2019 Nov 日本．富士山馬拉松 3 天之旅 － 行程規劃

~日本．富士山馬拉松 3 天之旅~

日期: 23/11/2019 - 25/11/2019

事隔一年, 繼上年既六大馬芝加哥馬拉松後, 出戰第十五隻全馬。還記得一年前, 原本狀態大勇, 希望芝馬可以 pb 而加強訓練, 點知就在出發前一個月腳傷了... 腳傷既成事實, 最後慢跑順利完成, 但之後就足足停賽了整整一年既時間, 先後放棄了神戶馬、渣馬同長野馬... 今年中見腳傷漸好, 希望在年尾可以跑番, 睇下啲賽事, 原本想報番上年放棄左既神戶馬, 但最後俾富士山既美景同富士山馬個完成獎牌吸引左, 加上富士山天氣凍啲較適合我, 最後就決定報富士山馬拉松。

同之前跑東京馬一樣啦, 唔駛特登 stay behind 玩, 又可以快閃, 不過富士山距離東京機場係遠左啲, 即日走係冇可能, 所以就決定星期五晚出發, 星期一番, 快閃3天！其實5月時已睇機票, 可能撞正紅葉期, 機票都不便宜, 咁我就用埋 HK Express 儲落既積分, 最後以差不多半價既價錢買了一張香港至東京既來回機票, 抵！買左機票就睇酒店喇, 由於去富士山, 不論係跑馬定係睇紅葉, 都係住河口湖一帶, 加上啲住宿應該俾富士山馬拉松大會 hold 起哂, 所以前一晚只能 book 到一間較遠但冇特別加價既酒店... 酒店距離起點大約 2 km, 步行到起點約20-30分鐘, 都可以接受啦... 跑完打算即晚回東京, 翌日就回港！

後記
富士山馬拉松於每年十一月舉行, 正值係河口湖既紅葉期, 所以跑富士山馬可以順道欣賞埋河口湖紅葉既美景。今次係第十五隻全馬, 上面都提到, 之前腳傷抖左一年, 自已知道心肺大不如前, 今次都唔期望有咩成績, 只係諗住邊欣賞河口湖同西湖既景色邊享受跑步既樂趣... 除左自已既身體狀況之外, 其實仲有好多因素會影響到跑時既表現... 好似天氣就係其中一個非常重要既因素, 跑馬前一天到達河口湖整天都落雨, 心裡面不禁有點擔心... 直至第二天醒來, 望出酒店外仍是下著雨 >.< 幸好接近起跑時雨收細了 ^.^ 不過雨停了, 但氣溫卻比前一天上升了很多, 跑到一半已成身大汗了... 天氣熱對我來說真是一大障礙, 加上到了大約 20K 時有一段接近 1K 既長命斜, 真係幾有挑戰性... 心裡面一直叫自已努力, 一路跑左腳底冇痛, 但都唔敢亂黎, 同自已講要無傷完賽, 之後還有很多時間練番起既... 最後望住大會既里數標示牌 1K 1K 咁捱下去 (其實半馬後係半行半跑), 最後以 PW 既成績完成左第十五隻全馬, 一直很想要既富士山馬拉松完成牌亦到手了！雖然成績係強差人意, 但非常感恩既係跑完翌日行路係完全冇痛, 想起至少可以繼續跑步就心滿意足了！總括黎講, 除左交通較麻煩, 我覺得富士山馬拉松賽道漂亮, 是十分值得推薦的！

➪ 相片集

事前準備

準備	備註
馬拉松比賽	網上申請全馬慈善名額並付報名費
申請日本旅遊簽証	免簽証
購買機票	購買香港快運航空 (HK Express) 香港至東京來回機票一張
訂酒店	於網上預約
購買高速巴士票	購買東京駅至河口湖及河口湖至新宿高速巴士票各一張
購買旅遊保險	於美亞保險香港有限公司購買全年旅遊保險

行程表

		住宿
Day 1	香港 --> 羽田國際空港 --> 河口湖 --> 梨川もみじ回廊 (河口湖紅葉まつり) --> 平浜駐車場 (領取選手包) --> 酒店	ビジネス＆リゾート 登り坂ホテル
Day 2	酒店 --> 船津浜駐車場 -->　富士山マラソン2019 (Mt. Fuji International Marathon 2019) --> 河口湖溫泉街 --> 新宿 --> 酒店	新宿 ワシントンホテル
Day 3	酒店 --> 成田國際空港 --> 香港

整個旅程所需費用 (一人計)

機票、酒店、交通	約 $3300
食	約 $800
手信	約 $1800
娛樂	約 $1300
其他	約 $800
總計	約 $8000

如果想知富士山馬拉松既實況就繼續睇落去啦, 仲有相睇架。。。