2009 April 日本．中部 (高山、飛驒古川、白川鄉、下呂溫泉) + 北陸 (金澤、立山黑部) 7 天自駕遊

~日本．中部 (高山、飛驒古川、白川鄉、下呂溫泉) + 北陸 (金澤、立山黑部) 七天自駕遊~

日期: 13/4/2009 - 19/4/2009

第七次日本遊，仲係第一次全程自駕 tim。雖然只是七天，但我們會走遍日本中部以及北陸多個地方。由於 JR 火車費用非常昂貴，加上日本中部沒有火車證，若然購買全國那種日本火車證，都仍然比租車昂貴，那不如全程租車好了。
今次自駕遊時間不長，只是七天，但行程卻充滿特色。除了能夠欣賞高山每年一度之 "春．高山祭" 外，還走訪世界文化遺產白川鄉以及近年才興起的立山黑部。

要同時一併欣賞高山祭同埋立山黑部雪之大谷既壯觀奇景，要就岩時間先得，今年的復活節假期正好可滿足晒咁多要求，yeah ~~!

事前準備

準備	備註
申請日本旅遊簽証	免簽証
申請國際車牌	不用申請 (因上年暑假到日本東北申請的國際車牌還沒到期，可以再用)
購買機票	於萬福旅行社購買中華航空香港至名古屋來回機票兩張 (需於台北轉機)
購買旅遊保險	於保誠購買旅遊保險
訂民宿, 酒店	於網上預約
租車	經東橫 Inn 租一車 (自駕五天，約行走了 800 km)
換日元	於恆生銀行換購

行程表

		住宿
Day 1	香港 --> 日本中部國際空港	中部國際空港 Toyoko-inn
Day 2	日本中部國際空港 --> 高山 --> 高山．高山祭 --> 高山	高山 Route-inn
Day 3	高山 --> 飛驒古川 --> 白川鄉	合掌屋民宿．大田屋
Day 4	白川鄉 --> 金澤 --> 富山	富山 Toyoko-inn
Day 5	富山 --> 立山黑部 --> 下呂溫泉	下呂溫泉．白樺溫泉酒店
Day 6	下呂溫泉 --> 土歧 Outlet --> 名古屋．榮 --> 日本中部國際空港	中部國際空港 Toyoko-inn
Day 7	日本中部國際空港 --> 香港

~Day 1~

13/4/2009 (Monday) 晴

香港 --> 臺灣桃園國際機場 --> 日本中部國際機場 --> 中部國際空港東橫 Inn

10:15 am	今次唔怕死, 最緊要夠平, 買左華航飛名古屋既來回機票, 仲要係晏畫機, 所以今次好難得地十點幾先係屋企出發, 唔駛咁早起身喇。
11:00 am	搭的士到機場, 去到華航櫃位, 諗住排隊之際, 有個職員走黎叫我地去做自助 check-in, 咁唔駛排隊都好啦, 跟左佢去, 佢好有耐性咁教我地做 self check-in, 其實佢都幫我地做埋咁濟, 哈哈......其實華航 d service 幾好, 奈何出事率咁高...... check-in 完去左食 Burger King, 食完 野就出境喇。 跟住去左機場貴賓室坐下, 飲下野, 上下網咁, 不過坐左一陣都係出番出面行, 裏面好似好焗促咁, 唔太鍾意......
1:40 pm	起飛喇, 向臺灣進發。上左機後, 又想讚下華航, 勁多新電影睇, 仲要係隨時開始播放, 唔似國泰係中央播放既。我揀左睇 "葉問", 真係幾好睇喎。
3:00 pm	一個小時多少少就到左臺灣桃園國際機場喇, 我想應該不是上番同一架機, 所以要走一段路去轉機。 一出去見到個洗手間, 唔留意仲以為自已已經到左日本機場, 好有日本 feel 啊！
4:25 pm	係候機室等轉機, 飛機準時起飛, 上左機繼續睇 "葉問", 唔駛由頭睇過, 你話係咪 good 先......
(以下轉日本時間) 7:50 pm	大約兩個小時多既航程, 終於到左日本中部國際機場喇, 呢個機場係 2007 年暑假已經黎過了, 都幾多野行同幾多野食的。我地跟住去入境同拎行理, 之後就問下個 customer service counter 既小姐, 點樣行去機場間東橫 Inn 啦, 佢點左我落去搭 shuttle bus, 咁就搭啦。不過其實唔搭都 ok 既, 因為佢有行理車俾你推行李過去酒店, 路程其實唔太遠, 反而搭佢架 shuttle bus 好焗, 仲係個機場度轉黎轉去, 轉到頭暈咁濟, 不過搭車就岩晒 d 唔鍾意行既人......
8:30 pm	去到機場東橫 Inn, 第一時間去辦理 check-in 手續, 突然有個 surprise, 個 staff 問我係咪今日落機, 我話係, 佢話咁樣會有 500 yen 折扣, yeah~~~ check-in 完放低行理上房就拿拿聲搭番架 shuttle bus 出機場食飯, 個司機又係剛才那個, 架車駛番機場中途, 突然停下, 原來個司機叔叔係想俾我地影相, 咁就影番張啦, 雖然影得唔係好靚...... 去到機場, 即刻去搵食, 原本諗住食名古屋好出名既味噌豬扒飯, 點知去到岩岩關門大吉, 好失望, 再諗住去買翼啦, 又係關左門, 唉......最後唯有去便利店買杯麵食 >.<
10:00 pm	係酒店食緊杯麵之際, 無無聊聊, 拎 d 鏡頭出黎影下先, 今次 d 裝備都唔弱架。
	超廣角變焦鏡頭 EF-S 10-22mm f/3.5-4.5 USM
	遠攝變焦鏡頭 EF 75-300mm f/4-5.6 III
	標準變焦鏡頭 EF 24-105mm f/4L IS USM
12:10 am	執好行理休息了。

~Day 2~

14/4/2009 (Tuesday) 雨

中部國際空港東橫 Inn --> 高山．飛驒之里 --> 上三之町 --> 高山祭 (因下雨取消夜祭) --> 高山 Route Inn

7:15 am	一早起來, 於酒店食早餐。呢間東橫 Inn 好正, 有日式同西式早餐揀, 我地梗係揀西式啦, 估唔倒 d 麵包幾好味, 仲有北海道牛奶任飲 tim。食完早餐就 check-out 喇, 之後就推行李回機場。去到機場首先買琴晚食唔倒既雞翼, 因為趕住走喇, 所以食唔倒豬扒飯, 雞翼都係外賣。 然後就到機場 Mazda 租車分店取車, 我地黎緊五日都會全程自駕, 架車係 book 東橫 Inn 時, 經東橫 Inn 幫我地 book 既, 咁樣會平好多, 不過唔識日文就麻煩 d, 我地係搵左個朋友幫我地打電話去 book 的。
9:10 am	開車出發了, 目的地係離名古屋機場頗遠的高山, 車程都要三小時。阿明負責架車, 我就係度食雞翼, 好好味喎, 不過調味料既味好重, 但食完又唔會覺得口乾既。 架車慢慢駛離名古屋, 係呢個時候, 個天開始落雨, 仲越落越大, 落個不停......最後去到高山都落緊, 唉...... 除左落雨咁不幸之外, 到左高山之際, 阿明行錯路, 可能個 gps 又衰, 到左高山冇 cut 落去......架車繼續行, 因為係公路關係, 冇路番轉頭, oh god......架車係咁行, 有 d 唔對路, 再咁行都唔知要去到幾遠, 行到中途, 我作出一個頗大膽既決定, 就係係隧道入面調頭, 此乃危險動作, 大家千萬唔好學, 我都係迫不得已姐......
12:30 pm	到達高山市, 我地先到 "飛驒之里" 參觀, 此時仍然下著毛毛細雨。飛驒之里入場費 700 yen, 門口仲有雨傘借用, 我想這裡必然是雨帶, 經常下雨的。
2:30 pm	離開飛驒之里, 駕車回高山市中心, 找好地方泊車後, 便去食 lunch。隨便找了一間吃中華拉麵, 味道普通。臨走到隔離幫襯了飛驒牛串燒, 味道 ok。
3:00 pm	食飽飽後, 就漫步高山市。先步行到 "高山陣屋", 好似冇咩特別野睇, 又要入場費, 冇入內參觀, 只在門口影左相算。此時仲落緊雨, 有點擔心晚上舉行的高山祭夜祭會受天氣影響呢！ 繼續漫步高山市, 一路走到上三之町一帶, 沿途都見到祭典用的高台車, 一共有十二台, 全部都有名字的。
5:30 pm	行到五點幾, 仲落緊雨, 好唔開心。睇住旅遊書, 搵左我地要食晚餐既地方。 黎到高山, 一定要食既就係呢度既朴葉味噌飛驒牛料理。我地要左兩款唔同整法既飛驒牛, d 牛好靚, 好鬼肥, 不過 d 味僧都有 d 鹹。 我地食完都係鍾意神戶牛或松阪牛多 d, 不過講價錢, 神戶牛同松阪牛貴成幾倍價錢啊！
7:10 pm	食完飯仍然落緊雨, 見附近都好靜, 行到夜祭會場附近睇睇, 原來夜祭真的因為下雨取消了，好失望。既然冇野睇, 就早 d 去酒店啦。 跟住個 gps 走, 走到差不多到達時, 個 gps 已經帶唔倒路喇, 不過只係差不多到咋, 我地見到間酒店係山上, 此時夜媽媽, 我地搵唔倒路上去....... 試左幾條路, 都唔岩, 黑媽媽又唔敢走得遠, 唉......此時見到個女人, 佢應該係住係度, 我地唯有硬著頭皮問佢識唔識路啦, 佢識呀, 不過唔識英文囉, 點溝通呢？佢仲要拎住把雨傘, 又唔知點講, 最後用盡所有身體語言, 加上用筆畫, 再身體力行咁走出馬路指手畫腳, 我終於明明地喇...... d 人話日本人假, 總好過唔采你丫, 假到咁樣幫人, 真係非常 good 啦......最後聽佢指示, 順利到達, yeah！
7:45 pm	check-in 後就到大浴場浸浴兼洗白白, 再嘆番杯免費咖啡......番房整理下 d 相就休息了。 臨訓望下出面, 仲落緊雨 >.<

~Day 3~

15/4/2009 (Wednesday) 晴

高山 Route Inn --> 宮川朝市 --> 飛驒古川 --> 高山祭 --> 白川鄉 --> 合掌屋．大田屋

8:00 am	一早起來, 第一時間望下個天, 嘩, 終於天晴喇, 琴日落左成日雨, 終於落完。於酒店吃早餐, 味道唔錯。
9:15 am	今日第一個目的地係高山市既 "宮川朝市", 話明朝市梗係要朝早黎啦。 我地試左呢度遊客都必飲既飛驒牛奶, 好 "蘇" 呀！
10:00 am	由於行程緊迫, 趕快駕車到距離高山市不遠既 "飛驒古川" 逛逛。呢度古色古鄉, 有 d 京都 feel 咁。最後去飛驒古川影番張相, 後來先醒起, 唔記得去蓋印, 失策。 漫步完飛驒古川, 再駕車回高山市睇祭, 沿途經過一個開滿左櫻花既 "櫻野公園", 順道入去影下相啦。欣賞完櫻花就駕車回高山。
12:15 pm	回到高山, 很熱鬧, 天氣很好, 人很多, 與昨天真是差得遠。其實這時舉行的不是巡遊, 那些高台車只會停留一段時間讓人拍照, 然後才會移動。由於昨晚的夜祭取消了, 只好參與這個日巡遊補數。
1:45 pm	到鍛治橋中華拉麵吃午餐, 還加了一個飛驒牛 sushi, 味道不錯。
3:00 pm	吃完午餐都已是三時, 我地要出發到世界文化遺產 "白川鄉" 喇, 這次由我來駕駛。 今次到白川鄉又出現左 d 阻濟, 我跟住個 gps 一路行, 沿途都好順利, 已經駛離高山應該差不多上 IC 啦, 直至去到一個 T 字位, 一個大大轉右既牌寫住 "白川鄉", 但係個 gps 就叫我轉左......我見到咁既情況, 立刻停埋一面睇清楚先。我諗果條公路係新起, 而個 gps 就未 update, 佢根本 search 唔倒有呢條路, 咁點算好呢？我就諗住唔理 gps 轉右, 但係阿明就話冇 gps 好危險, 寧願跟住佢行遠少少......咁我地就再睇下個 gps, 佢最後都係話轉左, 不過就話咩有阻塞咁上下意思, 我 d 日文又係有限公司, 咁諗住行遠少少冇所謂啦, 跟就跟啦...... 一路行......噢......前面整路, 封左唔俾行......唉, 原來個 gps 係話呢度有整路唔行得......都話一早唔好跟個 gps 轉右架啦, 成個牌寫住白川鄉仲有錯既？冇計啦, 又要行番轉頭, 呢個時候換阿明駕車, 因為佢渣得快 d, 免得天黑都未去到呀。去番頭先個 T 字位, 跟牌行, 直上公路, 今次真係冇錯喇。
5:30 pm	到達白川鄉已是五時半, 我地泊好車, 到合掌屋民宿大田屋 check in 先。管理民宿的是一個婦人和她的女兒, 她告訴我們六時吃晚餐, 我地心諗, 咁早, 都未出去行？我地唔理咁多, 即刻出去渣車上荻町展望台睇一睇先。以往呢個時間, 呢度 d 雪都未溶得晒, 但今次黎到, d 雪都沒有了, 不能看見合掌屋被雪舖滿的情景呢！
6:00 pm	好快趕回民宿吃晚餐, 以免被人覺得香港人鍾意遲到。 民宿吃的當然是歧阜縣的朴葉味噌料理, 右面坐了兩個香港來的女仔, 唔多出聲, 可能驚我地聽到佢地講野, 哈哈！左面係一家由美國來的遊客, 好 nice, 我地係咁同佢地傾計, 香港人真係唔多 ok >.<
11:00 pm	食完飯冇咩好做, 連電視都冇, 十一時就休息了。

~Day 4~

16/4/2009 (Thursday) 晴

合掌屋．大田屋 --> 白川鄉 --> 金澤．近江町市場 --> 兼六園 --> 廿一世紀美術館 --> 金澤城 --> 香林坊 --> 富山東橫 Inn

7:30 am	今天係阿明生日, 佢個生日都唔錯, 常在復活節假內, 他已是第二次在日本過生日了。 於民宿吃早餐, 一樣係朴葉味噌料理, 民宿女主人還與我們一起玩樂器同唱歌......佢唔知係咪做野做到好悶呢？
9:00 am	開始漫步這個世界文化遺產 "白川鄉", 其實係咪咁特別？只是一大群其他地方沒有的合掌屋吧！ 到接近中午的時候, 看到有些香港旅行團到來, 他們應該是到此一遊, 不會在這裡住宿的。 雖然留宿白川鄉有點悶, 因為這裡連電視都沒有啊, 不過若想靜靜享受白川鄉的寧靜, 真的建議在這裡住一晚, 這個體驗也實在非常難得。
11:15 am	離開白川鄉, 向金澤進發, 這次也是由我來駕車。
12:30 pm	到左金澤, 第一個目的地係 "近江町市場"。 金澤近海, 呢個唔駛問一定係魚市場啦, 我地都係黎睇下, 魚生飯我地都唔太岩。去日本真係好, 連街市都乾淨過人, 最岩我呢 d 超怕污糟既人, 哈哈！
1:00 pm	食 lunch 喇, 係近江町市場附近一個商場食拉麵, 味道普通。
2:00 pm	食飽飽後就到金澤遊客必到既 "兼六園", 呢度係賞櫻必到既庭園, 不過我地黎到既時候, d 櫻花都差不多凋謝了。
3:15 pm	欣賞完櫻花, 我地就走到兼六園附近的 "金澤廿一世紀美術館", 之前睇左旅遊書, 話呢個美術館全年入場人次比宮崎駿仲要多, 咁梗係以為好掂啦, 仲預留左成兩個鐘俾佢。 入到去, 分左兩個部份, 一部份係免費展館, 一部份係要另外俾錢的, 我地先睇免費展館。 可能因為我地藝術天分都不高, 好多都只係畫黎, 又唔知想表達乜, 感覺有點沉悶, 真係唔係幾識欣賞囉...... 要俾錢果個當然唔入啦...... 成個美術館, 唯一覺得有趣就是一個用玻璃做成的游泳池喇, 其實旅遊書都有介紹呢個展品, 等我仲以為呢度樣樣展品都有咁既質素, 真係失望而回喇今次......
4:00 pm	原本諗住廿一世紀美術館要行好耐, 而家多左 d 時間, 就用黎去番原本沒有時間去的 "金澤城" 和 "東茶屋街" 啦。 金澤城遊客比較少, 可能因為隔離有個名氣大咁多既 "兼六園" 吧。 我地只是在城外影相, 加上黎到北陸呢度, 氣溫已降到得番十度, 同名古屋相差成十度呀, 凍到唔想行咁耐。
5:00 pm	離開金澤城, 再駕車到 "東茶屋街", 其實這只是一條很有京都 feel 的街, 在日本很多地方也有呢！
6:00 pm	今晚會住宿係富山, 原本路途遙遠, 加上夜晚行車較危險, 理應係時候要走了, 不過我地最後都係唔好蝕, 渣車去金澤最繁榮既 "香林坊" 逛一逛。 呢度百貨公司林立, 街道繁忙, 我地架車要泊係付費停車場。 我地係呢度真係純粹逛一逛, 到此一遊, 因為我地都唔太需要 shopping。其實能夠在金澤住一晚就最好了, 咁我地就可以行耐 d 兼且係呢度食埋晚飯, 不過行程緊迫沒辦法, 明天一早要上立山黑部, 住宿富山會方便一點。
7:00 pm	起程往富山, 由於時候不早了, 最好快 d 到, 所以由阿明來駕駛。日本 d 公路係冇街燈的, 只是靠反光燈來照明, 感覺好危險。 我地起初行得好慢, 因為真係睇唔倒路架, 但係行行下發覺其他車又開得好快喎, 覺得唔係好對路, 最後我地發覺係要開高燈行, 咁就冇問題喇。 到左富山, 入埋油先到酒店。
8:15 pm	我地 book 左富山東橫 Inn, 呢度又係城市 feel, 所以地少, 連露天停車場都冇, 搵唔倒停車場喎, 唯有去 check-in 先啦......去到 check-in counter 先知, 個停車場係室內的, 仲要係人唔可以入去果隻.....駕車入左去之後就會被機器轉上去, 好似摩天輪咁架......初時有 d 阻濟, 我地泊好駕車入去, 走番出黎啦, 但係個閘冇反應, 唔識關門, 好彩後面有個日本人係度等緊泊車, 佢走黎睇一睇, 原來個 sensor detect 唔倒有人行左出黎, 佢驚入面仲有人, 所以唔會關門, 認真安全呢！
9:00 pm	好驚恐又好新奇咁泊完車, 放低行理之後, 就去搵食喇。我地去左富山 JR 火車站那面, 找了一間吃豬扒飯的。今次除了傳統那種豬扒飯外, 還點了一個免治豬扒, 出乎意料地好吃呀！
10:00 pm	我地住的東橫 Inn, 在火車站對面, 位置非常好, 岩晒自遊行既旅客。番到酒店, 整理相片, 同埋拎番大田屋送果塊白川鄉餅乾出黎食, 點知碎左, 我地將佢砌番好, 影左相先再食, 哈哈！

~Day 5~

17/4/2009 (Friday) 晴

富山東橫 Inn --> 立山黑部 --> 下呂溫泉 --> 白樺溫泉酒店

6:15 am	今天會到白川鄉以外另一重點---立山黑部, 所以六時多就起床了。今天是立山黑部開山的日子, 心情特別緊張及興奮。到 counter check-out, 順便問一問辦理國際會員證事宜, 個 staff 話有得申請, 咁即時申請埋啦, 佢仲俾左張說明我, 教我點樣拎番架車.....我填好 form 之後, 佢要 d 時間輸入資料, 咁我唔想等, 就話去拎車先, 轉頭番黎拎證, 佢話 ok, 到我後來番上去拎證時, 佢唔記得左收我錢, 哈哈......
7:00 am	七時出發, 因為早餐都未食, 途經便利店就買麵包做早餐。 大概八時左右, 我地到左立山黑部富山縣既起點, 立山站。把車泊係免費停車場, 然後就開始我地既旅程喇。
8:10 am	我地會由立山站作為起點出發, 到室堂就番轉頭, 因為自駕遊關係, 不能立山入, 扇澤走。不過咁都 ok, 因為冬天關係, 重點是雪牆和室堂最高點之 "雪之大谷", 同埋去到黑部平的話, 費用會多出一倍呢！ 我地係立山站買來回立山及室堂既車票, 先在立山站搭立山電纜車到美女平, 周圍都有不少登山滑雪的人。
	(圖片由立山黑部官方網頁提供)
8:30 am	到左美女平, 就轉搭旅遊車上室堂, 需時五十分鐘, 差不多到達時, 我地已身處雪牆之中了, 心情實在興奮到難以形容呀。
9:20 am	到達室堂時, 天氣非常之寒冷, 手都震晒, 之前冇諗過真係會咁凍, 連手套都冇帶, 心知不妙...... 今天係立山黑部全線開通, 亦即雪之大谷開放的大日子, 每年都會有開通儀式, 仲會有電視台來做訪問的, 以往看網友的 blog, 開通儀式好似係室外做的, 今日應該係天氣不太好, 所以要在室內進行。 到左十時, 可以正式出去雪之大谷的會場了, 一步出雪地, 嘩, 大鑊......冇太陽, 勁凍, 又冇手套, 仲要勁大風雪, 我都算係咁, 帶左太陽眼鏡, 不過百密一疏, 我見 d 人帶晒口罩 >.< d 風雪大到行唔倒, 因為 d 雪打落塊面度好鬼痛, 我地唯有慢慢行囉, 仲要行到隻手都僵晒, 慘...... 行左好耐, 入去室內休息一下, 拎番今朝買既一個朱古力麵包出黎食, 一食....點解硬既？原來 d 朱古力醬變左一舊硬朱古力, 呢 d 體驗你話係咪好正？
1:30 pm	淨係睇雪都睇左三個鐘, 行到又累又肚餓, 咁諗住係室堂食埋 lunch 先走, 遊客區既食物, 不過不失啦。食食下, 望下出面, 太陽出來了, 個天靚左好多, 景色都比今朝既靚好多, 咁我地又決定食完野再出去行多次, 影番 d 靚相咁, 睇黎我地去旅行都係戒唔倒呢個習慣, 經常影相影到唔願走, 不過總好過係買野買到唔願走丫, 哈哈！
2:30 pm	下一個目的地下呂溫泉都好遠, 所以真係要走了, 有點唔捨得......搭旅遊車回美女平, 再轉搭立山電纜車回立山站。
4:00 pm	回到立山站取車已是四時了, 趕快出發往下呂溫泉。溫泉區很多時都是比較偏僻的地方, 駕車去可能要行 d 山路, 都有少少危險, 加上天開始黑, 我地都好想快 d 係入黑前趕去下呂溫泉區。駕車駕左三小時, 七時左右終於到達了, 個心都定下來。駕車到我們入住的白樺酒店, 跟指示泊好車後, 就去 check-in 了。下呂溫泉最昂貴和最出名的溫泉酒店是湯之島館和水明館, 但真的太貴了, 要萬幾二萬 yen 一個人啊！我們住的白樺酒店都不錯, 房間頗大, 有點像香港新樓那種 studio 咁既樣。
7:45 pm	我地一早會預計很晚才會到達, 所以只係 book 左房, 冇 book 晚餐, 咁我地就到溫泉街一間居酒屋食野喇。 食完野慢慢行番酒店, 當散步, 沿途見到很多浸足湯的小溫泉。
9:00 pm	回到酒店, 我地 book 左個私人風呂浸溫泉, 500 yen 三十分鐘, 正！浸完溫泉我地再走出溫泉街浸埋足湯, 隻木拖鞋好難行啊！
12:30 am	浸完溫泉很舒服, 番房執好行理就休息了。

~Day 6~

18/4/2009 (Saturday) 晴

白樺溫泉酒店 --> 下呂溫泉 --> 土歧 Premium Outlets --> 名古屋．榮 --> 中部國際空港東橫 Inn

8:00 am	八時起床, 到酒店餐廳吃早餐。吃完再去浸一浸。
9:30 am	check-out 後遊覽下呂溫泉區, 先到下呂溫泉合掌村。到達後發覺入場費頗貴, 加上又係睇合掌屋, 所以決定唔入去喇, 只在外面影相。 之後到下呂朝市, 這是一個非常之細既朝市, 不過人就好多, 可能呢度既居民都在這時候出來買野吧。之後再逛下溫泉街就離開了。
11:45 am	出發往土歧 Premium Outlets, 最後一天安排到 Outlet 血拼, 目的是買 Edwin！係香港買一條 Edwin 牛仔褲要成千蚊, 係呢度買只係港幣二百幾蚊, 真係講都冇人信！
4:30 pm	今晚會再次入住機場既東橫 Inn, 入到去冇咩好食, 加上呢個 trip 其實都冇咩好野食過, 經常都是鄉土料理, 我最喜愛既拉麵同 shabu shabu 都冇得食, 所以決定到名古屋食埋晚飯先番機場。我地之前已經到過名古屋車站一帶, 今次諗住到另一繁華地 --- 榮。 原本諗住榮同金澤一樣, 實要搵付費停車場, 點知去到見到街有好多錶位, 咁泊啦, 再睇睇 d 車, 成條街都冇人入錶, 我又睇唔明 d 日文寫乜, 又好似唔駛俾錢咁, 噢.....咁唔入 lu, 快快趣食完飯走人。
6:45 pm	原本諗住食 shabu shabu, 點知呢一帶好多都係日式炭火燒肉, 咁就食燒肉啦。找了一間叫 "牛兵衛" 的炭火燒肉, 價錢唔貴, d 牛靚, 係香港根本食唔倒。 不過入面係冇 non-smoking area, 食完難免成身味喇。
8:00 pm	食完野都唔敢係度行咁耐, 因為泊左錶位, 咁就番去拎車走人喇。我地駕車番機場, 先係東橫 Inn 放低行理再去還車喇。 還車途中, 趁仲有時間, 拎個星光鏡出黎影下相先, 成個 trip 都冇機會用到...... 番東橫 Inn check-in, 同第一晚黎既一樣, 佢問我係咪聽日搭飛機走, 我話係, 咁就有 500 Yen 折扣呢！
12:00 am	執好行理, 十二點訓覺。

~Day 7~

19/4/2009 (Sunday) 晴

中部國際空港東橫 Inn --> 日本中部國際機場 --> 臺灣桃園國際機場 --> 香港

8:00 am	八時起床, 到地下大堂吃西式早餐。
9:00 am	吃完早餐便 check-out, 推著行李到機場。辦理登機手續, 搭華航真好, 個櫃位都冇人排隊, 哈哈, 我認為機票價錢還可以再便宜一點呢！
10:15 am	飛機起飛了, 我們又要同日本說再見。飛機先飛到台北, 我們再轉機回香港。正式結束七天日本中部北陸之旅！