2018 March 日本．名古屋女子馬拉松 2 天快閃遊 － 行程規劃

~日本．名古屋女子馬拉松2天快閃遊~

日期: 10/3/2018 - 11/3/2018

如果大家有捧下小妹個 blog 場的話, 都知我2016年同跑友跑左個名古屋半馬... 果年因為報唔切名, 最後只係去左跑半馬, 跑完先知原來連完成牌都冇, 仲激死小妹 tim... 到左2017年因為3月去左跑鹿児島同首爾馬, 而4月又要去跑倫敦馬拉松, 結果又同名古屋女子馬拉松無緣... 直至今年, 計劃左既只有2月既東京馬拉松, 到左名馬既報名開始, 要抽籤 (跑友話之前唔駛, 可能越黎越多人報名了), 抽中先俾錢, 咁就抽左先啦... 上年十月頭公布結果, 又抽中左, 好野... 今次真係有 Tiffany 頸鏈喇 (完走的話 :p...)！

同東馬一樣, 想快閃得黎又唔好咁辛苦, 所以本身既計劃係同東馬一樣, 星期五晚夜機, 星期一走既... 而去程名古屋冇夜機, 所以就夜機去大阪, 再搭火車過名古屋, 回程就名古屋回港啦... 好喇, book 埋酒店一心等出發... 點知... 臨到三月時, 老細又話跑完果日即12/3有野要做, 唔俾我放假... 咁點好呢？諗左幾日, 本來諗住唔去既, 反正咁多馬, 要跑你驚冇得跑咩... 但個心又心思思, 諗起冇左條 Tiffany 又好似有啲失落咁, 哈... 加上咁難得抽到 (其實我都好少聽到人話抽唔倒, 哈...), 而報名費都唔平喎, 好啦, 最後都係決定去... 問題來了, 由名古屋回港得國泰同快運, 快運唔駛諗, 2點幾機, 國泰就4點, 以我進步左計, 跑四個幾鐘都未必趕得切... 另外國泰有一班5點經台北回港既, 呢班都有啲機會趕到... 再唔係, 就搭火車番大阪, 大阪大把夜機回港, 但太辛苦了吧... 最衰自已跑馬實力未夠, 唔肯定自已同樣五個鐘內完走, 所以我作左一個重大既決定, 就係唔買回程機票住, 到時睇下跑得快唔快, 快就可以由名古屋回港了, 哈哈！

後記
今次係第十二場全馬, 名古屋女子馬賽道都係出名平坦, 難道不高, 岩哂初馬人士... 不過路線就圍繞名古屋市黎跑, 冇咩特別靚景睇, 有點悶... 同兩年前既名古屋城市半馬唔同, 全馬起點同終點都係名古屋ドーム, 今次亦係第一次係室內場館完走, 衝線後更可以從身穿燕尾服打扮既靚仔手上接到賽事限定既 Tiffany 完賽項鍊... 賽事當日天氣清涼, 但冇東京馬果日咁凍, 對我黎講已有影響喇... 身體好誠實架, 起跑後我已感到當日狀態冇東京馬咁好, 始終兩星期前先走完東京馬咋... 但名古屋馬路線平坦好好走, 頭30K時間仲好過東京馬... 去到30K開始黎料, 又係呢句老套既說話, 30K後才是馬拉松既真正開始... 30K後明顯跌速, 35K時間跌到同東京馬一樣... 但我知道我係得既, 死頂捱到40K, 望一望錶, 仲有啲啲機會 pb 就繼續走... 媽呀, 隻腳好似就斷咁, 心裡面又出現唔想再跑馬拉松既感覺 >.<... 終於見到名古屋ドーム, 仲有400m見仲有機 pb 狂衝呀, 最後以4:23:26完走, pb 左21秒... 雖然只係短短既21秒, 但呢個成績, 係全靠我既意志、堅持而得到既, 我真係好好好開心呀！除左pb之外, 我仲好開心既係, 可以趕得切去名古屋機場搭飛機回港呀, 哈哈！

➪ 相片集

事前準備

準備	備註
馬拉松比賽	網上報名, 中籤後付報名費
申請日本旅遊簽証	免簽証
購買機票	購買樂桃航空 (Peach Airlines) 香港至大阪單程機票一張, 另以亞洲萬里通換取國泰航空 (Cathay Pacific Airways) 名古屋至香港單程機票一張
訂酒店	於網上預約
購買旅遊保險	於美亞保險香港有限公司購買全年旅遊保險
買 Sim Card	於本港購買
換日元	於匯豐銀行換購

行程表

		住宿
Day 1	香港 --> 關西國際空港 --> 名古屋 --> 東スポーツセンター (領取選手包) --> 名古屋ドーム (Marathon Expo) --> 名古屋城 --> 栄 --> アパホテル＜名古屋栄＞	アパホテル＜名古屋栄＞
Day 2	酒店 --> 名古屋ウィメンズマラソン2018 (Nagoya Women's Marathon 2018) --> 中部國際空港 --> 香港

整個旅程所需費用 (一人計)

真係快閃, 加上回程換機票, 駛費不大...

機票、酒店、交通	約 $4200
食	約 $200
手信	約 $100
娛樂	約 $1100
其他	約 $100
總計	約 $5700

如果想知名古屋女子馬拉松有幾精彩就繼續睇落去啦, 仲有相睇 tim.