~新加坡聖誕悠閒之旅四天遊~
日期: 25/12/2014 - 28/12/2014
今年既聖誕節有幾日假期, 打算請媽咪去個短 trip, 主要都係行下街食下野咁啦... 俾左幾個地方媽咪揀, 都係 D 近近地既東南亞地方, 有台灣、新加坡、韓國咁啦... 最後媽咪話想去新加坡, 雖然都幾貴, 不過我又未去過喎, 咁就一於同媽咪加埋阿妹去一轉新加坡啦!回想起來, 自已去旅行就去得多, 同屋企人去旅行竟然係第一次 (大陸澳門唔算的話), 由買機票、訂酒店、plan 行程, 以至當地既領隊工作, 都係由我一手包辦, 真係仲辛苦過自已一個人去呢!不過去完番黎, 屋企人對我安排既酒店同行程都非常滿意, 雖然駛左唔少錢, 但最緊要大家玩得開心!
由於同屋企人同行, 行程方面都盡量簡單, 每日安排既景點都唔太多, 以免屋企人辛苦。觀光方面主要係 D 必去景點, 好似魚尾獅公園 (Merlion Park)、新加坡摩天輪 (Singapore Flyer)、濱海灣金沙 (Marina Bay Sands) 等等。中間兩日就分別去左環球影城 (Universal Studios) 同馬來西亞既 Legoland, 唔好以為老人家唔岩玩, 我媽咪都唔知幾鍾意去呢 D 主題樂園, 哈哈!買野方面就帶屋企人去牛車水買手信... 咩林志源、胡振隆、馮滿記、斑蘭蛋糕... 買左好鬼多野囉... 除左玩之外, 仲有梗係唔少得試盡當地既美食啦, 有老巴剎既沙嗲串燒、排成半個鐘先食到既天天海南雞飯、阿坤咖央多士, 仲有必吃既肉骨茶、魚丸麵等等... 真係食足咁多日, 好滿足!
最初決定同屋企人去旅行既時候, 原本想跟團既, 一黎係我懶啦, 唔想 plan 行程, 二黎係怕屋企人行得多路辛苦... 但係屋企人又話想自由行喎, 梗係啦, 又唔駛佢地 plan 野... 幸好新加坡係一個好先進既國家, 交通方便, 大部份既地方只需搭地鐵就可以去到, 就算唔識路都可以問下人, 新加坡人英文水平高, 又好 nice 架, 所以自由行都好鬼容易。唯一有點美中不足既就係天氣, 我地去左四日, 中間兩日都落雨, 仲要係環球影城玩緊架嘛, 真係落住雨睇 WaterWorld, 夠哂應景!總結整個旅程, 媽咪同阿妹都玩得好開心, 食左好多美食, 買左好多手信, 仲問我下次幾時再一齊去旅行, 哈哈... 好啦, 等我儲下彈藥先...!