2025 March 日本．東京馬拉松 4 天之旅 － 行程規劃

世界六大馬拉松

ABBOTT WORLD MARATHON MAJORS

TOKYO BOSTON LONDON BERLIN CHICAGO NEW YORK CITY

東京マラソン2025

~日本．東京馬拉松 4 天之旅~

日期: 28/2/2025 - 3/3/2025

世界六大馬拉松先後完成左4個, 分別係 2017 年既倫敦馬、柏林馬、2018年既東京馬及芝加哥馬, 之後因疫情關係冇進展。年紀漸大, 工作又忙到七彩, 真係要加快進度, 黎緊 2025年11月將會出戰紐約馬, 但係仲有個波士頓馬唔知點算, 呢個時候 Abbott World Marathon Majors 又宣布Sydney 加入成為第七大馬, 哈... 係完成目標既同時, 因為之前跑東馬既經驗實在太難忙, 氣氛一流, 天氣一流, 仲要 pb 埋, 所以東馬開放報名時又走去抽下籤... 其實東馬既中籤率低過10%, 抽唔到係正常, 都預左得個抽字, 唔係之前就唔駛申請東馬既慈善名額去跑啦... 嘩, 點知到左公布抽籤當日, 有個跑友同我講佢抽到, 我仲話: 你係咪發緊夢呀？好啦, 知道有結果, 我又去 check 下, 咦, 一入去報名個 system 見到 "Selected" 呢個字, 再望真啲, 我真係中左籤呀 ^.^... 估唔到我有幸可以跑第二次既東京馬拉松！

全球超過30萬人申請, 名額得37,500個, 咁難得抽到當然要去啦... 睇返2018年個東馬行程, 當年係快閃3天遊, 星期六凌晨機去, 星期一走... 不過事隔7年, 年紀大唔想咁辛苦喇, 今次決定星期五坐早機到東京, 星期一回港, 總共4天！至於酒店方面, 都係 book 返2018年住果間新宿既酒店, 貪佢近起點, 最重要當然係有大浴場啦 :p

後記
今次係第2隻東京馬, 第19隻全馬... 東馬一向評價極高, 無論係大會安排、Expo、賽道、氣氛等等, 都獲得一致好評, 唔係點會咁難抽呢... 但可能我係第二次黎, 加上有左2018年既體驗比較, 今次竟然冇太興奮既感覺... 首先, 跑手包冇左跑衫送, 大會 tee 要自已俾錢買, 另外, Expo 內售賣既紀念品款色唔多, 2018年我都買左2件 T-shirts 架, 但今年啲 T-shirt 款色唔多又唔算太靚, 買唔落手 >.< 記得2018年行 Expo 都行左成四個鐘, 今次行左兩個鐘就走人了... 不過點都係六大馬之一, 大會安排同氣氛都真係非常好既, 去日本又可以快閃, 黎緊我都會繼續抽, 希望有第3, 4, 5 ... 隻東馬啦！

岩岩上年尾11月先去日本完成左神戶馬拉松, 由於當日天氣炎熱, 所以成績不太理想, 今次東馬確係有啲期望, 希望可以 pb 既... 不過幸運之神似乎又一次遠離我, 出發前日本既天氣預測話比賽當日氣溫將會上升, 連大會都發出 email 通知跑手當日要注意補水, 唉, 點解神戶馬係咁, 東馬又係咁... 去到比賽當日, 天氣預測係9-20度, 起跑前都凍凍地, 應該都係10度以下... 唔好理咁多, 盡力去跑好好咁享受呢個六大馬吧...

起跑頭10K天陰陰又係落斜, pace 都 keep 住5分尾, 尚算輕鬆, 去到20K都係跑左2個鐘, 暫時快過2018年東馬... 不過過左半程太陽就出黎喇, 天氣開始熱, 拿拿臨食包防抽 gel 先... 後半程既氣溫可能真係高達20度, 我幾乎每個水站都有攞水飲, 仲好少有地食埋香蕉 tim, 而每隔5K自已都keep住食一包防抽 gel 或能量 gel, 可想而知確係有啲辛苦... 補給多左, 但都阻止唔到跌速既命運, 去到35K時望下錶, 知道完賽時間會慢過2018年既東馬, 果下真係有啲失望, 反正都冇 pb 又見到側邊啲人係度行, 我都想放棄停低行, 不過最後我都堅持繼續跑... 跑馬拉松 pb 當然開心, 但盡了自已最大既努力去完成一個馬拉松, 我覺得已經值得驕傲... 跑呀跑, 雙腳已經無咩感覺, 只想快啲到終點... 見到淨返1K既路牌, 就加啲速返去啦, 最後以4:29:35完成, 對於怕熱既我竟然唔駛做步兵, 我對呢個成績非常滿意喇！

另外真係要講, 話說上次神戶馬熱到飛起, 點知第二日氣溫急降, 今次東馬竟然一模一樣既, 跑果日就熱到成廿度, 點知去到星期一朝早突然又跌到得返6度, 仲落埋雨凍到街都行唔到... 不過又咁講, 凍就係好過熱, 不過落埋雨又未必好跑既, anyway, 期待下次既東馬 ^.^

➪ 相片集

事前準備

準備	備註
馬拉松比賽	網上報名 (全馬)，中籤後付報名費
申請日本旅遊簽証	免簽証
購買機票	購買國泰航空 (Cathay Pacific Airways) 香港至東京來回機票一張
訂酒店	於網上預約
購買旅遊保險	於招商永隆保險購買單次旅遊保險

行程表

		住宿
Day 1	香港 --> 成田國際空港 --> 東京ビッグサイト (領取選手包) --> 新宿 --> アパホテル ＜新宿 歌舞伎町タワー＞	アパホテル ＜新宿 歌舞伎町タワー＞
Day 2	酒店 --> 銀座 --> SEIKO HOUSE GINZA --> ASICS TOKYO GINZA --> 有楽町マルイ --> 新宿 --> アパホテル ＜新宿 歌舞伎町タワー＞	アパホテル ＜新宿 歌舞伎町タワー＞
Day 3	酒店 --> 東京都庁 -->　東京マラソン2025 (Tokyo Marathon 2025) --> Mo Mo Paradise (新宿東口店) --> アパホテル ＜新宿 歌舞伎町タワー＞	アパホテル ＜新宿 歌舞伎町タワー＞
Day 4	酒店 --> 羽田國際空港 --> 香港

整個旅程所需費用 (一人計)

世界六大馬拉松之旅, 呢排 yen 好平, 駛費主要用在機票上！

機票、酒店、交通	約 $8000
食	約 $1000
手信	約 $5500
娛樂	約 $1500
其他	約 $200
總計	約 $16200

如果想知東京馬拉松既實況就繼續睇落去啦，仲有相睇架。。。