[2014 北歐．北極光] Day 2 奧斯陸一日遊

~Day 2~

23/8/2014 (Saturday) 奧斯陸 --- 天陰

多哈國際機場 --> 奧斯陸國際機場 (Oslo Lufthavn) --> 奧斯陸 (Oslo) 市區遊 --> 哥本哈根 (Copenhagen)

1:15 am
飛往奧斯陸既 QR 177 航班又起飛喇, 第一次搭 Qatar Airlines, 座位夠闊夠大, 機上有 wifi (要俾錢既), 飛機餐好食, 大致上都好滿意... 唯一既唔好處就係同 Emirates Airlines 類似, 飛往歐洲要係多哈轉機, 搞到訓唔倒覺...

(以下轉奧斯陸時間)

6:30 am

又飛左大約八個鐘, 終於都到左挪威既首都奧斯陸喇...

當地時間慢香港六小時, 即刻較番隻錶同電話個時間先...

7:40 am

落左機就入境喇, 過關時都問左我唔少問題, 不過都係 D 大路問題好似黎做咩呀, 會去邊之類呀咁啦... 過左關就去拎行理喇...

拖住行理走到火車站, 準備搭挪威國鐵 (NSB) (NOK90) 出奧斯陸中央車站... 我係香港預先換左挪威克朗, 可以直接係售票機買火車票, 非常方便。

上到火車會有人查飛既, 個職員仲好好人咁同我講, 呢張飛係唔知幾多個鐘之內可以任搭 Oslo 既巴士、地鐵同輕鐵 tim...

8:30 am

去到中央車站, 第一時間係去搵 locker... locker 收費 NOK50 一日, 大約 HK$60 啦, 呢度駛錢真係倒水咁話都冇咁易 >.<

放低個行理就去左 Supermarket 買早餐, 然後正式開始 Oslo 一日遊喇...

10:10 am

搭輕鐵去第一站既諾貝爾和平中心 (Nobels Fredssenter)...

諾貝爾和平中心位於奧斯陸市政廳旁, 建於 2005 年, 主要介紹諾貝爾創辦人 - 瑞典富商阿爾弗雷德．諾貝爾 (Alfred Noble) 的生平事蹟和諾貝爾和平獎的歷史、歷年得獎人等。其實諾貝爾頒獎典禮係瑞典進行既, 眾多獎項之中, 只有和平獎係奧斯陸市政廳頒發。

10:30 am

奧斯陸市政廳 (Oslo Radhus)... 市政廳係為了紀念奧斯陸建城 900 周年而興建的, 於 1931 年開始動工建造, 於 1950 年完成。每年係度舉行既晚宴多不勝數, 最矚目既一定係每年 12 月 10 日進行既諾貝爾和平獎頒獎典禮喇... 諾貝爾當年立下遺囑時, 希望和平獎於奧斯陸舉行。當時奧斯陸仍屬瑞典統治, 後來挪威於 1905 年獨立, 但諾貝爾基金會仍遵守諾貝爾既遺願, 保留和平獎係奧斯陸頒發。

諾貝爾和平獎頒獎典禮既大廳... 大廳四周既壁畫係現代挪威藝術家以挪威歷史、文化同生活為題材而繪畫的...

市政廳內部...

11:10 am

離開市政廳, 走到國家劇院 (Nationaltheatret)... 國家劇院建於 1899 年, 係挪威國內最大既劇院... 劇院前有兩尊雕像, 左邊的是戲劇大師亨利克．易卜生 (Henrik Ibsen, 1828-1906), 右邊的是挪威著名人民文學作家比奧夏．比昂松 (Bjornstjerne Bjornson, 1832-1910)。

11:20 am

再走到附近既奧斯陸皇宮 (Slottet)... 呢座皇宮於 1848 年由卡爾 14 世建造, 為歷代君主居住之所。

如果想參觀皇宮既內部, 必須參加僅在夏季推出既導賞團。

瑞典國王 Karl Johan 騎馬大銅像 (1814-1905)... 當時挪威還未獨立, 仍屬於瑞典所管轄...

11:50 am

易卜生博物館 (Ibsen Museet)... 呢個博物館建立於 1990 年 5 月 23 日, 係為了挪威著名既戲劇家、文學家亨利克．易卜生 (Henrik Ibsen) 所設立的, 呢度亦都係易卜生最後居住既地方。易卜生被認為是現代現實主義戲劇既創始人, 係一位影響深遠既挪威劇作家。

12:00 pm

走回皇宮那邊, 開始逛逛奧斯陸最熱鬧既卡爾約翰斯大道 (Karl Johans Gate)。卡爾約翰斯大道係奧斯陸一條由中央車站延伸至皇宮既行人購物大道, 全長約 1.5 公里。大道兩旁既建築物都係奧斯陸既人氣景點, 好似奧斯陸大教堂、奧斯陸大學、國家劇院、國會大廈等等。

由皇宮行左一陣就會見到奧斯陸大學 (Oslo Universitet) 喇... 奧斯陸大學係挪威最大及最古老既大學，被認為係北歐最具聲望既大學之一。

12:20 pm

再繼續向前行, 會經過國家美術館 (Nasjonalgalleriet)... 呢個美術館因珍藏挪威藉畫家愛德華．蒙克 (Edvard Munch) 既作品而聞名, 其中最著名既作品就係以描繪生命無奈為主題既 <<吶喊 The Scream>>... <<吶喊>> 係愛德華．蒙克既代表作之一, 採用象徵和隱喻既手法, 展示了人類對世紀末既憂慮與恐懼。<<吶喊>> 一共有 4 個版本, 分別存放係挪威既蒙克博物館同呢度既國家美術館中。講左咁多, 講到呢個畫家咁出名, 但我都係唔識欣賞, 所以冇入去參觀 :p

12:30 pm

國會大廈 (Stortinget)... 國會大廈建於 1866 年, 主建築呈圓形的古典設計, 並分成兩翼, 與 Grand Hotel 為鄰。

國會大廈出面有一個小廣場, 環境優美, 我都買左份三文治坐係度慢慢嘆呢！

1:45 pm

食飽飽就繼續行喇...

走到奧斯陸大教堂 (Oslo Domkirke)... 教堂建於西元 1694 年, 花了約一世紀才完成。挪威國教 - 福音路德派就係以此大教堂為中心。教堂既青銅大門係挪威著名雕刻家 Dagfin Werenskiold 於西元 1938 年時設計的, 教堂內部有德國製造既管風琴, 教堂背後有挪威國王 Christian 四世既雕像, 奧斯陸今日既城市規劃就是由他打下基礎的。

去到大教堂時內部正進行結婚典禮, 所以冇得入去參觀...

2:15 pm

離開大教堂再繼續走就會走回中央車站, 此時陽光充沛, 車站外仲有排球比賽, 好不熱鬧, 與今朝到步時見到既中央車站係兩個不同模樣...

通過中央車站走到港邊既奧斯陸歌劇院 (Opera Huset)... 歌劇院由挪威著名建築師 Snohetta 建造, 於 2008 年 4 月正式啟用。歌劇院佔地 3萬8千5百平方公尺, 內裡有歌劇廳、芭蕾舞廳和音樂廳, 歌劇院既屋頂仲可以讓遊客漫步。

設計者不諱言設計此歌劇院時, 是以同位在港邊既悉尼歌劇院為參考目標, 以 'open space' 為理念主軸, 設計出開放式既建築, 期望每個人都能自由運用寬闊既空間, 事實亦證明奧斯陸歌劇院做到了...

走到歌劇院既屋頂, 可以見到今晚就會啟航出發往丹麥哥本哈根既郵輪, 我等陣就會上船架喇, 等埋我呀, 嘻嘻... 屋頂係由3萬6千塊義大利大理石及花崗岩舖成既一個斜坡, 人們係屋頂可以曬下太陽, 睇下書, 輕鬆寫意...

歌劇院既內部設計亦特別, 表演廳外由橡木條包圍, 能調節濕度, 創造良好既音響效果, 排列成波浪造型, 柔和了剛硬既玻璃帷幕以及鋼骨既線條。

3:00 pm

行左大半日, 奧斯陸主要既景點都去哂喇, 走回中央火車站。先去 Supermarket 買定今晚既晚餐同明天既早餐, 然後再去 locker 拎番個行理。

3:30 pm

係中央火車站外搭 60 號巴士 (NOK30) 到碼頭, 準備坐郵輪往丹麥既哥本哈根… 其實岩岩係歌劇院都可以望到泊係碼頭既郵船, 想慳錢可以行路過去既, 不過拖住行理又唔想行, 咁就坐巴士啦。物價高係唔同D, 連張車票都靚過人…

3:45 pm

唔駛十分鐘就到左 DFDS Ferry Port, 好 Grand 既郵輪呀, 嘩哈哈！出發前已經係網上 book 左房 (一早 book 最平果隻, €82,22), 去到碼頭內既 check in counter, show 個護照就可以換 boarding pass, 之後就可以上船喇…

4:30 pm

呢架咁大咁靚既郵輪 DFDS Seaways 於下午 4:30 pm 由挪威既奧斯陸啟程, 到左明天一早就會到達丹麥既哥本哈根。

DFDS Seaways 提供多條運行於歐洲各國既航線, 好似今次我搭呢條 Oslo – Copenhagen 航線咁, 下午上船, 第二天一早就到目的地, 可以慳番時間之餘又 book 少一晚酒店, 絕對係飛機以外另一個好選擇。不過郵輪價錢都唔平, 越早買價錢就越平, 如果臨近出發才預訂, 價錢可能同搭飛機差不多, 甚至乎貴過坐飛機 tim…

開船之後就周圍走… 先走上 deck…