[2017 加拿大．尼加拉瀑布] Day 9-11 渡假勝地 Mont-Tremblant

~Day 9~

30/12/2017 (Saturday) 蒙特利爾 --- 晴

蒙特利爾 --> 翠湖山莊 Mont-Tremblant --> 蒙特利爾

9:15 am

今早去 Breakfast Club 食 Benedict egg 同 Waffle... Yuki 話呢度好味既鬼佬早餐我都應該試得七七八八架喇喎, 哈哈哈...

[2017 加拿大．尼加拉瀑布] Day 6-8 閒遊首都渥太華 Ottawa x 蒙特利爾市 Montréal

~Day 6~

27/12/2017 (Wednesday) 渥太華 --- 晴

多倫多 --> 渥太華 (Ottawa) --> 蒙特利爾

8:00 am

今日要離開多倫多, 走之前再 encore 多一次藍海早餐... 今日太早, 包場...

[2017 加拿大．尼加拉瀑布] Day 4-5 多倫多．尼加拉瀑布 Niagara Falls

~Day 4~

25/12/2017 (Monday) 多倫多 --- 雪

蒙特利爾 --> 多倫多 (Toronto) --> 尼加拉瀑布 (Niagara falls) --> 多倫多

4:40 am

行過 outlet, 又去左 Quebec City, 今日會渣車落多倫多, 為的是一睹尼加拉瀑布既風采... 由於路途真係非常遙遠, 渣車去約需六小時, 所以天未光就起身, 今次真係辛苦朋友仔喇...

5:15 am
出發, 天未光, 路況好似好差咁 >.<

[2017 加拿大．尼加拉瀑布] Day 1-3 首次踏足北美洲

~Day 1~

22/12/2017 (Friday) 香港 --- 晴

香港 --> 多倫多皮爾遜國際機場 (Toronto Pearson International Airport)

5:30 pm

第一次去北美, 首站係加拿大... 美加呢啲地方, 一直都唔係我個 travel list 既頭幾位, 今次襯聖誕有長假期, 決定去加拿大玩下兼探下老朋友 Yuki, 算唔話得喇掛...

下午早走由公司坐 Uber 到機場, 交通暢順 check in 完仲有時間去 lounge 食野...

2017 Dec 加拿大．蒙特利爾、多倫多．尼加拉瀑布 x 白色聖誕 11 天之旅

~加拿大．蒙特利爾、多倫多．尼加拉瀑布 x 白色聖誕 11 天之旅~

日期: 22/12/2017 - 1/1/2018

又到聖誔又到聖誔, 本身冇咩特別旅行既計劃, 但見老細唔放假, 咁我又唔想浪費左個假期, 於是又諗下去邊 :p 好想去澳洲或新西蘭果面, 但聖誕係旺季, 機票都比較貴, 加上我而家實在懶得 plan 行程... 無意中同個小學同學傾計, 佢小學後已移民左去加拿大, 佢話我成日去旅行, 但都未去過佢果度... 咁加拿大好似無咩好玩咁, 世界咁大, 自然有排都未輪到佢啦... 咁講下講下, 我朋友又話聖誕可以放假帶我去玩, 如果我去呢又可以住係佢度... 咁我諗下又好似幾好喎, 唔駛自已 plan 行程, 去到有當地朋友帶我周圍去, 加上我又未去過北美, 咁就一於去過白色聖誔兼探老朋友啦。

今次真係唔駛自已動手, 我只需要買張機票, 網上做定個 Visa 就可以起程喇。朋友係加拿大既蒙特利爾 (Montréal) 住左好多年, 出發前一個月佢已 plan 左個行程俾我, 主要既城市﹕蒙特利爾 (Montréal)、魁北克市 (Quebec City)、首都渥太華 (Ottawa) 都會在行程之內, 另外會抽2日去多倫多 (Toronto) 睇尼加拉瀑布 (Niagara Falls)。我就梗係冇意見啦, 有人幫我諗埋我真係好滿意 tim 呀！朋友又知道我鍾意食西餐, 佢仲準備帶我去試不同既鬼佬早餐, 即係我至鍾意既三文魚、炒蛋、多士、咖啡咁啦！

後記

首次踏足北美, 繼兩年前去南美之後, 算是最辛苦既旅程, 講緊既係長途機。如上面所講, 北美即係美加呢啲地方, 似乎冇咩好玩, 去完番黎既感覺係, 都真係冇咩好玩, 確係移民既地方。不過朋友住既蒙特利爾都算不錯, 因為是法語區, 整個省都充滿歐洲既色彩, 也有不少好靚既大教堂, 也值得一去既... 至於多倫多嘛, 除了尼加拉瀑布就真係冇咩特別了。至於鬼佬早餐, 就完全合我口味, 不過份量確實好大... 另外比較唔習慣既係, 呢度既人都習慣渣車, 朋友由屋企到對面街餐廳食早餐都要渣車, 咁個人好似唔駛點郁咁... 加上天氣實在又太凍, 係凍到我都唔想行 :p 最後, 黎左10日, 食得超勁多, 但又冇咩行過路咁, 番到香港都唔敢上磅 >.<... 如果下次再黎既話, 最好揀秋天, 冇咁凍又有紅葉睇！

[2017 台北．馬拉松] 邀你一起跑向夢想．台北馬拉松 2017

~Day 1~

16/12/2017 (Saturday) 陰

香港 --> 桃園國際機場 --> 林東芳牛肉麵 --> 花博爭艷館 (領取選手包) --> 寧夏夜市 --> 饒河街觀光夜市 --> Home Hotel

9:15 am
出發喇，與家人一早到機場，先在 lounge 食早餐，然後就乘坐香港航空的航班 BR 2898　飛往台北。飛機餐是一個午餐肉包。

2017 Dec 台北馬拉松 2 天之旅 － 行程規劃

~台北馬拉松 2 天之旅~

日期: 16/12/2017 - 17/12/2017

台北馬拉松係2017年最後一個賽事, 由於9月、11月都分別要跑柏林同福岡馬, 而2018年1月就係香港渣馬既大日子, 所以12月就唔好亂黎喇... 之不過又身痕喎, 上網睇下12月有咩賽事啦, 又咁岩撞正台北馬拉松既報名期, 要抽籤既, 抽到先俾錢, 咁唔理抽左先, 保守啲, 抽個半馬... 真係好彩 (都唔知係唔係好彩...) 又俾我抽中, 台灣咁鬼近, 又可以快閃啦, 再問下屋企人有冇興趣快閃去台灣玩2日兼為我打打氣, 屋企人即刻話好, 咁就即刻做野, 買機票 book 酒店同 plan 行程先。

以 "邀你一起跑向夢想" 為口號既 2017台北馬拉松由台北市政府及中華民國路跑協會主辦, 賽道及跑手成績均獲國際田聯 (IAAF) 認証。今年度除左台灣國內既跑手, 亦都吸引左來自海外50個國家或地區, 共三千多名海外跑手一齊黎參與呢個大型賽事。由於只報左半馬, 都唔駛點練跑, 事前既準備都係集中 plan 行程, 搵美食 :p 由於同屋企人同行, 又要方便屋企人到終點會合我, 所以選了一間在台北101附近的酒店。

後記
好開心, 今次係首次有屋企人同行既海外馬... 今次是第二隻台北半馬, 2016年頭已跑過台北渣打公益馬拉松既半馬賽事, 仲記得當日天氣極度惡劣, 凍到震... 今次天氣相對好好多, 少少凍, 雖落毛毛雨但氣溫非常適合跑馬。唔計天氣因素, 跑過台北渣打半馬同台北半馬後, 我個人比較推呢個台北半馬。點解呢？首先, 台北渣打半馬朝早5:30am起步, 太早了, 人都未訓醒... 台北半馬朝早7:00am起步, 非常好的一個時間, 日本起步多數9:00am我又覺得太晏了。其次, 台北渣打半馬起點與終點位置不同, 跑完要搭的士番酒店... 台北半馬起點與終點均在台北市政府即台北101附近, 一大班親友們聚集在終點等待跑手回來, 然後爭相以台北101為背景拍照留念, 現場氣氛非常好, 好鬼熱鬧。今次表現中規中矩, 輕鬆完成, 成績不是重點, 最重要是家人都在終點迎接我回來, 為我打氣！

[2017 日本．福岡馬拉松] 兩年總結．第九馬福岡馬拉松 2017 直擊報導

~Day 1~
11/11/2017 (Saturday) 香港 --- 晴, 福岡 --- 陰

香港 --> 福岡空港 --> ふれあい広場 (領取選手包) --> ホテルリソル博多

6:15 am

一早起床, 搭 Uber 好快就去到機場... 上車時司機問: 小姐, 你冇行理既？我答﹕去機場一定要有行理架咩？:p...

已在網上辦理 check in 手續, 加上冇寄倉行理, 今次連 boarding pass 都唔去櫃枱印喇, 直接離境... 時間尚早, 人流唔算好多, 好快就過左海關同入左禁區喇...

6:20 am 到 Plaza Premium Lounge 食早餐...

2017 Nov 日本．福岡馬拉松 2 天之旅 － 行程規劃

跑在城市．跑在海岸．跑向未來
連接兩個城市的一段 42.195km．從福岡到系島

~日本．福岡馬拉松 2 天之旅~

日期: 11/11/2017 - 12/11/2017

到左2017年尾聲喇, 雖然12月還有些比賽, 包括一個10K同兩個半馬, 但全馬可以先黎一個結算。由2013年開始, 跑左4年步, 到左2015年開始參加比賽, 到目前為止, 福岡馬拉松係我第9隻全馬, 亦係繼京都、大阪、鹿児島之後既第4隻日本馬。今年4月時, 偶然看到這個福岡馬拉松剛好開始報名, 由於福岡好近機場, 跑完再回港都唔會太趕... 唔駛請假之餘又可以去我大愛既日本跑, 我諗都冇諗就報名了。

福岡馬拉松為國際田聯 (IAAF) 獲頒既金標賽事之一, 加上福岡是大阪以西人口最多的一個城市, 屬於旅遊區, 所以每年都吸引很多跑手參加... 全馬參賽名額為12,000個, 另外增設300個海外名額, 報名先到先得。報名後就睇機票酒店, 由於福岡已去過, 跑完唔駛再去玩, 加上 HK Express 去福岡既時間實在太好了, 早機去晚機返, 所以索性黎個兩日快閃之旅, 連星期五晚既酒店都慳番 (諗番起3月既首爾馬, 原定星期五下午出發既機 delay 左, 去到首爾酒店已經係凌晨時分, 真係激死...)。酒店就唔好慳, 選了一間位於起點附近的... 就係咁簡單, 所有野都準備好了！

後記
好開心, 今次唔駛孤軍作戰喇... 報名後先知道有班跑友都會去跑福岡, 雖然大家唔係一齊出發一齊回港, 但我到步之後就 join 左佢地一齊食 dinner, 比賽當日亦一齊等上線同回程返福岡... 同京都、大阪、鹿児島既日本馬一樣, 福岡馬既氣氛非常好, 沿途好多市民為跑手打氣, 大會提供既補給站食物豐富, 有生果、蛋糕、紅豆包、烏冬... 至於賽道, 由福岡市沿海岸跑向系島市, 風景不錯, 天氣涼爽亦非常適合跑馬... 不過好可惜, 今次我既狀態唔係幾好, 早在出發前右膝開始痛, 一星期前既運動家10K已就住黎跑... 福岡馬起跑後頭半程還可以, 跑到半程開始腳痛了, 右邊膝蓋感到隱隱作痛, 唔敢跑太快, 去到30K, 左邊腳姆指又起水泡... 好不容易捱到34K有止痛噴霧, 我毫不客氣要了2支, 對住兩隻腳係咁噴... 最後都係走下行下... 憑著意志終於完走了, 成績就真係唔多好喇, 不過跑馬唔一定要快, 亦唔一定要每次都 pb 既... 今次慢慢跑, 反而多左時間欣賞風景, 仲食盡水站既美食... 呢啲都係跑日本馬好珍貴既體驗黎！福岡係今個年度最後一隻全馬, 兩年來完成了九隻全馬, 黎緊都盡量會休息, 希望長跑長友, 2018年繼續加油！

[2017 德國．馬拉松六大滿貫] Day 8-10 羅曼蒂克大道．新天鵝堡 Schloss Neuschwanstein x 慕尼黑啤酒節 Oktoberfest

~Day 8~
30/9/2017 (Saturday) 雨

酒店 --> 新天鵝堡 (Schloss Neuschwanstein) --> 慕尼黑 (München) --> 慕尼黑啤酒節 (Oktoberfest) --> Hotel Luitpold

8:15 am

昨晚岩岩黎到慕尼黑, 成街都係醉酒佬, 對呢度印象麻麻地, 幸好入住既酒店都不錯, 早餐都好正, 啲人又可能鍾意夜浦, 食早餐竟然冇人, 哈...

[2017 德國．馬拉松六大滿貫] Day 6-7 奧地利隱世秘景．歐洲最美湖邊小鎮哈爾斯塔特 Hallstatt x 國王湖 Königssee

~Day 6~
28/9/2017 (Thursday) 晴

酒店 --> 哈爾斯塔特 (Hallstatt) --> 薩爾茲堡 (Salzburg) --> Easyapartments Central

8:00 am

住 apartment 冇早餐食, 走到火車站買早餐...

8:15 am
今日行程好輕鬆, 就是哈爾斯塔特 (Hallstatt) 一日遊... Hallstatt 其實只是一個小鎮, 離薩爾茲堡不遠, 但因為交通實在太不方便, 所以都要預一天既時間... 去 Hallstatt 有兩個方法, 第一是搭火車再搭船, 第二就係搭巴士, 不過要轉兩次車 >.<... 兩個方法都係咁煩架喇, 最後決定搭巴士, 因為 apartment 樓下就係巴士站, 而轉車都很簡單, 就在相同車站等車就可以了...

在 apartment 樓下的巴士站, 搭 150 號巴士...

[2017 德國．馬拉松六大滿貫] Day 4-5 童話王國．羅曼蒂克 x 古堡大道

~Day 4~
26/9/2017 (Tuesday) 晴

酒店 --> 符茲堡 (Würzburg) --> 舊城區散策 --> 羅騰堡 (Rothenburg) --> 舊城區散策 --> 符茲堡 --> Hotel Amberger

8:30 am

吃個豐富早餐, 今日要開始一連兩天既羅曼蒂克大道同古堡大道之旅, 兩日會合共走訪四大古堡﹕符茲堡、羅騰堡、班堡同紐倫堡...

[2017 德國．馬拉松六大滿貫] Day 1-3 全球最快賽道．柏林馬拉松 2017

~Day 1~
23/9/2017 (Friday) 香港 --- 晴, 柏林 --- 晴

香港 --> 赫爾辛基萬塔機場 (Helsinki Airport) --> 柏林布蘭登堡機場 (Tegel Airport) --> 柏林 (Berlin) --> Berlin Vital Expo (領取選手包) --> 東邊畫廊 (East Side Gallery) --> City Partner Hotel am Gendamenmarkt

11:00 pm

六大馬歐洲之旅出發喇, 好興奮呀... 放工後回家吃飯, 洗澡, 執好行理就出發去機場...

2017 Sept 德國．柏林馬拉松 x 古堡大道 10 天之旅 - 行程規劃

世界六大馬拉松

WORLD MARATHON MAJORS

TOKYO BOSTON LONDON BERLIN CHICAGO NEW YORK CITY

2017 BMW BERLIN MARATHON

~德國．柏林馬拉松 x 古堡大道 10 天之旅~

日期: 23/9/2017 - 2/10/2017

自從成功爭取到倫敦馬拉松既慈善名額後, 完成六大馬拉松既目標已出現在心中... 當然只係想, 知道要達成呢個目標真係唔容易, 但試下再接再厲, 經過網上抽籤唔中 >.<, 慈善名額唔算貴喎, 索性申請慈善名額, 柏林馬唔同倫敦馬, 申請門檻明顯冇咁高, 只需捐款700歐羅就搞掂, 而家歐羅抵, 都可接受！

其實報名時倫敦馬還未跑的, 後來既4月倫敦馬, 因為請唔倒假, 只是快閃了倫敦4天, 到左呢個柏林馬, 點都要去番次歐遊啦... 德國係我一直好想去的國家, 今次打算來一次德國深度遊, 順道跑埋柏林馬, 真係 perfect 喇！確定左假期之後, 買了芬蘭航空機票, 德國柏林入, 慕尼黑走, 不走回頭路, 由德國既北部玩到南部！

買機票後, 就開始計劃行程喇, 話就話今次請到假, 但都只係去10天咋, 打工仔嘛, 已算好好架喇... 10天要跑一隻馬, 仲想德國深度遊, 似乎又大想頭左啲, 因為德國實在太大喇... 參考左好多行程建議, 睇過好多網友既遊記, 最後決定來一個古堡之旅... 由柏林開始, 沿住羅曼蒂克同古堡大道, 一路玩落慕尼黑... 不過德國有實在太多古堡, 好多個都好想去, 實在唔夠時間呢... 睇下睇下, 發現奧地利西面既薩爾茲堡原來好近慕尼黑, 咁咪可以順道去一去人氣超高企既哈爾斯塔特？徵詢埋網友既意見, 網友又極力推薦去國王湖, 真係十五十六, 好難搞 >.<... 最後再三考慮, 精挑細算數個上榜既古堡, 鐵定了以下行程﹕

(德國) 柏林 --> 符茲堡 --> 羅騰堡 --> 班堡 --> 紐倫堡 --> (奧地利) 哈爾斯塔特 --> (德國) 國王湖 --> (奧地利) 薩爾茲堡 --> (德國) 新天鵝堡 --> 慕尼黑 --> 香港

行程橫越德國及奧地利兩國, 沿著有名的羅曼蒂克及古堡大道, 走訪了六大古堡, 其中三個及哈爾斯塔特更是世界文化遺產。

後記
作為世界六大馬拉松之一, 亦是有名的 PB 馬拉松, 但感覺比倫馬遜色得多, 唯一值得推薦的地方, 確是它的賽道... 作為專業跑手, 想創造自已的 PB 就黎啦, 全程平路, 係易走的... 但說到氣氛, 同倫馬差太遠了... 今次是我第八個完走既馬拉松, 由於冇操練, 冇寄望成績只望完走, 最後不過不失, 以 5:02 既成績完成賽事, 比倫敦馬還快了3分鐘...

完成柏林馬後, 順道遊覽德國同奧地利, 一如自已所料, 大路野係要去, 但不一定係最正, 去了六大古堡, 最喜歡的是班堡, 其次是羅騰堡, 反之最大路既紐倫堡, 唔係唔好, 只是實在太商業化了, 我比較喜歡具有原始風貌, 寧靜且純樸既古城多一點... 其次, 放棄了一些德國景點, 選擇抽2天時間去奧地利既哈爾斯塔特同國王湖, 呢個絕對係明智既決定, 全歐洲最美既湖邊小鎮, 一生人必要去一次既仙境國王湖, 絕非浪得虛名, 襯它們仍保留著原始風貌, 大家都快點去欣賞一下吧！

2017 Aug 中國．青島西海岸夜間國際馬拉松 5 天之旅

~中國．青島西海岸夜間國際馬拉松 5 天之旅~

日期: 26/8/2017 - 30/8/2017

今年確係去左唔少旅行, 五月去過北海道睇芝櫻, 七月又岩岩去完北海道睇薰衣草, 黎緊九月會去德國跑柏林馬拉松, 十一月就快閃福岡馬拉松, 八月本身係冇計劃的... 就係呢個時候, 有班跑友計劃八月尾去青島跑半馬, 問我有冇興趣... 本身行程真係太密, 七月同九月都要放長假, 我驚老細唔俾我再放八月啦... 不過諗諗下, 我本身未去過青島喎, 其實都想去好耐既, 加上番大陸跑馬又真係要搵人陪, 我自已係唔會去架嘛, 於是就試下同老細請假啦, 老細又好好人肯放喎... 就係咁, 今次好開心可以同一大班跑友一齊去跑馬拉松兼暢遊青島喇...

後記

今次真係超開心, 可以同一大班跑友去玩, 最最最緊要既係, 今次唔駛我自已去 plan 丫嘛... 今次既行程, book 酒店包車同每日既午餐同晚餐, 都係由一位跑友東哥一手包辦, 我就好似跟團咁, 只需帶個人去就 ok 喇, 嘻嘻！

第一次番大陸跑, 仲要係夜晚跑, 感覺都不錯, 啤酒節會場好熱鬧, 跑道佈置漂亮, 青島人普遍有禮, 等起跑到開跑都冇你推我撞既情況... 至於青島市, 整個城市保留著很多歐式建築, 歷史價值豐富, 街道整潔, 風景怡人, 係沙灘晨跑時仲差點以為自已係日本, 確係不錯的一個中國城市, 值得一去！不過今次去既景點不多, 希望下次再去時可以慢慢欣賞呢個咁漂亮既海港城市！

[2017 北海道．薰衣草] Day 7-8 世界自然遺產．人間仙境知床五湖

~Day 7~

28/7/2017 (Friday) 日本 --- 雨

知床 --> 知床五湖 --> 知床峠 --> 網走監獄 --> 佐呂間湖 --> 船長の家

7:15 am
一早起來又浸溫泉...

8:30 am
阿妹話今晚冇大酒店住, 所以浸耐左, 阿媽等唔耐煩自已走左去食早餐, 但又唔講低真係激死人...

[2017 北海道．薰衣草] Day 5-6 純樸且神秘既道東三湖

~Day 5~

26/7/2017 (Wednesday) 日本 --- 晴

層雲峽 --> 黑岳五/七合目 --> 流星．銀河の滝 --> 阿寒湖 -->あかん 遊久の里鶴雅

7:00 am
一早起來又浸溫泉...

8:00 am
浸完溫泉嘆 buffet 早餐, 道東的大酒店都是一樣, 晚餐 buffet, 早餐也是 buffet...

[2017 北海道．薰衣草] Day 3-4 薰衣草七色花田 x 全景拼布之路

~Day 3~

24/7/2017 (Monday) 日本 --- 晴

札幌 --> 富良野．果醬園、芝士工房、彩香の里、町營薰衣草園 --> 美馬牛 --> 旅の宿 Mr. GNU

7:10 am
一早起來又浸溫泉...

今日向道央既富良野進發, 展開2天既花見之旅... check out 後走到酒店附近的 Toyota 札幌駅南口店取車...

[2017 北海道．薰衣草] Day 1-2 家族旅行再度出發．重遊札幌小樽

~Day 1~

22/7/2017 (Saturday) 香港 --- 晴, 日本 --- 晴

香港 --> 關西國際空港 --> 新千歲空港--> 札幌 --> ホテル 京阪札幌

1:45 am

期待已久既家族北海道花見之旅終於出發喇, 乘坐國泰航空 CX 566 航班飛往關西國際空港...

2017 July 日本．北海道 (道央、道東) 薰衣草花見 8 天自駕遊 - 行程規劃

~日本．北海道 (札幌、小樽、富良野、美瑛、層雲峽、道東三湖、網走、知床)．薰衣草花見八天自駕遊~

日期: 22/7/2017 - 29/7/2017

一年一度既家族之旅又黎喇, 繼上年10月既東京立山黑部之旅後, 今年決定帶屋企人去北海道睇薰衣草... 計劃行程時, 我就梗係想去啲未去過的地方, 但家人未去過, 咁冇理由唔去札幌小樽架, 景點就實會重覆, 睇下點取捨啦... 諗番2006年既夏の北海道花見之旅, 當時去了道央加道南, 完成富良野美瑛花見後就殺落登別同函館... 至於2011年既冬の北海道雪祭之旅就去了首央加道東, 由札幌、層雲峽、川湯一路到知床... 今次就將呢兩個 trip 既行程混合埋一齊, 互補其短... 由於雪祭之旅主要睇雪祭, 未能真正享受夏天既道東美景, 所以今次既行程就由札幌玩到道央既富良野美瑛, 睇完花花之後就向道東既層雲峽、道東三湖同知床半島進發, 好好咁欣賞夏の北海道限定既大自然景色！

行程由札幌小樽開始, 在札幌小樽市散策, 睇過時計台、小樽運河後, 租車前往道央開始2天既花見之旅。由町營薰衣草園、富田農場到四季彩之丘, 一大片既薰衣草園同七色花田都不斷令人謀殺菲林, 好彩而家唔駛一定要曬相姐 :p... 完成上半部道央既花見之旅後, 就展開下半部道東既大自然之旅, 由層雲峽大雪山, 經過道東三湖 (阿寒湖、屈斜路湖、摩周湖), 再去網走以及世界自然遺產知床半島。最後在女滿別空港還車乘內陸機回札幌。

後記
第四次去北海道, 北海道確係有它的魅力, 一年四季各具特色, 幾時去都咁正... 首次同屋企人去8日既 long trip, 行程安排鬆動, 屋企人欣賞到靚靚薰衣草同七色花田, 又睇到道東三湖同知床半島既絕美景色, 真係只得一個字形容﹕正！其實呢個 trip 駛費不少, 但屋企人開心就好了。

[2017 北海道．芝桜] Day 6 日本最北端の地．宗谷岬

~Day 6~

1/6/2017 (Thursday) 晴

稚內 --> 宗谷岬公園 --> 稚內空港 --> 羽田空港 --> 成田空港 --> 香港

8:30 am

Good morning, 展開最後一天行程...

[2017 北海道．芝桜] Day 5 白の戀人．利尻岳

~Day 5~

31/5/2017 (Wednesday) 陰

稚內 --> 利尻島 --> 姫沼 --> 野塚展望台 --> オタドマリ沼 --> 仙法志御崎公園 --> 人面岩．寝熊の岩 --> 稚內天然溫泉 天北の湯ドーミーイン 稚內

7:00 am

今日又再一早出發, 向利尻島進發...

[2017 北海道．芝桜] Day 4 日本最北の島．花の島礼文島

~Day 4~

30/5/2017 (Tuesday) 晴

稚內 --> 礼文島 --> 西上泊．スカイ岬 --> スコトン岬 --> 桃台猫台 --> 北のカナリアパーク --> 稚內 --> 北防波堤 ドーム --> ノシャップ岬 --> 天然溫泉 天北の湯ドーミーイン 稚內

6:00 am

稚內既酒店選擇不多, 呢間 Dormy Inn 好多台灣人住, 為的是佢既酒店早餐... 原來稚內既 Dormy Inn 酒店早餐有自制新鮮海鮮丼, 不過好可惜, 我呢兩日都要一早出發, 坐船去礼文同利尻呢兩個外島, 無緣一試喇...

由酒店走到稚內港 フェリーターミナル, 中途買早餐...

[2017 北海道．芝桜] Day 3 花見之旅追加．鬱金香まつり

~Day 3~

29/5/2017 (Monday) 晴

遠軽町 --> 上湧別鬱金香公園 --> 芝ざくら滝上公園 --> 稚內 --> 宗谷岬 --> 稚內駅 --> 天然溫泉 天北の湯ドーミーイン 稚內

9:20 am

吃早餐...

[2017 北海道．芝桜] Day 2 花見之旅主菜．芝桜まつり

~Day 2~

28/5/2017 (Sunday) 雨

北見 --> 東藻琴芝桜公園 --> ひがしもこと 乳酪館 --> 網走湖 --> 能取岬 --> 能取湖 --> 佐呂間湖 --> 遠軽町 --> ホテルサンシャイン

8:40 am

訓醒一覺精神哂, 食埋個早餐就真係 very good 喇... 呢間酒店價錢平, 但早餐好正, 選擇多, 味道又好, 推薦呀！

[2017 北海道．芝桜] Day 1 花見之旅頭炮．滝川菜の花まつり

~Day 1~

27/5/2017 (Saturday) 香港 --- 晴, 日本 --- 雨

香港 --> 羽田空港 --> 旭川空港 --> 滝川菜の花 --> 北見天然溫泉 ホテルルートイン Grand北見駅前

11:00 pm

又唔係旺季, 唔知做乜鬼 lounge 咁鬼多人, 可能啲人去歐洲多...

2017 May 日本．北海道 (道東、道北) 芝桜花見 6 天自駕遊 - 行程規劃

~日本．北海道 (滝川、網走、滝上、稚內、礼文、利尻)．芝桜花見六天自駕遊~

日期: 27/5/2017 - 1/6/2017

今趟花見之旅原本不在本人既計劃內, 有留意小妹既 blog, 應該都知我4月岩岩去完倫敦跑左個六大馬, 亦都應該知道那次是快閃之旅, 原因係老細唔俾放長假... 去到五月, 老細可能知我4月個大假泡了湯, 突然同我講, 五月尾呢段時間好似冇咩特別野, 你想放假就放啦... 嘩, 老細竟然咁主動開口叫我放假, 咁我就梗係放啦... 由於一早已 plan 左7月同屋企人去北海道賞花, 咁我就諗下5月尾去邊好啦... 諗過去歐洲, 但又冇邊個國家特別想去, 又諗過去南澳, 但果面冬天又不太適合... 最後, 又係家鄉日本勝出:p 除左紅葉之外, 一直都想睇芝櫻, 而5-6月正正係芝櫻盛開既季節, 一於番鄉下, yeah！

唔止芝櫻, 5月尾出發仲可以趕得切睇到滝川既油菜花同滝上町既鬱金香... 花見之旅過後, 打算去道北既稚內, 同埋稚內兩個離島﹕礼文同利尻。呢個路線比較難搞, 因為賞花本身交通不便, 芝櫻公園同上湧別鬱金香公園都唔近火車站,  宗谷區域既稚內、礼文同利尻又係交通不便既... 自駕遊當然好啦, 但自已一個人租車成本高, 加上由道央去稚內實在太遠, 自已一個人渣車又驚太攰... 最初既方案係, 先租車去睇花, 然後還車搭火車上稚內, 但睇花尾站係滝上町, 搭火車上稚內要返回旭川, 咁又太轉折... 又諗過調轉, 先去睇芝櫻, 最後再去滝川睇油菜花, 但因為油菜花期到左5月尾已是尾聲, 所以一定要去睇油菜花先... 諗左好耐都搞唔掂, 好啦, 唔好煩, 自駕遊咁方便有咩好諗呢, 一於全程租車, 最後鐵定行程係旭川入, 稚內走。行程上半部係道東花見之旅, 下半部係道北探索之旅。飛抵旭川後租車去滝川、網走、滝上町, 然後渣車上稚內。至於礼文同利尻島, 連車坐船既票價實在貴得驚人, 所以會坐船, 最後在稚內空港還車。

後記
第三次去北海道, 但就有好多個第一次... 第一次係日本睇油菜花、芝櫻同鬱金香, 第一次踏上日本既宗谷地區, 第一次遠征日本最北端既礼文同利尻島, 第一次一個人完成日本自駕遊... 完成呢趟花見之旅後, 除左i能一償心願, 欣賞到好靚靚既花花同芝櫻之外, 仲欣賞到日本最北端礼文同利尻島既美麗景色... 至於美食方面, 當然冇東京大阪咁多選擇, 但旅程中吃過既宗谷和牛、礼文島既海鮮丼, 仲有北海道先有既三文魚飯團, 亦都令人大滿足！

[2017 英國．馬拉松六大滿貫]「跑者殿堂」．倫敦馬拉松 2017 直擊報導

~Day 1~
21/4/2017 (Friday) 香港 --- 晴, 倫敦 --- 晴

香港 --> 倫敦希斯路機場 --> 溫莎 Windsor --> 溫莎堡 Windsor Castle --> 倫敦國際會議展覽中心 ExCeL London (領取選手包) --> Queen's Theatre: LES MISÉRABLES --> Flemings Mayfair

11:00 pm

嚴格黎講, 20號晚就要出發, 本身是以亞洲萬里通換了11:55 pm 出發的 CX 251 機位的, 但朝早番工時收到國泰通知, 航班將會 delay 半小時出發, 即 12:25 am...

放工後回家吃飯, 洗澡, 執好行理 (由於跑完就走, 索性帶個背囊就算 :p) 就搭 Uber 去機場... 到左國泰既登記區域, 因已在網上辦理 check in 手續, 加上我係冇寄倉行理, 咁我直接於自助 check in 機印番張 boarding pass 出黎就離境喇 (其實網上 check in 左可以自已印埋張 boarding pass 又或者選擇係手提電話接收電子 boarding pass, 如果好似我咁連寄倉行理都冇既, 就可以直接出境)。

2017 April 英國．倫敦馬拉松 4 天之旅 － 行程規劃

世界六大馬拉松

WORLD MARATHON MAJORS

TOKYO BOSTON LONDON BERLIN CHICAGO NEW YORK CITY

2017 VIRGIN MONEY LONDON MARATHON

~英國．倫敦馬拉松 4 天之旅~

日期: 21/4/2017 - 24/4/2017

2013 年, 我既人生經歷左重大改變, 傷過, 痛過, 跌過... 路還是要繼續走... 同年, 我開始了跑步... 2015 年, 我跑了人生頭兩個半馬 (i.e. 澳洲 Ayers Rock 同新加坡渣馬)... 2016 年, 原以為自已未夠班, 在朋友鼓勵下, 完成了人生第一隻初馬﹕香港渣馬... 自此, 酷愛旅遊既我就展開左我既世界馬拉松之旅... 喂, 講到好似跑完全世界咁, 哈哈... 其實只係一年咁大把, 2016 總共跑了 4 個全馬 (i.e. 香港渣馬、京都、莫斯科同大阪馬)。人有個特質, 做每一樣野, 初時都有團火, 好有熱誠, 好有動力, 但可以維持幾耐, 冇人知... 加上跑馬拉松呢項挑戰人類體能極限既運動, 我真係唔知自已可以堅持幾耐... 但至少, 係呢一刻我團火就好勁, 又無意中聽到啲跑友話抽唔倒倫敦馬拉松, 好奇既我又上網搵下資料... 原來呢個倫敦馬來頭真不少, 貴為世界六大馬拉松之一, 仲係傳說中中籤率最低既六大馬, 有跑友仲話跑到跑唔郁都未抽到... 嘩, 講到跑倫敦馬係一個咁難能可貴既經歷, 我又點可以放過爭取參與其中既機會！

大抽獎唔中 (其實我都冇抽 :p) 但又想參賽, 最簡單不外乎呢兩個方法﹕申請慈善名額或報旅行社馬拉松團... 事實上, 作為六大馬拉松之一的倫敦馬拉松是目前世界上慈善募款金額最高的運動賽事, 從首屆舉辦以來已募集上億英鎊的善款, 亦都因為預留左大部分慈善名額, 大大降低左大抽獎中籤的機會... 想得到一個慈善名額要向大會指定的慈善團體提出申請... 我花了數天時間, 瀏覽每個慈善團體的資料, 他們的背景啦, 會拿捐款去做什麼啦, 當然最最最重要的是, 他們設定的募款金額... 由於太花時間既關係, 初時係隨意選了幾個就申請了, 但收到的回覆竟是名額已滿 >.< 好啦, 唯有繼續睇, 睇岩既又申請啦, 我都唔記得填左幾多張申請表了... 終於, 係年底有一個幫助英國失明兒童的慈善團體 VICTA 回覆了我, 表示可分配一個慈善名額俾我... 嘩, 實在太好了, 因為終於唔駛煩喇... VICTA 設定的募款金額為 1350 英磅, 呢個金額當然唔係細數目, 但總算係做善事, 跑都跑得有意義, 又比報旅行團平！決定接受呢個 offer 之後就要繳交報名費 100 英磅, 呢 100 英磅可計入為募款金額, 另外還要簽一些文件, 承諾於 2017年6月底或之前要完成募捐活動...

完成所有手續後, 距離比賽有五個月時間, 可以慢慢計劃行程... 飛到咁遠跑, 我就梗係唔會放過順道去旅行既機會啦... 一早 mark 左四月尾到五月頭既大假, 打算跑完黎一趟歐洲之旅... 但好景不常, 去到大約二、三月的時候, 工作上出現了變數, 老闆已暗示那段時間未必可以放假 >.< 呢個真係一個壞消息呀, 咁難得爭取到一個跑倫敦馬既名額, 而家話冇得放大假, 咁仲去唔去好呢？真係好鬼煩呀, 四月飛倫敦既機票唔平, 連埋慈善捐款 (冇人捐就要自已俾架啦), 飛過去跑一跑真係貴到爆喎... 考慮左好耐, 正正因為請唔倒假, 之後工作可能更忙, 今年唔去下年一樣可能冇假, 又或者連慈善名額都申請唔倒... 加上跑馬既熱誠, 唔知維持幾耐架嘛... 直到四月, 仍然唔捨得出手買機票, 但見到國泰放左啲 Asia miles 機位出黎, 去得果幾日換機票都係唔抵架喇, 但始終冇咁傷... 最後, 決定以 Asia miles 換機票, 降低成本。同公司請了兩天假, 星期五凌晨出發, 星期一抵港, 今次係一趟唔想, 但無辦法唔快閃既六大馬之旅！

後記
作為世界六大馬拉松之一, 亦是最大的慈善馬拉松, 幾乎有2/3的名額都落入慈善團體手中, 亦令到呢個六大馬成為全球最難中籤既一個賽事... 因為我既執著, 為左要完成呢個全球跑手都夢寐以求既賽事, 諗都唔諗就走去申請左個慈善名額 (又俾我爭取到 ^.^), 即使放唔倒大假, 又諗都唔諗就飛左過去英國... 跑完了, 我而家可以同大家講, 真係好正, 係堅正！倫敦馬在每年4月下旬舉行, 天氣非常好, 是跑馬季節, 加上寬闊既場地、景色優美既路線、非常熱情既觀眾、排山倒海般既歡呼聲, 這一切一切都深深吸引著那些馬拉松資深跑手。上面提到2016年的戰績, 其實係2017年頭, 在跑倫敦馬前又完成多兩個全馬 (i.e. 鹿児島同首爾馬), 今次是我第七個完走既馬拉松, 論成績不及首爾馬, 以 5:05 既成績完成賽事, 但時間絕非是今次的重點... 話說跑完首爾馬, 即使 pb 左但都好唔開心, 反之今次未能 pb 但心情就好唔同, 首次覺得自已係享受個過程... 去到尾段, 同以往一樣, 已冇咩力水, 但沿途熱情既觀眾係咁同你打氣, 又令你有動力繼續跑落去... 果種熱烈既程度, 係當你無論跑到邊度, 都會以為自已係奧運選手正要衝線咁架... 之前覺得日本馬正, 原來呢個仲正, 真不愧為世界六大馬拉松！

[2017 韓國．首爾馬拉松] 令我學懂謙卑．首爾國際馬拉松 2017 直擊報導

~Day 1~
17/3/2017 (Friday) 香港 --- 晴, 首爾 --- 晴

香港 --> 首爾仁川國際機場 --> a First Myeongdong

1:00 pm

今天請了半日假, 1:00 pm 就可以走人。不過係朝早收到國泰通知, 話航班 delay 一個鐘, 原先 4:40 pm 延誤至 5:40 pm 出發。就係咁, 我就唔駛急於到機場, 由於時間充裕, 唔駛搭機場快線, 就係公司樓下搭機場巴士到機場, 唔駛一個鐘就到左。

2:15 pm
到左國泰既登記區域, 因已在網上辦理 check in 手續, 加上我係冇寄倉行理, 咁我直接於自助 check in 機印番張 boarding pass 出黎就離境喇 (其實網上 check in 左可以自已印埋張 boarding pass 又或者選擇係手提電話接收電子 boarding pass, 如果好似我咁連寄倉行理都冇既, 就可以直接出境)。

到 Plaza Premium Lounge 食 lunch...

2017 March 韓國．首爾國際馬拉松 3 天之旅 － 行程規劃

WHY I RUN SEOUL

~韓國．首爾國際馬拉松 3 天之旅~

日期: 17/3/2017 - 19/3/2017

上兩星期剛完成日本九州之旅, 兼順道參加埋鹿児島馬拉松, 為2017年既跑馬之旅打了個頭陣, 仲 pb 左 tim... 事隔兩星期咋喎, 又跑...？相隔咁短時間, 其實真係有啲離譜咁, 我又不是勁人, 身體都唔知恢唔恢復得切... 其實係咁既, 原本係想睇下遲下復活節果段時間有咩比賽, 點知復活節果期就冇野岩, 反而俾我發現3月中呢個首爾馬拉松... 首爾話哂都係南韓首都, 加上呢個馬拉松係亞洲歷史最悠久既馬拉松賽事, 今年已是第88屆, 亦係國際田聯 (IAAF) 獲頒既金標賽事之一。除此之外, 呢個馬拉松由於賽道平坦, 配合埋3月絕對適合跑馬既天氣、濕度, 一向被外界認為是一場最容易 pb 既賽事... 講到咁, 儲緊馬拉松獎牌既我都為之心動... 唯一令我猶豫既係, 呢場比賽既時限係5小時...

雖然算係大賽, 但報名費只係幾百蚊, 見咁平報左先, 直到3月頭跑完鹿児島馬 pb 左, 雖然成績仍然不能 sub 5, 但總算不遠矣... 我心想, 都已經進步左咁多啦, 加上首爾條賽道真係超平坦, 什至乎大部分都係落斜 tim... 如果完走失敗唔止冇獎牌, 仲連幾千蚊機票酒店錢都蝕埋, 諗到咁我應該可以博一博... 好啦, 上網買機票, 又黎個三天快閃跑馬之旅... 嚴格啲黎講, 應該係屬於兩天半, 因為星期五只請半天假 ＠＠！

後記
一如所料, 3月既首爾天氣非常好, 溫度適中, 濕度低, 對跑馬有利... 而賽道真係好平坦, 幾乎冇高低差咁濟, 我亦都成功完走兼集郵, 最後以 5:00:17 既成績衝線, 又 PB 了! 雖然成功取得獎牌, 又有 pb... 不過今次跑完反而係最唔開心的一次... 一條咁好跑既賽道, 加上我求進步既鬥志, 我在頭 30K 既 pacing 都係比之前既快, 心想今次唔止 pb, 應該可以 sub 5 tim... 點知係最後果 10K 又出現撞牆, 見到救護就不停要求噴止痛噴霧, 仲忍唔住行左幾百米... 就係咁, 係衝線果刻, 望住個錶, 知道只係爭十幾秒就 sub 5 時, 真係好想喊... 亦都因為咁, 令我明白到實力唔夠就係唔得, 想 sub 5 必須要加強訓練, 冇僥倖可言... 果然, 跑馬係一種堅毅既表現, 亦會令人學懂謙卑！

[2017 南九州．鹿児島馬拉松] Day 5-6 鹿児島馬拉松

~Day 5~

5/3/2017 (Sunday) 大雨

酒店 --> ドルフィンポート前 --> 鹿児島マラソン2017 (Kagoshima Marathon 2017) --> 鹿児島駅 --> Aeon Mall/ AMU Plaza --> レム鹿児島 (阪急阪神第一ホテルグループ)

7:00 am

玩左4日, 終於到了鹿児島馬拉松既大日子... 一早起床吃早餐, 然後出發往會場...

起點就係昨天往櫻島渡輪碼頭經過既 Dolphin Port, 由酒店出發只需步行10-15分鐘就到喇...

[2017 南九州．鹿児島馬拉松] Day 3-4 鹿児島．指宿砂蒸浴

~Day 3~

3/3/2017 (Friday) 晴

酒店 --> 熊本駅 --> (鹿児島縣) 鹿児島 --> 指宿 --> 鹿児島 --> 天文館通 --> レム鹿児島 (阪急阪神第一ホテルグループ)

8:15 am

間房太大, 張床太舒服, 訓到成八點, 先去嘆個靚早餐先 :p

[2017 南九州．鹿児島馬拉松] Day 2 長崎原爆遺址 x 島原溫泉

~Day 2~

2/3/2017 (Thursday) 晴

酒店 --> 平和公園 --> 原爆資料館 --> 中華街 --> 島原溫泉 --> 島原溫泉 南風樓

9:00 am

每次去旅行, 第一晚總係要訓多啲既, 9 點鐘 check out, 把行李放在長崎駅的 locker, 然後去 Starbucks 買早餐...

[2017 南九州．鹿児島馬拉松] Day 1 首次踏足長崎．稻佐山夜景

~Day 1~

1/3/2017 (Wednesday) 香港 --- 晴, 長崎 --- 晴

香港 --> 福岡空港 --> (長崎縣) 長崎 --> 稻佐山夜景 --> アパホテル <長崎駅前>

7:30 am

自上年既十月大阪馬之後, 成4個月冇去過旅行喇, 今日終於出發, 出戰2017年第一隻全馬, 順道暢遊九州既長崎同鹿児島。

8:30 am
乘坐 HK Express UO 1600 航班飛往福岡...

2017 March 日本．鹿児島馬拉松 x 南九州 6 天之旅 - 行程規劃

~日本．鹿児島馬拉松 x 南九州 (長崎、鹿児島) 六天之旅~

日期: 1/3/2017 - 6/3/2017

繼上年10月既大阪馬之後, 連續4個月冇去過旅行喇... 因為身體有啲小毛病, 1月過年時入醫院做了一個手術, 之後要休息冇咩點跑... 直到3月頭, 因為啲假期就爆, 身體又已康復過來, 所以就來一個悠閒既南九州之旅, 兼久休復出, 出戰2017年既頭炮 - 鹿児島馬拉松。

之前與家人已去過一次九州, 只去了福岡、熊本同大分縣, 今次確實係想悠閒啲, 只集中長崎同鹿児島呢兩個縣。為左就番航班時間, 決定福岡入, 然後直接搭巴士去長崎。遊畢日本三大夜景稻左山夜景同原爆遺址後, 去到島原溫泉嘆一嘆。之後經熊本搭新幹線到指宿, 體驗全日本唯一既砂蒸溫泉。從指宿返回鹿児島市, 去看櫻島火山同完成鹿児島馬拉松。最後直接於鹿児島乘飛機回港！

後記
剛做完手術, 今次只想出外抖一抖, 去我最愛既日本, 睇下靚景, 浸下溫泉, 享受美食... 自從去過廣島原爆遺址, 一路都好想去埋長崎呢個, 今次終於黎到喇, 仲睇埋日本三大夜景之一稻左山夜景... 島原溫泉既望海溫泉同指宿既砂蒸溫泉令人真正放鬆... 至於長崎吉宗既茶碗蒸同鹿児島吾愛人既牛肉玉子卷同關東煮又係旅客必要一試的... 靚景、溫泉同美食都齊哂, 仲完成埋2017年既第一隻馬, 呢個旅程簡單得黎又令我好滿足！鹿児島馬拉松係我第五隻馬, 日本第三隻馬, 今次冇準備, 天氣又非常差, 但我亦都成功完走, 以 5:08:28 既成績衝線, 還 PB 了, 我真係好開心, 好滿足呀! 拎住個完賽獎牌, 為呢個鹿児島馬拉松 x 南九州 6 天之旅畫上一個完美句號, 但同時亦都為2017年打開美麗既第一頁！