[2016 台北．馬拉松] Day 1 人氣帝皇蟹吃到飽 + 5星級喜來登牛肉麵

~Day 1~
22/1/2016 (Friday) 香港 --- 晴, 台北 --- 雨, 寒冷

香港 --> 桃園國際機場 --> 帝皇蟹火鍋 ＠ 品火鍋 --> 信義區 --> 台灣牛肉麵 ＠ 喜來登大飯店 --> Sheraton Grand Taipei Hotel

10:00 am

剛完成左香港既渣打全馬, 休息左一個星期, 其實體力仲未完全恢復, 今日又要出發去台北, 準備出戰星期日既渣打半馬喇...

今次搭長榮航空, check in 後去食早餐...

11:55 am

BR 852 航班準時起飛...

第一次搭長榮, 服務與飛機餐都不錯...

1:15 pm
去台北機程真係同新界出九龍既車程差唔多, 食完個飛機餐, 套戲睇左半個鐘都冇就要準備落機...

到左桃園國際機場, 見到個好得意既郵筒...

2:00 pm
搭國光客運出台北車站... 去到火車站落起雨上黎, 我地決定轉搭的士到酒店。

3:10 pm
呢兩晚入住既台北喜來登大飯店 (Sheraton Grand Taipei Hotel), 雖然位置不在台北車站, 但交通尚算方便, 從台北車站轉搭捷運到善導寺站或直接搭的士就可直達。

3:45 pm
放低行理後, 時間都唔早, 即刻展開呢個渣馬美食之旅。第一餐係人氣帝皇蟹火鍋...

又凍又餓, 由酒店搭的士去到位於新生北路既 "品火鍋"... 品火鍋主打帝皇蟹吃到飽, 即係任食唔嬲, 時限兩小時, 但包你吃到飽... 品火鍋提供品質上乘既食材, 飽滿鮮甜既蟹腳, 仲有活跳蝦、干貝、蛤蜊、魷魚等等... 除左海鮮, 仲有新鮮美國安格斯牛肉... 除左火鍋配料, 仲可以任食壽司, 而刺身則限定每人一客... 以食物既質素來說, 每人 TWD1280 即大約港幣三百蚊既價錢真係好抵食... 講到咁抵咁好食就梗係好多人架啦, 如果大家係假日或者夜晚去, 建議先訂位比較好...

<<品火鍋 ShabuShabu Nabe>>
地址﹕台北市新生北路一段152號
營業時間﹕15:00-01:00 (Mon-Fri), 11:30-01:00 (Sat-Sun)
電話﹕02-2541-1563

台灣人既服務總係比較體貼, 一坐低就自動端上蔬菜、海鮮同牛肉各一盤, 仲幫你將蔬菜放落火鍋之中... 食完就自已再叫, 除左甜蝦帶子刺身 >.<...

好大隻既蟹腳啊...

經過熬煮之後, 帝皇蟹同大蝦既肉汁都溶入到火鍋之中... 係咁寒冷既天氣底下, 食完真係好溫暖好滿足呀！

5:45 pm
食完個暖笠笠既蟹火鍋, 就到新光三越領取跑手包... 去到唔覺有報到處, 拎番張 confirmation email 出黎睇睇, 大鑊... 原來報到時間係朝九晚五, 已經收左檔啦 >.< 既然都黎到, 就係附近既信義區逛逛街... 因為仲落緊雨, 都係行下商場同誠品...

8:30 pm
行到咁上下就返回酒店食牛肉麵...

大家可能會好奇怪, 台灣牛肉麵就梗係食林東芳或永康架啦, 再唔係都去西門町或夜市啦... 大家唔駛奇怪, 話明美食之旅, 介紹得俾大家既就梗係好野啦... 呢碗喜來登牛肉麵係喜來登大飯店一樓 "大廳酒吧 (The Lounge)" 內既主廚推介, 一碗賣上 TWD550, 即係港紙成舊水, 但仍然係有不少客人慕名而來... 呢晚黎到, 果然座無虛席, 職員話冇哂 table, 得番梳化位, 我地見時間都唔早, 是但啦...

呢碗喜來登牛肉麵選用冷藏既美國牛腹部肋條肉、黃牛肉牛筋, 肉同筋既分布均勻, 口感韌度做得非常好... 而湯底係用牛大骨加上雞骨搭配秘方熬煮12小時而成, 濃郁香甜... 牛肉麵端上時還附上三樣小菜, 分別係涼拌小黃瓜、酸菜同溏心蛋... 另外再點多一個生果盤...

呢麵牛肉麵雖然係貴左啲, 但就好似 Chatterbox 既海南雞飯一樣, 絕對係物有所值, 推介！

10:00 pm
食飽就返回酒店拉下筋, 早點休息！