[2016 台北．馬拉松] Day 3 體感溫度 0℃．台北渣打公益馬拉松

2016年1月24日星期日

[2016 台北．馬拉松] Day 3 體感溫度 0℃．台北渣打公益馬拉松

~Day 3~

24/1/2016 (Sunday) 大雨、嚴寒

酒店 --> 台北渣打公益馬拉松 --> lunch buffet @ 喜來登大飯店 --> 桃園國際機場 --> 香港

4:30 am
終於到左路跑日 (黎到台灣講得國語多，馬拉松都變左路跑 :p)... 天未光就起身，望出窗外，落緊雨，再睇下天氣報告，噢 MY GOD，台北氣溫得3度...

換好衫準備出發，一踏出酒店，嘩，真係好鬼凍呀... 仲要落住雨... 唔理得咁多，搭的士到比賽起跑點：總統府前廣場。

到左起點見到好多著住雨衣既跑手，雖然好凍，好唔想脫外套長褲，但都要去寄存行理，然後就熱身等出發... 由於寄存行理要在 5:00 am 前完成，所以仲要等多半個鐘至開始跑... 照理半個鐘就唔係多，拉下筋應該好快過，最慘係呢個時候仲要落住雨，兼且係越落越大... 加上氣溫超低，呢半個鐘真係好漫長... 比賽過後蘋果新聞亦有報導，指當日遇到百年難得既寒流，氣溫低至攝氏2度，係呢個咁惡劣既天氣情況底下，未起跑個人都凍到疆左喇，心諗究竟可唔可以跑得完呢 >.<
（因為冇帶電話，以下既相片借用網友既）

就係等起跑既呢個時間，等我又簡單介紹一下呢個賽事啦。台北渣打公益馬拉松 (Standard Chartered Taipei Charity Marathon 2016) 由中華民國路跑協會主辦，台北市政府體育局協辦，為全球十個渣打馬拉松其中之一，今年已是第三屆。賽事分全馬、半馬、十公里同三公里。我今次報左半馬，係我第三隻半馬。

全馬同半馬賽事同樣於 5:30 am 起步，起點在總統府前廣場，終點在大佳河濱公園。

5:30
呢場賽事沒有分組，想做個靚啲既時間就一早去霸頭位啦... 起跑前一直落雨，都未跑但對鞋已差不多濕透，身體又開始僵硬，真係折磨死人啦... 每個等出發既跑手都盡量郁動自已既身體，以免身體溫度下降...

睇下等起跑既情景，可能同呢股寒流一樣，都係百年一遇 >.<...

終於等到出發時間，此時乜都唔理係咁跑，心裡只想快啲跑到終點，因為真係凍到震呀 >.< 好努力咁向前跑，一路跑一路被雨係咁淋，啲風又係咁吹埋塊面度，跑到自已都好似冇咩知覺咁，想用力跑快啲又唔得，對腳啲肌肉好似已不受控制... 望住路牌，見到淨番幾公里時，係咁叫自已繼續努力，到左影相位，原本想證明自已有幾咁努力，打算做個 V 字手勢影番張靚相既，點知係呢個時候發覺原來隻手亦都凍到僵哂，做唔倒 V 字＠＠＠＠＠

望見終點拱門時，真係好想快啲衝過去，但對腳真係唔係咁受控制，哈哈。。。最後以2小時20分既成績完成呢個台北渣打馬拉松，成績比之前澳洲同新加坡既半馬差，但卻係最令人驕傲既一場賽事。由於天氣惡劣，同上星期香港既渣馬一樣，呢次賽事既缺跑率非常高。正常咁既天氣，應該係被窩度，工都唔想番啦，就連 FB 都被人洗版，香港既朋友個個凍到嗌哂救命，但係我都竟然可以無懼嚴寒，係接近零度既天氣底下完成呢個比賽，少啲意志力都會失敗... 你問呢啲意志力邊度黎既呢？我都唔知，哈哈。。。我只知我又賺了一個奇妙既旅程，為我既人生增添多一份色彩。

慢慢向前行，從工作人員手中領取完賽獎牌，未有心情欣賞佢住，因為呢個時候有另一樣比呢個咁辛苦先得到既獎牌更重要，就係前面大會準備俾跑手既薑母茶... 係超級寒流下跑左成兩個幾鐘，真係要飲番杯薑母茶，暖一暖個胃，免得凍親...

飲完薑茶再向前走，再有工作人員派發完賽福袋，內有水、香蕉、麵包同毛巾，最後就係物資領取區，搵番自已寄物資果架車就可以拎番自已既行理。由於身體係跑完個半馬之後仲僵硬過未跑，所以要換番啲衫同長褲都搞左好耐，之後只想快啲番酒店沖個熱水涼，因為仲係好凍 >.<

搭大會安排既接駁車到捷運圓山站，到左圓山站即刻轉的士番酒店。

9:00 am
番到酒店先到 kitchen 12 book 定位等陣食 buffet... 然後就番房沖個熱水涼...

慢慢開始回氣，身體有番知覺，哈哈，終於得閒欣賞下呢面完賽獎牌喇...