[2014 新加坡] Day 1 魚尾獅既熱辣辣聖誕節

2014年12月25日星期四

[2014 新加坡] Day 1 魚尾獅既熱辣辣聖誕節

~Day 1~
25/12/2014 (Thursday) 香港 --- 晴, 新加坡 --- 晴

香港 --> 樟宜國際機場 --> 濱海藝術中心 (Esplanade) --> 魚尾獅公園 (Merlion Park) --> 老巴殺 (Lau Pa Sat) --> 烏節大酒店

8:30 am

出發喇, 一家人既聖誕之旅終於出發喇, 係度祝大家聖誕節快樂先... 媽咪晨咁早起左身, 好驚遲左上唔倒機咁喎... 三個人連埋行理, 搭的士去機場啦... 嘩, 個司機唔知係咪趕下場, 好快就到左機場...

走去老虎航空個 counter, 唔多覺有 check in 人龍既, 問下 d 職員, 原來 check in counter 仲未開 >.< 自已去旅行多數都係驚趕唔切 check in 既姐, 你話早到連 check in counter 都未開就真係第一次 :p... 反正都要等, 去 pacific coffee 嘆杯咖啡先...

9:00 am

到左 9:00 am 就去 check in, 由於唔駛寄行理, 好快就搞掂, 入閘喇...

9:50 am

見仲有時間, 同屋企人分道揚鑣, 我自已去左 Lounge 食早餐, 之後係候機大堂集合。

10:55 am

TR 2063 飛往新加坡既航班準時起飛... 因為正值聖誕假期既關係, 呢日出發既機票都比較貴, 所以揀左新加坡既廉航 Tiger Airways... 雖然話係廉航, 除左寄行理同飛機餐要另外俾錢先有之外, 我覺得 Tiger Airways 都唔錯呀... 座位舒適, D 空姐服務都好好, 不愧為新加坡既航空公司 :p

3:00 pm

大約四個鐘就到左新加坡既樟宜機場, 呢個機場好大, 有三個 terminal, 我地係 T2 落機... 由於廉航冇飛機餐食, 所以落機時大家都好肚餓, 我地決定先去 T3 搵食再出市區。

3:20 pm

我地原本想食阿坤既, 但係搵黎搵去都搵唔倒, 最後黎左呢間 Kaffe & Toast, 叫左新加坡必食既咖央多士同喇沙米線, 唔知係咪太肚餓, 真係覺得超好食！！

4:00 pm

食完野就準備出市區, 如常咁去入境啦... 去到入境 counter, 個關員睇下本 passport, 左睇右睇, 跟住話你唔係 T3 落機喎, 你要去番 T2 呀... 我心諗, 唔係 T3 落機唔可以係 T3 入境架咩？咁我唯有問佢, 我地黎左呢面食野, 可唔可以係呢度入境？果個關員又好似唔話得事咁, 佢又問下隔離果個同事... 之後佢問我有冇寄倉行理, 我話冇, 咁佢就俾我地過喇... 後來我係度諗, 應該好少人會冇寄倉行理, 亦都好少人一落機會係機場食野既, 所以應該好少人會好似我地咁係 T2 落機但就走左去 T3 入境... 咁其實佢唔俾我地係 T3 入境, 係擔心我地拎唔番自已 D 行理定因為其他保安問題呢？

4:15 pm

搭的士去烏節路既酒店。

4:40 pm

話咁快就到左酒店喇, 我 book 左位於烏節路既 Orchard Hotel Singapore, 貪呢度夠旺, 夜晚番黎有夜街行下, 交通又方便...

5:15 pm

放低行理休息左一陣, 就出發去新加坡地標﹕魚尾獅公園...

首先行番出烏節路去搭地鐵 MRT...

為左方便屋企人, 唔駛次次都要排隊買飛, 我地買左新加坡既八達通 EZ-Link Card... 買完就搭地鐵去 City Hall 站。

6:00pm

一出地鐵站就係聖安德烈教堂 (St Andrew's Cathedral), 今日唔知係有 event 定聖誕節休息, 冇得入去參觀...

6:25 pm

慢慢走到濱海藝術中心 (Esplanade)...

6:40 pm

新加坡必到既景點﹕魚尾獅公園 (Merlion Park)...

望過對面就會見到濱海灣金沙娛樂城 (Marina Bay Sands)...

7:15 pm

影完魚尾獅既日景, 本身諗住先去老巴殺食飯, 再番黎睇光影水幕表演, 順便影埋魚尾獅既夜景既... 但係跟住地圖行, 行左好耐都搵唔倒, 於是索性走番轉頭, 睇埋水幕表演先食飯...

8:30 pm

睇完一個同維港幻彩詠香江差唔多既光影水幕表演 (Wonder Full) 就去老巴殺食飯, 由於之前行過搵唔倒路, 又帶住媽媽既關係, 我都係決定搭的士去... 上到車話要去老巴殺, 個的士司機話好近架咋, 我話之前行過搵唔倒呀, 唔想媽媽再行所以搭車啦... 佢又問我地邊度黎... 估唔倒新加坡既的士司機同台灣既一樣都係咁好傾...

真係話咁快就到左老巴殺 (Lau Pa Sat)... 新加坡呢度有好多大大小小既熟食中心, 老巴殺係其中一個。老巴殺於 1894 年, 座落於商業區中心 Raffles Place 外, 係東南亞現存最大既維多利亞時期古老建築, 最初只是個菜市場, 現改建為熟食中心, 有過百間售賣各式各樣地道小吃如炒粿條、沙嗲串燒、辣椒螃蟹等既攤檔。我地叫左喇沙米線、沙嗲串燒同一個菜, 好好味, 不過呢餐都唔平！