[2014 北歐．北極光] Day 6 首次踏足極地格陵蘭

2014年8月27日星期三

[2014 北歐．北極光] Day 6 首次踏足極地格陵蘭

~Day 6~

27/8/2014 (Wednesday) 晴

哥本哈根 --> 哥本哈根國際機場 --> 格陵蘭 (Greenland) --> 伊盧利薩特 (Ilulissat) --> Local Tour: Evening Boat Trip Among the Icebergs --> 伊盧利薩特

7:15 am
今日會離開丹麥, 向極地格陵蘭進發... 心情好興奮, 一早搭 metro 去機場...

7:30 am
到了機場, 如常去 check in 啦... 去到 check in counter, 俾本特區護照地勤姐姐話要去格陵蘭, 地勤姐姐即刻問我有冇 visa... 我話用特區護區係免簽證架播... 地勤姐姐一臉疑惑, 好似唔多信我所講, 仲左 check 右 check, 又打電話去問... 其實我對呢個情況都唔太出奇, 因為我相信係哥本哈根呢度, 用特區護照飛格陵蘭既香港人真係應該少之又少, 話唔定地勤姐姐連特區護照都未見過, 哈... 等佢問完一輪之後, 就幫我繼續 check in 同出機票喇...

9:00 am
要去格陵蘭只有兩個方法, 一個係由哥本哈根飛去, 另一個係由冰島飛去, 由哥本哈根出發的就只有坐格陵蘭航空 (Air Greeland) 既航班, 機票好貴 >.<

格陵蘭係世界最大既島嶼, 屬於丹麥王國既海外自治區, 位於北美洲東北面, 東面為冰島與北歐四國, 全島約五分之四地區處於北極圈之內, 氣候相當寒冷... 格陵蘭亦係南極洲以外, 大陸冰川面積最大既地區, 幾乎全個島嶼都被冰覆蓋住, 但由於空氣乾燥, 積雪難以形成, 地面才得以暴露。

由於格陵蘭太大, 冇可能玩哂成個島, 今次選擇左位於西面既伊盧利薩特 (Ilulissat) 作為首次踏足格陵蘭之地 (另一個旅遊重鎮係東面既 Kulusuk), 呢度人口只有約4000, 係格陵蘭第三大定居地。雖然呢度人口唔多, 但呢度絕對係格陵蘭最受歡迎既旅遊地點, 因為呢度有貴為世界自然遺產既伊盧利薩特冰峽灣, 景色一絕。

由哥本哈根出發到伊盧利薩特, 航程分為兩段, 首先乘搭 GL 781 飛到格陵蘭另一城鎮 Kangerlussuaq...

飛機經過冰島上空喇...

不錯的飛機餐...

世界極地格陵蘭我黎喇 ^.^

(以下轉格陵蘭時間)
9:40 am
今次呢個極光之旅走遍既幾個北歐國家, 除左係用唔同貨幣, 就連時間都唔一樣, 進入左格陵蘭就要較錶喇, 時間比丹麥慢四個鐘咁多架...

黎到 Kangerlussuaq 只係朝早九點幾, 要等多大約四個鐘先轉機, 唯有周圍行下... (其實個機場細到爆, 冇野行...)

1:35 pm
終於等到上機, 轉乘 GL 510 航班到 Ilulissat... 呢架飛機超細架, 似坐巴士多啲, 哈哈...

2:20 pm
唔駛一個鐘就到喇... 唔知以後仲有冇機會坐呢隻螺旋型飛機, 影多幾張先 :p

Ilulissat 機場又係超細, 一出就拎行理, 行多幾步就見到個 information centre... 話說我之前係網上 book Ilulissat Hostel 既時候, 問埋有咩車去 hostel, 得到既回覆係, Ilulissat 呢度係冇公共汽車既 >.< 於是我就請 hostel 既職員幫我約定一部的士... 我拎完行理就行出去機場外等啦... 點知等呀等呀... 都冇車黎既... 的士站又冇的士等客喎, 所有開黎既車都已有人 book 左... 呢個時候, 個心開始有啲驚 tim... 於是走番入去 information centre 問下, 點知個職員姐姐話: 呢度唔會有的士黎架... (可能人太少啦...) 咁我同佢講其實我之前約左架, 不過等極都冇車黎, 我仲請佢幫手打去 hostel 問下... 唉, 搞左一陣, 其實我都唔知職員姐姐打左去邊, 佢淨係同我講, 而家架的士係出面喇, 你快啲出去啦... 就係咁, 我咪走番出去, 點知真係有架的士係度等我... 成件事係好神奇...

2:45 pm
呢架就係 Ilulissat 既的士... 唔怪得北歐係數一數二既富裕國家, 我好肯定就連呢個的士司機都有錢過我, 事關呢程短短10分鐘既車程, 車資就要 DKK100, 大約港幣$110... >.<

2:55 pm
今次呢個極光之旅, 旅費真係好鬼嚇人... 除左本身機票貴, 就連住宿既開支都好龐大... 一向對酒店都有少少要求既我 (只係少少, 要乾淨企理兼有浴室既單人房咁...), 係網上 book 酒店時都有啲頂唔住, 丹麥酒店又貴, 冰島酒店又貴, 呢度既酒店更加唔駛講, 因為選擇不多, 晚晚都過千蚊... 後來見好多人都推薦 Ilulissat Hostel, 價錢仲要平一大截, 咁就一於住下呢間頗有特色既 hostel 啦...

到左 hostel 先 check in 放低件行理先...

Ilulissat 全個小鎮都係大大小小既彩色屋仔, 就連呢間 hostel 都一樣, 好得意...

好乾淨既廚房...

3:40 pm
稍作休息之後, 就走到市中心既 World of Greenland 睇下有咩玩... 今次會係 Ilulissat 呢度停留四日, 黎得呢度都係為左睇冰山, 冰川同冰河, 唔係坐船出海睇就係坐直升機係上空睇架啦, 所以就算自由行黎到都要參加當地搞既 local tour, 而 World of Greenland 係當地最大既 travel agent, 睇過網上既介紹同呢度職員既推介, 決定報名參加兩個重點 local tour (恕我真係唔太有錢, 唔可能參加太多, 其實我好想坐直升機係上空睇下呢個咁壯觀既冰河世紀架), 一個係今日黃昏出發睇冰山既 evening boat trip, 另一個係明天去睇冰峽灣既 day tour... 至於第三日同第四日朝早, 就留番係 Ilulissat 呢個咁舒服既小鎮行下...

白板上清楚睇到哂黎緊有咩 local tour...

報左名, 俾錢果刻好肉痛 >.<...

4:00 pm
Boat trip 今晚七點先出發, 仲有三個鐘, 周圍行下先...

6:45 pm
差不多七點, 走回 World of Greenland 集合, 準備呢個奇妙旅程﹕Evening Boat Trip among the Icebergs。呢個 boat trip 都唔算話太貴, DKK600 尚可接受, 航程大約二個半小時, 觀光船會在黃昏時段在冰山中運行, 包咖啡熱茶。

出發喇...