2016 Oct 日本．大阪馬拉松 3 天之旅 － 行程規劃

みんなでかける虹　

攜手共同架起彩虹,精選七大慈善主題

大阪マラソン2016

~日本．大阪馬拉松 3 天之旅~

日期: 28/10/2016 - 30/10/2016

係年頭2月同3月分別跑過京都全馬同名古屋半馬之後, 真係愛上左日本既馬拉松比賽。日本人既熱情, 大會體貼既安排, 完美既賽道, 好多好多野都好吸引, 所以同朋友係4月時又上網報名參加10月舉行既大阪馬拉松。大阪馬可說是繼東京之後, 日本第二大既馬拉松比賽, 參加人數雖然一定冇東京馬咁多, 但都唔係咁易抽呢！最後好幸運地, 我成功抽到參賽名額, 但朋友就抽唔中... 由於大阪馬拉松都算係日本既大型賽事, 所以就算得我自已一個, 我都決定會去跑... 不過大阪已去過多次, 玩就唔需要喇 (講係咁講, 但我都唔會放過去探索呢個世界既好機會, 最後都去左志賀一趟睇紅葉, 哈哈...), 所以又黎個快閃3天跑馬之旅！

當收到大會通知成功抽到跑馬資格之後, 就好興奮咁上網睇定啲機票酒店 (真係唔知係去日本興奮定有得跑馬拉松興奮, 哈哈！)... 由於只去三天, 星期五出發, 星期日係比賽日, 跑完當晚回港, 不過有樣野要留意, 日本唔同台北或者新加坡, 市區同機場既距離比較遠, 如果想即晚走, 要好好咁計算一下, 跑完夠唔夠時間趕飛機... 最後買了國泰航空香港至大阪來回既機票同上網 book 了兩晚難波既酒店。搞掂機票同酒店之後, 基本上就可以安心練跑等出發喇！

係 2016 年結束之前黎一個總結, 大阪馬拉松係我第四隻全馬, 依次係香港既渣馬, 之後既京都馬, 莫斯科馬同今次既大阪馬。香港同京都馬既成績相若 (5:22), 莫斯科馬狀態不佳退步, 今次既大阪馬盡左努力, 係良好既天氣狀況底下, 一雪前恥, 最後以 5:21 既成績完走, 比京都馬快了 44 秒, 成功 PB 了, yeah! 大家唔好笑我, 對於我呢啲體能咁差既人黎講, 跑完已經好勁架喇, 仲要快左 44 秒咁多, 真係好叻叻架喇, 真係要自我獎勵一番, 哈哈！雖然成績冇咩大突破, 但黎緊我會繼續努力, 挑戰自己, 期待 2017 年既跑馬之旅！

事前準備

準備	備註
馬拉松比賽	網上報名(全馬), 中籤後付報名費
申請日本旅遊簽証	免簽証
購買機票	購買國泰航空 (Cathay Pacific Airways) 香港至大阪來回機票一張
訂酒店	於網上預約
購買旅遊保險	於美亞保險香港有限公司購買旅遊保險

行程表

		住宿
Day 1	香港 --> 關西國際機場 --> Toyoko-inn 大阪なんば日本橋	Toyoko-inn 大阪なんば日本橋
Day 2	酒店 --> (滋賀縣) 志賀 --> 琵琶湖 バレイ --> インテックス大阪 (Intex Osaka) (領取選手包) --> 難波 --> Toyoko-inn 大阪なんば日本橋	Toyoko-inn 大阪なんば日本橋
Day 3	酒店 --> 大阪馬拉松 2016 (Osaka Marathon 2016) --> 關西國際機場 --> 香港

整個旅程所需費用 (一人計)

快閃馬拉松之旅，因為今次坐國泰, 主要費用花在機票上, 其他花費本身唔多, 但我買左條日本跑步 tight, 所以成本高左 :p！

機票、酒店、交通	約 $4800
食	約 $300
手信	約 $1700
娛樂	約 $1400
其他	約 $150
總計	約 $8500

如果想知大阪馬拉松既實況就繼續睇落去啦，仲有相睇架。。。