, 幸好臨近終點有好多大會安排既工作人員係路邊為跑手打氣, 氣氛都唔錯... 淨返1K咋, 加油呀...

2:15 pm
終於衝線喇, 在工作人員手上拿到了這塊神戶馬拉松完賽獎牌...

全馬獎牌

完走後回想自已既表現, 感覺有啲啲失落... 雖然疫情停左練習, 原本都冇打算要 pb 或要求什麼成績, 但跑了半程後身心都感到很疲累, 耐力跌到最低點, 個人好似唔想跑咁... 失落係因為感覺自已不夠努力, 不過仍然值得開心既係, 可以係無傷無痛既情況下順利完走第17隻全馬... 跑全馬要付出既時間實在太多, 就算努力練習了, 也不一定跑得好... 我希望跑步既熱誠可以延續下去, 長跑長有... 回去要好好咁為2025年既全馬作準備喇, 2025年已確認報名既有香港渣打馬拉松, 以及六大馬當中既東京馬拉松同紐約馬拉松。

取完獎牌影下相, 之後就去取行李同換衫...

3:25 pm
神戶馬拉松既起點同終點唔同, 跑完要由 Port Island 返回三宮... 於港島駅乘搭 Port Liner 回三宮駅...

4:00 pm
返回酒店取行李, 隨即又拖著行李走回三宮駅, 出發前往有馬溫泉... 聽落好似好轉折咁, 但冇計, 終點不在酒店附近, 又冇可能帶埋個大行李箱去跑馬...

於三宮駅乘搭西神、山手線到谷上駅, 再轉神戶電鐵有馬線, 就可到達有馬溫泉駅, 其實都好方便。

4:50 pm

好快到左有馬溫泉駅, 一行出駅外第一個感覺就係... 凍 >.<... 點解跑果時唔凍, 跑前跑後就咁鬼凍架... 咁凍好想快啲去浸溫泉, 先會合小學同學去溫泉酒店放低行李。

話時話, 跑完個全馬仲未沖涼, 黎到有馬溫泉就梗係想即刻去大浴場沖個涼再浸個溫泉啦, 但係兩位同學想爭取時間行街街, 好啦, 咁我放低左行李係酒店之後, 我地就出去行溫泉街喇...

[有馬溫泉]

有馬溫泉是位於日本兵庫縣神戶市北區有馬町的溫泉區, 與愛媛縣的道後溫泉以及和歌山縣的白濱溫泉並稱為日本三大古老的溫泉勝地。

得天獨厚的有馬溫泉, 最稀有之價值所在, 便是同時擁有「金泉」與「銀泉」。

金泉鹽份濃度居日本溫泉之冠, 比一般海水還多1.5~2倍, 無臭的泉水嚐起來帶有金屬澀味, 鐵與鹽的成分會在皮膚表面形成保護膜, 具有保濕、保溫、殺菌等三重作用,對慢性皮膚病、神經痛、關節炎等症狀最具療效, 又能改善四肢冰冷的問題, 極為受到女性青睞。

無色透明之含鐳的碳酸泉、與含碳酸的放射泉,則被統稱為「銀泉」, 屬於溫度稍低的冷泉, 一般所熟知炭酸泉的最佳功效, 即是加強血液循環與促進新陳代謝, 進而排除體內老舊的乳酸廢物、消去水腫等。另一種同樣無色無味的能放射泉, 帶有極為稀少的鐳元素, 能釋放對人體有益的微量放射能, 促進細胞活化, 增強免疫力, 同時對改善肌肉痠痛、消除疲勞等頗具功效,若採飲用食療法可改善腸胃不適, 或以蒸氣吸入療法改善支氣管疾病。

明治時代之前因技術缺乏, 有馬溫泉一直僅有「金泉」單種泉質, 二次大戰後, 為重振有馬觀光, 再度挖掘出新的天神泉源等泉眼, 亦發現其他不同泉質, 目前有馬溫泉共有七處新舊泉源, 分別為﹕金泉、銀泉(碳酸)、御所、天神、妒、極樂、有明等。而碳酸水被用來入浴, 則是近代才開始。時至今日, 使用炭酸泉水為原料的炭酸煎餅與炭酸蘇打, 已成為眾所皆知的有馬溫泉知名特產。[資料撰自有馬溫泉網頁]

7:15 pm

行完溫泉街買完手信就返酒店食燒肉 dinner... 俗語有云, 三個女人一個墟, 仲要係三個咁耐冇見既女人, 我地一路食一路傾, 傾到俾 staff 話夠鐘叫我地走, 哈哈...

酒店大堂仲有甜品俾住客享用...

10:00 pm

食到好飽, 終於可以去浸溫泉喇, 我哋一路浸又一路傾, 浸完室內溫泉, 又去浸露天風呂, 最後成12點先返到房...

返房影下今日有馬溫泉既戰利品先...

12:00 am

返到房我地又圍埋傾計, 一路食住炭酸煎餅一路傾, 傾到差唔多凌晨4點, OMG... 真係要訓喇, 佢地話我一撻落床就訓著左, 哈哈哈！

~Day 3~
18/11/2024 (Monday) 晴
溫泉酒店 --> 三宮 --> Ball & Chain (神戸專門店) --> 難波 --> 酒店

8:55 am

訓左幾個鐘, 起身食早餐... 由於神戶馬只是輕鬆跑, 第二日都冇腳痛或者肌肉酸軟既感覺...

10:15 am

check out 後先走到有馬溫泉巴士站, 買了前往神戶三宮既巴士票... 未夠鐘出發就再行下溫泉街... 嘩, 好神奇, 琴日明明好鬼熱, 今日氣溫急跌可能10度都有, 凍到我朋友要借衫俾我著... 如果係今日跑神戶馬結果可能就不一樣了...

11:25 am

搭阪急高速巴士唔駛半個鐘就到左神戶既三宮駅, 真係超級方便...

12:00 pm

到左三宮駅先寄存行李在 locker, 然後在三宮駅附近逛下...

1:00 pm

之後就去食神戶牛 lunch...

[鉄板焼神戸Fuji]

地址﹕兵庫県神戸市中央区中山手通1-9-5
電話﹕078-391-1141
營業時間﹕12時～23時(ラストオーダー22:30時)

定休日﹕不定休
網址﹕https://www.teppanyaki-fuji.jp/

2:40 pm

食緊 lunch 時, 大阪同學話附近有間 Ball & Chain 既神戶專門店, 咁我話想去朝聖下, 於是食完 lunch 就去左呢間位於神戶既 Ball & Chain 專門店... 由於我有選擇困難症, 咁鬼多款點揀呀, 揀好款又唔知咩色好, 揀好款揀好顏色又唔知咩 size 好 :p... 最後原來我地係間舖逗留左兩個鐘 :p

[Ball&Chain KOBE]

地址﹕兵庫県神戸市中央区北長狭通３丁目１２−７
電話﹕078-600-9583
營業時間﹕11時～19時

定休日﹕不定休
網址﹕https://www.ball-chain-kobe.com/

4:40 pm

Shopping 完真係攰, 去 high tea 先...

7:10 pm

訓醒起身食個神戶牛 lunch, shopping 完又 high tea 返幾個鐘, 呢啲生活真係正呀 :p... 其實都係太耐冇見啦, 我地食 tea 又傾到唔願走, 加上大阪同學攰到訓著左, 哈, 所以我地都坐左成兩個幾鐘...

去 locker 攞返行李就搭阪急電車回大阪... 天氣真係凍左好多, 唔係講笑, 去到大阪車駅轉車去難波前走左去 Uniquo 買衫...

8:40 pm

轉車到難波駅, 再走到一間位置頗偏僻既燒鳥店「一兆」... 日本既「燒鳥」, 即係烤雞肉串燒... 去日本遊客較熟悉既燒鳥店就有「鳥貴族」, 而呢間小店就只有當地民居幫襯, 但竟然好有驚喜, 好鬼好味啊！後來上網睇返, 原來「一兆」是一家歷史悠久既燒鳥店, 創業於平成元年。

[一兆 (近鉄日本橋/焼き鳥)]

地址﹕大阪府大阪市浪速区日本橋東1-2-2
電話﹕06-6645-4990
營業時間﹕[週一至週六] 18時～22:30時(ラストオーダー22時) [週日] 18時～21:30時(ラストオーダー21時)

定休日﹕不定休

我地先到燒鳥店, 大阪同學老公之後黎 join 我地一齊 dinner...

飲飽食醉好滿足, 但大阪同學都未夠喉, 佢提議去唱 K, 仲話日本當地既 K 好鬼平, 好啦, 咁我地又轉場, 但唱 K 之前我就先到今晚入住既酒店 check in 同放低行李...

10:35 am

搵酒店都出現左個搞笑既小插曲, 話說我話 book 左近日本橋既 Dormy INN, 咁大阪同學話: 我知邊間呀, 野乃丫嘛, 一入去要除鞋既... 我心諗: 我 book 既呢間 Dormy INN 之前同屋企人住過, 印象中係唔駛除鞋架喎, 但我又諗會唔會係我記錯呢, 唔好鬼理, 照跟住行... 去到酒店, 一入去見到大大隻字野乃... 我就知呢間一定唔係我 book 果間 :p 去 check in counter 問下, 職員話你 book 果間行前啲就到架喇, 哈哈...

原來大阪同學講既係 Dormy INN 集團較高級既天然温泉花風の湯御宿野乃なんば, 而我 book 既係天然温泉夕霧の湯ドーミーインPREMIUMなんば...