2010 April 台灣．高雄、墾丁 4 天之旅

~ 台灣南部．高雄、墾丁四天之旅 ~

日期: 8/4/2010 - 11/4/2010

今年既復活節假期足足有 11 天咁多, 要休息之餘, 仲要諗下阿明既 birthday trip 去邊好, 喜愛日本的我們, 好自然就諗起日本喇, 但係今年既公眾假期撞正日本既櫻花期, 唔知係咪好多香港人都選擇去日本, 搞到 d 機票好鬼貴, 有個朋友話訂個 cx package (又係 cx >.<) 去大阪要成八千幾蚊 ...... >.< >.< >.< 我心諗, 唔係掛, 上年復活節去白川鄉、立山黑部成個 trip 每個人都係用左八千幾蚊咋喎, 咁貴, 唔去！

其實放假都有學校既野做, 咁去近 d 啦, 最後決定去台灣南面既高雄市同墾丁, 一於 relax 一下！立刻打去萬福 book 機票, 即時 confirm, 快靚正！由於時間比較緊迫, 好遲先 confirm 呢次既旅程, 所以要立刻仲要極速咁 plan 野, 不過應該難唔倒我, 呵呵！相對去日本, 比較麻煩的應該係 book 酒店, 因為怕香港人放飛機, 台灣多要先收錢才會幫你留房。



事前準備

準備	備註
申請台灣旅遊簽証	於網上申請, 再到香港國際機場領取, 費用 $75
購買機票	於萬福旅行社購買香港至高雄來回機票二張
訂民宿、酒店	電郵預訂墾丁民宿一晚 (於香港存入訂金) 以及於網上預訂高雄酒店二晚
購買旅遊保險	於保誠保險購買, 有八折
申請國際車牌	到運輸署申請國際車牌, 有效期為一年, 費用 $80
換台幣	於高雄國際機場換購

行程表

		住宿
Day 1	香港 --> 高雄國際機場 --> 墾丁	浪琴海渡假旅館
Day 2	墾丁 --> 高雄	城市之星商旅新崛江館
Day 3	高雄	城市之星商旅新崛江館
Day 4	高雄 --> 香港國際機場 --> 香港

~Day 1~

8/4/2010 (Thursday) 晴

香港 --> 高雄國際機場 --> 墾丁 --> 墾丁西半島 --> 民宿

8:00 am	一早起來, 搭巴士到機場, 好多人 >.< 上車時, 放行理的架已差唔多 full 晒 >.< 到左機場後, 第一步先到位於機場既中華旅行社櫃位取台證, 然後再到中華航空 check in 櫃檯前做自助 check in, 真的非常方便, 但唔知點解冇人做自助 check in, 個個都走去排隊呢！ 寄埋行理就去左美心 mx 食早餐, 時間非常充裕。
10:20 am	今次乘搭中華航空 AE 982 班機直飛高雄國際機場, 飛機準時起飛, 飛機餐還有我最喜愛既桂林辣椒醬。大約一小時, 飛機便於高雄國際機場降落了。
11:20 am	到步後, 先於機場銀行換台幣, 此時, 預約左去墾丁包車既司機已經來電, 我地就加快腳步走出接機大堂了。與我們一同坐車的, 還有兩個台灣人, 他們不是遊客, 應該是回家吧。
12:00 pm	大約中午十二時, 開始出發往墾丁。下午一時四十五分到達墾丁大灣區民宿, 我地住 "浪琴海渡假旅館", 揀呢度係貪佢近墾丁大街得黎又夠靜。
2:30 pm	係民宿休息左一陣, 就出去租車喇, 我地係墾丁大街問左好多間, 最平都要 2000 台幣 (包保險), 咁就幫襯佢啦。係墾丁旅遊, 交通比較不便, 當地人大多以電單車為主要交通工具, 遊客可以租電單車, 不過我地冇電單車牌, 亦可以包車, 不過人多會抵 d, 所以我地都係決定自己租私家車。 我地就係呢間勝利租車度問既, 不過原來問完發現, 佢只係幫另一間比較偏僻既公司代收客, 我地話租車, 個老闆就打俾另一間公司, 好快就有人黎接我地喇。基本上佢地呢間唔係公司, 因為唔會有 walk in 客.......
3:30 pm	租完車都成三點半, 為左爭取時間旅遊, 我地放棄左個 lunch, 開始墾丁西半島之旅。 行程係﹕南灣 --> 貓鼻頭 --> 白砂 --> 關山日落 --> 出火 --> 墾丁大街 --> 鵝鸞鼻燈塔夜遊
	渣車到第一個景點 --- 南灣。其實南灣只是一個海灘而已, 我地又冇打算遊水, 所以只是影下相咁。
4:30 pm	之後到貓鼻頭公園, 這個景點比較大, 遊客都比較多, 因為未食 lunch 既關係, 好肚餓, 係呢度買左串花枝丸頂肚。
5:30 pm	之後到白砂, 又係海灘, 亦是海角七號景點之一。
5:55 pm	差唔多六點, 諗住去關山睇日落, 但因天氣唔好, 冇得睇 >.<
6:20 pm	之後到出火特別景觀區, 出火位於恆春鎮東門外，原為鑿井時挖至墾丁泥岩層，意外發現有天然氣自然冒出，經點火後至今不熄，蔚為奇觀；後經完整規劃出停車場、步道區，並將出火區域以岩石圍成圓形，成為「出火特別景觀區」。 呢度除左睇火之外, 亦有人放煙花, 我地就冇放, 不過睇人放都好開心咁。
7:30 pm	離開出火特別景觀區, 我地先渣車回民宿, 泊低架車, 再步行到墾丁大街掃街喇。成日冇食過野, 好鬼肚餓。掃左大熱狗、炸魷魚、燒雞翼同炸雞排, 好好味但好鬼熱氣, 之後仲病埋 tim >.< 唔知關唔關 d 野食事呢！我地一路行一路食, 唔經唔覺都行左成個半鐘。
9:25 pm	食飽飽後都九點半, 應該都係時候番民宿休息, 但一向用盡所有時間去盡各景點的我們, 當然未打算回去啦, 我地還打算夜遊鵝鸞鼻燈塔。 渣車好快就到左位於墾丁東半島既鵝鸞鼻, 不過我地搵左好耐都搵唔到個燈塔, 應該咁講, 個燈塔係位於鵝鸞鼻公園入面既, 我地架車行左好耐都搵唔倒一個位係可以見到個燈塔囉, 唉, 失敗而回......
9:55 pm	番到民宿門口, 見到 d 民宿著晒燈好靚呀, set 番個腳架影番幾張靚相先！
10:15 pm	回民宿洗澡, 然後浸一浸按摩浴, 整理相片, 上網。
12:00 am	睡覺了。

~Day 2~

9/4/2010 (Friday) 晴

民宿 --> 墾丁東半島 --> 國立海洋生物博物館 --> 高雄 --> 瑞豐夜市 --> 新堀江商圈 / 原宿玉竹商圈 --> 酒店

8:30 am	第二天八點半起床, 先欣賞下露台外既景色先。
9:30 am	民宿隔離有一間快餐店, 我地就過左隔離食早餐, 都幾好味, 仲有港式咖啡奶茶飲 tim。
10:00 am	食完野開始今天既墾丁東半島之旅, 完成後還會到國立海洋生物博物館。 行程係﹕船帆石 --> 貝殼砂展示館 --> 鵝鸞鼻公園/燈塔 --> 最南點 --> 龍磐草原 --> 風吹砂 --> 國立海洋生物博物館
	第一站先到船帆石, 今日既天氣比昨天好好多, 不過就好鬼曬。
10:40 am	然後到貝殼砂展示館, 只是一個很少的展覽館黎。
10:50 am	睇完貝殼, 驅車往鵝鸞鼻公園, 入場費台幣四十元。呢個景點比較大, 連埋睇燈塔同影相, 都逗留左一個鐘。
11:50 am	離開鵝鸞鼻公園, 到下一個景點 "最南點", 最南點既意思係呢度位於台灣既最南端, 其實最南點冇乜野睇, 只是有一舊石頭而已。
12:25 pm	因為時間緊迫, 趕快渣車去下一景點 --- 龍磐草原。龍磐草原係觀看日出同夜晚觀星既好地方, 原本琴晚就係諗住黎呢度觀星的, 不過天氣唔好, 日落都冇得睇, 更何況係星星呢！我地都係落車影幾張相, 就離開去下一個景點 --- 風吹砂。
12:30 pm	風吹砂, 即係成地都係沙咁解？
1:15 pm	完成墾丁東半島之旅, 最後驅車前往離墾丁較遠既 "國立海洋生物博物館"。 入場費台幣 450 元, 學生台幣 250 元, 睇入場費唔平都知入面應該幾大幾多野睇。
3:15 pm	參觀完海生館, 回墾丁大街還車, 然後趕快去 kfc 食野, 因為預約左車去高雄。食完野, 回民宿取行理, 我地約左包車司機係民宿等既, 但係番到去, 都唔見有車係度, 時間都差不多啦, 唯有等......等左十五分鐘都冇車黎, 咁叫民宿主人幫我地打電話去問下, 點知個中介人話可能司機唔記得左, 勁嬲 >.< 佢話即刻幫我地搵過第二個司機...唉, 又要等......
4:20 pm	終於有車黎啦, 去接埋其他乘客, 差不多四點半左右就離開墾丁了。 沿途司機開得好快, 台灣 d 司機一向都開得很快的, 不過同大陸比, 都係大陸恐怖 d 呢！另外想提一提, 高雄 d 人都幾 nice, 尤其 d 的士司機, 很多都很友善, 很喜歡同人傾計。
6:30 pm	六點半直達康橋商旅城市之星高雄新崛江館, 酒店很新, 房子乾淨, 有點像日本既東橫 inn。 最欣賞的是浴室, 浴缸的線條設計很特別呢！
7:30 pm	於酒店休息一會, 就出發到捷運巨蛋站附近既瑞豐夜市。先從酒店附近既中央公園站搭捷運到巨蛋站，中央公園站內有很多花花, 好靚！ 瑞豐夜市係一個高雄既地道夜市, 呢晚去到超多人, 寸步難行, 大部份都是高雄人, 遊客不多, 呢度賣既野食都係高雄地道野食為主, 冇香港人喜愛既豪大大雞扒、鹽穌雞等等...我地幫襯左一檔鐵板牛扒麵, 塊扒食落好似香港花園餐廳果 d 咁樣。
8:30 pm	行左一個鐘左右, 搭捷運返回中央公園站, 逛逛酒店附近既新堀江商圈 / 原宿玉竹商圈。
10:00 pm	回酒店洗澡休息。
12:00 am	睡覺了。

~Day 3~

10/4/2010 (Saturday) 晴

酒店 --> 夢時代購物中心 --> 旗津 --> 西子灣 --> 六合夜市 --> 老四川麻辣火鍋 --> 愛河 --> 酒店

9:45 am	雖然唔係大酒店, 但呢間商務酒店都有簡單早餐供應, 味道都唔錯。
10:30 am	食飽飽後, 第一站會先到夢時代購物中心坐一坐 hello kitty 摩天輪。 先搭捷運到凱旋站, 再搭免費接駁巴士到 Dream Mall。
10:55 am	十一點未夠就到左夢時代購物中心, 有 d 舖頭仲未開, 人流唔多, 冷清清咁......查實我地唔鍾意 shopping, 行行下又走左入去誠品, 呢間誠品好大, 環境又好好, 俾我係度睇書睇足一日都得呀。逛多一陣, 就走左上去頂層坐摩天輪, 因為冇人排隊, 我地就排透明車廂, 成個摩天輪得兩個透明車廂, 如果多人排隊時就要等好耐的。坐完摩天輪我地就走喇, 下一站會去旗津。 坐免費接駁巴士返回凱旋站, 然後再搭捷運到西子灣站。
12:30 pm	離開西子灣站, 步行到鼓山輪渡站, 再坐船到旗津。天氣非常好, 氣溫仲好高 tim。
12:45 pm	一落船, 有好多人會叫你租電單車或單車, 因為旗津都幾大, 而且天氣很熱, 我地冇租單車, 行到想死。
1:30 pm	經過一條海鮮街, 選了一間酒家食 lunch, 點了幾個菜, 有炒硯、炸蝦餅、炒豬肉同炒菜。味道唔係話超好食, 不過價錢就好平。
2:30 pm	食完飯繼續行, 但氣溫實在太高, 而且太陽就在頭頂, 好鬼熱。行到炮台同燈塔分叉口, 我地二選一, 選左去炮台。 之後再到沙灘走走, 買左一串烤魷魚食, 好惹味......不過賣魷魚果個人就好辛苦咁, 熱死呢！
4:40 pm	走回旗津輪渡站, 搭船回鼓山輪渡站, 然後出發往西子灣睇日落。最初以為好快就到, 點知行左成半個鐘都未到, 途經國立中山大學, 好靚, 令我回想起讀大學時既日子, 實在好懷念。差不多五點半, 終於到了, 找一個好位置坐下, 一邊休息一邊看日落和影相。
6:30 pm	睇完好靚既日落, 又要步行回西子灣捷運站。我地 book 左位今晚會去食麻辣火鍋 (每次到台灣都必定要去食), 但係去食火鍋之前, 要先到六合夜市逛一逛先。六合夜市係一個專門供遊客參觀既夜市, 賣既食物都比較岩香港人口味, 琴晚到左瑞豐夜市, 聽日就要離開台灣, 所以今晚一定要逛一逛六合夜市, 然後再去食火鍋。搭捷運到美麗島站, 六合夜市就在捷運站出口。
6:50 pm	呢度果然比瑞豐夜市多遊客, 雖然我地要留肚, 但都想趁呢個機會試一試台南擔仔麵。另外仲叫左一碟豬腸, 不過......
7:45 pm	逛完六合夜市, 搭的士到這間很出名的 "老四川" 麻辣火鍋館, 去到果然有很多人在等位, 我地都要等一陣先可以入座。我地叫了麻辣及清湯湯底, 麻辣湯底內有很多鴨血, 食完可以再加的, 而清湯湯底亦真材實料, 有人蔘, 所以諗諗下, 呢個應該唔係清湯, 不過唔記得叫咩...... 另外叫了安格斯牛、豬、手打丸，另外要特別一提的是這裡的招牌菜 "大腸頭", 即是豬腸啦, 超級好食, 這是我食過最好味既豬腸, 與六合夜市那些比較, 真是冇得比！ 由湯底到食材, 樣樣都非常好, 但價錢又比香港的平很多, 無得頂呀！另外想提一提的是, 最後居然有甜筒送俾你食, 你話呢 d service 去邊度搵！
10:00 pm	食完野都差不多十點, 我地都仲未夠, 因為明天就要離開高雄, 我地想去埋愛河睇夜景, 於是搭的士前往。
10:30 pm	有時我都幾佩服我地自已, 明明已經好累, 但又好想去好多地方, 好似我地咁樣去旅行, 可能比番工更加辛苦, 但我地又好享受呢！
12:00 am	休息了。

~Day 4~

11/4/2010 (Sunday) 晴

酒店 --> 三多商圈 --> 新堀江商圈 / 原宿玉竹商圈 --> 高雄國際機場 --> 香港

9:30 am	琴日去左太多地方, 今天訓晏一點, 九點半於酒店餐廳吃早餐。今日係最後一天行程, 唔想咁辛苦, 只是計劃到三多商圈逛街, 所以食完早餐再回房間休息一下, 執拾行理再出動。
11:20 am	把行理寄存在酒店, 然後搭的士到三多商圈。三多商圈其實是一個百貨公司群, 這裡有大丸百貨、sogo 和三越百貨。途中經過售賣曾經很流行既 "吊鐘燒" 舖頭, 試左奶油吊鐘燒, 好好味。
1:30 pm	到 food court 食鄧師傅既牛肉麵, 味道普通。
2:50 pm	食完野繼續周圍逛, 行經藥行, 買左 d 感冒藥, 然後再去試一試這個似叮噹豆沙餅既 "銅鑼燒", 一個內附紅豆既豆沙餅, 都好好味。
3:15 pm	由三多商圈一帶步行回酒店附近, 再逛一逛新堀江商圈 / 原宿玉竹商圈, 可能是星期日, 這裡好似旺角咁多人。
4:00 pm	回酒店取行理, 搭捷運到高雄國際機場。
7:25 pm	大約七點半, 飛機起飛了, 只需一小時, 我地就回到香港, 完成高雄墾丁四天之旅。