[2017 韓國．首爾馬拉松] 令我學懂謙卑．首爾國際馬拉松 2017 直擊報導

~Day 1~
17/3/2017 (Friday) 香港 --- 晴, 首爾 --- 晴

香港 --> 首爾仁川國際機場 --> a First Myeongdong

1:00 pm

今天請了半日假, 1:00 pm 就可以走人。不過係朝早收到國泰通知, 話航班 delay 一個鐘, 原先 4:40 pm 延誤至 5:40 pm 出發。就係咁, 我就唔駛急於到機場, 由於時間充裕, 唔駛搭機場快線, 就係公司樓下搭機場巴士到機場, 唔駛一個鐘就到左。

2:15 pm
到左國泰既登記區域, 因已在網上辦理 check in 手續, 加上我係冇寄倉行理, 咁我直接於自助 check in 機印番張 boarding pass 出黎就離境喇 (其實網上 check in 左可以自已印埋張 boarding pass 又或者選擇係手提電話接收電子 boarding pass, 如果好似我咁連寄倉行理都冇既, 就可以直接出境)。

到 Plaza Premium Lounge 食 lunch...

5:00 pm

去到登機閘口, 地勤人員又宣布最新起飛時間為 6:00 pm... >.<

見到空姐上飛機準備開工...

6:00 pm
CX 416 飛往首爾既航班終於出發... delay 咁多早知坐廉航啦 >.<

三個多小時既航程, 食左個飛機餐, 睇左套戲, 好快就到左首爾仁川國際機場... 只不過既係, 因為 delay, 黎到首爾已經係晚上十點幾, 去到酒店都要訓, 原本仲諗住可以行下夜街 tim...

(以下轉韓國時間)
10:40 pm
而家我既世界之旅, 因為加插了海外馬拉松元素, 搞到我都變左個專業背包客... 因為唔駛等行理, 入境後先去唱錢, 然後直奔到機場鐵路仁川機場站...

11:20 pm
原先諗住黎到仲可以行下夜街, 加上又近馬拉松起點, 所以 book 左位於明洞既酒店... 由機場出發首先搭機鐵到弘大入口站, 再轉地鐵2號線到乙支路入口站, 連埋轉車時間, 全程約1小時20分鐘, 都咪話唔遠。

12:40 am
黎到明洞已經十二點幾, 攰死人... 同上次去大阪跑馬一樣, 到步已經天黑, 仲話差啲搵唔倒酒店... 今次諗住都 ok 啦, 拎住張預先印定既簡單地圖, 搵岩出口架喇, 點知上到地面... 張地圖又真係好鬼簡單 (只怪自己懶, 準備得唔好), 加上全部都係韓文, locate 唔倒自己係邊, 唯有博一博照行, 點知行錯左方向, 去左明洞街果邊...

講開又講, 我本身對韓國係冇咩興趣既, 皆因行街 shopping 掃面膜唔岩我, 韓國餐又唔特別鍾意食, 最重要係韓國人好無禮貌, 街上只見韓文, 就連搭巴士都有困難, 對上一次黎首爾已經係十年前既事... 直到三年前去過一轉釜山睇紅葉, 可能鄉下地方又好啲, 那次旅程還算不錯...

今次重遊首爾, 叫做好左啲, 因為地鐵站加左中文名, 咁自由行就冇咁慘... 不過我夜媽媽盪失路去左明洞, 呢度好靜, 好似無哂人既砵蘭街咁, 連習慣一人旅既我都感到好迷惘呀... 係街搵左個地圖睇左好耐, 終於搞清楚自己身在何方, 然後再研究下到酒店應走既方向...

1:30 am
都係果句, 其實識路係好近既, 衰在行錯左方向... 終於黎到酒店 , 房間正到爆, 不過都冇咩時間享受, 哈！

明天又要早起, 都係趕快沖涼休息。

~Day 2~
18/3/2017 (Saturday) 首爾 --- 晴

酒店 --> 弘益大學 ISAAC Toast --> Jam-sil Sports Complex (首爾綜合運動場) (領取選手包) --> 明洞 --> a First Myeongdong

9:00 am
由於琴晚太夜訓, 今日要訓晏啲, 加上希望再次 pb (好有決心咁 :p), 所以今日唔會安排啲咩特別行程 (唔似我喎 :p)... 先去食個早餐, 之後去 expo 拎選手包, 晚上行下明洞, 就咁話啦...

9:30 am
多士控既我, 早餐就去試下被喻為冇食過等於冇黎過首爾既 ISAAC Toast 啦... 佢有好多分店既, 我選定了位於弘益大學旁既分店, 貪其有點書卷味囉...

搭地鐵去弘益大學站... 八達通是三年前去釜山時買落既...

9:50 am
到左弘益大學站, 沿弘益大學既指示牌走... 弘大區亦是遊客區, 沿途街道整潔, 兩旁都是 coffee shop, 感覺非常舒服...

10:30 am
從遠處見到弘大踪影, ISAAC Toast & Coffee 就係佢對面...

ISAAC 唔係每間分店都有堂食的, 我揀呢間分店都係因為佢有位坐, 我仲諗住佢會比其他分店如明洞少人啲... 點知係錯既... 朝早十點幾黎到已座無虛席, 仲聽到好多香港人聲音 >.<

隨便點左個 menu 上推介既 Toast, 找了個位置坐下, 此時驚見傳說中既點餐人龍...

好快就有得食喇... 本身係多士控既我, 唔多唔少都對呢份 Toast 幾有期望, 話哂都係大人氣必食推介嘛... 兩片厚厚既多士, 中間夾著生菜絲、豬柳等饀料, 見到都流口水... 食左一口, 冇"嘩"一聲喎, 可能係錯覺, 再食多啖, 個包唔脆, 味道又咁熟既, 係喇, 好似食緊哈迪斯唔知邊隻漢堡包咁... 點解啲人講到咁好食架？係咪我問題呀？我真心覺得 McCafe 果個 chicken & ham toast 好食好多喎 >.<

對面坐左個香港女人, 見佢又係一個人, 咁我就問下佢係咪第一次黎啦, 點知佢話唔係, 已經食過幾次喇, 咁實係覺得佢好好食先會再黎架啦... 我話我又唔覺得真係好食得咁緊要喎, 佢話佢都覺得今次整得麻麻地, 失左水準... 佢話可能呢度多人, 同埋其他分店係阿豬媽整會好食啲喎... 唔係嘛, 乜我咁唔好彩呀, 我聽日就走架喇, 冇時間再食多次架喇 >.<

食完就慢慢走回地鐵站...

11:15 am
食唔倒高水準既 Toast 有啲嬲嬲地, 係地鐵站見到間麵包店, 呢個太陽蛋 Toast 都好似幾好味咁丫, 於是又買左件等陣當 lunch 食...

12:00 pm
坐地鐵2號線到堂山站, 再轉9號線到綜合運動場站... 黎到地面就見到 Olympic Stadium, 呢個首爾奧林匹克主競技場, 位於綜合運動場範圍內... 1988年既漢城奧運會就係喺呢度進行, 亦係明天馬拉松賽事既終點站...

12:15 pm
好快就黎到 Expo 既會場, 會場好細, 唔似日本咁可以行幾個鐘...

先去報到處拎選手包...

Expo 雖然細冇咩野睇, 但呢度有比較少見既免費印字服務, 你可以印自己個名係件跑衫上... 咁我見唔駛錢又未試過, 咪排隊印下囉... 點知排就好快, 填哂所需資料之後話件衫要等兩個鐘先有得拎... oh.... 兩個鐘太耐了吧, 最慘個 Expo 冇野行, 點消磨多兩個鐘呢？職員見我唔知點好, 佢就話明天跑完黎番呢度拎都得既, 而我又覺得未必要兩個鐘既, 咁就照等啦...

我既籌號係 A222, 取衫時要出示番呢張飛仔...

因為要消磨時間, 連平時唔會做既都做埋...

真係行到冇野好行, 唯有番去睇下件衫印好未... 仲有成廿幾件先到我, 原本都想走先, 反正我又唔會著大會 T 跑既, 明天拎番都得啦, 不過諗諗下, 衫係唔會著, 但要影相呢 (好似仲無聊, 哈)... 好, 一於繼續等...

終於到我喇, 仲睇住佢印個 "Ivy" 落件衫度, 呵呵！

附送大會贊助商 Adidas 紙袋一個...

3:15 pm
下一站係明洞... 走回綜合運動場站, 先搭9號線到高速站, 再轉3號線到乙支路3街站...

4:00 pm
因為唔想轉咁多次線, 所以就係乙支路3街站行去明洞...

4:30 pm
見到長長既人龍同熱鬧既小食店就知到左明洞喇, 因為好肚餓, 隨即開始明洞掃街之旅...

首先試食呢個人氣薯餅, 好好味...

明洞大教堂...

好多人, 成個旺角咁既明洞...

繼續掃街...
quota 不多, 下面呢啲都冇食到...

quota 要留番俾我既至愛：辣炒年糕...

唔想咁快就食到飽哂, 見到煎餅冇食, 但後來有啲後悔...

再食蒜蓉燒蝦, 勁正！

裡面真係有雞蛋既雞蛋糕, 呢期好 hit...

燒豚肉卷... 呢個食完有啲飽喇...

有間 Hello Kitty Cafe...

最後食多杯炸雞年糕, 飽到想嘔... 其實咁食法, 唔怪得會越跑越肥啦...

8:00 pm
行完明洞就過對面既樂天百貨, 目的係去樂天超市買手信...

8:15 pm
好快買完野, 再去 7-eleven 買明天的早餐...

8:30 pm
今次真係好鬼乖, 冇周圍去探索世界, 仲鬼咁早番到酒店, 因為我要早啲訓, 希望聽日可以發揮得好啲...

不過相都係要影的 :p

10:30 pm
執好行理, 拉下筋就休息喇。

~Day 3~
19/3/2017 (Sunday) 首爾 --- 晴
酒店 --> 首爾國際馬拉松 2017 (Seoul International Marathon 2017) --> 首爾仁川國際機場 --> 香港

6:30 am
一早醒來, 吃昨晚買定既早餐... 其實我唔係要食3條蕉咁多, 只係 7-eleven 冇得散買1條姐...

換好比賽裝束就 check out, 部分行理會寄存在酒店, 然後出發去大會既起點。

7:00 am
大會起點設於光華門廣場 Gwanghwamun Plaza, 由酒店步行去只需十至十五分鐘。去到會場, 唔好期望有日本馬果種安排, 清楚指示、大型更衣室、打氣人群統統都冇...

最搞笑係 Expo 咩都冇, 呢度就有小販檔賣 energy gel, 運動用品...

其實都唔知邊度寄行理, 唯有跟著人群走...

見到運送行理既貨車喇, 我係 5XXXX, 要走到尾...

途中難得見到 Toilet 指示牌... 指示牌後面個帳篷就係更衣室黎架喇...

7:30 am
寄完行李之後, 上個洗手間, 之後就去起跑區等出發...

最搞笑係, 初時都唔知起跑區係邊, 想問人但韓國人又唔太友善, 都唔知問邊個好... 最後俾我發現倒個好大既 "E" 字, 咁我係被安排係最後既 E 區出發, 所以就跟住去喇...

成日都講到冇指示, 又話唔知邊度寄行理, 又話唔知邊度起跑, 其實大會既場刊入面有講既, 只不過佢乜鬼都係得韓文之嘛, 都冇心機䏲啦...

起點佈置安排

終點佈置安排

第88屆首爾國際馬拉松 Seoul International Marathon 2017 由東亞日報社、漢城特別市大韓田徑競技聯盟主辦, 設有馬拉松同 10km 兩個項目。馬拉松賽事名額為 20,000 人, 唔需要抽籤, 直接在網上報名... 到左報名截止後, 我都唔見佢話滿額, 我諗參加既人數應該唔會超過 20,000 人... 馬拉松比賽時限為 5 小時, 參賽者費用為 KRW 5,000 (約 HK$350)。

馬拉松以光華門廣場 Gwanghwamun Plaza 為起點, 沿途經過著名景點崇禮門、明洞、清溪川公園、東大門、蠶室大橋, 最後以首爾奧林匹克主競技場 Jam-sil Olympic Main Stadium (即係昨天選手既報到會場) 為終點。呢條金標賽道既特點係標高差極少, 大部分都是平路, 是一條出名 pb 的路線。

由於呢個首爾馬拉松真係唔多歡迎外國參賽者, 跑完成個月都唔見網站有比賽當日既相睇, 只能在網上搵到以下既相片...

8:00 am
大會既起跑時間為八時正... 我排在最後的 E 區, 用了20分鐘才走到起跑線...

賽道大部分都係平路黎... 頭一半路程都能保持住 6:30/km 既 pacing...

帶著汽球跑的是 pacer... pacer 是領跑員, 汽球上會寫著 pacer 的跑速, 讓跑者可以跟隨, 以自定的目標配速完成比賽, 或是突破自已的 pb。

11:45 am
到左 30K 望下錶, 用左唔夠三個半鐘, 心想, 今次應該 sub 5 不成問題...

不過實際情況是, 腳力開始下降, 配速越黎越慢, 每往前踏一步都感到艱苦萬分... 又再一次撞牆了... 原來跟著 4:40 pacing 走, 到 4:50 都慢慢離我而去, 最後看到跟著 5:00 pacing 的一班參賽跑手在身邊經過, 跑到有點兒沮喪...

呢個時候, 我知道再唔加油, sub 5 就會冇望, 但係身體話俾我知, 唔係你想快就得囉...

又再一次印證 "真正馬拉松都是在30K開始的" 呢個說法, 又令我深深體會到, 一個原來以為好容易達到的目標, 例如跑快少少啦, 即使只係1秒什至係更少時間, 都唔係一定可以做到...

1:20 pm
又再一次憑著堅毅既意志, 終於見到奧林匹克運動場, 盡最後努力在場內完成最後的一圈, 以 5:00:17 的時間完走... 突破了自已上兩星期鹿児島馬的 pb!

1:40 pm
話說由報名開始, 對呢個貴為國際既金標大賽印象已唔多好, 網頁上只得韓文, 英文的資訊都少之又少, 而家跑完咁鬼辛苦, 都冇安排阿豬媽為跑手送上獎牌, 感覺真係唔太好... 過了終點後, 只有工作人員為跑手送上食物一袋, 打開望下先發現入面有個獎牌係度... 嘩, 如果我唔拎包食物咪大鑊 @@@...

之後就去拎行理同換衫...

獎牌設計亦冇咩特別... 除左獎牌, 亦冇完賽毛巾...

2:40 pm
慢慢走回綜合運動場站, 搭地鐵回酒店取行理。

3:40 pm
在酒店稍作休息, 又要拖住沉重既腳步去機場...

5:45 pm
已於網上辦理 check in 手續, 可以直入離境大堂...

6:30 pm
雖然今日天氣涼爽, 但唔知點解跑完都係成身鹽, 所以去 lounge 沖番個涼先上機...