[2018 印度．世界七大奇蹟泰姬陵] Day 5-8 東方瑞士．喀什米爾 Kashmir

~Day 5~
26/12/2018 (Wednesday) 斯里納迦 -- 晴

酒店 --> 新德里 --> 英迪拉．甘地國際機場 (Indira Gandhi International Airport) --> 斯里納迦機場 (Srinagar Airport) --> 喀什米爾 (Kashmir) --> 斯里納迦  (Srinagar) --> 船屋

3:45 am
跟團有好處亦有壞處, 唔駛自已 plan 行程安排哂交通俾你就梗係好啦, 不過日日都趕鴨仔咁仲要晨咁早出發就真係有啲辛苦... 由於今日要由阿格拉坐車回新德里機場, 所以凌晨三點九就要出發... 最搞笑係我地仲要唔知醒, 三點半先起身, 極速梳洗執野就落大堂集合, 此時領隊已將我地既早餐盒拎左上車了...

7:00 am
車上吃早餐...

[2018 印度．世界七大奇蹟泰姬陵] Day 4 世界七大奇蹟．泰姬瑪哈陵 Taj Mahal

~Day 4~
25/12/2018 (Tuesday) 亞格拉 --- 晴

酒店 --> 勝利宮 (Fatehpur Sikri) --> 泰姬瑪哈陵 (Taj Mahal) --> 亞格拉堡 (Agra Fort) --> 酒店

6:15 am
今日係聖誕節啊, 第一次在印度過聖誕節, 一早吃個聖誕早餐又要出發了...

[2018 印度．世界七大奇蹟泰姬陵] Day 1-3 鼓起勇氣踏上印度征途

~Day 1~
22/12/2018 (Saturday) 香港 --- 晴

香港 --> 英迪拉．甘地國際機場 (Indira Gandhi International Airport) --> 新德里 (New Delhi) --> 酒店

6:00 pm
到達香港國際機場, 先會合領隊 Eric... 在1號客運大樓的A區見到領隊, 第一個印象是... 咁後生既... 印度成日俾人話治安差, 呢個領隊得唔得架... anyway, 領隊幫我地 check in, 然後叫我地自已去寄倉, 之後就過關離境...

8:28 pm
國泰航空 CX 679 飛往印度德里既航班起飛喇... 估唔倒大家一聽到就怕怕既印度, 我都終於要黎喇...

2018 Dec 印度．金三角 (新德里、齋浦爾、亞格拉)、喀什米爾世界文化遺產 8 天之旅

~印度．金三角 (新德里、齋浦爾、亞格拉)、喀什米爾世界文化遺產 8 天之旅~

日期: 22/12/2018 - 29/12/2018

又到聖誕, 又到聖誕, 又係時候諗下有冇地方想去... 話說上年聖誕去左加拿大, 仲連四十年一遇既極度寒冬都俾我預到, 真真正正咁過左一個白色聖誕... 白色聖誕固然吸引啦, 不過都係一次夠架喇, 今年好想去啲熱既地方 :P... 問左兩個朋友有冇興趣去澳洲或新西蘭, 其中一個朋友話好, 而另一個朋友就話想去印度... 其實我地三個係幾年前都話想去印度, 但當時因不同原因都去唔成... 今次佢又提議去印度, 因為印度治安唔好, 我唔敢自已去, 加上搵朋友去呢啲地方真係唔易架, 而家有人話去就梗係應承啦... 跟旅行團去印度, 主要分6天同8天團, 6天只去金三角即新德里、齋浦爾同亞格拉呢三個主要旅遊城市, 8天團就會加埋北部既喀什米爾, 我地好快就決定報永安一個印度8天團。

整個行程, 由印度首都新德里 (New Delhi) 開始, 之後再到齋浦爾 (Jalpur) 同亞格拉 (Agra), 最後返回新德里, 睇下下面個地圖就知點解呢三個城市被稱為印度金三角... 除左路線呈一個三角形之外, 單單遊覽呢三個城市就去了五個世界文化遺產﹕加德古塔 (Qutb Minar)、古天文台 (Jantar Mantar)、勝利宮 (Fatephur Sikri)、同時又係七大奇蹟既泰姬陵 (Taj Mahal) 以及亞格拉堡 (Agra Fort)。之後坐內陸航班飛往北部既喀什米爾, 一個有東方瑞士之稱既印度城市。

後記

由決定左去印度之後, 家人朋友同事都不約而同咁話: 下？印度咁危險都去？印度好污衊架喎... 你唔好自已一個周圍走呀... 更有人叫我買定樽裝水去... 咁我又上網睇下啲人既印度遊記, 大部分既評論又真係話: 印度啲街道好亂啦, 好污衊啦, 空氣差啦, 亦都有人係自已帶水去刷牙, 不過最後大多數都係話值得去既... 而我係一個好怕污衊的人, 呢個亦都係我一路未能成行既原因之一, 但今次去完番黎, 可能有哂心理準備, 我對印度的印象反而不是太差... 又或者跟五星團都有啲關係, 我地去的餐廳都好乾淨, 水照飲, 雪糕照食, 好幸運地大家都冇事... 第一晚我又聽人建議用香港既樽裝水刷牙, 但第二晚已經嫌麻煩用番酒店既水喉水, 冇事... 而原來最擔心既問題, 就係景點既洗手間, 竟然都 ok 喎... 至於北部既喀什米爾就更加正, 風景真係好靚, 當地人亦都好純樸, 好 nice... 不過當然, 今次唔係自由行, 如果大家自已去的話就要加倍小心。同亞洲其他發展中國家一樣, 好似柬埔寨咁, 導遊話十個客人有九點九個都唔會再黎, 咁我覺得印度咁大, 至少我會想去印度既南部城市既, 但唔知會係幾時之後呢？

2018 Nov 日本．北海道．定山溪溫泉 2 天快閃遊

~日本．北海道．定山渓温泉 2 天快閃遊~

日期: 17/11/2018 - 18/11/2018

大家冇睇錯, 真係去2日... 呢排其實好忙, 下年1月尾要考試, 而家周末都要上堂, 日日唔係番工就係溫書, 就黎發顛... 咁岩呢個星期阿 sir 唔得閒, 過去浸個溫泉練下日文先... 去程坐凌晨機, 回程用里數換, 北海道正值淡季, 平時想換 CX 札幌直航番香港既機票簡直係天荒夜譚...

去2日都要揀北海道, 仲要淡季到唔恨, 紅葉又冇哂, 雪景又未有, 但我就係想去北海道... 要數札幌最近既溫泉區, 又要未去過既, 有諗過定山渓同洞爺, 兩者都適合2日1夜遊, 咁諗住邊度有特色野睇就去邊啦... 點知睇睇下, 原來定山渓上豐平峽既紅葉巴士已停駛, 而洞爺既夏季花火又岩岩完左, 噢... My God... 原來真係淡得咁緊要, 唔怪 CX 肯放啲機票出黎啦 :p... 咁最後決定去定山渓啦, 因為好近札幌, 搭巴士都係個半鐘...

[2018 美國．馬拉松六大滿貫]．芝加哥馬拉松 2018 直擊報導

~Day 1~
4/10/2018 (Thursday) 香港 --- 晴, 芝加哥 --- 晴

香港 --> 洛杉磯國際機場 --> 芝加哥國際機場 --> Chicago 芝加哥 --> Riverwalk --> Tribune Tower --> Chicago's Original Architecture Tour -->  海軍碼頭 Navy Pier --> Nordstrom --> Wrigley Building --> Chicago French Market --> Hampton Inn Chicago Downtown West Loop

10:30 pm

第四隻六大馬, 又是首次踏足美國之旅, 理應是興奮的... 但因為腳傷, 首次懷住戰戰兢兢既心情出發...

到了機場寄行理就入閘, 夜晚通常都好快既, 所以又有時間去 lounge 坐下...

00:06 am
飛往美國洛杉磯既國泰航班 CX 880 航班好準時起飛...

2018 Oct 美國．芝加哥馬拉松 6 天之旅 － 行程規劃

世界六大馬拉松

WORLD MARATHON MAJORS

TOKYO BOSTON LONDON BERLIN CHICAGO NEW YORK CITY

Bank of America Chicago Marathon 2018

~美國．芝加哥馬拉松 6 天之旅~

日期: 4/10/2018 - 9/10/2018

2017 年既倫敦馬、柏林馬, 到2018年既東京馬, 繼續向六大馬拉松呢個目標進發。淨番三個都位於美國, 有啲難度, 好鬼遠, 波士頓就更加唔駛諗, 冇 BQ... 2017年尾即管上網報下名, 芝加哥同紐約呢兩隻馬相距時間好近, 正路唔適宜一齊跑, 不過反正都要抽籤既, 六大邊有咁好彩中丫... 登登登登, 結果出喇, 今次有啲運仔, 竟然俾我中左芝加哥馬呀, 紐約馬就唔中... 其實咁樣都好, 如果兩隻中哂, 一黎唔知點跑, 二黎一個係十月, 一個係十一月, 連續兩個月去一次冇野玩美國, 唔好喇掛... 

網上報名芝馬時, 要俾埋信用卡, 如果抽中左, 大會就會自動過數, 咁既做法有好有唔好啦, 等你中左冇得諗, 亦都防止啲人係又抽唔係又抽... 唔知係咪因為咁, 所以芝馬比其他六大都易中, 真係第一次抽就中, 希望2019中埋紐約馬就好喇, 嘻嘻 :p

收到結果就上網 book 酒店, 然後就 plan 下行程... 我都算成日去旅行, 但一次都未去過美國, 一黎勁遠, 二黎好似冇咩玩咁... 上網睇下網友介紹, 芝加哥好似真係冇咩玩咁, 哈... 再問下去過既朋友, 都係話冇咩特別野玩, 照咁睇可以快閃喎... 不過咁, 去美國真係唔同去日本, 搭十幾個鐘飛機, 去到又要適應時差, 機票又咁鬼貴, 無理由去到跑完就走架, 連個美國簽証都浪費埋啦... 左諗右諗, 芝加哥雖然好細, 但我諗都可以玩到三四日既, 最後決定去6日, 唔計頭尾機程, 玩足4日... 到確認左假期後, 約在七月買埋國泰機票, 去程經洛杉磯飛芝加哥, 回程由芝加哥直航飛香港, 玩足4日半！

今次係第十四隻全馬, 第四隻六大馬... 2018年跑過東京馬、名古屋馬同紐西蘭既生日馬, 東京馬同名古屋馬都 PB 了, 為求再次進步, 在五六月開始訓練階段, 訓練中加入 tempo, interval 既項目, 希望能夠再次 PB... 但好景不常, 在八月中左腳腳踭出現疼痛, 睇醫生食左消炎藥, 但一路冇好轉... 上網睇左好多資料, 應該是跑者最唔想患上既足底筋膜炎 >.< 腳痛後唔好話訓練, 連 hea 跑幾 K 都痛, 真係好灰... 對於跑者黎講, 冇得跑慘過大病, 我亦都知好多跑手係痛住照跑, 但我就比較理智 (自以為...), 我只想盡快好番, 唔停跑肯定有排都唔會好... 不過咁好彩有得跑芝馬, 就係呢個時候腳痛, 個天係咪玩我呀？為左快啲好番, 咩都去試, 碌網球、按摩、拉筋, 仲去埋做金灸, 但得番個半月, 邊會好得切呢... 諗過放棄唔去, 但岩岩買埋機票, 成本太高... 唉... 最後決定去, 最多慢跑完成, 番黎再專心治療。

後記
同倫敦馬、柏林馬、東京馬比較之下, 論 Expo 規模, 東京一定係最大, 其次係柏林, 芝馬同倫敦馬差不多, 但都好多野睇... 論賽道, 芝馬同柏林馬一樣, 賽道寬闊平坦, PB 一流... 論比賽時氣氛, 倫敦馬仍然係第一, 其次係芝馬同東馬, 最後係柏林馬... 芝馬整體黎講, 大會各方面都安排不錯, 賽道非常好跑, 十月天氣頗適合跑馬... 最值得一讚係個完賽牌好靚 ^.^... 

上面提到, 岩岩衰左筋膜炎, 八月中後一個10K都冇跑過, 哈... 跑前準備十足, 唔係長課, 而係止痛藥、止痛膏、防震鞋墊:p... 最後十分感恩, 跑前朝早啪左四粒止痛藥, 唔知係咪好有效, 跑頭30K竟然冇事, 腳踭唔痛... 到左30K先黎料, 始終都跑左30K, 對隻腳傷害已不少, 最後12K痛到跑唔倒, 唯有放棄成績, 快走番終點... 最後以5:25成績順利完走... 原本目標是 sub 4, 雖然好唔開心, 但都冇辦法... 番到香港第二日即去做針, dr 話跑到70歲都仲可以完成呢啲先係成績呀... 我唔知佢係咪安慰我先咁講, 但諗深一層, 又唔係冇道理既... 之前為左成績為左攞獎, 操到受埋傷, 而家慢跑都唔得, 值唔值得呢？

最後, 雖然今次完全冇心情玩, 但話哂第一次去美國, 都要講下遊覽既部分... 同未去之前既預期一樣, 美國同香港差不多, 唔係去探親的話都冇咩特別野做... 不過芝加哥有好多設計獨特既建築, 大家去到一定要遊船河去欣賞位於芝加哥河兩旁既高樓大廈。美食方面, 呢度必食既係 pizza 同牛扒, 待我下次有機會再黎先慢慢品嚐！

[2018 挪威．三大峽灣聖壇岩] Day 7-9 黃金之路 x 蓋倫格峽灣 Geirangerfjord

~Day 7~
27/7/2018 (Friday) 晴

酒店 --> Round trip to UNESCO Geirangerfjord & Trollstigen --> 老鷹之路 Eagle Road --> 蓋倫格峽灣 Geirangerfjord --> 精靈之路 Trollstigen --> 奧勒松 Ålesund --> First Hotel Atlantica

7:15 am

今天買了 day tour 套票去看最後一個峽灣, 一早就要吃早餐, 呢間酒店係唯一一間冇三文魚 >.<...

[2018 挪威．三大峽灣聖壇岩] Day 5-6 挪威奇石聖壇岩 Preikestolen

~Day 5~
25/7/2018 (Wednesday) 晴

酒店 --> 卑爾根機場 (Bergen Airport) --> 斯塔萬格機場 (Stavanger Airport) --> 斯塔萬格 (Stavanger) --> 聖壇岩 (Preikestolen) --> Thon Hotel Maritim

5:20 am

今日一早就要離開 Bergen, 5:00 am 就要 check out, 酒店預備了外帶早餐俾我, 然後搭 Flybussen 到卑爾根機場...

[2018 挪威．三大峽灣聖壇岩] Day 3-4 文化遺產布呂根碼頭 Bryggen x 哈當厄峽灣 Hardangerfjord

~Day 3~
23/7/2018 (Monday) 陰

酒店 --> 哈當厄峽灣縮影 (Hardangerfjord in a nutshell tour from Bergen) --> Vøringfossen Waterfall --> 哈當厄峽灣 Hardangerfjord --> 卑爾根 Bergen --> Scandic Bergen City

7:15 am

今天要去看第二個峽灣-哈當厄峽灣, 出發前已在網上購買哈當厄峽灣縮影的套票, 一早走到火車站取票, 再走回酒店食早餐...

[2018 挪威．三大峽灣聖壇岩] Day 1-2 世外桃源佛洛姆 Flåm x 松恩峽灣 Sognefjord

~Day 1~
21/7/2018 (Saturday) 香港 --- 晴, 佛洛姆 Flåm --- 晴

香港 --> 赫爾辛基萬塔機場 (Helsinki Airport) --> 奧斯陸國際機場 (Oslo Lufthavn) --> 松恩峽灣縮影 (Sognefjord in a nutshell from Oslo) --> 弗洛姆 (Flåm) --> Fretheim Hotel

10:30 pm
挪威偷閒抖氣之旅出發喇, 放工後回家吃飯, 洗澡, 執好行理就出發去機場...

2018 Aug 北歐．挪威．三大峽灣聖壇岩 9 天之旅

~挪威．三大峽灣聖壇岩 9 天之旅~

日期: 21/7/2018 - 29/7/2018

又到左一年一度既暑假, 雖然我就冇暑假放, 但一向都係暑假期間比較清閒, 可以放下假咁, 於是又諗下去邊啦... 記得 2014 年暑假嗎？當年去左一個北歐極光大旅行, 當時主要係去冰島同格陵蘭既, 但計劃行程時已留意到挪威驚人既美景, 但奈何時間有限, 取捨後決定先去冰島格蘭蘭, 挪威留待下次吧... 就係咁, 每年既暑假都有諗過去, 但都未能成行, 到左今年終於有空檔, 因為冇家族旅行, 朋友又唔得閒, 所以就決定來一趟挪威峽灣之旅。挪威係一個好大既國家, 即使只遊一國, 都未能玩哂所有著名景點... 今次先把行程重點放在挪威既靈魂 - 峽灣之上, 另外再加插一個挪威奇石, 最後擬定了一個挪威三大峽灣聖壇岩之旅。

好啦,  最後鐵定左既行程係咁﹕香港 --> 奧斯陸 (Oslo) --> 弗洛姆 (Flåm) --> 松恩峽灣 (Sognefjord) --> 卑爾根 (Bergen) --> 哈當厄峽灣 (Hardangerfjord) --> 斯塔萬格 (Stavanger) --> 聖壇岩 (Preikestolen) --> 奧勒松 (Ålesund) --> 蓋倫格峽灣 (Geirangerfjord) --> 香港

整個行程, 由挪威 (Norway) 首都奧斯陸 (Oslo) 開始,  坐火車經弗洛姆 (Flåm), 再乘船遊挪威最長既松恩峽灣 (Sognefjord), 遊船終點站為西面城市卑爾根 (Bergen)。完成第二長哈當厄峽灣 (Hardangerfjord) 之後, 飛到西南面城市斯塔萬格 (Stavanger), 征服挪威三大奇石之一聖壇岩 (Preikestolen), 最後就飛抵中部城市奧勒松 (Ålesund), 以挪威最美既蓋倫格峽灣 (Geirangerfjord) 為這個旅程畫上一個完美句號！

後記

四年前曾經踏足挪威既奧斯陸, 唯一既印象係一個字-貴, 交通貴, 食物貴... 今次黎足9日, 呢個印象又再次深深咁印在我腦海中喇... 挪威咁大, 每日都需要以火車、巴士什至飛機去連接不同城市、景點, 交通費實在貴得可怕, 住宿酒店又係貴, 但呢啲都冇得慳... 想節流就唯有係食方面落手, 除左水之外, 食物都盡量吃得簡單, 每天都是包包包, 連我呢個包怪都有啲頂唔順, 番到香港都要即刻食番個五香肉丁出前一丁呀... 除左貴之外, 挪威既美景確實係令人著迷, 三大峽峽及挪威奇石聖壇岩實在太吸引了, 每年只在5-9月才能欣賞到既自然風光, 花多少少都係值得既, 欣賞自然風光之餘, 也是一個休息既好機會, 完成呢個峽灣之旅又繼續工作, 為下一個旅程作準備囉！

[2018 新西蘭．霍克斯灣馬拉松] 一份別具意義既生日禮物

~Day 1~
9/5/2018 (Wednesday) 香港 --- 晴

香港 --> Auckland Airport (奧克蘭機場)

6:50 pm

放工出發到機場... 走到 CX counter check in...

過關很快, 仲有大把時間先上機就去 lounge 加定碳, 1 號閘口附近既 lounge 剛剛裝修完...

2018 May 新西蘭．霍克斯灣馬拉松 5 天生日之旅 － 行程規劃

~新西蘭．霍克斯灣馬拉松 5 天生日之旅~

日期: 9/5/2018 - 13/5/2018

2018 年過左一半都冇, 已跑左3隻馬, 東馬同名古屋馬仲進步左pb了... 但天氣熱始終係我既弱點, 踏入5月基本上賽季已完, 再跑都好難有好成績, 但心裡面一直想跑番隻生日馬... 馬拉松大多在星期日進行, 而5月又不是賽季, 就算有都多數在歐洲舉行, 所以要撞正生日而地點又不能太遠, 呢個機會都咪話好容易... 2018年既生日在星期六, 一心以為最快都要等到2019年才有機會, 點知上年無意中發現在新西蘭北島既內皮爾 (Napier) 在我生日當天就有個霍克斯灣馬拉松...

Napier 係位於新西蘭北島東岸既一個沿海城市, 深度旅行當然會去, 但人氣始終不及南島既基督城同皇后鎮嘛, 所以一路都唔驚報唔倒名... 一路諗緊去唔去, 始終去新西蘭唔平啊！一路諗到4月, 魔鬼又走出黎喇, 話哂生日馬, 意義大不同呀, 加上在新西蘭呢個咁靚既地方跑喎, 又係幾吸引喎... 仲有呀, 今年唔去下年又唔知有冇機會, 下年去唔成分分鐘要再等7年呀... 好啦, 又同老細請2日假, 黎個短短既生日馬之旅啦。好快咁睇過啲資料, 發現 Napier 景點雖然不多, 但因為交通唔多方便, 所以我就決定租車自駕... 除左 Napier 市內既裝飾藝術 (Art Deco) 之外, 我亦去左陶波 (Taupo) 睇 Huka Falls 同 Hastings 附近既 Te Mata Peak... 風景真係好靚... 而霍克斯灣馬拉松亦都非常令人期待, 賽道全程幾乎冇上下坡, 沿路既漂亮風景更是賣點之一... 今次一於唔做時間, 好好咁享受一下在美景下跑馬既樂趣先。

後記
為左跑隻生日馬, 令我首次踏上新西蘭既國土... 其實想去新西蘭旅行好耐架喇, 但始終未能成行, 今次終於黎到紐西蘭北島東岸既霍克斯灣... 雖然只係短短幾日, 去左 Napier, Taupo 同 hastings 三個 city, 但係呢度既風景真係好靚呀, 尤其當地人都推薦既 Te Mata Peak, 在山上可以360度既角度去欣賞整個霍克斯灣, 真係一個必要去既景點... 而主角霍克斯灣馬拉松都好鬼正, 雖然參加既人係非常之少, 沿路亦冇乜打氣聲, 但整個賽道風景真係超正... 在 Napier 出發後, 跑手們在公路、自行車道、沼澤地、橄欖園以及葡萄園中交替穿梭, 整個霍克斯灣既美景盡收眼底。而在最後10公里, 即係已經冇咩力既時候, 跑手們又再奔跑於私人既葡萄園間, 周遭環繞着橄欖樹, 最後抵達終點站－美不勝收的Sileni Estates酒莊。跑完名馬後都冇長課, 今次就唔望 pb 架喇, 但在生日當天可以完成一個咁靚既馬拉松, 真係好開心好難忘！番港後睇睇2019年馬拉松既賽程, 生日果日有個瑞士日內瓦馬拉松, 呢個勁有興趣喎, 唔知下年有冇可能再延續生日馬呢？

[2018 日本．沖縄] Day 5 鎖定目標．連掃三對虎走

~Day 5~

22/4/2018 (Sunday) 雨

酒店 --> スポーツデポ (Sports Depo) --> 那霸空港 --> 香港

7:30 am

最後一日行程了, 一早起身仲落緊雨 >.<

[2018 日本．沖縄] Day 4 文化王國 x Aeon Mall Okinawa Rycom

~Day 4~

21/4/2018 (Saturday) 雨

酒店 --> おきなわワールド (文化王國．玉泉洞) --> Aeon Mall Okinawa Rycom --> Loisir Spa Tower Naha

7:30 am

一早去浸溫泉... 

呢間酒店唔包早餐, 所以浸完溫泉我地就出發喇... 問屋企人想食咩, 佢地話去麥當勞...

[2018 日本．沖縄] Day 3 可愛菠蘿園 x 海中展望塔

~Day 3~

20/4/2018 (Friday) 晴

酒店 --> ナゴパイナップルパーク (名護菠蘿園) --> 海中展望塔 --> 美國村 --> Loisir Spa Tower Naha

7:30 am

一早醒來, 準備去吃早餐... 一睇就知冇 Sheraton 酒店既咁正 >.<

[2018 日本．沖縄] Day 2 古宇利島 x 沖縄美ら海水族館

~Day 2~

19/4/2018 (Thursday) 晴

酒店 --> 古宇利島 --> 心形岩 --> 古宇利大橋 --> 沖縄美ら海水族館 --> Hotel Mahaina Wellness Resorts Okinawa

7:15 am

訓醒覺望出酒店就見到個好靚既沙灘, 不過游水前要落酒店餐廳食 buffet 早餐先... 

[2018 日本．沖縄] Day 1 家族旅行出發．首次踏足沖縄

~Day 1~

18/4/2018 (Wednesday) 香港 --- 晴, 那霸 --- 晴

香港 --> 那霸空港 --> 座喜味城跡 --> 殘波岬 --> 真榮田岬 --> 萬座毛 --> Sheraton Okinawa Sunmarina Resort

5:15 am

期待左好耐既全家族之旅出發喇, 之前果晚仲話驚大家唔知醒, 原來我係最後一個起身 :p 一早 call 左車去機場, 司機好準時黎到...

好快就到左機場, 第一次 check in 要寄 bb 車 :p

2018 April 日本．沖縄悠閒 5 天自駕遊 - 行程規劃

~日本．沖縄 (那霸、恩納、名護)．悠閒五天自駕遊~

日期: 18/4/2018 - 22/4/2018

帶阿媽阿妹一齊去旅行都有好幾次 , 今次更係首次全家人一齊出動, 連埋細佬一家人, 黎個真正既家族旅行。其實係因為細佬個女, 即係我姪女晴晴好乖, 咁我呢個大姑姐就想係晴晴番學前同佢去旅行玩下咁啦... 但又要考慮到佢咁細個, 去得遠唔方便, 行程太豐富又唔太適合, 思前想後我就提議去日本沖繩... 大家一向對我呢個領隊兼導遊都非常滿意, 有我安排咁大家都唔會反對, 咁我就著手去計劃呢個家旅沖繩自駕遊。加埋踏上沖繩既領土, 我既旅遊足跡已遍佈日本全國既九大區域喇：北海道、東北、關東、中部、近畿、中國、四國、九州、沖繩。

由於同屋企人同行, 今次仲要有個歲半既 bb 同行, 行程唔敢去得太盡, 只想屋企人可以睇到大自然靚景、享受日本美食、浸下溫泉, 好好咁享受呢個自駕遊！整個行程, 由那霸機場開始租車, 直接駛向中部既恩納, 去人氣景點殘波岬同萬座毛睇下沿海既風景, 之後再上北部既名護, 除左必去既水族館, 仲去左古宇利島既心形岩... 之後再返回中部水中展望塔同坐海底玻璃船睇魚魚, 唔少得既仲有人氣景點 Aeon Mall 同美國村, 最後就返回那霸機場還車結束豐富既行程喇。

後記
整個自駕之旅, 大家都玩得非常開心, 皆因靚景、陽光與海灘、溫泉、美食樣樣有齊！沖縄係一個渡假勝地, 喜愛陽光與海灘同 relax 既你一定會喜歡。說真的, 我自已並不特別鍾意, 但黎過之後, 不得不承認, 呢度確係幾適合同小朋友黎既... 沖繩大部分既酒店都有私人既沙灘或泳池, 亦有好多兒童遊樂設施, 同小朋友留係酒店都可玩足一整天... 除此之外仲有水族館, 菠蘿園亦不錯, 晴晴最鍾意就係渣菠蘿車車... 另外亦感恩有好天氣, 只是去到第四天開始下雨, 迫住取消去蒲添大公園同國際通既行程...

之前未黎過沖縄, 偶爾會聽到人說沖縄唔係咁似日本, 今次親身踏足呢個地方, 係既, 呢度一啲都唔似日本本州... 去慣日本本州既我都有啲唔慣, 呢度既 service, 不論係大酒店定餐廳, 都不太好... 或者咁講, 根本唔係差, 只係我地去慣既日本實在太完美了... 除左 service, 食文化亦不大相同... 不過美食仍然係有既, 沖繩既阿古豬、石垣牛、全世界第二好味既雪糕菠蘿包, 仲有就係臨走都要 encore 既沖縄限定炸蝦飯團。總結整個旅程, 家人都玩得好開心, 雖然帶住小朋友同行, 但晴晴好乖, 完全冇影響我地既行程... 回來後一講菠蘿車車, 晴晴仲即刻指住幅相... 好啦, 等晴晴大個啲大姑姐再帶你去旅行啦！

[2018 海の京都．櫻花] Day 4 賞櫻殺科．大阪城 x Gram 朝聖

~Day 4~

2/4/2018 (Monday) 晴

大阪 --> 大阪城公園 --> 關西國際空港 --> 香港

8:30 am

酒店唔包早餐, 所以訓晏少少...

9:30 am
早上既行程就是參觀大阪城公園, 順道去人氣 Gram & Pancake 食早餐, 從酒店走到大板城公園...

[2018 海の京都．櫻花] Day 3 繼續追櫻．美山合掌村 x 哲學の道

~Day 3~

1/4/2018 (Sunday) 晴

美山町 --> かやぶきの里 (美山草屋之里) --> 京都．哲學之道 --> 清水寺 --> (大阪府) 道頓崛、心齋橋 --> ホテル モントレラ・スール

7:00 am

一早又再浸溫泉... 浸完溫泉就去食早餐, 我記得個玉子好好食...

[2018 海の京都．櫻花] Day 2 海の京都．伊根の舟屋 x 日本三景天橋立

~Day 2~

31/3/2018 (Saturday) 晴

城崎溫泉 --> (京都府) 伊根町．伊根の舟屋 --> 天橋立 --> 美山町 --> 料理旅館 枕川楼

7:00 am

昨晚去左七個外湯既其中一個, 今朝就去最近酒店既一個啦, 真係好近, 就係酒店隔離既地藏湯...

[2018 海の京都．櫻花] Day 1 孝親追櫻之旅．姬路城 x 城崎溫泉

~Day 1~

30/3/2018 (Friday) 香港 --- 晴, 日本 --- 晴

香港 --> 關西國際空港 --> (兵庫縣) 姬路城 --> 城崎溫泉 --> 四季香る宿　いちだや

11:00 pm

今次係孝親團, 帶阿媽去睇櫻花, 冇阿妹份 >.< 因為去得4天, 景點又比較遠, 為左多啲時間玩, 問阿媽坐凌晨機怕唔怕辛苦, 佢話 no problem... 於是我地就係星期四晚出發去機場喇...

2018 March 日本．海の京都．4 天櫻花自駕遊 - 行程規劃

~日本．海の京都 (姬路、城崎、伊根、天橋立、美山、京都、大阪)．四天櫻花自駕遊~

日期: 30/3/2018 - 2/4/2018

三月中剛跑完名古屋馬拉松, 咁快又飛？係咁既, 因為跑馬拉松之後少左啲純觀光既 trip, 次次都係為左跑步而出發, 仲要係趕頭趕命咁快閃... 跑完東馬同名馬之後, 真係好想休息下, 見三月尾有幾天復活節假期, 咁岩又同日本既櫻花期撞到正一正, 於是就黎個孝親團, 帶阿媽去賞櫻花啦！

由於同媽媽同行, 行程唔敢去得太盡, 希望以賞櫻花為主, 其次就係享受日本美食、浸下溫泉咁！又因為唔想媽媽辛苦, 所以選擇全程自駕遊。整個行程, 由大阪機場租車開始, 直駛去兵庫縣既姬路城同城崎溫泉, 之後向海の京都進發。看過伊根町船屋、日本三景天橋立同美山町既合掌村秘景之後, 返回京都、大阪再賞櫻花, 然後直駛回大阪機場結束行程。

後記
整個櫻花花見之旅, 原本是有一點點擔心的, 因為得我一個人駕駛, 驚攰啦, 其次係大阪京都這些地方都不太適合駕駛, 最後都同我預期差不多, 大阪京都非常塞車, 而京都搵泊車位亦唔方便, 幸好最後都非常順利, 所有安排好的景點都去哂, 仲要度度都櫻花滿開, 除左賞櫻名所姬路城, 京都既哲學の道同清水寺, 啲櫻花簡直多到茖雪咁·！除左櫻花, 唔少得既就梗係浸溫泉啦, 城崎溫泉確係一個好靚好特別既一個溫泉區, 值得推薦！至於大自然美景, 位於京都府北部既伊根町船屋、天橋立同美山絕對唔會令你失望, 不過確係幾遠, 時間預多點會比較好既！去完天橋立, 連同之前去過既宮城縣松島同廣島既嚴島神社, 日本三景都去齊了。有櫻花, 有靚景, 有溫泉, 仲要帶阿媽去食好野, 阿媽最鍾意食大阪既小丸子, 係道頓堀仲食左兩次 tim... 而我就去左 Gram & Pancake 朝聖, 食左個每日限定發售既人氣梳乎厘 pancake 囉！最後感恩的是, 4天天氣都好好, 每日都係藍天白雲, 阿媽玩得好開心, 番黎仲多左一輯個人櫻花寫真集！

[2018 日本．名古屋女子馬拉松] 再度PB．等開跑已感動既女子馬拉松

~Day 1~
10/3/2018 (Saturday) 香港 --- 晴, 名古屋 --- 晴

香港 --> 關西國際空港 --> 名古屋 --> 東スポーツセンター (領取選手包) --> 名古屋ドーム (Marathon Expo) --> 名古屋城 --> 栄 --> アパホテル＜名古屋栄＞

11:30 pm

9號晚搭巴士出發到機場...

桃子航空冇 online check in 既, 所以就算冇寄倉行理都要去櫃枱 check in, 咁我記得之前搭過 Peach 既 check in counter 係喺 Terminal 2, 咁就係 T2 落車... 點知望望個水牌, 點解會變左 T1 架... 於是就要由 T2 行番去 T1, 真係運吉 >.<

好快咁過左關, 到 lounge 加定碳先 :p...

2018 March 日本．名古屋女子馬拉松 2 天快閃遊 － 行程規劃

~日本．名古屋女子馬拉松2天快閃遊~

日期: 10/3/2018 - 11/3/2018

如果大家有捧下小妹個 blog 場的話, 都知我2016年同跑友跑左個名古屋半馬... 果年因為報唔切名, 最後只係去左跑半馬, 跑完先知原來連完成牌都冇, 仲激死小妹 tim... 到左2017年因為3月去左跑鹿児島同首爾馬, 而4月又要去跑倫敦馬拉松, 結果又同名古屋女子馬拉松無緣... 直至今年, 計劃左既只有2月既東京馬拉松, 到左名馬既報名開始, 要抽籤 (跑友話之前唔駛, 可能越黎越多人報名了), 抽中先俾錢, 咁就抽左先啦... 上年十月頭公布結果, 又抽中左, 好野... 今次真係有 Tiffany 頸鏈喇 (完走的話 :p...)！

同東馬一樣, 想快閃得黎又唔好咁辛苦, 所以本身既計劃係同東馬一樣, 星期五晚夜機, 星期一走既... 而去程名古屋冇夜機, 所以就夜機去大阪, 再搭火車過名古屋, 回程就名古屋回港啦... 好喇, book 埋酒店一心等出發... 點知... 臨到三月時, 老細又話跑完果日即12/3有野要做, 唔俾我放假... 咁點好呢？諗左幾日, 本來諗住唔去既, 反正咁多馬, 要跑你驚冇得跑咩... 但個心又心思思, 諗起冇左條 Tiffany 又好似有啲失落咁, 哈... 加上咁難得抽到 (其實我都好少聽到人話抽唔倒, 哈...), 而報名費都唔平喎, 好啦, 最後都係決定去... 問題來了, 由名古屋回港得國泰同快運, 快運唔駛諗, 2點幾機, 國泰就4點, 以我進步左計, 跑四個幾鐘都未必趕得切... 另外國泰有一班5點經台北回港既, 呢班都有啲機會趕到... 再唔係, 就搭火車番大阪, 大阪大把夜機回港, 但太辛苦了吧... 最衰自已跑馬實力未夠, 唔肯定自已同樣五個鐘內完走, 所以我作左一個重大既決定, 就係唔買回程機票住, 到時睇下跑得快唔快, 快就可以由名古屋回港了, 哈哈！

後記
今次係第十二場全馬, 名古屋女子馬賽道都係出名平坦, 難道不高, 岩哂初馬人士... 不過路線就圍繞名古屋市黎跑, 冇咩特別靚景睇, 有點悶... 同兩年前既名古屋城市半馬唔同, 全馬起點同終點都係名古屋ドーム, 今次亦係第一次係室內場館完走, 衝線後更可以從身穿燕尾服打扮既靚仔手上接到賽事限定既 Tiffany 完賽項鍊... 賽事當日天氣清涼, 但冇東京馬果日咁凍, 對我黎講已有影響喇... 身體好誠實架, 起跑後我已感到當日狀態冇東京馬咁好, 始終兩星期前先走完東京馬咋... 但名古屋馬路線平坦好好走, 頭30K時間仲好過東京馬... 去到30K開始黎料, 又係呢句老套既說話, 30K後才是馬拉松既真正開始... 30K後明顯跌速, 35K時間跌到同東京馬一樣... 但我知道我係得既, 死頂捱到40K, 望一望錶, 仲有啲啲機會 pb 就繼續走... 媽呀, 隻腳好似就斷咁, 心裡面又出現唔想再跑馬拉松既感覺 >.<... 終於見到名古屋ドーム, 仲有400m見仲有機 pb 狂衝呀, 最後以4:23:26完走, pb 左21秒... 雖然只係短短既21秒, 但呢個成績, 係全靠我既意志、堅持而得到既, 我真係好好好開心呀！除左pb之外, 我仲好開心既係, 可以趕得切去名古屋機場搭飛機回港呀, 哈哈！

[2018 日本．馬拉松六大滿貫] PB@東京馬拉松 2018

~Day 1~
24/2/2018 (Saturday) 香港 --- 晴, 日本 --- 晴

香港 --> 羽田國際空港 --> 東京ビッグサイト (領取選手包) -->アパホテル ＜新宿 歌舞伎町タワー＞

10:30 pm

23號晚出發到機場...

冇寄倉行理又好快咁過左關, 到 lounge 加定碳先 :p...

2018 Feb 日本．東京馬拉松 3 天之旅 － 行程規劃

世界六大馬拉松

WORLD MARATHON MAJORS

TOKYO BOSTON LONDON BERLIN CHICAGO NEW YORK CITY

東京マラソン2018

~日本．東京馬拉松 3 天之旅~

日期: 24/2/2018 - 26/2/2018

2017 年既倫敦馬, 令我親身感受到世界六大馬既吸引之處... 由報名後給予跑手既資訊、超大既 Expo、睇到眼都花既紀念品, 到比賽日既交通安排、比賽時既熱烈氣氛等等, 都深深印在我腦海裏... 在跑道兩旁既打氣歡呼聲更令我真正咁享受呢個全馬賽事。倫馬係六大馬之中最難中籤的一個, 其次都應該是東京了, 上年抽不中, 就連報團都話滿哂, 既然咁難報, 而東京既慈善名額亦係最抵玩既, 於是就決定申請慈善名額啦... 大家要留意既係, 申請慈善名額係先到先得並且即時確認的, 確認後就唔可以在公開報名階段再報名了。

申請東馬既慈善名額, 除左捐款門檻不高之外, 亦都唔駛好似倫馬咁麻煩要自已向慈善團體申請, 只要在大會既網頁上申請就可以了。大會首先會開放慈善名額既申請, 先到先得, 大家只需要捐出 100000 yen 再另付報名費就可以了, 就係咁簡單。整個慈善名額申請階段完結, 公開報名才會開始, 所以大家要想清楚是否真的需要申請慈善名額, 否則可以試下抽籤先既... 我識既跑友當中都有人中籤, 難道雖高, 但叫做易中過倫敦馬 :p

日本都先後跑過京都、大阪、福岡, 氣氛好係不用懷疑, 但東馬貴為六大馬之一, 亦都成日聽人講話好正好正, 搞到我真係好鬼期待呢隻東馬呀... 跑東京唔駛 stay behind 玩, 又可以快閃, 不過東京機場離市區較遠, 唔想咁辛苦, 跑完又想浸番個溫泉, 咁就決定留多一日啦, 星期六凌晨機去, 星期一番, 快閃3天！十月時買 HK Express 的機票都只是千多元, 抵！買左機票就睇定酒店喇, 由於東京馬既起點同終點唔同, 起點在新宿既東京都庁, 而終點係東京駅附近, 為左方便跑馬, 起跑前一晚住新宿, 跑完果晚轉東京駅附近既酒店, 跑完行一陣就到酒店, 好正！

後記
今次係第十一隻全馬, 第三隻六大馬... 同倫敦馬、柏林馬比較之下, 我比較喜歡倫敦馬同東京馬, 其次才到出名好跑既柏林馬。倫敦馬整體都不錯, Expo 都好大, 跑完有 Finisher T-shirt, 但我覺得最優勝同吸引我既地方, 一定係現場既氣氛, 唔知係咪西方人都比較熱情, 全程42公里跑到每一個位置都有人在為跑手打氣, 尤記得跑過 Tower Bridge 時果一幕, 真係冇哂力都可以堅持繼續跑。至於柏林, 同樣係六大馬, 但大會比較孤寒囉, 唔好話完賽 T-shirt, 普通跑手 T-shirt 都冇架, 要自已買, 就連比賽用的晶片都要收回, 唔見左要罸錢... Expo 都 ok 大, 賽道係好跑, 但冇咩氣氛的。至於東馬呢, 整體表現平均, 真的如跑友所講, 最優勝係東馬 Expo, 我從未試過行 Expo 行左成四個鐘, 好似好跨張, 行完都冇哂力... 係 Expo 買既野多到唔知點算好, 事關我諗住快閃冇帶喼架 >.< 東馬賽道一樣好跑, 頭10K係落斜, 之後都係平路... 氣氛都非常好, 但以日本馬計, 我個人首推京都馬喎... 

跑到第十一隻馬, 之前一直希望 sub 5 但未能成功, 今次比以往認真一點, 花多左時間去練習, 希望可以成功 pb... 東馬前完成了兩個30km既長課, 覺得狀態不錯, 而東馬舉行當日天氣非常好, 等起跑時氣溫大約4度, 大部分港人應該會覺得凍, 但呢個溫度真係有利於我呀, 我最怕熱架嘛... 真係一如我所料, 起跑頭10K落斜好輕鬆, 跑左半程食件蛋糕仔, 到左25K食包防抽 gel, 去到30K都係三個鐘咋喎, 望住隻錶, 心諗 pb 在望呀, 見到水駅都唔停, 係咁跑, 美食都吸引唔倒我呀, 唯有食包 gel 頂埋最後10K... 去到35K隻腳可以有啲軟, 又食多包防抽 gel, 見到水駅有止痛濟派, 跑住去拎拎完又跑, 一路跑一路噴, 啲鬥志乜解究咁強架喂... 跑到36K, 心諗點解仲未到架, 好辛苦呀... 仲有6K頂埋佢, 呢個時候雖然未到終點, 但眼見自已 pb 在望, 又諗起自已為左呢個東馬既付出, 突然喊左出黎... 跑呀跑, 終於見到終點喇, 第十一隻完走既馬拉松, 以4:23:47完成, pb 36分30秒, 真係好好開心呀！