[2024 台北．馬拉松] PB@台北半馬 2024

~Day 1~

14/12/2024 (Saturday) 陰

香港 --> 桃園國際機場 --> 花博爭艷館 (領取選手包) --> 西門町 --> 林東芳牛肉麵 --> Meistay Art Gallery Hotel

7:00 am
台北馬拉松快閃之旅出發喇，一早到機場，出境後在 Terminal 2 既美心 MX 吃早餐。唔知係咪太耐冇食過辛辣麵, 呢碗餐蛋辛辣麵真係超級好食啊 :p

2024 Dec 台北馬拉松 2 天之旅 － 行程規劃

~台北馬拉松 2 天之旅~

日期: 14/12/2024 - 15/12/2024

疫情遠去, 跑步比賽復常, 11月剛完成神戶馬拉松, 12月就報左2017年已經跑過既台北馬拉松... 由於2025年頭有香港渣馬同東馬, 所以今次台北馬同2017年一樣, 都係報半馬... 今次既報名形式同2017年唔同左, 全馬仍然係以抽籤形式報名, 但半馬就唔駛抽籤, 改為以先到先得既形式報名... 去到報名當日, 大會網頁塞哂車, 幸好都成功報名... 後來先知, 由於2024台北馬拉松晉升左成為金標籤賽事 (Road Race Gold Label), 所以全馬既中籤率創新低, 難怪連半馬既報名人數都急增。報名後就 plan 野 book 酒店啦, 同2017年一樣都係快閃算, 今次唔係同屋企人去, 連美食既行程都唔諗太多 :p...

2024台北馬拉松由台北市政府、中華民國田徑協會、中華民國路跑協會主辦, 賽道及跑手成績均獲國際田徑總會 (IAAF) / 世界田徑總會 (WA) 認証。除左報名形式, 2024台北半馬既路線圖亦都與2017年既不同, 2017年既起點同終點係一樣既, 2024年半馬起點仍然係市民廣場, 即台北101附近, 但終點改左係南京東路四段, 靠近台北小巨蛋。由於快閃, 今次選了一間位於終點附近既酒店, 方便完賽後可以快啲返到酒店沖涼。

後記
第二隻台北半馬 (正確啲黎講, 今次係第三次係台北跑半馬 (計埋2016年頭跑過既台北渣打公益馬拉松既半馬賽事)), 比賽當日天氣一流, 起跑時氣溫11-12度... 雖然只係跑半馬, 應該應付到既, 但出發前病左大半個月, 由12月頭開始感冒, 到出發前好左啲, 但都有啲擔心, 只好成日提自已要放鬆心情, 盡力就好了... 好感恩係咁既狀況下, 我竟然 PB 左, 完賽時間係 1:56:15, PB 左 1.5分鐘有多呀, 開心之餘, 仲加強返對跑步既信心！

[2024 日本．神戶馬拉松] 久違的日本馬拉松 x 有馬溫泉之旅

~Day 1~
16/11/2024 (Saturday) 香港 --- 晴, 日本 --- 晴

香港 --> 關西國際空港 --> 神戸国際展示場 (領取選手包) --> CANDEO HOTELS (カンデオホテルズ)

11:30 pm

15號晚出發到機場...

1:59 am
CX 566 航班準時起飛...

2024 Nov 日本．神戶馬拉松 x 有馬溫泉 4 天之旅 － 行程規劃

~日本．神戶馬拉松 x 有馬溫泉 4 天之旅~

日期: 16/11/2024 - 19/11/2024

要數對上一隻海外馬, 就係2019年既富士山馬拉松喇... 還記得當時腳傷漸好, 可以在無傷無痛既情況下完賽, 諗住之後可以繼續跑, 點知跑完富士山馬之後, 又因疫情關係幾年冇得飛, 就連所有跑步賽事都無法舉行 (2020年2月原本報左既KIX 泉州國際馬拉松最後都容許海外參賽者延期)... 直至2023年全球開始復常, 海外馬拉松賽事又重新開放俾大家參加, 但疫情期間停哂訓練... 到左2024年慢慢 pick up 返, 咁岩見到跑友話神戶馬拉松大會宣布左2025年會改路線, 屆時選手唔會再跑上神戶大橋, 加上我之前其實報過神戶馬的, 但因為腳傷放棄了, 搞到我又心思思想襯佢改路線前去完成返呢個曾經放棄過既賽事。就係咁, 雖然冇咩信心跑得好,最後都報左名 :p...

同之前跑日本馬一樣, 原本諗住快閃既, 跑完當晚打算去有馬溫泉休息下, 翌日就回港... 咁岩住係加拿大既小學同學 (就係2017年加拿大之旅帶我周圍去玩果個) 11月會去大阪旅行, 問我可否 join 佢？因工作關係, 我唔可以請太長假, 傾下傾下佢話可以join我一齊去有馬溫泉... 大家咁耐冇見, 難得可以係日本相聚, 咁我決定留多一日, 最後仲可以約埋住係大阪既另一個小學同學, 嘩, 今次真係難得既世紀相聚啊！大家confirm日子OK之後, 我就定左個行程, 星期五晚出發, 星期日完賽後前往有馬溫泉會合小學同學, 星期一大家一齊行下神戶再返大阪難波食飯, 星期二回港！

後記
今次呢個旅程很特別, 可以分為神戶馬拉松以及與小學同學同遊神戶大阪兩個部分。

先講神戶馬拉松, 由於疫情期間只能進行有限度訓練, 本身都不敢定下什麼目標, 加上起跑當日氣溫突然急升 (真黑仔 >.<), 跑到9公里已經成身濕哂 >.< 對於怕熱既我好不容易捱到去明石大橋折返, 之後半行半跑終於到左神戶大橋... 幸好既係神戶馬氣氛好好, 臨到終點前路邊有好多為跑手們打氣既工作人員同市民... 最後順利完走第17隻全馬, 成績未至於 PW, 但當然係唔滿意啦, 唯有返去加緊訓練, 希望2025年有進步啦！

順利完走後就會合小學同學, 展開旅程既下半部分。到步後我地行下有馬溫泉街, 買下手信, 之後就回酒店吃燒肉 dinner 同浸溫泉... 原本諗住跑完馬, 去住返晚溫泉酒店係要好好休息, 點知... 呢3個分別住係加拿大、香港同大阪既人可能太耐冇見, 傾到唔願訓... 我地由食晚飯開始傾, 到浸溫泉都未停過, 最後返到房都要食住宵夜繼續傾... 傾下傾下最後成4點鐘先訓... OMG... 第二日我地行下神戶, 係三宮食左個神戶牛 lunch, 然後去左神戶既 Ball & Chain 專門店朝聖, 晚上回大阪難波食雞串燒... 好喇, 玩左成日時間黎到呢度, 大家都係時候要分別, 點知住係大阪既同學提議去唱K, 仲話日本既 Karaoke 好平咁話... 於是乎我地又夜媽媽去唱K, 由夜晚11點唱到凌晨2點幾, 不過又真係幾平喎, 唱左3個鐘仲有軟雪糕任食汽水咖啡任飲, 每人都只係要付大約港幣$25, crazy 到冇朋友呀... 唱完K因為太夜, 佢地話先陪我返酒店再搭車走, 點知去到酒店門口我地又傾到唔捨得走, 最後係酒店門口又傾左2個鐘 :p 傾到4點幾真係要解散喇, 返到酒店沖埋涼到訓落床已經係朝早5點... 嘩, 跑完個全馬之後差唔多通左2晚頂咁濟, 今次真係元氣大傷, 不過呢個世紀聚會真係好正好開心！

[2024 台北．淡水九份十分] 地道美食家族悠閒 4 天遊

~Day 1~

14/8/2024 (Wednesday) 香港 --- 晴, 台北 --- 雨

香港 --> 桃園國際機場 --> 林東芳牛肉麵 --> 淡水區 --> 淡水老街 --> 漁人碼頭 --> 饒河街夜市 (胡椒餅) --> 象山 --> 台北君悅酒店

6:00 am

期待左好耐既全家族暑假之旅出發喇, 我地預早2小時係機場集合...

到了機場就去 check in, 可能都係暑假尾聲, 唔算太多人, 好快就辦好 check in 同寄行李既手續... 寄好哂行李就過海關, 出境...

8:30 am
國泰航空 CX 564 航班準時起飛...

2024 Aug 台灣．台北 (淡水、象山、九份、十分)．悠閒家族之旅 4 天 - 行程規劃

~台灣．台北 (淡水、象山、九份、十分)．悠閒家族之旅4天~

日期: 14/8/2024 - 17/8/2024

繼上年暑假熱到傻既日本富士箱根自駕遊, 我地又全家人一齊出動喇... 今次真係全家總動員, 上年暑假去日本細佬要返工去唔到, 今次難得佢話有幾日假期, 咁問下佢地想去邊, 我就梗係話日本 :p... 但佢地話得4天想悠閒啲, 提議去台灣, 咁得幾日假期又唔想趕行程, 旨在睇下靚景食下好野, 去台灣又真係好岩有老人家同小朋友既家族旅行既... 好, 定左目的地之後, 我就開始 plan 下行程。

由於家人已經講明唔想趕行程 (會唔會係之前跟我去既trip行程都太豐富? :p :p :p), 咁我盡量 plan 得輕鬆啲啦, 每日只安排一至兩個景點, 而當中希望有齊睇靚景、親子活動、掃街食好野既元素... 細佬仲額外要求要去象山影夜景... 好快就定左個 plan, 第一日會去淡水區, 行下淡水老街同漁人碼頭, 晚上去饒河街夜市掃街, 第二日參觀臺北市立動物園, 晚上食返餐馬辣火鍋, 第三日包車去九份同十分, 逛下九份老街, 欣賞十分瀑布同放天灯, 晚上連掃基隆夜市同西門町呢兩個熱門夜市, 最後一日就參觀台北101, 然後就輕鬆出發去機場結束豐富既行程喇。

後記
整個台北之旅, 一如我既計劃, 睇風景既有好靚既淡水漁人碼頭、黃金瀑布、十分瀑布, 親子活動既有動物園, 美食有一到步就去既林東芳牛肉麵、饒河街夜市既必食胡椒餅、Haagen Dazs 同 Movenpick 雪糕任食既馬辣火鍋、九份既魚丸湯同賴阿婆芋圓、基隆夜市既魯肉飯、西門町既阿宗麵線同幸福堂珍珠奶茶 (講起都想再去 :p)... 天氣方面, 除左第二日去動物園期間落大雨, 其餘時間天氣都不錯, 又不會太熱... 總括黎講, 整個行程不會太趕, 又品嚐到咁多美食, 家人對呢次既台北4天之旅非常滿意啊 (講真, 我去過咁多次台北都仲係覺得幾好玩)！另外, 要讚一讚平時唔多運動既細妹, 因為細佬要上象山影台北101既夜景, 我地就陪佢去啦, 我阿妹真係行到索哂氣, 但最後都順利完成呢個壯舉, 叻！

[2024 日本．富士山] 日本最高山峰．富士山登頂全紀錄．感恩安全完走

~Day 1~

10/7/2024 (Wednesday) 香港 --- 晴, 東京 --- 天陰

香港 --> 成田空港 --> 新宿 --> 歌舞伎町一番街 --> 新宿プリンスホテル

8:00 am

挑戰日本最高山峰既富士山登山之旅出發喇... 香港航空 HX 604 航班準時起飛...

2024 July 日本．富士山登山 5 天之旅 - 行程規劃

~日本．富士山登山 5 天之旅~

日期: 10/7/2024 - 14/7/2024

[富士登山官方網站提供]

5月去左南半球既西澳珀斯慶祝生日, 叉完電之後就要準備展開一個極具挑戰性既旅程... 究竟係咩行程？有幾難？答案就係要登上日本第一高峰、海拔3,776米高既富士山！旅行就成日去, 但多數都係食買玩, 睇下古蹟、世界遺產, 又玩者深度自駕觀光遊咁... 而日本既富士山都去過好多次, 但每次都係在附近既景點遠望富士山、在河口湖既溫泉酒店浸住溫泉欣賞富士山, 又或者邊跑馬拉松邊欣賞富士山既景色...

要登上日本呢個第一高峰, 似乎唔係話去就去, 除左體力係咪OK, 仲要準備好多野... 諗左好幾年, 上年2023年係疫情後首次開山, 睇報導成日話登山人數創左紀錄, 搞到我又出現返想登富士山既念頭... 上網睇下啲登山資料, 開始有啲概念, 咁初步就諗住2024年去, 不過首先係要book到山小屋先...

如果大家想登上富士山既山頂, 官方係絕對唔建議彈丸攻山既, 彈丸攻山既意思係即日來回, 即係朝早上山, 上到山頂之後就直接下山咁... 由於富士山高3,776米, 本身體力既要求已唔低, 加上海拔越高, 登山既速度可能要減慢, 以防出現高山症狀, 所以大部分既登山客都會安排2日1夜既登山行程... 我地參考左好多成功登頂既行程分享, 打算第一天由五合目出發, 晚上在山小屋休息, 第二天凌晨再繼續登上富士山山頂。有左呢個初步行程, 下一步就係"搶"山小屋喇... 無睇錯, 唔係"book", 係"搶"... 由於山小屋數目不多, 全球想登山既人都要book山小屋, 咁你話唔係"搶"係咩... 好幸運, 成功預約到11/7/2024位於本八合目既山小屋 - 本八合目トモエ館...

預約左山小屋就代表可以成團喇, 由於假期不多 (8月已安排家族旅行), 完成富士山登頂呢個首要目標之後都唔可以留太耐, 但如果咁艱辛既行程都可以完成, 無理由唔獎勵下自已架嘛... 最後決定落山後在河口湖住一晚溫泉酒店, 嘆下溫泉餐兼浸溫泉消除疲勞, 然後回東京逛逛街再回港。訂左整體行程就可以預備埋其他野, 例如 book 酒店、預約東京至五合目同河口湖至東京既高速巴士車票、預約登山通行證、租登山裝備等等。

整體行程﹕香港 --> 東京新宿 --> 富士山吉田線五合目 --> 本八合目 --> 山小屋 --> 富士山山頂 五合目 --> 河口湖 --> 東京銀座 --> 皇居 --> 香港

後記
好感恩順利地完成富士山登山之旅, 美中不足既係登上山頂後天氣突變, 最後睇唔到御來光 >.< 咁辛苦上到山頂睇埋日出固然係完美, 但經歷左呢趟登山之旅後, 我真心覺得唔需要有咩遺憾, 相反, 我好感恩大家都成功登頂, 又安全地下山...

其實係預備呢個登山之旅時, 都知道富士山既天氣係變幻莫測既, 朝早明明陽光普照, 下午突然黑哂天, 夜晚變左打10號風球咁亦唔出奇... 係出發前最擔心都係天氣, 日日上網check住個登山指數, 一直都係麻麻地... 到左11/7朝早, 東京天氣還好, 但係搭車去五合目時個天開始陰陰地, 到達五合目落車時仲要超級大風 >.< 唔理咁多, 先去攞之前預約左既登山裝備, 然後就將大型行李寄存係五合目。

我地知道自已行得慢, 原本諗住早啲出發, 希望天黑前可以到達山小屋, 點知正準備出發之際, 出面落勁大雨, 仲要係橫風橫雨果隻 >.< 咁不如係五合目食埋個 lunch 先啦... 等到啲雨細左, 天色好轉, 冇咁大風, 我地就決定起行喇... 由五合目開始行, 一路到七合目都還可以, 但係由七合目到八合目呢段山路, 海拔高度會從2,700米提高到3,100米, 地形也會從平坦既之字形山路, 變成較陡峭的岩石路, 基本上要手腳並用, 爬上去... 加上由七合目開始, 氣溫急降, 風勢大到好似10號風球咁, 企起身都驚俾風吹走, 真係只能慢慢爬上去, 不過非常慶幸既係一路都冇落雨, 如果唔係又濕又滑都唔知點搞 >.<... 過左八合目, 路段又平坦左啲, 繼續慢慢行, 最後成8點鐘先去到山小屋, 仲驚遲哂大到唔俾 check in >.< 係山小屋食過簡單晚餐就準備訓覺, 點知開始頭痛, 唔係點訓到...

好快又要起身, 個頭仲有啲痛, 但都要起程繼續登頂... 由本八合目出發, 經過御來光館、九合目, 好快就到左山頂喇... 到左山頂之後, 天氣又突然變壞, 開始落雨, 仲越落越大, 個人又超級凍, 我地最後決定放棄缽巡, 早啲落山...

上山容易落山難, 經過無數個之字形山路後終於回到五合目喇... 回想呢次登山之旅, 係約3,000米高既山峰上經歷10號風球咁既風勢, 又有少許高山症症狀, 其實都有一定危險性, 今次可以順利登上富士山山頂, 再安全下山, 我真係感到好開心同感恩！

[2024 珀斯．夢幻粉紅湖波浪岩] Day 8-9 Perth 珀斯悠閒一日遊 ...

~Day 8~
18/5/2024 (Saturday) 晴

酒店 --> 珀斯 (Perth) --> 國王公園 (Kings Park) --> 藍色小屋 (Blue Boat House) --> 北橋 (Northbridge) --> 珀斯國際機場 (Perth Airport)

9:30 am

黎到今趟旅程既最後一日喇, 之前都睇左好多西澳既大自然景觀, 今日就留返係珀斯呢度慢慢行下呢個 city 啦... 難得唔駛跟 local tour, 可以訓晏啲...

訓醒食啲野, 然後就 check out 同寄行理係酒店...

[2024 珀斯．夢幻粉紅湖波浪岩] Day 6-7 南半球最長木樁碼頭 Busselton Jetty x 鬼斧神工Wave Rock 波浪岩

~Day 6~

16/5/2024 (Thursday) 晴

酒店 --> 1-Day Local Tour --> 巴瑟爾頓 (Busselton) --> 瑪格麗特河 (Margaret River) --> 波然普森林 (Boranup Forest) --> 盧文海角燈塔 (Cape Leeuwin Lighthouse) --> Hyatt Regency Perth

7:05 am

完成左珀斯北面既行程, 今日向南面進發, 參加左一個 1-day local tour 去 Busselton, Margaret River 同 Cape Leeuwin Lighthouse...

雖然係另一個 local tour, 不過司機兼導遊又係 Cindy, 而團友大部分都係同粉紅湖3日團既一樣 :p...

[2024 珀斯．夢幻粉紅湖波浪岩] Day 3-5 The Pinnacles 尖峰石陣 x Hutt Lagoon 粉紅湖 x Nature's Window 自然之窗

~Day 3~
13/5/2024 (Monday) 晴

酒店 --> 3-Day Local Tour --> 蘭斯林沙丘 (Lancelin Sand Dunes) --> 賽凡提斯 (Cervantes) --> 南邦國家公園 (Nambung National Park) --> 尖峰石陣 (Pinnacles) --> 傑拉爾頓 (Geraldton) --> Best Western Hospitality Inn

7:30 am

要睇靚景, 當然唔可以淨係待在珀斯, 但獨自出行又唔想租車, 所以 plan 行程時已決定 join 當地既 Local Tour, 務求深入西澳唔同既地方... 今日我就會 join 一個 3天既 Local Tour, 探索一下珀斯北面既大自然奇觀...

朝早在酒店寄存行理, 然後就在酒店門外等 Tour 既司機兼導遊 Cindy 開車黎接我... 可能我住既酒店有少少偏離市中心, 我係第一個上車, 之後 Cindy 繼續去接埋其他團友...

8:20 am

待所有團友都上哂車, 就正式出發喇...

[2024 珀斯．夢幻粉紅湖波浪岩] Day 1-2 首次踏足西澳．文青小鎮 Fremantle 弗里曼特爾

~Day 1~
11/5/2024 (Saturday) 香港 --- 晴, 珀斯 --- 晴

香港 --> 珀斯國際機場 (Perth Airport) --> Hyatt Regency Perth

1:00 pm
西澳珀斯生日之旅出發喇, 吃過早餐, 執好行理就出發去機場...

2024 May 西澳．珀斯．醉人粉紅湖、波浪岩 9 天之旅 - 行程規劃

~西澳．珀斯．醉人粉紅湖、波浪岩 9 天之旅~

日期: 11/5/2024 - 19/5/2024

相隔左5年, 終於可以襯一年一度既生日大日子放個長假... 回顧上一次既生日之旅, 已經係2019年疫情前同日文老師同學們既台灣之旅了... 今年難得可以放下假, 梗係要出外走走, 抖抖氣叉叉電啦... 想悠閒啲, 我又怕熱, 所以好快就鎖定目標去歐洲或者西澳... 之後上網睇下啲機票, 去西澳仲可以用 Asia Miles 換免費飛, 咁一於就去西澳珀斯啦！西澳相對澳洲東面城市例如悉尼、墨爾本好似冇咁出名, 但自從周杰倫去左西澳既粉紅湖拍MV, 西澳既知名度已經大大提升左... 講真, 去西澳主要都係睇大自然既靚景, 而且交通時間都幾長, 如果習慣了去日本 shopping 浸溫泉既團友可能就唔多岩架喇...

為左一睹西澳珀斯既大自然靚景, 最後草擬左個行程﹕香港 --> 珀斯 (Perth) --> 弗里曼特爾 (Fremantle) --> 賽凡提斯 (Cervantes) --> 南邦國家公園 (Nambung National Park) --> 尖峰石陣 (Pinnacles) --> 傑拉爾頓 (Geraldton) --> 粉紅湖 (Hutt Lagoon) --> 卡爾巴里國家公園 (Kalbarri National Park) --> 自然之窗 (Nature's Window) --> 巴瑟爾頓 (Busselton) --> 瑪格麗特河 (Margaret River) --> 波然普森林 (Boranup Forest) --> 盧文海角燈塔 (Cape Leeuwin Lighthouse) --> 波浪岩 (Wave Rock) --> 珀斯 (Perth) --> 香港

整個行程, 由西澳既首府珀斯 (Perth) 為中心, 先到西南面一個文青小鎮弗里曼特爾 (Fremantle)閒逛... 之後向珀斯既北面進發, 深入南邦國家公園 (Nambung National Park) 睇下尖峰石陣 (Pinnacles), 坐小型飛機欣賞夢幻兼醉人既粉紅湖 (Hutt Lagoon), 再去卡爾巴里國家公園 (Kalbarri National Park) 內既自然之窗 (Nature's Window)。完成北面既探索之旅, 就向珀斯既南面進發, 係沿海城市巴瑟爾頓 (Busselton) 坐小火車、去瑪格麗特河 (Margaret River) 酒莊飲下酒, 最後到達最南端既盧文海角燈塔 (Cape Leeuwin Lighthouse)。返回珀斯, 又再向東面長征, 為了一睹珀斯東面內陸一個自然奇觀波浪岩 (Wave Rock)。珀斯東、南、西面既主要景點都叫做去過了, 最後例牌逛逛珀斯市內景點, 又以周杰倫 MV 出現過既藍色小屋 (Blue Boat House) 為這個旅程畫上一個完美句號！

後記

原本呢個生日之旅係想抖下叉下電, 朋友聽到我話去珀斯都話夠哂 hea... 但實際上並唔係咁, 因為不同既靚景離珀斯實在太遠喇, 每日花大量時間在交通上, 搭車搭到你攰呀... 唔係跨張, 好似去波浪岩咁, 由珀斯開車去要大約4個鐘, 你冇睇錯, 係4個鐘, 去到睇唔夠1個鐘又要坐4個鐘車回程, 都咪話唔辛苦... 雖然係咁, 但我覺得可以親眼目睹不同既大自然奇觀, 尤其係粉紅湖同波浪岩, 我覺得都係值得既！總括黎講, 西澳既天氣好好, 經常藍天白雲, 令人好舒服好開心！