2017 Dec 台北馬拉松 2 天之旅 － 行程規劃

~台北馬拉松 2 天之旅~

日期: 16/12/2017 - 17/12/2017

台北馬拉松係2017年最後一個賽事, 由於9月、11月都分別要跑柏林同福岡馬, 而2018年1月就係香港渣馬既大日子, 所以12月就唔好亂黎喇... 之不過又身痕喎, 上網睇下12月有咩賽事啦, 又咁岩撞正台北馬拉松既報名期, 要抽籤既, 抽到先俾錢, 咁唔理抽左先, 保守啲, 抽個半馬... 真係好彩 (都唔知係唔係好彩...) 又俾我抽中, 台灣咁鬼近, 又可以快閃啦, 再問下屋企人有冇興趣快閃去台灣玩2日兼為我打打氣, 屋企人即刻話好, 咁就即刻做野, 買機票 book 酒店同 plan 行程先。

以 "邀你一起跑向夢想" 為口號既 2017台北馬拉松由台北市政府及中華民國路跑協會主辦, 賽道及跑手成績均獲國際田聯 (IAAF) 認証。今年度除左台灣國內既跑手, 亦都吸引左來自海外50個國家或地區, 共三千多名海外跑手一齊黎參與呢個大型賽事。由於只報左半馬, 都唔駛點練跑, 事前既準備都係集中 plan 行程, 搵美食 :p 由於同屋企人同行, 又要方便屋企人到終點會合我, 所以選了一間在台北101附近的酒店。

後記
好開心, 今次係首次有屋企人同行既海外馬... 今次是第二隻台北半馬, 2016年頭已跑過台北渣打公益馬拉松既半馬賽事, 仲記得當日天氣極度惡劣, 凍到震... 今次天氣相對好好多, 少少凍, 雖落毛毛雨但氣溫非常適合跑馬。唔計天氣因素, 跑過台北渣打半馬同台北半馬後, 我個人比較推呢個台北半馬。點解呢？首先, 台北渣打半馬朝早5:30am起步, 太早了, 人都未訓醒... 台北半馬朝早7:00am起步, 非常好的一個時間, 日本起步多數9:00am我又覺得太晏了。其次, 台北渣打半馬起點與終點位置不同, 跑完要搭的士番酒店... 台北半馬起點與終點均在台北市政府即台北101附近, 一大班親友們聚集在終點等待跑手回來, 然後爭相以台北101為背景拍照留念, 現場氣氛非常好, 好鬼熱鬧。今次表現中規中矩, 輕鬆完成, 成績不是重點, 最重要是家人都在終點迎接我回來, 為我打氣！

事前準備

準備	備註
馬拉松比賽	網上報名(半馬)，中籤後付報名費
申請台灣旅遊簽証	於網上辦理入臺許可同意書暨入境登記表
購買機票	購買長榮航空 (Eva Airways) 香港至台北來回機票三張
訂酒店	於網上預約
購買旅遊保險	於美亞保險香港有限公司購買全年旅遊保險

行程表

		住宿
Day 1	香港 --> 桃園國際機場 --> 林東芳牛肉麵 --> 花博爭艷館 (領取選手包) --> 寧夏夜市 --> 饒河街觀光夜市 --> Home Hotel	Home Hotel
Day 2	酒店 --> 台北馬拉松 2017 (Taipei Marathon 2017) --> 陳根找茶 --> 西門町 (阿宗麵線、鴨肉扁) --> 桃園國際機場 --> 香港

整個旅程所需費用 (三人支出/一人付)

快閃美食x馬拉松之旅, 由於今次請埋屋企人去, 所以以下花費是三人的總支出, 不過就係我一個人俾哂, 花多少少等屋企人玩下食下開心下, 我又有屋企人黎打氣, 雙嬴呀！

機票、酒店、交通	約 $8500
食	約 $450
手信	約 $2400
娛樂	約 $300
其他	約 $100
總計	約 $11750

如果想知台北馬拉松既實況就繼續睇落去啦，仲有相睇架。。。