2024 Dec 台北馬拉松 2 天之旅 － 行程規劃

~台北馬拉松 2 天之旅~

日期: 14/12/2024 - 15/12/2024

疫情遠去, 跑步比賽復常, 11月剛完成神戶馬拉松, 12月就報左2017年已經跑過既台北馬拉松... 由於2025年頭有香港渣馬同東馬, 所以今次台北馬同2017年一樣, 都係報半馬... 今次既報名形式同2017年唔同左, 全馬仍然係以抽籤形式報名, 但半馬就唔駛抽籤, 改為以先到先得既形式報名... 去到報名當日, 大會網頁塞哂車, 幸好都成功報名... 後來先知, 由於2024台北馬拉松晉升左成為金標籤賽事 (Road Race Gold Label), 所以全馬既中籤率創新低, 難怪連半馬既報名人數都急增。報名後就 plan 野 book 酒店啦, 同2017年一樣都係快閃算, 今次唔係同屋企人去, 連美食既行程都唔諗太多 :p...

2024台北馬拉松由台北市政府、中華民國田徑協會、中華民國路跑協會主辦, 賽道及跑手成績均獲國際田徑總會 (IAAF) / 世界田徑總會 (WA) 認証。除左報名形式, 2024台北半馬既路線圖亦都與2017年既不同, 2017年既起點同終點係一樣既, 2024年半馬起點仍然係市民廣場, 即台北101附近, 但終點改左係南京東路四段, 靠近台北小巨蛋。由於快閃, 今次選了一間位於終點附近既酒店, 方便完賽後可以快啲返到酒店沖涼。

後記
第二隻台北半馬 (正確啲黎講, 今次係第三次係台北跑半馬 (計埋2016年頭跑過既台北渣打公益馬拉松既半馬賽事)), 比賽當日天氣一流, 起跑時氣溫11-12度... 雖然只係跑半馬, 應該應付到既, 但出發前病左大半個月, 由12月頭開始感冒, 到出發前好左啲, 但都有啲擔心, 只好成日提自已要放鬆心情, 盡力就好了... 好感恩係咁既狀況下, 我竟然 PB 左, 完賽時間係 1:56:15, PB 左 1.5分鐘有多呀, 開心之餘, 仲加強返對跑步既信心！

事前準備

準備	備註
馬拉松比賽	網上報名(半馬)並付報名費
申請台灣旅遊簽証	於網上辦理入臺許可同意書暨入境登記表
購買機票	購買長榮航空 (Eva Airways) 香港至台北來回機票兩張
訂酒店	於網上預約
購買旅遊保險	於招商永隆保險購買單次旅遊保險

行程表

		住宿
Day 1	香港 --> 桃園國際機場 --> 花博爭艷館 (領取選手包) --> 西門町 --> 林東芳牛肉麵 --> Meistay Art Gallery Hotel	Meistay Art Gallery Hotel
Day 2	酒店 --> 台北馬拉松 2024 (Taipei Marathon 2024) --> 桃園國際機場 --> 香港

整個旅程所需費用 (一人計)

快閃馬拉松之旅, 主要駛費用在機票同酒店上, 其次就係買手信俾屋企人！

機票、酒店、交通	約 $4500
食	約 $400
手信	約 $2000
娛樂	約 $400
其他	約 $200
總計	約 $7500

如果想知台北馬拉松既實況就繼續睇落去啦，仲有相睇架。。。