~日本.中國地區 (廣島、島根、鳥取、岡山) 六天鐵道遊~
日期: 17/4/2014 - 22/4/2014
第十二次日本遊,今次一個人向中國地區進發。日本既中國地區位於本州既西部一帶,再被分為山陰與山陽兩個部分,由山口、廣島、島根、鳥取同較多香港人熟悉既岡山縣五個縣所組成。靠近日本海的島根和鳥取縣屬於山陰地區,鄰近瀨戶內海既山口、廣島同岡山縣則為山陽地區。中國地區確實係比較冷門,旅遊景點不多,景點分散,花在交通上既時間真的很長,所以今次個 Trip 既主題都叫做鐵道遊,哈哈!今次除左可以欣賞中國地區既景色之外,仲俾機會我去左好多火車站儲印仔啊!
由於中國地區既景點真係比較分散,山口縣既旅遊景點下關仲要正正係九州隔離,太遠了,留待下次九州之旅才去吧。今次只去四個縣﹕廣島、島根、鳥取同岡山縣。買左中國東方航空既機票,雖然要經上海轉機,但可以廣島入,岡山出,價錢又平,算係去中國地區既一個好選擇。
整個行程,由廣島縣開始,睇左兩個世界文化遺產﹕宮島既嚴島神社同廣島市既原子彈爆炸遺址﹔之後去左島根縣既另一世界文化遺產石見銀山,亦都去左出雲市既出雲大社拜下月老﹔跟住再到鳥取縣既境港市,呢度係鬼太郎既故鄉,仲有近年好多香港人都去既鳥取砂丘﹔最後就係岡山縣既岡山市同倉敷市。
綜觀整個中國之旅,由於旅遊景點不多,美食同購物既選擇亦非常有限,引致中國地區既遊客都唔多。呢六日既行程入面,遇見既大多數都係日本本土遊客,有日本女孩相約去出雲大社求姻緣、有日本既一家四口去境港市搵鬼太郎妖怪、亦有日本既公公婆婆拖手行岡山後樂園欣賞風景。對於愛吃喝玩樂同 shopping 既香港人黎講,呢度係比較沉悶既,但對於愛好日本文化既我,正正可以俾我享受到日本真正寧靜既一面。另外,可能由於少遊客既關係,沿途遇見既日本人都好奇問我邊度黎,我又可以用我有限既日文同佢地傾計,呢 D 就係向世界出發既大收獲啦!