[2014 日本．中國地區] Day 2 世界遺產 - 嚴島神社、原爆遺址

~Day 2~

18/4/2014 (Friday) 天陰

廣島 --> (廣島縣) 宮島 --> 嚴島神社 --> 廣島 --> 原子彈爆炸遺址 --> 廣島平和紀念資料館 --> 廣島城 --> 米子 --> 米子 Town Hotel

8:00 am

昨天搭左成日飛機, 訓番一個好覺成個人精神哂, 今日正式開始中國之旅, 首站就係廣島縣喇。

廣島縣位於日本本州西端中國地方, 面向瀨戶內海既一個縣。東接岡山縣、北接鳥取縣同島根縣、西鄰山口縣、南濱瀨戶內海。首府位於廣島市。

落去酒店 lobby 食個豐富早餐先, 選擇都幾多喎...

呢間就係我住既酒店, 近廣島站, 價錢平, 早餐 OK, 值得推介！

8:50 am

食飽飽就出發喇, 因為今晚就會離開廣島, 先寄存行理係酒店...

今日既首站係去宮島, 睇睇世界文化遺產嚴島神社。

去左日本咁多次, PLAN 行程呢 D 工作對我黎講就應該冇咩難道既, 但今次真係犯左一個好大既錯誤 :p 話說今次主要係去中國地區, 而 JR 會係我主要乘搭既交通工具, 咁我 PLAN 行程時就梗係會睇下日本 D JR Pass 啦, 係網上見到有一隻 JR West Sanyo 4-day Pass, 覆蓋關西機場到下關既鐵路, 心諗, 正啦, 買左咪可以連用 4 日, 係中國地區任搭 JR 囉。呢隻 4-day Pass 都唔平, 要 20, 570 yen, 對番港幣大約 $1600。咁我計晒黎緊 4 日搭 JR 既費用, 岩岩要二萬幾 yen, 又唔係話抵好多, 但勝在唔駛次次買飛, 一於買佢啦。

去到廣島站即刻去綠色窗口買, 填好晒 Form 俾埋錢喇, 咁我就諗住 reserve 定今晚由廣島去米子既車飛啦 (而家仲以為自已好醒 @@)... 點知個職員姐姐同我講, 你呢個 pass 只可以搭新幹線去岡山, 由岡山去米子既 local train 係唔包既... 下？唔係掛, 係呢一刻, 簡直就係晴天霹靂啦, 我腦海入面即刻浮現既 message 係, 我果二萬 yen 咪凍過水... >.< 咁我唯有出動我有限既日文, 問清楚個職員姐姐, 係咪除左新幹線, 其他既 local train 都唔包, 佢話: 係！咁點算好呢, 我唯有同個姐姐講, 我除左新幹線沿線既廣島同岡山, 我仲會去島根既出雲同鳥取既米子, 所以我都係唔要呢張 Pass 喇 (呢個時候已經唔知自已講緊乜咁 >.<)... 點知個姐姐話已經辦好手續, 冇得退錢... @@@@ 今次真係慘, 唯有怪自已之前睇得唔夠仔細, 我不停叫個姐姐俾我 cancel, 個姐姐有 D 黑面, 又唔知點鬧我好, 應該都好鬼嬲, 哈哈... 佢見我死都唔肯走, 最後都幫我 cancel 番張 Pass 同退番錢俾我, 我好開心咁多謝佢啦, 但佢都冇咩表情 >.< 鬼叫自已唔岩在先, 即刻拿拿聲走人...

9:16 am

冇 Pass 就唯有去買飛囉, 由廣島站去宮島口站只需大約半個鐘... 之前去日本多數都係自駕遊, 好耐冇搭 JR 喇, 感覺都仲係好親切！

10:00 am

好快就到左宮島口站, 再行多十分鐘去宮島口碼頭, 搭 JR 渡輪去宮島。

10:10 am

到左碼頭就買飛上船... 買埋回程唔駛煩... 當架船差唔多到既時候, 離遠可以見到係水中既大鳥居, 個個都走到船邊影相, 但其實去到慢慢影仲靚！

10:25 am

到左宮島喇... 究竟宮島有咩咁出名呢？宮島因其建於海上既嚴島神社同大鳥居而聞名, 而宮島大鳥居同宮城縣既松島以及京都既天橋立亦被合稱為日本三景。

落左船先去 information centre 睇下有咩野拎, 見到今日既潮汐情報, 要等到下午五點幾先退潮, 即係無得睇陸上既大鳥居喇...

開始慢慢行去嚴島神社, 途中見到呢個日本三景碑, 松島已於2008 年去過, 咁遠既宮島而家都黎埋, 反而京都既天橋立未去喎, 唔知幾時有機會去呢？

途中有商店街... 商店街全都是賣廣島名物 - 廣島饅頭或燒蠔...

沿途有一間手信店, 門口賣炸饅頭, 見好多人排隊, 我又試下先, 叫左一個我至愛既芝士味, 又幾好味喎！

廣島燒蠔都好出名, 可惜我唔食 >.<

差不多走到嚴島神社喇, 見到個聞名已久既大鳥居... 嚴島神社呢個大鳥居創建於 1168 年, 建立在距海岸線 200 米處的海水中。而家正值滿潮, 可以看到像是浮在海上既大鳥居。相反, 若遇上退潮時, 就可以看到建於陸上既大鳥居。大家去之前可以參考一下潮汐表, 預知滿潮同退潮既時間。

黎到嚴島神社既入口喇... 我地講既嚴島神社一般係指呢個位於日本廣島縣境內, 創建於公元 593 年既神社, 為日本國內其他約五百座嚴島神社既總本社, 於 1996 年被列入為世界文化遺產。嚴島神社建於瀨戶內海海濱既潮間帶之上, 神社前方就係岩岩見到立於海中既大鳥居喇, 呢度亦係嚴島境內最知名既地標, 遊客必到之地。大鳥居好壯觀, 不過今日天氣麻麻地, 影相都冇咁靚 >.<

神社內遇到一對新人... 希望他們幸福啊！

離開嚴島神社, 走回商店街買廣島饅頭做手信... 呢度既廣島饅頭有好多種不同既口味, 好多間舖頭都可以試食, 我覺得全部都好好味, 買完之後個老闆問我鍾意食咩味, 我答佢芝士味, 佢就送左一個俾我食, 哈哈！

12:40 pm

走回宮島口碼頭, 搭船回宮島站, 再搭 JR 回廣島站。

2:00 pm

係廣島站外搭廣島電鐵去下一個目的地﹕原子彈爆炸遺址。

2:15 pm

於原爆圓屋頂前車站下車, 只需十五分鐘, 車站旁就係原子彈爆炸遺址。呢座位於廣島市市中心既建築物遺址稱為原子彈爆炸圓頂屋, 屬廣島和平紀念公園的一部份, 於 1996 年被聯合國教科文組織列為世界文化遺產。於 1945年8月6日, 美軍以原子彈轟炸廣島, 爆炸既中心與附近既建築物幾乎被夷為平地, 但係呢座圓頂屋竟然沒有傾倒, 後人就保存此建築物以紀念當日既原爆事件。