日期: 31/7/2008 - 11/8/2008
第六次日本遊喇,上年因為工作關係,推遲了這個日本東北遊,今年終於可以實行了。
日本東北是指本州的東北部的六個縣:青森縣、岩手縣、秋田縣、宮城縣、山形縣及福島縣。
總共十二天,我們走遍東北五個縣,包括青森、岩手、秋田、宮城以及山形。看過東北四大祭﹕青森 Nebuta 祭、秋田竿燈祭、山形花笠祭及仙台七夕祭。
除了東北四大祭之外,今趟東北之行另一重點必定是奧入瀨溪流以及Nyuto Onsen溫泉鄉。
事前準備
準備
|
備註
|
申請日本旅遊簽証
|
免簽証
|
申請國際車牌
|
到運輸署申請國際車牌
|
購買機票, 訂酒店
|
於萬福旅行社購買 CX 航空東京三日兩夜自遊行套票, 包括 CX 航空香港至東京來回機票兩張,
三日兩夜 Shinjuku Vintage 酒店住宿
|
購買日本火車證
|
於縱橫遊旅行社購買 JR East Pass (10 days) 及 Limousine 機場巴士卷
|
購買旅遊保險
|
於保誠購買旅遊保險
|
訂民宿, 酒店
|
於網上預約
|
租車
|
分別於 Toyota 及 JR Rent-A-Car 租一車前往十和田湖及Nyuto Onsen溫泉鄉
|
換日元
|
於恆生銀行換購
|
行程表
住宿
|
||
香港 --> 東京成田機場 --> 仙台
|
仙台 Toyoko-inn
|
|
仙台 --> 松島 --> 仙台
|
仙台 Toyoko-inn
|
|
仙台 --> 青森‧Nebuta 祭 --> 八戶
|
八戶 Toyoko-inn
|
|
八戶 --> 奧入瀨溪流 --> 十和田湖
|
十和田湖國民宿舍
|
|
十和田湖 --> 田澤湖 --> Nyuto Onsen溫泉鄉
|
蟹場溫泉
|
|
Nyuto Onsen溫泉鄉 --> 角館 --> 秋田‧竿燈祭 --> 秋田
|
秋田 Toyoko-inn
|
|
秋田 --> 山寺 --> 山形‧花笠祭 --> 山形
|
山形 Toyoko-inn
|
|
山形 --> 米澤 --> 山形
|
山形 Toyoko-inn
|
|
山形 --> 仙台‧七夕祭 --> 仙台
|
仙台 Toyoko-inn
|
|
仙台 --> 盛岡 --> 新宿
|
Shinjuku Vintage
|
|
新宿 --> 川越 --> 新宿
|
Shinjuku Vintage
|
|
新宿 --> 東京成田機場 --> 香港
|
~Day
1~
31/7/2008
(Thursday) 晴
香港 -->
東京成田機場 --> 仙台 --> 牛舌通 --> 酒店
7:45 am
|
終於等到出發之日喇, 一早到達機場, 嘩, 係唔係經濟好好呢?好鬼多人呀......睇黎呢個暑假好多人外遊......去到國泰櫃位排隊 check-in, 都等左一陣......大概八點半去大家樂食早餐, 食食下發覺時間不早了, 即刻飛跑去入閘......
|
9:10 am
|
9:10 am 去到閘口, 冇晒人......個空姐話﹕下次早 d 呀, 唔係關閘架喇 >.< 惡到死, 都話國泰差架啦, 不過以前又真係未試過咁炆水, 呵呵。飛機於大約 9:40 am 起飛, 起飛冇耐, 發覺架機漏水, 同空姐講, 佢送番 20 蚊美金俾我喎, 都算係咁......
|
(以下轉日本時間)
3:10 pm
|
大概 3:10 pm, 飛機於東京成田機場降落, 落機後就如常排隊入境。拎完行理就先到 JR 綠色窗口換 JR East Pass, 我地一早係香港買左, 因為有九折, 不過黎到日本先買都得既。即時啟用 pass, 為期十日, 第一程先用佢黎搭 Narita Express 出東京, 然後再轉東北新幹線直上仙台。
|
4:25 pm
|
搭 4:25 pm 的 Narita Express 出東京, 5:20 pm 到達, 非常準時。到達東京後, 立刻拖著行李轉搭東北新幹線上仙台。
|
5:56 pm
|
拖著行理去轉車, 發覺而家既 JR 車站比幾年前進步了不少, 多左電梯, 記得以前要拎住 d 行理行樓梯, 呢個亦係不少香港人選擇搭機場巴士既原因之一。搭 5:56 pm 開發的東北新幹線上仙台, 到達仙台站已是晚上 7:37 pm。
|
7:37 pm
|
終於到達仙台, 坐左成日飛機同火車, 好想快 d 落車行下。出左站, 見到周圍都係仙台七夕祭既佈置, 雖然個祭未開始 (6/8-8/8 舉行), 但係我地都忍不住影左好多相, 因為 d 佈置好靚呀。
|
8:00 pm
|
去到車站既牛舌通食牛舌, 話明牛舌通, 成條街都係食仙台既名物 --- 牛舌既, 我地當然揀左呢度最出名既 "伊達之牛舌" 幫襯啦。 其實去到仙台唔駛驚冇牛舌食, 呢度基本上周圍都係食牛舌, 你想食碗拉麵就難洛......唔鍾意食牛舌既, 黎到呢度都應該冇啖好食了。我地叫左兩個定食加一杯酒, 味道都唔錯。正當我地飲緊湯既時候, 發現一隻小昆蟲正想飛落碗湯度, 嚇死......咁我地同 d 侍應講, 佢即刻拎過另一碗湯出來, 我地話唔駛了, 咁佢最後冇收我地杯酒既錢, 哈哈, 日本人 d 服務態度真係好到死, 香港人真係要學下。
|
9:00 pm
|
食飽飽後就拖住行理番去我地今晚住既仙台西口廣瀨通 toyoko-inn 了。
|
9:40 pm
|
番到酒店拎部 notebook 出黎過相, 上下網, 睇下電視, 沖埋涼就休息了。
|
~Day 2~
1/8/2008
(Friday) 晴
仙台 -->
松島 --> 石卷 --> 仙台
8:59 am
|
今日一早會先去松島, 因為東北交通似乎不太方便, 火車唔係咁密, 所以為左趕上一早 plan 好的火車, 連早餐都不吃了。搭乘
8:59 am 由仙台出發到本鹽斧站的仙石線 JR 火車, 9:26 am 準時到達。落車後, 天色不太好, 但又冇落雨, 咁都好, 冇咁熱。
|
跟住會去碼頭搭 "松島遊覽船",
我地一出火車站就見到有一個 counter 係度賣船飛, 仲要有九折 tim, 咁我地就買左先啦, 個職員仲教我地行去碼頭。因為冇乜太陽,
所以沿途都唔係太曬。去到碼頭, 影左幾張相就上船喇。
呢架係由本鹽斧開往松島既單程遊覽船, 可能今日不是假期, 加上係松島開出既船係會多人搭 d 既, 所以係本鹽斧乘船的人並不多。我地選擇係本鹽斧上船,
松島下船, 咁樣可以乘船欣賞到松島既景色之外, 又會順路 d......如果係松島上船的話, 咁就可以搭循環線, 環繞松島海岸一周。
|
|
10:00 am
|
十點鐘開船喇, 係船上面除左欣賞松島海岸既景色之外, 就係買蝦條餵海鷗喇。我地都買左一包蝦條, 諗住唔餵海鷗都可以自已食丫, 反正都未食早餐......點知
d 蝦條又真係幾好食喎, 哈哈......
原來餵海鷗都幾驚, d 海鷗好似成日想飛埋黎咁, 不過佢地係唔會飛入架船度既, 真得意......
|
10:50 am
|
搭左五十分鐘遊覽船, 終於到左松島喇。呢度比起本鹽斧真係熱鬧好多, 一落船就有好多遊客。
|
11:00 am
|
|
12:50 pm
|
行到差唔多一點, 突然覺得好肚餓, 諗諗下原來今朝只係食左 d 蝦條, 咁就係附近搵食啦。可能係遊客區關係, 間間都唔平, 仲要多數都係食牛舌, 冇計啦, 太肚餓了, 搵左一間裝修幾好既食店就衝入去了。食物水準明顯差過"伊達之牛舌",
不過都可接受啦。
|
1:34 pm
|
食完 lunch 就步行到 JR 松島海岸站搭仙石線到石卷站, 車程五十分鐘, 為的是 "石之森萬畫館"。到達石卷後, 人很多, 原來呢兩日咁岩有個石卷舉辦既祭典。日本真係無野多, 祭典就真係好多, 幾時去去到邊都有咁濟......因為人太多了, 令到我地原定步行到漫畫館的時間亦都增長左。
|
3:00 pm
|
三點鐘到達漫畫館, 入場費 800 日元。呢個展館會定期展示唔同主題既作品, 今次去到展示既係 "鬼太郎"。參觀完之後, 沿路步行回火車站, 直接搭乘火車回仙台。
|
6:15 pm
|
番到仙台既時間尚早, 於是到 "一番町商店街" 逛逛。行到八點已經很肚餓了, 我們選了一間叫 "大戶屋" 的餐廳吃晚飯, 味道不錯, 價錢又平, 後來幾日我們發現原來大戶屋有很多分店, 算是大集團呢!
|
9:30 pm
|
可能琴日搭飛機又早起的關係, 今日有點兒頭痛, 番到酒店都早點休息了。
|
~Day 3~
2/8/2008
(Saturday) 陰天、雨
仙台 -->
八戶 --> 青森 Nebuta 祭 --> 八戶
10:10 am
|
今日會離開仙台, 到青森觀看一年一度的東北四大祭既第一站 --- 青森 Nebuta 祭。由於呢個時候到東北既遊客實在太多, 而青森 Nebuta 祭係四大祭之中人氣最旺盛的, 所以連我咁早計劃都 訂唔倒青森既酒店, 最後決定留宿於八戶!
|
一早乘搭東北新幹線到八戶,需時個半鐘。到達八戶後先到八戶 Toyoko-inn 放低行理, 八戶這間 Toyoko-inn 非常方便, 與火車站距離十分近。不過咁早未有得 check in 住, 我地放低大件行理並執拾一下隨身要帶既物品後便步行回火車站。見時間尚早, 於火車站內找了一間拉麵店吃午餐。
|
|
1:10 pm
|
食飽飽後就搭乘東北本線特急火車上青森了, 不知是否上青森睇 Nebuta 祭的人太多了, 火車都滿座兼企滿了人。
|
2:10 pm
|
大約一個小時車程便來到青森了, 祭典要到今晚七時才開始, 下午既時間就正好讓我們先遊覽一下青森市, 第一站會先去參觀 "青函連絡船八甲田丸"。 八甲田丸擁有八十年歷史, 當還未有鐵路連貫北海道與東北地區時, 八甲田丸是一艘連接青森與函館的青函連絡船, 當它完成了歷史史命後, 它就被人留下來作公開展覽。
|
4:10 pm
|
參觀完八甲田丸後, 步行回青森市, 這時已有很多人在祭典會場內席地而坐霸位了, 我地要爭取時間遊覽, 當然不會選擇霸位呆等啦。我地走到一間旅遊書介紹的餅店 "
赤以林檎", 青森最出名既係蘋果, 而呢間餅店人氣最高既就係蘋果批, 我地咁遠黎到梗係要一試啦。旅遊書都有提到, 這個蘋果批每日限量發售, 售完即止, 我地去到時, 得番最後一個, 真好彩, 不過可能唔係新鮮出爐, 凍左了, 不過都真係好好味。食完野行番出黎, 成條街都係人, 非常熱鬧, 不過此時天色好似唔係咁好, 仲有d 想落雨 tim......
|
7:00 pm
|
到左差唔多七點, 我地就跟住 d 人群步行到祭典會場啦, 就係呢個時候, 個天開始落起雨來, 此時有點擔心祭典會否如期舉行, 後來才知祭典用的燈籠車全都用膠袋封好, 原來日本人已經早有準備, 亦都不得不稱讚日本既天文台, 真係好準呀!
|
青森的 Nebuta 祭是東北四大祭之中人氣最高的, 可能是因為它打頭陣吧!祭典開始時, 一架架大型的燈籠車由十幾二十人推出來, 前面有人在擊鼓作樂, 後面有著住祭典服飾的民眾, 而作為觀眾的我們, 都被這些熱鬧的氣氛感染到跟住大叫呢!而在祭典會場的路邊, 都有很多小吃的檔舖, 好像炒麵、烤肉串、烤魷魚、冰啤酒等等...生意都非常之好。
|
|
作為東北四大祭的首站兼且是人氣最高的青森 Nebuta 祭, 果然沒有令我們失望, 不過始終不及我們上年在大阪觀看的天神祭壯觀呢!
|
|
8:51 pm
|
觀賞完精彩的祭典後, 已經差不多九點了, 由於時間不早, 加上回八戶車程都不短, 於是決定先趕搭 8:51 pm 開往八戶的東北本線, 回到八戶後再找晚餐吃。
|
10:00 pm
|
回到八戶, 光顧了位於酒店附近的 "居樂屋千年之宴"。這間居酒屋, 就像香港既和民咁, 主要食日式小食。光顧這些餐廳, 我想遊客不多, 侍應都不懂以英語溝通, 如果餐牌沒有圖畫, 都幾麻煩呢!我地想問下佢有乜好野食, 佢又唔識聽, 唉...最後搞左好耐都係得個吉, 仲難為左果位侍應妹妹 tim, 哈哈!
|
11:00 pm
|
食飽飽後回酒店休息了。
|
~Day 4~
3/8/2008
(Sunday) 睛
八戶 --> 奧入瀨溪流 --> 十和田湖
10:00 am
|
今日會離開青森, 向今次旅程既另一重點 --- 奧入瀨溪流進發。我地已於網上預訂了豐田既車, 取車前先到八戶站吃拉麵早餐。其實八戶市中心絕非八戶 JR 火車站一帶, 八戶站一帶沒有什麼百貨公司, 亦沒有什麼好吃, 我們只在此留宿 (因訂不到青森的酒店), 作為到青森及十和田湖的中轉站吧了。如果大家到八戶又喜愛吃海鮮的話, 必定要去八戶八食市場, 因為我們行程趕急, 所以決定不去了。食完拉麵就係火車站附近影下相, 再到 Lawson 便利店買了一些麵包, 跟住就番酒店取行理了。
|
11:00 am
|
十一點鐘到酒店隔離既 Toyota 取車, 真係冇講錯, 呢間 Toyota 八戶站東口店正正就係東橫 in 隔離, 有相為證, 方便到極點。Toyota 既職員好細心, 雖然英文都係麻麻, 但佢都好落力咁講解租車既細節俾我地聽, 問完我地去邊又幫我地 set 埋個 GPS tim......不過價錢就比 JR 既 Rent-A-Car 貴少少......
|
11:20 am
|
開車出發了, 向奧入瀨溪流進發。 奧入瀨溪流從十和田湖流出, 從入口的 "子之口" 到 "燒山" 的源流部份就是奧入瀨溪流, 長約 14 公里。水流極富變化, 沿岸更是欣賞櫻花、紅葉的好地方。它與十和田湖同被指定為青森縣的特別名勝和天然紀念物。
|
有些人會選擇沿著溪流漫步, 慢慢欣賞溪流沿途大大小小的瀑布景色, 如果以散步形式, 全程約需 4-5 個小時吧。
|
|
12:40 pm
|
阿明負責開車, 我就一路欣賞沿途景色, 一路食住麵包, 哈哈。大約一個多小時, 我地到達 "燒山"。泊好車子後, 先去一去洗手間, 再買一些小吃作為今天的午餐, 然後再繼續上路。
|
1:30 pm
|
從燒山繼續驅車進入奧入瀨溪流, 很快就到達下一個景點 "石竹戶" 了。
|
2:00 pm
|
下一個景點是 "阿修羅之流"。
|
2:30 pm
|
繼續前進就到 "雲井之瀧"。
|
3:05 pm
|
離開 "雲井之瀧" 再驅車前往下一個景點, 這個應該是最壯觀的瀑布 "銚子大瀧" 了。可能撞岩中午時間, 這兒的遊客碰巧又特別多, 好熱鬧。
|
3:35 pm
|
離開 "銚子大瀧" 之後, 整條全長 14 km 的奧入瀨溪流都差不多走完了, 再繼續開車向十和田湖方向去。到達十和田湖休屋前, 都要經過一些較難行既山路, 又斜轉彎位又多, 路邊又沒有圍欄, 好像一不留神就會跌落山去似的, 如果大家渣車去都要小心一點啊!
|
走到奧入瀨溪流與十和田湖之交界, 見到有開往十和田湖休屋之遊覽船。這時, 我們有一個想法, 可否渣車沿十和田湖走一圈呢?但清醒過後, 知道是沒可能的了, 因為湖實在太大, 恐怕行到一半已經天黑迷路了。打消這個可笑的念頭後, 繼續開車前往 "瞰湖台" 及 "乙女之像"。瞰湖台是一個展望台, 讓你可在高處欣賞十和田湖之景色, 很多旅遊名勝都有的。至於 "乙女之像", 我就覺得冇乜特別了, 唔知睇黎做乜。
|
|
5:30 pm
|
入黑前到達十和田湖休屋, 因為今晚只預訂了酒店的房間, 並沒有預訂晚餐, 所以我們先找了一間餐廳, 吃過晚飯才到酒店 check in 呢! 可能遊客比較少, 來光顧的人亦自然少 (很多來住宿的都會一併預訂酒店的晚餐), 餐廳的食物好像不夠新鮮, 而味道亦不太好, 後來更被我們形容為整個旅程最差的一餐呢!
|
6:20 pm
|
晚飯過後, 驅車前往今晚入住的 "十和田湖國民宿舍"。這間酒店, 其實應該叫旅館就差不多, 它的設施簡陋, 幸好房間地方尚算乾淨, 亦有電腦上網。我原來不是訂這間國民宿舍的, 我的同事介紹我另一間比較好的 "十和田莊", 但我預訂時已沒有房間了, 應該給旅行團訂晒啦, 因為好多旅行團都係去呢間的......
|
11:00 pm
|
在旅館沒有什麼好做, 浸過簡陋的溫泉便就寢了。經過今天的旅程, 可以給大家一些建議。本人認為十和田湖沒有什麼地方值得花時間遊覽, 亦沒有什麼高水準的酒店, 若果大家是駕車遊覽奧入瀨溪流的話, 我認為可以即日來回呢。
|
~Day 5~
4/8/2008
(Monday) 睛
十和田湖 --> 田澤湖 --> Nyuto Onsen溫泉鄉蟹場溫泉
8:40 am
|
七點幾起身, 天氣非常好啊, 加上今日會到今個旅程既另一個重點---Nyuto Onsen溫泉鄉, 心情特別興奮。話時話, 唔係跨張, 日本東北真係好多地方都值得去, 風景實在太靚喇。check out 之後就開車離開十和田湖, 中途會再次經過昨日遊覽既奧入瀨溪流, 不同既係相反方向行, 由 "子之口" 走到 "燒山"。今次由我來駕車, 坐穩 d 呀, 呵呵......
|
9:20 am
|
到左燒山, 落車去燒山郵便局寄 postcard 番香港。 之後繼續開車, 中途見到 Lawson 便利店, 又落車買野食, 因為未食早餐。日本因為地方大, 好多人都要以私家車代步, 所以便利店門外都會有泊車位, 唔似香港咁要俾錢, 好方便, 不過當然去番日本既市區就唔會有呢 d 情況啦。之後再開車, 途經油站, 先入油。今次由八戶到十和田湖再回八戶, 總共行走了 134.6 km。
|
11:00 am
|
十一點鐘到達八戶, 準時還車。 還車後拖著行理到 JR 八戶站, 搭乘東北新幹線到盛岡, 然後再轉乘田澤湖線到田澤湖站。
|
12:35 pm
|
十二點半到左盛岡, 原本諗住順便出去食個盛岡好出名既冷麵既, 但又要趕搭 1:24 pm 開出既火車到田澤湖, 最後決定在車站食快餐算了。
|
1:24 pm
|
食完 Lunch 就搭田澤湖新幹線到田澤湖站喇, 車程只需半個鐘, 真係話咁快就到。
|
2:10 pm
|
到左田澤湖站之後, 就到車站旁既 JR Rent-A-Car 取車, 準備到真正既田澤湖同埋今日既重頭戲 ---Nyuto Onsen溫泉鄉喇。係計劃旅程時, 原本諗住由十和田湖直接駕車落田澤湖, 但仔細計劃過後, 發覺車程十分長, 而且在八戶取車, 秋田還車要另加附加費, 實在不太化算, 加上我們又購買了 JR East Pass, 所以最後決定只租車到沒有火車到達既郊野地方係最好不過的了。今次到 JR Rent-A-Car 租車, 比 Toyota 便宜一點。
|
(地圖由
Google 提供)
|
|
2:25 pm
|
2:25 pm 開車出發往田澤湖, 真正的田澤湖並唔係位於 JR 田澤湖車站旁的, 大家要去的話需要在此轉巴士。田澤湖是靠近秋田縣東部中心的破火山口湖, 相比十和田湖, 它的面積要細得多, 今次真的可以駕車繞湖遊覽了, 哈哈。 大概二十分鐘, 我地已經到達田澤湖了, 果度有個 "飲水思源像", 應該是景點來吧, 影張相先啦。
|
3:00 pm
|
之後我地駕車繞湖一周咁走, 沿途欣賞湖邊景色。
|
3:40 pm
|
到達遊客比較多既 "浮木神社" 同 "雲金辰子像", 其實都唔知呢個名岩唔岩, 本本旅遊書既譯名都唔同。
|
4:15 pm
|
繼續上路, 途經 "御座石神社" 同一間叫 "Hear Herb" 既花店。
|
4:45 pm
|
完成田澤湖繞湖一周之旅, 準備出發到神秘既Nyuto Onsen了。係呢個時候, 咁岩係旅遊書睇到附近有一個叫 "金色大觀音" 既寺廟, 正正係往Nyuto Onsen既路途上, 諗住租左車又唔好蝕既心理底下, 一於去埋。去到個廟度都關左門, 不過好笑既係你一樣可以行入去, 咁我地都唔敢走得太入, 只係係出面影下相就算喇。
|
5:05 pm
|
睇完個大觀音, 話時話, 真係幾大, 就開車上Nyuto Onsen喇, 一路上, 氣溫一路急劇下降。Nyuto Onsen散布在秋田駒岳的山麓上, 因為日本東北暫未成為港人之熱門旅遊勝地, 所以這兒能保存一片寧靜及舒適的環境。 要數最出名的必定是被人稱為日本第一秘湯的 "鶴之湯", 它的房間必須預早三個月預訂, 否則都很難可以有房給你。除了 "鶴之湯" 之外, 比較出名的還有 "妙乃湯", 不過價錢較貴, 另外還有 "蟹場、孫六、黑湯溫泉" 等等。今次我們就預訂了較化算的 "蟹場溫泉", 明天一早再到 "鶴之湯" 浸一浸聞名已久的乳白色溫泉呢, 因為我們租車前往, 所以由蟹場溫泉再到鶴之湯會比較方便呢!其實聽很多香港人都說要訂 "鶴之湯" 和 "妙乃湯", 計我話, 如果像我們一樣租車前往, 你不住它的房間也可入去浸它的溫泉, 實在不必一定要預訂到這兩間不可呢!
|
5:30 pm
|
沿途經過鶴之湯、妙乃湯及其他溫泉, 最後才到我們入住的蟹場溫泉呢!去到辦理 check in 手續, 負責的人英文麻麻, 但都細心講解民宿設施給我們聽。我地放低行理之後, 周圍走走, 睇下溫泉及洗澡的地方先。Nyuto Onsen是日本少數留下可以男女混浴的溫泉鄉, 即是話, 男女可以一齊浸溫泉, 男仔聽到一定好興奮呢!不過好可惜, 真係冇乜女人會同 d 男人一齊浸囉, 有都應該係阿婆......佢夜晚有一個鐘係專門俾女士浸的, 所以 d 女人通常只會係呢一個鐘入面浸。
|
6:00 pm
|
參觀完個溫泉旅館後, 先去食晚餐, 好豐富的一餐呢! 不過阿明就慘 d, 因為佢唔鍾意食日本野。
|
8:30 pm
|
食飽飽先去沖涼, 然後我就襯露天溫泉只俾女士去浸果段時間去浸一浸先, 嘩, 好正呀, 雖然而家係 8 月, 但呢度 d 溫度都幾低架......女士專用時間結束, 我就同阿明出去喇。我就梗係唔係陪佢浸啦, 我只係陪佢睇住佢浸咋, 隔左一陣, 就有 d 男人出黎喇, 我就係咁坐係側邊睇住 d 男人浸溫泉喇, 哈哈, 咩都俾我睇晒......就係呢個時候, 佢一路浸一路望住個天, 發覺天上面既星星好靚, 仲好清楚 tim, 佢話想影下個天喎......於是我地就番入房拎相機出黎影相喇。
|
拎左部相機出黎, 唔知係部野 cheap, 定係冇技術呢, 都影唔倒 d 乜野, 我企係度又超凍喎, 望下個溫泉又冇晒人, 咁我地就再去浸一浸啦。 今次係我地兩個人一齊浸呢, 哈哈哈哈!浸左一陣阿明係咁趕我走, 話費事有人突然殺出黎啦, 不過到我地走, 都冇人出黎囉, 日本人真係早訓呢! 雖然係驚險 d, 不過都係一個好難得既經歷黎。
|
|
12:00 am
|
浸完溫泉番房休息喇。
|
(上面呢幅就係乜都睇唔倒既天空喇, 哈哈)
|
~Day 6~
5/8/2008
(Tuesday) 睛
Nyuto Onsen溫泉鄉 --> 角館 --> 秋田竿燈祭 --> 秋田
7:30 am
|
一早起身, 再黎多次室內溫泉兼沖涼, 然後就去食早餐。
|
9:15 am
|
食飽飽後就開車離開蟹場溫泉, 出發去鶴之湯喇, 沿途仲會經過妙乃湯。去到鶴之湯只是九點半, 見到好多人喎, 原來有好多日本人專程渣車來浸溫泉呢, 亦有一 d 係昨晚同我地一樣, 住係蟹場的!呢度 d 溫泉旅館在日間會開放給唔住宿的人, 所以我話訂唔倒鶴之湯住宿的唔駛失望, 你一樣可以入去浸那個乳白色的藥用溫泉的。溫泉要到十點鐘先開放, d 人好搞笑, 個個拎住條毛巾企係度等, 咁我地就影下相先。
|
10:00 am
|
十點鐘可以入去了, 入到去周圍走一走, 望望咩環境先, 原來淨係女湯都有好幾個溫泉浸, 幾個室內, 一個露天乳白色溫泉必定係主打啦。另外有一個係乳白色男女混浴的溫泉, 除左有一個女人圍住件袍係度浸, 就冇女人了。最搞笑係, d 女人唔浸, 不過就企係側邊幫 d 男人影相囉, 我就係其中一個喇, 哈哈, 笑鬼死!鬼叫呢個溫泉咁出名呀, 咁遠黎度梗係影番夠本啦。仲有好搞笑既係, 有 d 男人為左方便, 浸完呢個要去浸另一個, 就咁搵條毛巾遮住重要部位係度走黎走去囉.......
|
10:55 am
|
果然係日本秋田縣第一秘湯, 浸完成個人舒服晒。離開鶴之湯, 繼續我地今日既行程喇。我地會先到角館, 參觀完角館之後才還車。因為田澤湖同角館距離唔遠, 所以係角館還車唔需要另加附加費, 化算得多。
|
11:55 am
|
大約一個小時車程到左角館, 我地又搵左間 Lawson 便利店泊好架車, 再入去買我地既 Lunch 喇。睇我地既遊記, 好似成日都要食 Lawson 咁, 冇計啦, 行程緊迫, 仲慘過旅行團, 哈哈!
|
12:10 pm
|
我地要遊覽角館既武家屋敷, 應該就係附近, 我地索性將架車泊係 Lawson 出面, 待參觀完先番黎取車, 唔好話俾人知呀!
|
角館武家屋敷別號小京都, 因為佢到處都保留著江戶時代既建築。我地順序參觀了小田野家、河原田家、岩橋家、青柳家、石黑家及松本家,其屋舍是江戶時代具崇高地位武士的代表性宅邸。
|
|
1:17 pm
|
參觀過後, 番去取車, 然後去入油, 經 "天寧寺" 再到 JR 角館站還車。我們到達火車站時, 找不到 JR Rent-A-Car, 以為去錯了地方, 於是渣車再周圍找, 此時已經很著急, 因為夠鐘還車了。我再用 gps 輸入電話號碼, 它都說在火車站就是了, 我再仔細看一看, 終於找到了, 看一看下面的相, 就知點解我們找不到了, 個招牌真的細到冇人有囉。
|
2:11 pm
|
還車後, 搭 JR 新幹線到秋田。到達後立刻到秋田 Toyoko-inn check in。
|
4:00 pm
|
休息一會, 我地先去遊覽秋田市及千秋公園, 晚上去觀看東北四大祭第二站 --- 秋田‧竿燈祭。
|
5:50 pm
|
行完一個好大既千秋公園已經好累, 仲好肚餓 tim, 今次唔駛食 Lawson 喇, 仲係食好野 tim。我地去左 "七代佐藤養助" 食好出名既秋田名物 --- 稻庭冷麵。我一向唔多鍾意食凍既野, 雪糕同刺身除外啦, 不過我都覺得呢度 d 冷麵配埋佢 d 花生醬好好味呀, 值得推介。
|
7:30 pm
|
食到好飽, 可能今朝冇乜點食野啦。步行到竿燈祭會場, 沿途好多人, 不過應該少人過青森既 Nebuta 祭。
|
8:50 pm
|
整個祭典好好睇, 我地都睇晒先走。番到酒店整理一下相片就休息了。
|
~Day 7~
6/8/2008
(Wednesday) 睛
秋田 --> 山形 --> 山寺 --> 山形花笠祭 --> 山形
6:45 am
|
今日特別早起, 因為要花四小時由秋田落山形。拖著行理走到火車站, 用十分鐘時間去食早餐, 然後搭 8:02 am 開出既新幹線往仙台。到達仙台站後, 再轉搭仙山線快速到山形, 到達山形時已是中午十二點了。到達後先到預先訂了房的 Toyoko-inn 放低行理。
|
12:30 pm
|
放低行理後, 走回火車站附近, 找了一間吃拉麵的餐廳入內。呢間野叫 "麵房春 ki 家", 味道唔錯喎。
|
1:36 pm
|
食完野就番 JR 火車站, 搭 JR 仙山線到山寺站, 車程只需二十分鐘。
|
1:56 pm
|
離開山寺站, 就向山寺進發。山寺是山形縣一個郊外著名觀光重點, 是山形及仙台之仙山線上重要鐵道站, 亦是著名佛門聖地。要走到山頂, 需要經過一千多個石階, 沒有體力真的無法抵達呢!我走到一半, 都已經要停下來休息, 仲喘晒氣 tim, 但我見 d 公公婆婆都唔駛休息, 我諗我都係要多 d 做運動了。去到山頂, 望番落去 d 景色真係靚好多, 行到喘晒氣都值得既。
|
4:39 pm
|
參觀完山寺就走回 JR 車站搭車番山形喇, 雖然山寺都算係遊客區, 但呢條仙山線既火車比較疏, 建議大家睇定幾點有車。我地去到火車站先發覺上一架火車岩岩開走左, 最慘附近又冇野行, 可以做既就係係火車站呆坐等下一班到來的火車, 等既地方又冇冷氣, 都幾悶。
|
4:55 pm
|
番到山形, 要先食晚餐, 再去睇東北四大祭既第三站 --- 山形 ‧ 花笠祭。山形出名既係山形牛, 我地當然唔會錯過啦。我地先係山形市中心周圍睇下, 最後揀左呢間幾出名既 "山形佐五郎"。入到去, 好日式, 只係得日文 menu, menu 又冇圖, 即係證明呢度冇乜遊客黎囉, 不過我諗日本東北應該好快就會俾香港人攻陷架喇。我地唔知點叫野食, 又要問 d 侍應, 又係例牌英文唔掂, 佢地又好似好驚咁, 真係難為左佢地洛。最後叫左 d 鐵板菜式, 有 d 似廣東菜喎。
|
6:55 pm
|
食完晚餐就步行到花笠祭會場, 呢個係東北四大祭之中規模最細, 人氣亦都係最少既一個, 要搵個位睇都好容易。呢個祭典冇大型燈籠車, 冇人表演舉燈籠, 只係不同類型既人配以唔同既衣著以簡單舞步循遊咁姐。不過都好熱鬧, 因為 d 日本人好投入。佢地參與既人由小學生到老人家都有, 比著係香港人, 你想叫 d 學校老闆放你假去練習和表演都難啦。
|
8:15 pm
|
睇完祭典, 步行回酒店。途中經過雜貨店, 見到有好平 (平過係便利店同其他地方架) 而且好好味既薯條, 買左 d 番酒店食。黎到日本都要買平野, 真係吹賬。
|
~Day 8~
7/8/2008
(Thursday) 睛
山形 --> 米澤 --> 山形
8:50 am
|
今日既行程唔算趕, 只打算到山形附近一個叫 "米澤" 的旅遊區。雖然叫旅遊區, 但我相信遊客不會太多, 尤其香港人更絕少會去, 因為這個地方沒有什麼特別出名的東西, 出名的只有一樣, 就是 "米澤牛" 了。 我特地安排到米澤都只是為了一親米澤牛的香澤呢!大約 9:50 am 到車站下面的一間麵包餐廳吃早餐, 味道很好。
|
10:04 am
|
乘搭 JR 新幹線到米澤站, 需時 36 分鐘。下車後, 第一時間當然是去 information centre 拎地圖, 順便問下呢個地方點行好啦。點知一問之後, 我就知道呢個地方應該冇乜遊客黎喇, 因為 d 人連少少英文都唔識既。 我地又死不罷休, 係咁問。 在我用一半英文, 一半簡單日文既情況下, 問左成大半個鐘頭......日本人都幾有耐性呀下......
|
11:45 am
|
見時間都唔早, 我地決定先去食米澤牛 lunch。乘搭米澤市市民循還巴士右迴線, 在米澤市役所前站下車。
|
12:45 pm
|
下車後就找我地既目標 "登起波米澤牛牛肉店", 呢間舖唔係大街, 加上呢個地方都好鄉下, 我地都搵左好耐先搵到呀。 我地兩人都點左 shabu shabu, 雖然天氣好似熱了點, 但為左我地既米澤牛, 冇法啦。
|
2:15 pm
|
|
4:33 pm
|
大約四點半左右就搭循環巴士左迴線回米澤站, 準備搭 JR 新幹線番出形了。 係我地等巴士番 JR 站時, 附近有一間叫 "愛染" 既米澤拉麵店, 都是很出名的, 旅遊書都有介紹的, 不過我地沒機會試了。
|
6:00 pm
|
回到山形, 時間尚早, 於是我地又走到花笠祭的會場。
|
7:00 pm
|
琴晚諗住食牛, 但最後變左食廣東菜咁, 於是今晚就搵番 d 真正既日式山形牛食喇。我地選了一間叫 "KUROGE" 既炭燒山形牛店, 入去要坐地下, 冇遊客......我地係度諗, 又唔知點叫野食, 點知個侍應妹妺好好人, 好努力咁講解, 講講下個廚師走埋出黎, 指住一個字, 跟住又指住自已個身, 即係話俾你聽呢客係牛既咩部位, 真係好好人呢......我地食食下, 佢仲送多一客牛俾我地食, 好好味, 價錢又唔貴, 正過係香港食多多聲呀......
|
8:40 pm
|
食完晚餐就慢慢行番酒店, 經過一個太空奇兵威 E 的公仔, 好鬼得意架, 係香港都唔會見到呢 d 野既。之後再買左 d 宵夜番去食, 過埋 d 相就休息了。
|
~Day 9~
8/8/2008
(Friday) 睛
山形 --> 仙台 --> 仙台七夕祭 --> 仙台
8:40 am
|
今天會回仙台, 欣賞今次東北四大祭既最後一站 --- 仙台‧七夕祭。一早乘搭 9:36 am 開出既仙山線列車到仙台, 需時 71 分鐘。到達後先到今晚會入住既 toyoko-inn 放低行理, 然後再出動食 lunch。
|
11:40 am
|
我地係仙台市搵左好耐, 都冇乜特別野好食, 講食呢度真係唔夠東京大阪咁多選擇, 最後決定食吉野家。
|
12:30 pm
|
|
12:50 pm
|
大約二十分鐘就到左瑞鳳殿, 入場費 550 yen。
|
2:05 pm
|
之後搭觀光巴士到仙台城跡, 呢個城已經冇左, 其實冇野睇, 主要係睇番仙台市既風景。
|
3:15 pm
|
參觀完仙台城跡, 番落仙台市行下, 雖然七夕祭仲未開始, 但仙台市都已經非常多人了。 |
5:15 pm
|
行到五點幾, 我地選了一間叫 "美日月" 的餐廳吃晚飯, 入到去間餐廳既佈置有點西化, 但食物都是日式的, 店員又係例牌唔識英文。係雞同鴨講之際, 佢地問我地識唔識講普通話, 我地話可以, 佢就叫左個廚師出黎, 原來佢係中國人來的, 咁就方便很多了。食物味道很有水準, 像香港高級酒店的質素, 但價錢卻比香港平得多。 |
6:30 pm
|
食完野就去欣賞東北四大祭最後一個祭典仙台七夕祭喇, 呢個祭比較西化, 有 d 似一個大型歌舞表演, 都好好睇喎...... |
7:30 pm
|
呢個 trip 要睇既四大祭已經完滿結束了, 四個祭都各具特色, 好好睇。我地走回酒店途中, 買左 d 暑片同暑條, 諗住睇奧運會開幕時食呢! |
~Day 10~
9/8/2008
(Saturday) 睛
仙台 --> 盛岡 --> 新宿
8:38 am
|
今天我們會先到盛岡的小岩井農場, 之後就會離開東北, 向東京進發了。乘搭 8:38 am 由仙台開出的東北新幹線列車到盛岡, 需時 44 分鐘。你可能會問, 為何走回頭路上盛岡呢?我們原先想一早落東京的, 後來都是決定要去小岩井農場, 其中一個原因係想用盡個 JR East Pass, 因為今日係用個 pass 既最後一日限期了。 其次是想到今次來了東北, 下次可能會係好耐之後呢, 只少比東京耐吧, 所以最後還是決定上盛岡一趟, 而小岩井農場話晒都係旅遊勝地。我地買左麵包上車食。
|
9:22 am
|
到左盛岡之後, 我地仲見到我地岩岩搭既火車會一開為二, 一半繼續出發去八戶, 另一半變為秋田新幹線去秋田呢。原來呢個情景都幾多人企係度欣賞, 仲拍埋 video tim。
|
9:45 am
|
乘搭岩手縣交通巴士到小岩井農場, 需時 35 分鐘。車上大部份都是小朋友, 可見呢個農場很受小朋友觀迎呢!
|
10:20 am
|
入到去我地先品嚐一下呢度好出名既牛奶同 cheesecake 先, 然後再圍繞農場走一圈。我地玩過射箭, 睇過綿羊, 感覺很舒服, 很寫意, 好渡假 feel。要走完整個農場不需花太多時間, 最多預留半天已十分足夠, 個人感覺有小朋友同行會比較合適。
|
臨走前到農場內之山麓館餐廳食 lunch, 好多人, 要等位, 不過呢度 d 蛋包飯好出名, 好想一試。等位既時候又再周圍走, 仲試埋佢 d 牛奶雪糕。終於有位了, 我地叫左兩個唔同既蛋包飯, d 蛋好滑, 同澳洲牛奶公司有得揮喎, 哈哈。
|
|
1:40 pm
|
搭岩手縣交通巴士番回盛岡站, 再搭 JR 新幹線落東京, 到達東京新宿已是五點半了。到達後我們先到今晚入住的 Shinjuku Vintage 酒店 check in 同放低行理, 呢間酒店係 package 包左的, 我地之前住過 Vintage 知道佢都 ok, 而且價錢係最平的, 所以就揀左佢了。
|
8:20 pm
|
黎到新宿, 感覺同東北真係完全唔同, 我諗香港人都係鍾意東京多 d, 哈哈。淨係食都大把選擇, 至驚你冇咁大個胃。我地今晚會去香港人好鍾意既六歌仙, 一去到就聽到好鬼大聲既廣東話......我地兩人點左兩個 set, 因為我地知道食牛其實好肥膩, 好快就會飽, 所以無點任食, 同埋任食 d 牛應該冇咁靚吧。食完都覺好飽, 價錢真係唔算平, 兩人總共要一千二百幾蚊, 值唔值見人見智......我地就覺得其實有好多食牛既餐廳, 無咁貴, 都有咁既質素, 不過旅遊書冇介紹吧了。
|
9:30 pm
|
食完野就行下歌舞伎町, 然後就回酒店休息了。
|
~Day
11~
10/8/2008
(Sunday) 睛、雨
新宿 --> 川越 --> 新宿
9:10 am
|
今天是最後一個 full day 留在日本了, 打算到川越走一趟, 行程不算趕, 還可以在老麥食個早餐。川越又名小江戶川越, 皆因它到現在都充滿著古舊情懷, 有點兒像京都。
|
9:31 am
|
乘搭西武新宿線急行列車, 到達本川越站。
|
11:00 am
|
到達後先取地圖, 然後順路參觀喜多院、本丸御殿、藏之街、鐘樓以及?子屋橫丁, 最後走回本川越站。中段在一間叫春夏秋冬的餐廳吃了一碗烏冬作為午餐, 味道還可以。
|
4:04 pm
|
走了大概五個小時, 完成了小江戶川越之行。搭火車回新宿。
|
5:15 pm
|
回到新宿, 走入一間叫三葉既迴轉壽司, 吃了兩客三文魚 sushi, 感覺比香港元氣還要差。
|
8:05 pm
|
走遍了新宿的百貨公司之後, 我地決定要再一次品嚐三太豬扒飯。我地記得係幾年前, 當我地唔知係第一次定第二次來日本既時候, 已經黎過呢間三太食豬扒飯, 但我地當年冇錢, 兩人只係叫左一個 set 黎食, 幾年後再黎過, 終於可以一人一個 set 喇, 哈哈。
|
食完野行出黎, 原來落緊大雨, 仲要係好大果隻, 搞到 d 衫濕晒......
|
|
9:45 pm
|
好辛苦咁番到酒店, 整理下行理就休息了。
|
~Day 12~
11/8/2008
(Monday) 睛
新宿 --> 東京成田機場 --> 香港
8:50 am
|
今天係行程既最後一天, 上午時段例牌係 shopping 時間啦。其實我地都不太喜歡 shopping, 通常都留待最後一天才買野。咁早舖頭未開門, 我地先嘆番個早餐先。
|
2:10 pm
|
用盡所有時間, 行到成二點, 我地拖住行理去食埋個博多天神拉麵。呢個拉麵係我既至愛, 每次黎新宿都必定要食架。
|
3:25 pm
|
終於要走了, 搭機場巴士到成田機場。搭巴士時, 唔覺意望下隔離果對男女, 個女既好熟面口, 原來係曹眾黎, 佢幾時退出左娛樂圈架?不過冇人提佢都唔出奇, 我都差點唔記得有呢個人, 我隔離果個話, 你咁都認得, 好野......
|
6:40 pm
|
check in 後如常入禁區, 點知係照行理果度俾人截住, 我心諗, 搞乜呀, 再諗下, 死火, 有 d cream 係個手提袋度......會唔會俾人扣留架, 好驚 tim......果個人幫我再 check 清楚 d, 佢話太大支果 d 唔可以過, 佢又話番轉頭再寄艙趕唔切, 咁我話, 掉左佢啦, 我心諗, 仲好, 反正仲有好多支, 哈哈。
|
7:35 pm
|
飛機於 7:35 pm 起飛了。
|
(以下轉香港時間)
10:25 pm |
番到香港喇, 十二天既日本東北‧夏‧四大祭之旅終於完滿結束。
|
沒有留言:
張貼留言