日期: 19/7/2007 - 30/7/2007
第五次日本遊喇，有一個悠長的假期, 原本打算到日本東北睇四大祭，但考慮到八月有一些更重要的工作要做, 所以決定將旅程改在七月尾, 而地點是日本的關西同中部各大城市。
四大祭未有得睇住，但我地都參與左日本三大祭之一既天神祭，其實天神祭比四大祭壯觀很多呢！
巧合的是，上年又是 19/7 出發到北海道，而今年則是去大阪。
一如以往，今次旅程主要是觀光 + 豪食，購物並不是我們的主打節目，但我都 plan 左一日去 outlet 掃貨呢！
事前準備
準備
|
備註
|
申請日本旅遊簽証
|
免簽証
|
申請國際車牌
|
到運輸署申請國際車牌
|
購買機票, 訂酒店
|
於縱橫遊旅行社購買 CX 航空大阪四日三夜自遊行套票, 包括 CX 航空香港至大阪及名古屋至香港機票兩張,
四日三夜大阪新阪急酒店住宿
|
訂民宿, 酒店
|
於網上預約
|
換日元
|
於恆生銀行換購
|
行程表
住宿
|
||
香港 --> 關西國際空港 --> 大阪
|
大阪新阪急酒店
|
|
大阪
|
大阪新阪急酒店
|
|
大阪
|
大阪新阪急酒店
|
|
大阪 --> 姬路 --> 神戶 --> 大阪
|
梅田中津 Toyoko-inn
|
|
大阪--> 奈良 --> 神戶 --> 大阪
|
梅田中津 Toyoko-inn
|
|
大阪 --> 京都 --> 大阪
|
梅田中津 Toyoko-inn
|
|
大阪 --> 京都 --> 大阪‧天神祭 --> 大阪
|
梅田中津 Toyoko-inn
|
|
大阪 --> 白濱
|
白濱溫泉旅館
|
|
白濱 --> 名古屋
|
名古屋 Toyoko-inn 新館
|
|
名古屋 --> 松阪 --> 伊勢 --> 名古屋
|
名古屋 Toyoko-inn 新館
|
|
名古屋
|
名古屋 Toyoko-inn 新館
|
|
名古屋 --> 中部國際空港
--> 台北 --> 香港
|
~Day
1~
19/7/2007
(Thursday) 晴
香港 -->
關西國際空港 --> 心齋橋 --> 道頓堀 --> 大阪
8:15 am
|
一早到達香港國際機場, 國泰櫃位排隊 check in 的人不是太多, 加上一早已劃左兩個 window seats, 所以好快就完成左 check in 手續了。 之後去左大家樂食早餐, 人唔算太多, 起碼好快就找到兩個位子, 買食物也不需輪候太久。
|
10:05 am
|
飛機準時起飛, 唔知點解 d 人成日話國泰好, 我就覺得 d service 好鬼差, d 空姐既態度麻麻, 飛機餐又唔好食, 我反而覺得華航仲好過佢。不過無奈得佢飛去大阪既時間係最好, 又係最多班機, 始終係香港人公司, 抵佢咁串。
|
  |
|
(以下轉日本時間)
2:30 pm
|
飛機準時到達關西國際空港, 機程比去東京的快很多......
落機後還要搭一程接駁火車才可以入境, 搭完接駁車後, 其他人都很快步離開, 可能想排頭位以免入境花太多時間吧。但我們去旅行習慣了一路行一路欣賞下 d 新奇既野, 真係連垃圾桶都要影番張相先繼續行, 哈哈！
|
  |
|
3:25 pm
|
入境後去取行理, 然後去買 limousine bus 巴士卷直出梅田, 每人 1300 yen。大概需時一個鐘, 係巴士度訓左覺, 所以感覺好快就到。一落車就見到新阪急酒店喇, 交通勁方便。 至於 d 房都唔錯, 好大, 又乾淨, 大堂 d service 都好好。 原本我地係想 book 木阪第一酒店架, 因為包早餐, 不過 full 左, 而家覺得新阪急都唔錯丫。
|
    |
|
5:20 pm
|
休息左一陣, 就搭地下鐵出發到心齋橋筋行街街。其實呢度四年前已經黎過, 感覺一樣係咁熱鬧。行左一陣好肚餓, 原來今朝食完飛機餐之後就冇食過野, 所以買左個班 cake 食住先。食完就繼續行, 我地打算一路行到道頓堀就食拉麵作晚餐。
|
  |
|
8:00 pm
|
沿著心齋橋筋繼續行就會行到去道頓堀食街, 呢度五光十色, 好多食肆, 簡直花多眼亂。
|
    |
|
8:20 pm
|
我地之前已經食過金龍拉麵, 今次選了四天王, 叫左兩碗拉麵加一碟餃子。 好好味！
|
   |
|
8:45 pm
|
食飽飽再行左一陣, 就係難波搭地下鐵番梅田喇。今日都冇乜買過野, 值得一提的是那兩個指甲剪刀, 日本的指甲剪刀很特別, 剪完 d 指甲唔會周圍飛, 大家下次去可以買番個黎試下。
|
  |
|
9:40 pm
|
番到酒店拎個 notebook 出黎, 噢, 岩岩讚完呢間酒店, 而家就發覺佢有一個不足之處, 就係房入面冇得上網, 算, 拎部相機出黎過相落部 notebook 先啦, 一路睇相同埋 delete 左 d 唔要既相, 搞掂晒就訓覺 lu......
|
~Day 2~
20/7/2007
(Friday) 陰、雨
大阪 -->
環球片場 --> 大阪
8:30 am
|
8:30 am 起左身, 都爭扎左好耐下, 其實香港時間只係 7:30 am, 救命。今日會去環球片場, 所以冇法啦, 唔早 d 去就玩唔晒。
|
9:00 am
|
因為冇乜時間, 經過麥當勞就走入去食番個早餐先, 好似香港好味 d 喎。
|
 |
|
9:30 am
|
係 jr 大阪站搭火車到 jr 環球片場站都只需半個小時左右, 落車又影下相咁, 我原本 plan 左明天才來, 但阿明話星期六會好多人喎, 咁就改左今日黎, 點知......後來佢好後悔改左我個 plan, 點解？睇落去就知喇......
影完相去售票處買飛, 每人 5800 yen。雖然四年前我們都來過這裏, 但興奮度不減, 除左新既過山車、4D 電影同蜘蛛俠之外, 其他 game 都想再玩晒佢呀！
|
     |
|
10:30 am
|
第一站我地先去 universal studio 睇史力加 4D 電影, 好好睇呀！好多不同效果, 好 enjoy！睇完戲就順路繼續行去 Hollywood Dream 玩果個新既過山車。一早入場時, 已經不斷聽到玩緊過山車 d 人不停咁係度嗌, 心諗, 個過山車唔係好高咋喎, 同富士急比仲爭好遠喎, 有冇咁跨張呀, 點知上到去, 個心開始覺得唔妥, 有 d 驚 tim, 開車喇, 首先慢慢上左一條大斜路, 去到最頂既時候, 嘩, 救命呀, 咁高既, 仲要好快咁跌落去, 離心力好鬼勁, 我嗌到收唔倒聲呀, 佢仲要跌完又上, 上完又跌過, 完全唔俾你停......玩完之後, 就連隔離果兩個日本男仔都話驚......真係估佢唔倒！
|
  |
|
玩完過山車, 去左睇動物表演。呢個時候正岩俾我休息下同埋定一定神喇。雖然唔係 d 咩大表演, 但係 d 動物仔都幾得意, 唔知 d 人係點訓練佢地既呢？
|
|
   |
|
跟住去左玩大白鯊, 呢個又係一個好驚喜既 game 黎, 如果你未玩過, 一定要坐側邊位呀, 包你話正。
|
|
   |
|
玩完大白鯊, 就去睇大表演 "waterworld" 喇......呢個表演好好睇, 好似睇緊戲咁真實......大家如果唔想個身俾人整到濕晒, 就千其唔好坐咁前呀！
|
|
      |
|
睇完表演就周圍影下相啦, 大家睇下呢張相, 見唔見倒有架 peter pan 既船？
7 月開始 usj 晚上都會有一個唔係成日有既節目, 就係 "小飛俠之夢幻島" 既表演, 應該會幾精彩吧！
一路影一路行去侏羅紀公園喇, 呢個應該係普通一點既 game 來, 有點像海洋公園的滑浪飛船呢！
  |
|
1:15 pm
|
好彩今日唔係咁多人, 唔駛三個鐘已經玩左咁多野, 係時候去食野喇, 搵左間快餐店食, 順便休息一下。個餐唔係好多野, 男仔未必夠食啊！
 |
2:00 pm
|
休息完就繼續去玩喇, 首先去左玩 Back To The Future, 然後就玩新開冇幾耐既 Spiderman。唔知係咪晏晝多左人, 呢兩個 game 都要排差唔多半個鐘至 45 分鐘，不過都還可以接受。其實 Spiderman 又係 4 D 野, 不過就要坐住架車周圍走, 都幾正。
|
  |
|
玩完兩個 game 後又有 d 肚餓, 加上睇埋表演再番梅田都會幾夜, 於是又坐低食左個熱狗, d 介辣好好味喎。
 |
|
食完野繼續行, 呢個時間有巡遊, 咁就睇下啦, 點知就槽殃了, 俾人潑到成身濕晒, 不過個氣氛又真係幾正。
|
|
    |
|
成身濕晒之後, 走去睇另一套 3D 戲 "Terminator 2"。如果你鍾意阿諾舒華辛力加的話, 你一定會勁鍾意呢個 game, 正到暈呀。套戲正不特正, 仲有好多不同效果, 個人好似會係個銀幕度走出黎現實世界咁。睇完 Terminator 2 就去左玩 ET Adventure, 對我黎講, 呢個係最普通既 game, 最岩細路仔。玩完 ET 出黎, 落緊毛毛雨, 唔係嘛, 真掃興......唔緊要, 我地要去番 universal studio 睇芝麻街 4D 電影, 室內唔怕啦。其實 universal studio 有兩套 4D 戲, 朝早就播史力加, 下午四點半後就播芝麻街, 當然兩套都不能錯過啦。
  |
|
6:30 pm
|
睇完芝麻街出黎仲係落緊雨, 我地都差唔多玩晒 d game, 見到 d 人似走喎, 心知不妙, 於是乎我地就走去睇下 peter pan 係咪取消左啦, 唉, 原來真係因天雨關係取消左, 好失望, 咁難得黎到冇得睇......我隔離果個仲因為咁好內疚, 點解？因為之後果十日都冇落過雨, 即係話呢晚係我地整個 trip 唯一落過雨既時間黎, 佢話總之唔改行程啦, 算吧, 去買紀念品, 之後就離開了......
  |
10:30 pm
|
番到酒店放低 d 戰利品先, 然後去左博多食拉麵......以前係東京新宿食過博多拉麵, 超正, 呢間唔知係分店定係同名, 好似冇新宿果間咁好食, 不過都 ok 既。食完番酒店, 影低 d 戰利品, 其實只係好少野, 過埋 d 相就休息了。
|
   |
~Day 3~
21/7/2007
(Saturday) 晴
大阪 -->
手塚治虫紀念館 --> 海遊館 --> 天保山大觀覽車 --> 大阪
9:00 am
|
琴日玩左成日好累, 今日既行程要編得鬆動 d, 可以九點先起身。
|
9:30 am
|
新阪急真係幾方便, 一落樓下就係地下街, 我地去左食麵包做早餐, d 麵包好鬼好食, 仲要好似餐廳咁可以坐低慢慢食, 不過咁既早餐都要幾十蚊港紙架。
|
   |
|
10:10 am
|
食完包包後就坐阪急電車到寶塚站, 我地既目的地係 "手塚治虫紀念館", 入場費 500 yen。 落車都行左幾耐下, 大約半個鐘, 其實另外有一個寶塚南口站係比較近的, 但要轉車, 好似冇咁方便，而且行下又可以影下相咁, 岩晒我地。
|
      |
|
12:30 am
|
參觀完之後, 終於覺得有 d 累, 所以今次我地決定唔再行番去寶塚站, 改為行去寶塚南口站呢, 哈哈！不過我地要搭番去寶塚站, 再轉車番梅田的, 係咪冇咁方便呢！除左唔駛行咁耐之外, 又可以影埋寶塚南口站, 唔錯架 :p ......
|
 |
|
1:30 pm
|
番到梅田, 我地先到地鐵站既案內所買海游館入場卷加地下鐵一日乘車卷, 每人 2400 yen。如果單買入場卷都要 2000 yen, 所以係比較化算的。買完飛就立即搭地下鐵到大阪港喇。去大阪港要轉線, 仲要係行好遠, 好似由中環站行去香港站咁, 仲未食飯, 冇力行喇......
|
2:40 pm
|
一到步, 先到海游館隔離既天保山 Market Place 食飯先, 我地揀左食蛋包飯, 唔知係咪好肚餓, 又覺得好好食。我又揀左個最貴既牛柳伴蛋包飯, 不過 d 牛柳好好味喎。
|
   |
|
3:10 pm
|
食完飯又再次充滿力量, 有氣力繼續行了。我地向海游館進發, 行左差不多兩個鐘先行完, 最得意係 d 企鵝, 長腳蟹 d 腳真係好長, 唔知係咪仲長過北海道果 d 呢？水母就同海洋公園果 d 差唔多。
行完就買下手信同紀念品呀咁啦, 我買左個企鵝公仔, 好鬼得意。
|
           |
|
5:50 pm
|
睇完魚魚就到隔離坐天保山大觀覽車喇, 原價 700 yen, 買左地鐵一日 pass 有張 coupon, 只需 630 yen。其實我玩摩天輪都有 d 驚, 轉到去最高果時, 真係成個人都唔係好敢郁架......
|
  |
|
7:00 pm
|
玩完呢個咁浪漫既摩天輪之後, 我地就番梅田, 去品嚐我地都期待已久既和牛 shabu shabu 喇。呢間野位於阪急東通商店街, 果度有池袋果個 Namco City 餃子城, 不過池袋果個去過了, 呢個就唔去喇。 我地行左一陣, 就見到我地既目標喇, 花心燒肉放題。呢度係食放題, 即係任食, 你可以食 shabu shabu 或者 sukiyaki, 有不同價錢既和牛任你揀。我地揀左個最貴既 shabu shabu 放題, 每人 5000 yen。唔好以為我地好豪, 其實我地兩個都好鍾意食牛, 人一世物一世, 平時做野咁辛苦, 咁遠黎到冇理由唔食最好架。不過我地係香港上網 print 左張八折 coupon 出黎, 平左 2000 yen, 好抵呀。
|
       |
|
10:20 pm
|
食到好飽, 番酒店時仲去買左杯雪糕食, 日本既 Haagen Dazs 平過香港, 食左個雙球雪糕。 食完雪糕先到 jr ticket counter 買定 26/7 落白濱既巴士卷, 來回每人 5000 yen, 比 jr 慢, 但便宜一半價錢。我地諗住 book 最早那班 7:50 am 的車, 點知賣晒了, 咁唯有改搭下班 9:50 am 架啦, 去到成點幾鐘呀, 不過冇計了。番到酒店執埋 d 相就休息了。呢隻企鵝仔係海游館買的, 得唔得意呀？
 |
~Day 4~
22/7/2007
(Sunday) 晴
大阪 -->
姬路城 --> 元町 --> 南京町 --> 神戶港 --> 大阪
9:00 am
|
玩左兩日半大阪, 今日要去偏遠既姬路。九點鐘起身, 先行 check out, 請新阪急酒店代為保管行理, 留待今晚取回, 然後大約十點鐘又去食麵包, 今次揀左第二款麵包, 都係咁好食呀。
 |
11:15 am
|
我地黎緊果 4 日都仲會係大阪附近玩, 第 5 日先會落白濱, 所以決定買 jr west pass (4 days), 6000 yen, 咁我地就可以任搭 jr 喇。我地等左架神戶線快速火車去姬路, 需時一個鐘。到達 jr 姬路站後, 循例搵個 jr 既印吸一吸先, 再係 information centre 拎 d 地圖呀咁, 就出發行去姬路城喇, 沿途既風景都好靚, 好舒服。 行到去姬路城都差唔多一點鐘喇, 去到見到好多鬼佬, 反而香港人就好少。(如果想撞香港人, 一定要去伊勢丹既 agnis b counter, 哈哈)
我地決定食埋個 lunch 先入去姬路城, 因為一行要行成個幾兩粒鐘。我地係間叫"高田之馬場"既食肆度食左個豬扒飯同牛肉烏冬, d 烏冬好好味！
|
      |
|
2:00 pm
|
食完野都兩點鐘, 向姬路城進發。先買入場卷, 每人 600 yen。我地一路行, 一路影, 仲拎埋腳架出黎影合照, 未入城都花左一段時間呢！入城前有個指示牌寫住話遊覽時間約個半鐘, 我地真係行到差不多三點半走, 日本人 d 時間觀念真好。
|
    |
|
3:30 pm
|
離開姬路城, 行回 jr 火車站, 等待 4:42 pm 開發既快速火車到下一個目的地 --- 神戶既元町站。其實最快速既火車唔停元町站的, 我地先在神戶站落車, 再轉普通火車到元町站。
|
5:20 pm
|
一落車站, 覺得周圍都好熱鬧。我地先去行元町商店街, 經過見到有間賣炸物既好多人排隊, 我地又有 d 肚餓, 於是買左塊炸豬扒黎食。
|
     |
|
之後繼續行到元町既南京町, 亦即所謂既唐人街喇, 其實神戶呢個城市都幾似東京既橫濱, 果度又係有個唐人街。 南京町好多中國野食賣, 不過睇見都唔想食。
|
|
     |
|
6:30 pm
|
行到咁上下, 差唔多接近我地期待已久既主角喇, 就係一間食神戶牛既餐廳。呢間位於元町名叫 "六段" 既神戶牛餐廳, 係我地事前搵定既, 入面既位子不多, 幸好當時有位, 我地選擇左坐 table, 如果食 steak, 會用鐵板上的。我地揀左個最貴既神戶牛套餐, 10000 yen 得 100 g。不過個頭盤好正, 係帶子黎, 個湯都好好飲, 唔同一般既味僧湯。主角當然係神戶牛啦, 好好味呀, 岩晒我地兩個牛魔王。最後仲有一杯凍咖啡飲, 咖啡唔知係咪呢度既名產黎呢, 杯咖啡非常好味, 連我平時唔飲咖啡既都讚不絕口, 而且神戶呢度周圍都係賣咖啡。
|
        |
|
7:45 pm
|
食完一餐好好味既神戶牛, 我地就繼續行去神戶港, 果度既夜景好正, 我地放左個腳架係度, 影左好耐。個神戶塔就冇俾錢上去, 因為好似已經上過好多次呢類野咁......影完夜景就行下商場, 最後就行去 jr 神戶站搭車走喇。
|
    |
|
10:30 pm
|
番到梅田先到新阪急酒店取回行理, 然後拖著行理走到梅田中津 toyoko-inn, 雖然冇新阪急咁近 jr 站, 但都 ok, 唔算太遠。我 plan 行程前已計劃大多會搭 jr 周圍去, 況且每晚番到黎都唔會再有時間行街, 所以我選了梅田中津這間東橫 inn 而不選心齋橋或難波的酒店。番到酒店執拾一下就休息了。
 |
~Day 5~
23/7/2007
(Monday) 晴
大阪 -->
奈良公園 --> 東大寺 --> 三宮 --> 北野異人館 --> 大阪
9:00 am
|
今日都係九點鐘起身, 唯一不同的是我地身處東橫 inn 而不是新阪急酒店了。東橫 inn 朝早有免費飯團食, 但味道麻麻, 我地寧願訓多一陣, 所以冇起身食。大約十點鐘又去食麵包, 我地覺得自已已經融入左日本人既生活, 入到去熟習地揀麵包, 叫野飲, 食完又好自然咁執野。
 |
10:30 am
|
食完早餐去到 jr 大阪站, 準備搭火車到今日要去既地方 --- 奈良。 去到 jr 奈良站, 先搵下個印先, 點知搵極都搵唔倒, 個站好細姐, 冇理由架。其實 jr 唔係個個站都有紀念印, 有 d 細站冇乜遊客去既就唔會有, 但我心諗, 奈良冇理由冇架喎, 於是問下站職員, 原來個印冇放出黎, 佢地自已收埋左, 好彩問下姐, 唔係以為冇 tim 呀......
去案內所拎地圖, 那位職員英文唔錯, 教我地搭巴士去到奈良公園落, 再行番落黎 jr 火車站。咁我地就搭巴士上去喇。 同車又係好多鬼佬......
|
 |
|
11:50 am
|
|
      |
|
2:45 pm
|
離開東大寺, 就經過一些商店街走回 jr 站。沿途找了一間食肆食飯, 我叫左個咖喱豬扒烏冬食, 嘩, d 咖喱好好味呀, 結結地, 又唔似湯, 食到流晒汗, 連隔離食緊果個鬼佬都猛咁話 "oishi", 仲不停多謝個老闆 tim...... d 鬼佬真係幾 nice, 反觀香港人就唔會多謝人。
係呢間食肆入面, 有一個中國女仔做侍應, 還用國語和我們溝通。呢個係我地係大阪十二日既旅程當中, 唯一一個中國人係拉麵舖度做, 以前去東京, 差唔多間間拉麵舖都有中國人架......
|
    |
|
3:40 pm
|
返回 jr 奈良站, 先乖車回大阪站, 再轉車到神戶既三宮站。點解又去神戶？因為琴日只去左元町同神戶港, 我地想去埋三宮既北野異人館 (其實只係去睇下, 冇諗住入去參觀), 加上我地決定要再食多一餐神戶牛, 所以向三宮出發。
|
5:05 pm
|
五點鐘去到三宮站, 北野異人館六點收, 雖然冇諗住俾錢參觀, 但驚連唯一免費入場既都睇唔倒, 於是立即走去案內所問下應該係邊度搭神戶觀光巴士啦。問問下都 5:18pm, 原來 5:20 pm 有一班車, 於是我地就飛跑去巴士站, 離遠見到架車, 跑到去佢居然想開車, 好彩負責收錢既姐姐好人, 叫個司機停車俾我地上。 去到北野異人館站落車, 去左參觀免費入場果個唔知咩館先啦, 其實都知免費得應該都冇咩好睇架喇。繼續去睇下其他既, 沿途好多蚊, 搞到唔想逗留咁耐, 感覺呢度似函館既教堂群, 不過函館舒服好多。最後去買左 d 手信。
|
      |
|
7:00 pm
|
再繼續由北野異人館行番落去, 一路欣賞下呢區既景色, 影下相咁, 最後又到左我地今晚食第二餐神戶牛既目的地喇, 呢間野比較多香港人去, 其實係有個老師介紹我去的, 去到撞到幾個香港人, 番到香港發覺原來都幾多人會去呢間野。呢間野叫 "Mouriya" , 有好多不同既神戶牛晚餐俾你揀。我地今次揀左個 set 10290 yen, 好似有 150 g, 所以計落, 琴晚果間 "六段" 係貴 d 架......
今晚揀左坐 counter, 即係可以睇住個廚師整野食, 佢會一路煮俾你食, 一路等你食完再繼續整, 唔駛等 d 牛凍晒...... d 牛好好食, 不過好多油, 我地覺得 "六段" 係好味 d.......唔知係咪因為食左佢先呢？
順帶一提, 呢間野要收 service charge, 之前係日本從未試過, 唔知係呢間要收, 定係因為坐 counter 所以要收呢？
|
         |
|
8:35 pm
|
食完神戶牛就番三宮站搭 jr 番大阪了, 我地等到有快速車先上, 當架車駛到去唔知邊個站, 爬頭快過隔離果架普通車時, 見到頭先係隔離食牛果幾個香港人, 佢地搭普通車, 分分鐘要遲我地半個鐘先番到去大阪, 大家記住等快速車呀。
|
 |
|
10:00 pm
|
番到酒店仍然係度回味緊 d 牛神戶呀, 唯有睇番 d 相, 好想再食呀。
|
  |
~Day
6~
24/7/2007
(Tuesday) 晴
大阪 -->
嵯峨嵐山 --> 渡月橋 --> 天龍寺 --> 嵯峨野觀光鐵道 --> 金閣寺 --> 京都伊勢丹 --> 大阪
9:00 am
|
今日又係九點鐘起身, 十點鐘去到食麵包, 我地 d 生活都幾有規律喎, 哈哈。d 麵包又幾鬼好食喎......
 |
10:30 am
|
食完早餐就直接搭 jr 到 jr 嵯峨嵐山站喇, 不過要先到京都站轉車的。
|
11:20 am
|
到達 jr 嵯峨嵐山站, 第一時間先去買小火車飛, 我地買左 1:50 pm 那班車, 第 5 號車, 每人盛惠 600 yen, 第 5 號車卡個車箱係冇 windows 的。 買完飛, 我地先去渡月橋, 沿途有好多商舖, d 野好靚, 淨睇都有排睇。走到去渡月橋, 好多人係度影緊相, 果度既風景好靚, 不過好熱同好曬。我地影左好多相, 之後就沿路番去搵野食喇。
|
     |
|
12:45 pm
|
我地在商店街隨便找了一間食肆, 又係食果 d 豬扒飯同肉烏冬, 味道一般, 始終掛念奈良哪碗咖喱豬扒烏冬啊！
|
  |
|
1:10 pm
|
食完 lunch 即刻急步返去天龍寺, 因為買左 1:50 pm 那班小火車既飛, 所以只係用好短既時間黎參觀下天龍寺就算了。
|
   |
|
1:50 pm
|
參觀完天龍寺, 急步返去 jr 火車站。返火車途中經過郵便局, 寄了一張明信片回家。
係 jr 站隔離, 就係 "嵯峨野觀光鐵道" 既第一個站嵯峨站。呢架小火車會沿著保津峽黎走, 如果秋天黎睇紅葉應該係最正啦！架小火車準時開車, 去到第二個站嵐山站, 有好多人上車, 這時架車先坐滿人。
架車行駛途中, 少不免會有 d 人幫你影相賺錢, 影完之後, 睇一睇, 撞鬼, 又影得我幾靚喎, 於是諗都唔駛諗即刻買左。 對面坐左一對日本男女朋友, 個男仔唔知係咪見我地買左, 所以佢諗左一陣都買左張相俾個女仔, 個男仔好怕醜啊！
架小火車經過差唔多 25 分鐘, 終於去到尾站龜岡站。此時烈日當空, 好鬼熱呀。
|
     |
|
2:52 pm
|
熱都冇辦法, 我地拎住把唔係好遮倒太陽既 umbrella 行左十分鐘去 jr 馬堀站, 真係搽左幾多太陽油都冇用, 成個人黑晒。馬堀站係細站, 有 d 似北海道既美馬牛站。我地先搭火車到 jr ?町站, 再轉巴士到金閣寺。 去巴士站中途買左一罐好長既可樂, 好得意。
|
   |
|
3:30 pm
|
上巴士後, 發現坐在前面那對男女原來是香港人, 下車後, 佢地行得好快, 一支箭咁向著金閣寺售票處出發, 香港人係咪慣左做乜都要咁趕既呢？我地又因為影相落後左, 但當我地去到售票處時, 佢地只係排係我地前面。入場費每人 400 yen, 見到咁平, 都知應該唔駛好耐就會行完。
入到去, 個金閣寺好靚, 又影相啦, 不過因為人多地方細, 唔俾用腳架, 我地見 d 香港人咁趕, 所以都係搵 d 鬼佬幫我地影合照算, d 鬼佬真係幾 nice, 又會問你係邊度黎, 咁又 talk 左幾句。
|
    |
|
4:15 pm
|
果然不出我所料, 行左 45 分鐘度就離開金閣寺去搭巴士了。搭左成 45 分鐘, 差唔多五點鐘先番到去京都站。係車上我都訓左覺。
|
5:00 pm
|
我地行左咁多日, 主要都係觀光同豪食, 都冇乜點 shopping, 於是乎今晚我就 plan 好左係京都既伊勢丹度行街街喇。七月係日本既大減價, 但我覺得 d 野 sale 左都仲係貴過香港, 如果唔係特別鍾意, 都冇必要買咁多。最後幫細佬係 agnis b 買左條手鏈, 自已反而冇買野, 佢 d 袋既款式好似冇以前咁好, 冇乜邊個想買咁。行到七點幾, 落去地庫既超級市場行下, 有好多特價野食好似麵包咁, 有好多日本人係度爭相購買呀......
|
    |
|
8:30 pm
|
日本 d 百貨公司大多八點鐘就關門大吉, 我地行完就搭 jr 返大阪, 然後去食 dinner 喇......返到大阪都九點鐘, 加上行左成日好累, 於是就貪近去番第二日食過既博多拉麵喇......今次叫左個激辛拉麵, 不過一 d 都唔辛......
|
   |
|
10:00 pm
|
食完野行番去梅田中津既 toyoko-inn, 沖完涼到地下洗衣服。因為洗衣機都俾人用緊, 所以等左差唔多半個鐘先有得洗, 影埋 d 戰利品就休息了。
|
  |
~Day 7~
25/7/2007
(Wednesday) 晴
大阪 -->
銀閣寺 --> 平安神宮 --> 二條城 --> 清水寺 --> 天神祭 --> 大阪
8:45 am
|
今日早左少少, 八點九就彈左起身。未夠十點鐘就食早餐喇, 今日唔飲橙汁飲咖啡。
|
 |
|
10:15 am
|
今日既行程主要都係京都, 會繼續去遊覽銀閣寺、平安神宮、二條城同清水寺。夜晚會番大阪睇日本三大祭之一既 "天神祭"。
因為今日要去京都幾個地方, 所以去到京都站先買京都巴士一日卷 (500 yen), 咁會比較抵 d。
|
11:00 am
|
買完巴士 one day pass, 先搭 100 號巴士去銀閣寺。搭左半個鐘, 11:30 am 到達 "銀閣寺前"站, 落車行多十分鐘就到左銀閣寺喇。入場費每人 500 yen。
相比金閣寺, 銀閣寺好似普通 d, 其實都唔係銀色的, 只是一座普通寺廟。不過呢度都好多遊客, 又係唔俾用腳架影相。
|
   |
|
12:30 pm
|
由銀閣寺走出來, 沿途有好多手信舖, 我地慢慢睇, d 野好別緻好靚。我地在附近找了一間食肆食 lunch, 補充體力後再繼續餘下旅程。
|
  |
|
1:00 pm
|
食完野就走回巴士站, 搭 100 號巴士番回平安神宮喇。此時正值中午, 太陽就係正我地個頭頂, 好鬼熱呀。我地入到去, 唔知有咩喜慶節目呢, 有人係度表演唱歌, 不過我地就冇乜興趣, :p
|
      |
|
1:50 pm
|
好快咁參觀完平安神宮 (通常叫 xx 城果 d 係需要多 d 時間參觀既, 例如二條城、姬路城、大阪城呀咁, 如果叫乜乜寺, 好似金閣寺, 銀閣寺呢, 都比 xx 城快, 而 xx 神宮就應該最快或者同 xx 寺差不多吧, 不過 xx 神宮多數都是免費的), 我地下一個目的地係二條城。想係平安神宮到"二條城前"站, 係冇直接巴士可到達, 我地又覺得轉車好麻煩, 於是我地就係平安神宮搭 93 巴士到"堀川丸太町"站, 然後再步行至二條城, 咁樣仲方便。
我地係 2003 年曾經來過京都, 亦有計劃到二條城的, 不過那次到達二條城係四點後, 雖然參觀時間未完, 但已經唔俾人再入場了, 那次我地覺得好可惜, 仲話將來一定要去番。呵呵, 終於我地係 2007 年四年後既今日就可以入去參觀二條城了。入場費每人 600 yen。買飛時已見到很多外國人, 他們似乎對這些寺廟很感興趣呢！你地可以留意下 d 相, 相中影到既人差唔多全部都是鬼佬來的, 我地一路下, 一路話 "呢度真係鬼多過人", 哈哈......
|
       |
|
3:52 pm
|
睇完國寶二條城後, 我地就要去埋最後一個京都既景點 --- 清水寺。落巴士後, 還要行一條斜路才可到達清水寺, 不過沿途又係有好多商舖, 唔怕冇野睇呀。清水寺算係一個大寺, 好多旅行團都黎呢度。我地經過 d 商舖既時候, 就聽到 d 香港人係度講野, 應該係咁岩有團黎喇。我地冇俾錢入去, 不過好似已經行得七七八八。
|
    |
|
睇完清水寺, 就沿另一條既商舖街行番落去, 沿途經過見倒有間專賣"芝麻糊"味雪糕既舖頭, 當然有好多人幫襯啦, 咁我地又試下啦。日本都幾得意, 唔同地方有唔同既特色, 連雪糕味道都有限定咁。記得以前去鎌倉就要食香芋味雪糕, 去北海道芝士工房就要食芝士味雪糕, 去富田農場就要食蜜瓜味雪糕, 各具特色。
係間舖頭入面, 體驗到日本除左好有禮貌之外, 其實做野係好有原則的。事緣我前面有個操普通話既中國人 (或者係台灣人), 佢同一個朋友一齊買七杯雪糕, 個店員整左四杯俾佢之後, 佢個朋友先拎出去俾人食住先啦, 跟住個店員再整多兩杯俾佢, 係呢個時候, 個店員以為自已已經俾左七杯佢, 於是就話, 你已經拎左七杯喇, 咁果個人梗係唔識講日文啦, 淨係猛係度話爭一杯, 其實我係後面睇住, 知果個人冇呃佢, 佢真係得六杯, 不過我冇理到, 哈哈, 反正我又唔識用日文講......
佢地爭持左好耐, 店員都唔肯俾多杯佢, 我心諗, 我等左好耐喇, 你地一日唔搞掂都唔會理我架啦, 如果俾我係老闆, 大家又言語不通, 咪俾多杯佢囉, 一係就 serve 左後面 d 人先啦......
後來果個中國人有個朋友入黎幫手, 佢用英文同班店員解釋, 最後先搞掂, 跟住就猛咁同我講唔好意思, 唉......呢杯雪糕真係等得你好苦呀。食完雪糕就繼續行去巴士站喇。
|
|
  |
|
5:40 pm
|
大概 5:40 pm 就有 100 號巴士番京都站喇。
|
  |
|
5:50 pm
|
只需十分鐘就到左京都站喇, 兩日既京都之旅亦都順利結束。之後就要急急搭 jr 番大阪睇一年一度既 "天神祭" 喇。我地先搭特急車番大阪, 再轉搭環狀線到 "櫻之宮" 站。到左大阪既時候, 已經見到好多著住和服既女仔喇, 大家都沿住同一方向出發, 感覺有 d 似香港年初二睇煙花咁。
|
6:55 pm
|
因為太多人, 所以到左 "櫻之宮" 站都唔行得住, d 人塞住晒, 行動緩慢。其實天神祭係晏晝已經開始左陸巡遊, 而夜晚就有海巡遊同埋煙花。我地跟住 d 人一路行, 行到出去見到有 d 賣小食既檔口, 我地都同 d 人一樣, 停低食番 d 野先, 因為好肚餓呀。食完野再一路慢慢行, 未入到去個會場到已經突然 "呯" 一聲, 煙花已經開始放了。不過唔駛擔心, d 煙花唔會一陣就放晒, 佢地會放完一輪, 等一陣再繼續放, 成個祭典好似到夜晚十一點先完架。
我地好辛苦咁迫到入去個會場度, 入面有好多攤檔, 有賣小食的, 有玩遊戲的, 有 d 似香港既年宵。海上面有好多隻船, 船上面 d 人係度唱歌, 欣賞煙花, 好熱鬧呀。
|
              |
|
9:30 pm
|
我地一路行到九點幾, 因為明天去白濱要早起, 所以都要走了。因為人太多, 冇可能走回頭路, 所以我地行到去另一個 jr 站 --- 大阪城北"馬吉"站再搭 jr 番大阪了。
|
10:15 pm
|
番到大阪搵食, 今次唔食博多喇, 番酒店途中都幾多野食架, 我地選左另一間叫麵匠既餐廳食拉麵。我又叫左個辣味叉燒拉麵, 好好味呀。
|
   |
|
11:00 pm
|
十一點番到酒店, 今日居然冇買過野, 好快就休息了。
|
~Day 8~
26/7/2007
(Thursday) 晴
大阪 -->
白濱 --> 三段壁 --> 千疊敷 --> 崎之湯 --> 白良濱海水浴場 --> 白濱
8:00 am
|
今日一早要去白濱, 所以八點就被迫要起身, 亦都因為咁, 可以食到 toyoko-inn 既飯團早餐了。
|
 |
|
9:50 am
|
我地拖住行理走到 jr 大阪站, 因為有部 notebook 既關係, 拖到手軟呀。我地將一個大行理箱同埋部 notebook 放到 jr 站既 locker 入面, 留待明晚回來時才取回, 咁我地就只係拎一個細行理箱去白濱就可以了。jr 巴士 9:50 am 準時由大阪出發, 先經難波, 再直去白濱。因為車程成三個幾鐘頭, 所以架車行到一半咁上下, 就停左係一個專俾長途車停泊既地方, 可以等司機同乘客休息下。架車一停, 我就立刻飛奔落車去洗手間, 同埋買左 d 麵包上車食。
|
    |
|
1:30 pm
|
差唔多一點鐘, 架車就到左白濱, 沿途經過 tore tore 市場, bus centre。我地係新湯崎落車, 再拖住行理行到千疊敷。我地從網上預訂左一間係千疊敷既溫泉酒店, 呢間野規模好細, 貪佢夠平, 又包早晚餐。不過最衰 jr 巴士就冇千疊敷呢個站, 一係要去到三段壁, 一係就係新湯崎落車。不過去到發覺原來白濱好細, 景點同景點之間唔算太遠, 我地行左一陣就到酒店了。
大概兩點鐘去到酒店, 唔知係咪白濱近海, 我已經行到出晒汗, 好鬼辛苦, 點知個 staff 話要三點鐘先有得 check in。咁都冇計啦, 唯有叫佢地幫手 keep 住 d 行理先啦, 但係 d staff 英文又唔掂, 大家都溝通唔倒, 最後唔知係咪見時間都差唔多, 又執好房, 所以又話俾我地 check in 喇。我地 book 左間和式既房, 房間 ok, 不過呢度就冇乜 service, 唔同一般酒店, 連毛巾都要俾錢租的。
|
  |
|
2:50 pm
|
係房間休息左一陣, 就準備好行裝, 包括好重要既 umbrella, 紮埋 d 頭髮, 就出發去搵食了。我地會先到三段壁, 於是沿著三段壁方向一路行, 行左一陣就見到有間食肆, 於是就走左入去了。入面得一個女人, 招呼又係佢, 收錢又係佢, 連煮野食都係佢, 勁呀。
|
   |
|
3:05 pm
|
食飽飽後就做定心理準備, 諗住有排行, 點知從食肆出黎繼續行, 行左一陣就見到有個三段壁既牌, 心諗, 唔係到左下話, 好似冇行過咁既, 原來真係到左三段壁了。我地黎之前原本諗住租車架, 但係而家......我地都認為冇咁既必要囉。加上我地發覺呢度唔似富良野咁大, 有 d 地方泊車又要俾錢, 所以我地都係決定唔租車了。
去到三段壁, 我地先去參觀三段壁洞窟, 入場費 1200 yen。呢到除左可以近距離欣賞一望無際既太平洋之外, 仲可以睇到 d 巨浪拍打岩石既現象。黎到呢度, 望住個太平洋, 感覺真係好舒服, 好渡假 feel 呀。
|
      |
|
4:30 pm
|
四點半離開三段壁, 好快就行番去千疊敷喇。去到影左幾張相, 見時間唔早, 仲要趕住八點鐘番酒店食晚餐, 於是我地決定去左崎之湯先, 因為酒店就係千疊敷, 諗住聽日再黎過。我地又選擇行路啦, d 巴士好鬼疏, 等得佢黎我都行左去喇。由千疊敷出發, 沿途經過海中展望塔, 好快就到左呢個大家都話要去既崎之湯喇。
|
    |
|
5:30 pm
|
去到崎之湯五點半, 太陽未落山, 景色超正。去到見到個門面好舊, 其實入面既設施都係好舊, 不過呢度只需 300 yen, 仲要對住個太平洋浸溫泉, 仲想點？唯一唔好處係好似冇乜安全感, 我浸緊既時候, 隔離男湯 d 日本仔直頭企起身裝個頭過黎想"目及"野, 離晒大譜！
|
   |
|
7:00 pm
|
浸完崎之湯, 成身鬆晒, 繼續再向前行, 目的係要到白良濱海水浴場玩煙花。係香港唔可以放煙花, 所以黎到呢度一定要玩呀。去到沙灘, 游水既人大部份都走得七七八八喇, 唔似晏晝時咁熱鬧, 所以我地聽日晏晝打算再黎呢度感受下日本夏威夷既 feel。
|
  |
|
8:00 pm
|
八點鐘準時番到酒店食晚餐, 味道不及大酒店, 但尚可接受。
|
    |
|
9:00 pm
|
食完飯休息一陣, 就去浸一浸酒店既溫泉喇。其實最初原本諗住 book 民宿的, 因為係 bus centre 附近, 交通方便 d, 又平, 不過因為想浸溫泉, 所以最後都 book 左呢間有溫泉浸既酒店喇。係訓覺之前浸一浸溫泉, 簡直係人生一大樂事呀。成間酒店唔係好多人, 所以浸溫泉時都唔多人, 好 relax。
|
11:00 pm
|
溫完溫泉番房睇下電視, 好快就訓著了。
|
~Day 9~
27/7/2007
(Friday) 晴
白濱 --> Tore Tore 市場 --> 圓月島 --> 白良濱海水浴場 --> 千疊敷 --> 大阪 --> 名古屋
8:00 am
|
因為酒店包埋早餐 (其實係俾左錢的), 所以又要焗住早起, 不過呢度咁陽光與海灘 feel, 早 d 起身都值得啊！
|
   |
|
食完野執拾行理, 十點前要 check out 喇。我地煩請酒店既 staff 幫我地 keep 住 d 行理, 留待下午回來取回。然後就出去搭十點鐘那班巴士到 Tore Tore 市場喇。 Tore Tore 市場係白濱既另外一邊, 離酒店比較遠, 如果有車會方便 d, 其實我地係香港都係渣開車的, 原本都諗住租車, 但思前想後, 發覺租車真係唔係幾抵, 因為呢度景點唔多, 時間好足夠, 所以搭佢 d 咁疏既巴士都 ok, 只需去到每一個目的地時, 睇定幾點有巴士走就 ok 喇。
|
|
10:20 am
|
只需 20 分鐘就到左 Tore Tore 海鮮市場喇, 同車有兩個香港人, 我地話香港人 d 步伐快, 真係一 d 都冇錯, 繼上次極速行去金閣寺果 pair 香港人之後, 今次呢 pair 一落車, 又係一支箭咁走, 個男既都想影下入口個牌, 但個女既唔理佢行左先。我地就唔駛講, 係個門口度都有排影, 呢個角度又影下, 果個角度又影下, 個樣唔靚又影多張......真係頂你地唔順喇......
入到去睇下個魚市場, 唔係好大, 都唔駛行好耐......
|
    |
|
行到去呢個檔口, 嘩, 係度切緊魚, 好新鮮呀, 佢仲切左 d 細細塊既俾人即場試食。魚生就食得多, 成條魚睇住佢切出黎然後即食都係第一次見, 唔理咁多, 咁新鮮梗係要試下, 一放入口, 嘩, 好味呀, 好自然咁嗌左出黎。其實我唔係特別鍾意食魚生的, 但我都覺得好好味。好難以想像架, 條魚有 d 似香港街市果 d, 但香港果 d 點可以生食架？果種新鮮既味道, 真係從來都未試過......
|
|
  |
|
再睇下 d 乾貨, 都係 d sushi 黎。
|
|
  |
|
睇到咁上下, 就係魚市場食埋飯先走, 因為今晚可能要去到名古屋先有時間食飯。呢度 d 熟食就認真麻麻, 我地認為係成個大阪之旅最差既一餐呀。我叫左個天婦羅拉麵, 隻天婦羅放係 d 湯度好快就"林"晒, d 皮仲要甩晒出黎, 隻蝦又唔新鮮, 同剛才 d 魚生比, 真係差天共地！d sushi 都係麻麻地, 唔明點解咁多人話要黎呢度食野。
|
|
  |
|
11:50 am
|
食完野就搭車去下一個景點 --- 圓月島喇。我地出到去巴士站, 見車又未黎, 我地又手痕影左幾張相。
|
  |
|
12:05 pm
|
十分鐘車程就到左圓月島喇, 呢度勁大風, 企都企唔定咁, 個人差點俾風吹走。如果大家有時間, 可以搭佢隻觀光船出海近距離欣賞圓月島架。
|
    |
|
12:47 pm
|
因為巴士既班次好疏, 經圓月島呢面既巴士尤其疏得交關, 所以要搭番 12:47 pm 呢班車出番去, 唔係就要等成個鐘。我地搭巴士去番琴晚黎過既白良濱海水浴場, 同琴晚個 feel 又唔同左, 而家呢度變左充滿活力既夏威夷喇。
|
1:00 pm
|
一落車, 係眼前既就只有陽光與海灘。男士們就正啦, 個個女仔都係著三點式。有人係度曬太陽, 有人玩沙灘波, 小朋友就玩水玩得好開心。呢度 d 海水好清, 好乾淨, 同香港 d 海灘真係差得遠。
|
        |
|
1:50 pm
|
之後搭車番去千疊敷, 因為琴日未指細睇清楚呢度周圍既環境。呢度風又係好大, d 浪又好勁咁拍落 d 岩石度, 唔怪得 d 石俾 d 浪打到一層層咁。
|
      |
|
3:00 pm
|
大概三點鐘, 我地就行番酒店取行理。然後拖住行理到三段壁等 jr 巴士番大阪了。預約左 4:10 pm 那班車, 所以先到三段壁遊客中心抖一抖, 果度仲有電腦俾人上網 tim, 我地就上下網等巴士喇。
|
4:10 pm
|
jr 巴士準時到達巴士站, 我地一上車就把握時間訓覺了。上左 highway 之後, 唔知去到邊, 訓訓下醒左, 居然塞車, 唉......係架巴士度, 訓又訓唔得舒服, 又唔郁得, 都好鬼辛苦呀......差唔多七點鐘, 架車先去到休息處, 我即刻落車去洗手間, 順便吸一吸車外既新鮮空氣, 仲去買左 d 野上車食。再上番車之後, 都訓唔番喇, 咁就睇下車外既景色啦, 係八點半架車就到達大阪喇, 足足搭左四個幾鐘呀, 救命......落車時, 個司機講左好多野, 唔知係咪話塞車搞到遲左唔好意思之類........
雖然車程成四個鐘, 好似有 d 離譜, 不過價錢就比 jr 平一半, 而且今次行程之後, 我覺得白濱既景點都唔太多, 就算要預番 d 時間係交通上都 ok, 所以巴士都值得推介既！
|
落車後就番 jr 站開番個 locker 拎番 d 行理, 然後就去買飛落名古屋喇。岩岩搭完一程咁長途既巴士, 搞到我唔想慳, 只想快, 於是就買了新幹線既飛落名古屋喇, 每人要 5670 yen, 折實成三百幾蚊港紙。(其實 plan 行程時已決定左搭新幹線, 免得去到名古屋太夜啦。)
|
|
9:10 pm
|
之前黎日本亦有搭過新幹線由東京去大阪, 但 jr pass 日本火車證不能搭新幹線最快既型號 NOZOMI, 今次一定要搭番。我地特登揀 NOZOMI 黎搭, 只需 50 分鐘就可到達名古屋, 仲快過係屯門出旺角呀。
|
10:00 pm
|
架火車係十點正好準時咁到達名古屋, 我地落車後唔係即刻走, 而係留係度影相, 影到下一班新幹線都黎喇, 哈哈！(10:10 pm 到站既係我地之後一班由大阪黎名古屋既 NOZOMI 黎)
|
   |
|
10:40 pm
|
落車後睇一睇地圖, 就拖著行理走到名古屋 toyoko-inn 新館喇。放低 d 野落去便利店買左個杯麵番黎食, 然後準備休息了。
|
  |
~Day 10~
28/7/2007
(Saturday) 晴
名古屋 --> 松阪城跡 --> 御城番屋 --> 伊勢神宮內宮 --> 伊勢神宮外宮 --> 名古屋
8:15 am
|
今日要去偏遠既松阪同伊勢, 所以又要早起兼且食埋 toyoko-inn 既早餐。
|
 |
|
9:30 am
|
搭 jr 到今日第一個目的地, 松阪市, 需時一個鐘。係街度見到個咪錶, 又影一影, :p
|
  |
|
10:30 am
|
10:30 am 到達松阪市, 首先到 information centre 拎一拎地圖。入到去, 有一個 staff d 英文好勁, 佢應該係出國留學的。佢叫我地坐低, 慢慢指示我地係松阪市應該點行, 又問我地會唔會食松阪牛午餐, 咁梗係會啦, 然後就介紹左 d 餐廳俾我地, 佢話最出名就係 "和田金" 同 "牛銀", 不過好貴同埋唔會有位, 其實之前都聽網友講過話 "和田金" 經常俾人 book 晒, 唔會有位。呢個 staff 真係好 helpful, 仲好樂意同你傾計, 佢話遲 d 會去北京同湖南旅遊, 問佢黎過香港未, 佢話未, 咁都好正常既, 香港其實冇咩玩, 但生活指數又高, 有乜好黎丫......。
以前細個唔識野, 以為香港夜景靚, 又係乜東方之珠, 以為會好受遊客歡迎, 當我大個左成日周圍去之後, 就發覺原來香港係冇乜野好玩既, 天氣又唔好, 潮濕到死。
|
 |
|
11:10 am
|
知道應該點行之後, 就先出發到 "松阪城跡", 沿途經過見到旅遊書介紹的旅館 "鯛屋"。周圍又有好多 "和田金" 既牌, 睇黎有好多日本人會特登渣車黎呢度食松阪牛呢！
我地經過左和田金, 還掂都黎到, 咁就入去睇下有冇位啦, 點知真係 full 晒, 搞錯呀, 諗住大出血都唔得。
去到松阪城跡喇, 叫得跡, 即係個城已經冇左架喇。講真 d, 去到其實係睇 d 城牆架咋。
|
      |
|
順路行去隔離既 "御城番屋", 呢度有好多好有特色既屋, 全部都係以前江戶時代既人係度住既。有一間屋係開放俾人參觀的, 不過入面都冇咩野睇。
|
|
      |
|
12:30 pm
|
睇完兩個松阪市必到既景點之後, 就到我地今日既主角出場喇。哈哈, 當然就係我地期待已久既松阪牛午餐啦。既然 "和田金" 冇位, 我地就去第二個選擇 "牛銀" 啦。 去到時, 有好多人係度等緊, 咁我地又一齊等啦, 都等左差唔多半個鐘先有位。
其實果度 d 日本人去到唔會叫最頂級既松阪牛黎食, 佢地好多都只係叫 d 普通既定食, 價錢都唔太貴的。我地咁遠去到, 梗係要試最靚既松阪牛啦, 所以又叫左兩個松阪牛鐵板餐, 12600 yen 190 g, 不過就唔同之前食既神戶牛喇, 冇前菜, 冇湯, 冇野飲, 心諗, 食個最貴既反而乜都冇？
食就幾好食, 不過都係嫌佢太多油, 食完都幾"濟"。
|
        |
|
2:35 pm
|
食完松阪牛, 今次唔搭 jr, 我地選擇搭近鐵去宇治山田站, 再轉 51 號巴士到伊勢神宮內宮。
|
  |
|
3:45 pm
|
到達伊勢神宮內宮, 呢個內宮比較大, 要花比較多時間參觀。同平安神宮一樣, 都係免費入場的。今日仲要係撞正每二十年先舉辦一次既 "式年遷宮" 儀式, 不過我地去到都差唔多完了。
伊勢神宮由內宮、外宮、14 座別宮和 109 所散佈伊勢市各處的神社組成。每隔 20 年, 伊勢神宮的內宮、外宮和部分神社要另選基址翻新重建, 冇然後把所供奉的神遷入新殿, 這就是 "式年遷宮", 至今已有近 1300 年曆史。
|
      |
|
5:00 pm
|
行內宮都行左成個幾鐘, 跟住行下出面 d 商店街, 我買左 d 伊勢好出名既烏冬。
|
  |
|
5:45 pm
|
之後就搭番 51 號巴士去伊勢神宮外宮喇。外宮比較細, 亦都好快行完。
|
    |
|
7:25 pm
|
走番去 jr 伊勢市站, 搭 jr 番名古屋, 需時差不多個半鐘。
|
  |
|
9:00 pm
|
番到名古屋站, 我地就去左食豬扒飯, 好好味。
|
      |
|
10:00 pm
|
食飽飽番酒店休息。
 |
~Day 11~
29/7/2007
(Sunday) 晴
名古屋 --> 名古屋城 --> 名古屋港 --> 意大利村 --> 長島溫泉 Jazz Dream Outlet --> 名古屋
9:15 am
|
今日訓晏左, 食唔倒飯團早餐了。因為驚趕唔切去晒今日要去既地方, 所以索性唔食早餐住, 搭地下鐵去名古屋城先。
|
10:40 am
|
搭地下鐵名城線到 "市役所" 站, 行五分鐘就到名古屋城架喇, 入場費 500 yen。名古屋城係重建既, 入面仲有電梯搭同有冷氣 tim, 咁熱當然好啦, 不過就好似冇左 d 特色咁。行完成個城, 因為未食早餐, 所以就食條腸頂住先。
|
    |
|
12:15 pm
|
參觀完名古屋城, 就搭地下鐵名港線到 "名古屋港" 站。名古屋港同大阪港有點相似, 都係有好多遊玩設施, 摩天輪同展望塔就一定唔少得架喇, d 日本人放假真係唔驚冇野玩。我地落左車, 先周圍影下相, 然後就買飛參觀左 "南極觀測船", 入場費只需 300 yen, 但就可以參觀到呢架去過南極探險既船喇。
|
      |
|
1:30 pm
|
去完南極就要去意大利喇, 哈哈。我地行去意大利村, 呢度係模仿意大利興建既。你係度可以騎馬或者坐船欣賞威尼斯河, 亦可以品嚐意大利食品, 周圍既建築都令你置身係意大利一樣。
|
    |
|
2: 15 pm
|
行左咁耐, 原來仲未食午餐 (其實成朝只係食左條腸), 咁就搵間餐廳食意大利粉喇。我叫左個我最鍾意食既蜆肉意粉, 好好味呀。
|
  |
|
3:25 pm
|
食完野再行左一陣, 就搭地下鐵返回名古屋站, 準備搭名鐵巴士到長島溫泉喇。要到長島溫泉, 就只有搭名鐵巴士, 一程 1000 yen, 買來回就 1800 yen。買完飛未夠鐘上車, 就到等候室坐下先。其實如果有時間, 可以 stay 一日係長島溫泉, 果度除左可以浸溫泉之外, 仲有個遊樂場, 不過我地既目的就只有去 outlet shopping。架車準時 4:30 pm 出發, 成架車就只有我地兩個, 包車喎。
|
    |
|
5:15 pm
|
大概 40 分鐘車程, 就到左長島溫泉。一落車, 聽到幾把香港人既聲音, 黎到名古屋之後, 都好少撞到香港人呀。我地步向 Jazz Dream Outlet, 呢度 d 商舖八點鐘就關門, 所以我地就重點出擊, 先去 nike, 然後去 edwin, 再去 levis。最後買左兩對波鞋, 幾件衫, 一條牛仔褲, 因為唔夠時間呀, 所以唔係買左好多野, 不過都差唔多喇, 之前係咁食牛, 再買會破產呀。
|
  |
|
8:10 pm
|
買完野就飛奔去巴士站, 趕搭 8:10 pm 那班回名古屋既巴士啦, 點知去到大排長龍, 梗係啦, 個個都係呢個時間走, 我地上唔倒車呀。下一班要到九點鐘呀, 點算好呢, 不過後面仲有好多人喎？係呢個時候, 後面有一架寫住臨時既巴士駛過黎, 原來係佢見咁多人, 加多一班車呀, 真係好喇。
|
9:00 pm
|
番到名古屋, 因為今日係最後一晚係日本喇, 亦都係最後一餐係日本食既晚餐, 所以就決定去食多次 shabu shabu。我地揀左一間日本餐廳, 一人 4000 yen, 不過唔係任食放題。唔知係咪食過神戶牛、松阪牛呢 d 頂級牛, 覺得呢間野麻麻, 至少梅田果間 "花心" 都好過佢, 5000 yen 任食, d 牛都靚 d。
|
      |
|
10:15 pm
|
食完 shabu shabu 就返酒店, 影低 d 戰利品, 然後就執行理, 準備聽日走 lu, 嗚嗚......
|
    |
~Day
12~
30/7/2007
(Monday) 晴
名古屋 --> 豐田市 Toyota 會館 --> 中部國際機場 --> 台北桃園中正機場 --> 香港
8:30 am
|
今日係最後一日既旅程喇, 其實只得一個上午, 我地又會去一個幾偏遠既地方, 就係豐田市。先係 toyoko-inn 食早餐, 然後 check out 再放低 d 行理, 就出發搭 jr 喇。
|
 |
|
9:45 am
|
去豐田市要先搭 jr 到 "岡崎" 站, 然後再轉愛知環狀線到 "三河豐田" 站。因為到岡崎站既 jr 遲左, 累我們趕唔切搭去三河豐田站那班車, 要等多半個鐘。
|
    |
|
11:20 am
|
去到豐田市都十一點幾, 唯有急步趕去豐田會館啦, 行得好鬼辛苦, 真唔明平時 d 香港人去旅行都行得咁急做乜。 經過豐田總部 head office, 影番張相先。終於到達豐田會館, 呢度唔駛入場費, 除左可以參觀最新既豐田汽車之外, 仲有話你知成架車既製作過程。 雖然呢度好遠, 我地又冇足夠時間上埋佢個見學, 但我地都覺得好開心, 因為我地都係渣豐田車架嘛, 呵呵！
|
          |
|
12:38 pm
|
好草率咁參觀完豐田會館 (真係 bad), 就要趕番去搭 jr 回名古屋喇。番到名古屋要先番 toyoko-inn 拎番 d 行理, 然後就去搭名鐵到名古屋既中部國際機場, 終於要走了。
|
2: 32 pm
|
我地拖住 d 行理, 買左去機場既飛之後, 見到有一班就開既快速車, 我地去問一問售票處個售票員, 我地呢隻普通飛可唔可以搭啦, 咁佢唔知講左 d 咩, 又好似話 ok, 咁我地就飛奔落去搭車喇。點知......
成架車都係得指定席, 我地都冇買指定席既飛, 即係唔坐得啦......車程過左一半, 有個 staff 黎查飛, 我就同佢講話唔知呢間唔搭得啦, 點知個 staff 好好人, 叫我地補番錢, 仲同我地講架車會準時 3 點鐘到達機場, 佢仲好似覺得自已好叻, 可以用英文同我地溝通, 我地又明佢講乜, 佢好開心咁。
中部國際機場係新開既, 好新好靚, 有 d 似香港國際機場。
|
        |
|
3:40 pm
|
check in 之後, 就搵食喇, 因為仲未食 lunch。呢間野都幾特別, 食拉麵既, 但就配暑條, 又配炸雞一齊食。
|
    |
|
5:15 pm
|
食完野再逛下個機場, 就要上機了。我地搭既機要停留台北, 所以要到夜晚十點鐘先會番到香港。
飛機起飛之後, 好快就有飛機餐食, 味道一般。可能順風既關係, 飛機比原定時間早左到達台北。如果目的地唔係台北既旅客, 可以選擇留係架機度等, 亦可以落機等。成個幾鐘, 咁就梗係落機行下啦。
我地行左出去, 有個地方係俾人上網既, 咁我地一個就用佢 d desktop 黎上, 一個就用自已部 notebook 黎上, 時間好快就過去。好快又到八點鐘, 係時候要上機喇, 我就立刻去買左一盒太陽餅, 最衰呢度買唔倒維格?梨酥啦。
上番機之後, 而家架機就變左由台北去香港喇, 因為機程比較短, d 空姐好快又出黎派餐喇, 心諗, 唔係又食多餐呀, 咁著數？會唔會係小食黎呢？唔係喎, 又係飯黎喎......會唔會轉機既乘客冇得再食呢？又唔似喎, 人人都有喎, 原來真係有第二餐食, 雖然係好抵, 不過都食唔倒咁多啦, 但隔離 d 鬼佬一樣係岩岩食完, 而家又係食晒 d 野.......
初初諗住架機要停留台北, 唔係咁好, 不過黎到又俾我買倒台灣既手信番去, 又幾好喎, 哈哈......
|
(以下轉香港時間)
9:45 pm |
好順利咁架機又早到, 唔駛十點鐘就番到香港喇, 落機拎番 d 行理就搭車番屋企, 而我地今次關西 + 中部 12 日既旅程就好完滿咁結束左喇。
|
沒有留言:
張貼留言